2016年12月30日 星期五

滴答, 滴答, 滴答, 2016年, 今天就快......

噢.... 大家今年過成點.....?

今年呢, 我是在郁悶中度過, 英國脫歐, 當奴友做老美總統, 我這裡滿地可港人買少見少, 全變成東北人了. 

好像預示著, 來緊的日子, 不再容易過了. 不過, 唔怕, 我儲定彈
藥了, 慢慢同麻煩日子來磨菇菇, 我就唔信我會輸俾佢. 

 可能我在這裡寒冷的地方住得太耐, 現在聽番香港歌, 少了點共嗚, 最近聽到一首落雪的歌, 有少少共嗚咁啦, 可能大家第日不能當我做加燦港燦了, 嗚嗚..... 











2016年12月29日 星期四

人生.... ?

前幾天, 寫了一篇"大智可到彼岸", BLOG友仔的回覆, 又令我想起很多東西來. 

其實, 移民後社會制度不同左, 機遇不同, 但人生最後都是沒有太大分別, 一到人生進境到一個慢下來的地步, 甚至有種不進則退的恐懼時, 其實此岸和彼岸是沒有太大分別.

 到了現在, 想要多10%進步, 以前用10%努力就可以, 現在可能要30%努力吧, 難了很多!

但是, 卻很容易一子錯, 滿盤皆落索. 

我知道, 生活在加拿大, 比在香港舒服些, 工作容易些(因為D人著重生活休閒一些), 不過到最後, 人生進境仍然都是一樣, 沒有太大分別. 天生是虫的, 到了加國也不會變龍, 天生是鳳的, 就算在最窮困最落後的國家, 也都是鳳. 當然, 生活在加國, 衛生和醫療, 都使人長命一點吧!


2016年12月28日 星期三

噢... 譚玉瑛姐姐....

竟然..... 現在唔做兒童節目, 走左去做煮餸節目..... 跌眼鏡呀....

還有更跌眼鏡的, 果個功夫片大奸人李家鼎, 又做埋煮餸節目. 


睇完阿爺鼎揸刀和炒鑊, 我就唔信係佢伯爺教咁簡單, 佢一定係以前做過廚房佬.

現在這個世界興轉型, 世事真係老馮, 只有見路行路, 遇水過河, 遇浪跨海, 遇石爬山...... 人生到此, 請大家在新一年裡, 跟我一樣, 唔好為到不如意事而苦惱, 因為天色不一定常藍, 青山不一定常綠, 人生路唯有照行下去, 不要停呀!



2016年12月26日 星期一

啊..... 我這裡外邊全都是鏡面咁滑.

今天中午仍然風光明麗, 雖然-7C, 但無雨無雪, 本來人人都約哂出街去 BOXING DAY購物. 

我JJ一向都唔係這天購物, 因為仲未減到最低價嘛, 1月中到2月頭, 所有人都莫水來消費時, 那時商家卻要清貨, 才是勁減最勁的日子. 

不過, 今天一到大部份人出哂街係商場時, 就開始係零下7C下, 落起雨來, 一落就落左10個MM雨了, 現在還會落多10MM雨. 即係地下會有近20MM(1吋)的冰. 

 慘呀, 現在外邊好像一塊大冰, 起了鏡面, 十分恐怖, 無論行路或揸車, 都會勁跣呀.

 去左所有好友的網站上, 叫好友不要出外, 又或在外注意安全. 

已經有人報話, 發生左無數單的連環疊埋的意外. 嗚嗚.....

聖誕節後.....

去了唐人街, 才發現火災後的商場和超市, 都已經再開門營業了, 只不過, 人流少了很多. 

超市新老闆為了催谷生意, 竟然喊出一招9折酬賓, 不過, 超市一向利潤微薄, 我俾錢時才知道, 真係唔想要佢D折頭呀.

唉..... 希望新來的超市老闆頂得住, 唔好咁快又摺埋了. 



PS: 係呀, 間超市上手老闆, 一見到我就同我好好傾, 因為只有我這類顧客, 才會同佢買幾十元一盒的香港月盒, 幾元一磅的金桔, 幾元一磅的紫心蕃薯, 不過, 估唔到佢咁快就摺左, 世情世事實在太令人神傷了.

2016年12月24日 星期六

各位聖誕快樂, 來年順利高阩...

















我JJ....., 是否旁門左道?

今天聖誕節前最後一天工作天, 成間公司早半天休息, 好等大家早早去商場買禮物. 

其實, 我跟其他人無乜分別, 都係要去買些禮物, 不過, 我就一早寫定要買乜囉.....

還有, 我唔行商場正門嘛, 一定好很多人迫迫貢嘛, 所以我JJ由商場後門落貨區, 揸架車入去嘛. 

成班同事約好左, 買完野後大家飲杯野才回家, 點知道我買完走出來時, 成班人才入到來門口, 才開始購物.

佢地又唔知道自己想買乜, 等到我飲完杯茶食完個CAKE, 等左班人2粒幾鐘, 都未見班人來會合我, 我就發個輪俾佢地, 才知道班人仲係度同人迫迫貢來俾錢, 我就當然話我眼仔睏, 自己先回家去眠一眠. 

 嗱, 這些人第一句就會話, JJ 咁早到商場, 一定係我早早係公司蛇王出來, 佢地一定唔會估到, 我行條比佢地更快更堅慳時間, 唔洗同人迫的路. 第二, 佢地唔寫低要買D乜, 而我事前做足準備功夫, 在大人群仍未殺到商場前, 我已經買完去嘆茶了.

死唔死呀, 我買完嘆完杯茶後, 佢地仲要捱緊迫來俾錢, 這些人的人生, 就係咁樣虛渡了...... 沒有辦法了.

PS: 所以, 我諗番起以前間唐人教會普遍的人, 他人生也是這樣, 人家比他們更成功, 就誤以為人家旁門左道了, 甚至巧取豪弄, 一D都唔諗下, 佢地自己錯係邊度. 

有時我好心想指條好路佢地行, 誰知這些人牛皮燈籠, 點極都唔明, 還以我有心整鬼佢地. 例如: 以前我教人去投資, 但係個個最後都變左炒咁好鑊氣, 激死我了, 我都無咁好氣. 

就算我真變成宅男, 我都唔會同這些蠢人為伍, 蠢到出汁, 仲係度以為自己高人一等.




2016年12月23日 星期五

為何過氣女星後勁咁凌厲?

嘩..... 嘩..... 嘩.....最近蒲頭左3個過氣女星出來喎, 吓, 不過, 唔係過氣十零年果D, 係廿幾卅年果D. 

首先, 最強勁的係潘迎紫, 好多人都唔會聽過佢名, 因為佢今年71, 佢藝海浮沉時, 我地好多人都未出世, 但係扮到17歲出來見大家喎, 





第二位係58的趙雅芝, 佢好勁呀, 仲咁少女FEEL. 



第三位, 係關之琳, 佢真係唔似5兜野喎.



相比一早已經摺埋多年的青霞曼玉和楚紅, 其中最大的分別, 其實好簡單咖咋, 青霞老公咁醒, 係歐佬又高, 佢公司股價又高時, 將公司買左俾退休基金, 最富有係青霞佢啦! 曼玉手上都有個錢, 唔做驚乜姐? 楚紅雖死左老工, 但環境都唔差. 而關美人前排話佢炒樓時時賺喎, 哈, 令我想起功夫李個老婆荔枝小姐, 炒上海樓炒到要老公幫佢贖身. 另一個趙美人呢, 要為兒子入娛樂圈搭路, 咁, 都要再出來吧, 最後, 潘美人呢...... 照前邊2個的軌道來看, 都估到係錢作怪啦.
 
PS: 我JJ就一向無扮嫩咖, 但上星期同一班中年人討論孔子學說, 我諗我應該係年紀最大果個, 點知我第一次去, 都未出聲, 人人都話我人生經歷淺....... 哈..... 嗱..... 這個呢, 係D人佢地自己老得快咋嘛, 唔關我人生經歷的事, 不過, 我也不好講佢地囉, 唔想俾人打嘛.....  哈哈哈..... 求其我去學到野回來, 理得人家點睇我喎.





2016年12月22日 星期四

冬至後, 同大家看看最美的雪景.

大家在香港, 常常夢想冬天落雪有幾靚, 不過, 對於我這個大半生, 在加國這個苦寒之地生活的人來說, 其實, 我並不覺得落雪過癮果播..... 因為這裡冬天沒有綠葉或花卉, 落雪後就只有灰和白色了, 十分令人情緒低落.

直到我見到, 北非撒哈拉沙漠落雪後的景, 嗱..... 我就覺得一定要同大家分享下了, 直係好鬼靚呀. 

這個堅實好靚, 灰和白中間有一片沙漠的橙色..... 




2016年12月21日 星期三

咦, 這裡時裝, 猛吹中東希臘風

其實, 唔洗咁喎, 我係果D有自己 STYLE 的人, 唔會改變我自己的 STYLE, 所以我係唔會跟風的.










2016年12月19日 星期一

大智可到彼岸? 到最後, 才發現沒有多大分別.

以前, 我家移民, 以為由一個世界, 走到另一個不同的世界, 數十年過後, 才發現, 世界原來並沒有異樣, 就是差不多. 

各位唔信? 看看這兩幅在太平洋兩岸的漁村相片, 一張在香港榕樹澳, 一張在美國近西雅圖的奧林匹克國家公園, 都是差不多而已. 佛謁說: "大智可到彼岸." 不過, 我心裡想, 不知道彼岸和此岸, 又是否相同?



心跳慢

我係D心跳較慢的人, 睡覺時, 會跌到50左右. 

有次有個做護士的朋友, 佢生病了, 又坐左係度成粒鐘, 我同佢聽心跳, 我數到佢60. 其實係好正常的, 很多人坐耐左, 心都係跳慢左(我只有55). 只是佢話我數錯, 佢話佢平時唔會咁低. 

如果我果次真係無數錯的話, 即係佢: 平時休息時心跳都會跳得好快, 即是佢會短命D囉(因為一個心臟跳幾多下, 是有上限的, 就如汽車或機器一樣, 快D跳哂, 就快D蒙主寵召了. ) 第二, 佢果次一定病得好金, 而且佢係好攰. 

咁.... 我平時都心跳咁低, 係咪一定好呢? 今天我跟我做心肺科醫生的親戚講, 我心跳咁低, 佢同我講, 將來如果我有心臟病, 我無得食 BETA BLOCKER 這些藥, 咁我就問佢, 我可以食乜藥, 佢叫我多D祈禱喎, 

嗚..... 嗚..... 嗚..... 咁即係.... 我唔一定比人地長命, 要聽天尤命喎.




2016年12月18日 星期日

好心做壞事.

今天開車行在滿天飛雪的路上, 人們都低著頭看路, 深怕跣倒了. 

當我停在紅綠燈前,前邊有人在拿著罐子, 問經過駕車者要零錢, 初時我還以為是個男人, 但當佢行近一點, 我才發現是個大嬸,而且衣著清潔, 不像專業行乞者.

當然我就要給點錢吧, 大家知道啦, 給錢是一種意向, 一種對眼前人的支持和關懷嘛, 任何中國人當然就不會用上紙鈔. 一個大餅的2元加仔, 就應該足夠了, 我就提手叫佢來我車窗這邊, 並且投了硬幣落佢罐裡, 就有清脆叮一聲嘛!

之後, 個嬸繼續向後走, 竟然忘了我旁邊部車個黑人女人, 原來個黑人女人又係想俾錢, 看看她手中的紙鈔, 竟然係張20皮加仔喎..... 噢..... 橫睇直睇, 個黑人女人都唔似係有錢人喎, 真係好好心地咖.

不過, 我好心做左壞事了, 個大嬸被我叫左埋來, 無睇到旁邊有人想俾佢20皮大鈔喎. 嗚嗚嗚..... 

PS: 黑人呢, 他們大多唔係好計較錢的, 所以很多黑人是貧窮一族, 但是, 一個不有錢的黑人, 忘記了自己並不有錢, 忘記了曾經被人歧視, 忘我地向人伸出援手, 這個是一個美德.

2016年12月13日 星期二

又到下雪時, 我部車又可以玩飄移.

下了小兒科的15CM雪, 都足夠令到交通不便, 因為D雪好濕好跣軚.

大把車在路上擺尾, 我部車就算有冬天雪軚, 都難逃擺尾的命運, 不過, 我苦中作樂, 擺尾就當係玩飄移. 


放油門, 不踩剎車BRAKE, 我只係咁扭軚, 來穩定部車的方向, 和令部車行番直佢嘛. 

我反應好好野咖, 再加上現在大部份車基本配備的ABS(防食死剎車系統), 如果部車跣軚彎左, ABS系統就去剎右後邊個碌, 部車就自然拉番直, 真係要多謝現代科技. 以前90年代無 ABS 時, 我要左扭右扭個軚幾次, 才可以整直部車佢, 現在扭左一次扭右一次, 大多都已經OK了. 

不過, ABS有度唔好, 以前兩邊剎車片大多都係同樣磨蝕的速度, 但現在ABS會自動去剎某塊剎車片多一點, 就會變成一邊蝕快D, 一邊無蝕咁快. 驗查剎車片時, 要4塊片都要睇哂.

2016年12月12日 星期一

老美總統選戰, 仍未塵埃落定!

老美黑仔總統已下令, 對今年總統大選期間所有網路攻擊, 再度進行檢查. 同一天,首都官員說,中央情報局在祕密評估,斷定北極熊有否干預今年的老美大選,協助當奴友當選總統.

這些官員仲講,老美情報機構已查出一些與北極熊政府有關係的人,向維基解密提供, 從民主黨全國委員會+黑林頓老婆的高級顧問等人, 所HACK得的數以千計電郵。

有報導更指,老美政府幾個月來, 一直辯論如何因應北極熊的干預;但總統府班官員擔心公開指控, 北極熊或暗中報復,會導致兩國緊張對立升高,危及老美脆弱的數位基礎設施,並惹上幫黑林頓老婆助選的罵名。

總統府拒絕在投票日前回應北極熊干預老美大選問題,使國會民主黨和黑林頓陣營不滿;民主黨國會議員一再敦促政府公布或提供有關的情報,共和黨則懷疑這些情報的正確性,宣稱其中充滿暗示,缺乏直接證據。

當選總統的當奴友宣稱,現屆政府公布這種消息, 出於政治動機,「那可能是北極熊,也可能是中國,也可能是住在新澤西州的人幹的。」

參院共和黨領袖麥康諾也表明,他將把對北極熊指控, 視為黨派政治運作;不過, 麥康諾的妻子趙小蘭, 後來成為當奴友內定的運輸部長人選。

在大選前幾個月,維基解密接連公布民主黨全國委員會和波德斯塔的機密電郵,損及黑林頓老婆的選情。

投票前一個月,老美情報界宣布,最近一些老美和機構的電郵遭竊和公開,是由北極熊政府指使,企圖干預老美的選舉程序。

中情局上周向參院領袖進行祕密簡報,表示他們從各方獲得愈來愈多情報,明顯顯示北極熊的目標是讓當奴友當選。

例如,老美情報單位查出的那些人並非北極熊政府人員,中間還隔著一層,而老美方面尚未掌握明確情報,顯示著北極熊「指示」這些人把民主黨的電郵交給維基解密。

維基解密創辦人阿桑吉說,那些電郵不是北極熊政府提供的。

面對北極熊干預老美大選的指控愈鬧愈大,總統府9日表示,黑仔總統已下令徹底檢討今年大選期間出現的所有網路攻擊, 把這件事視為重要優先事項,希望在下月20日卸任前完成調查報告, 並儘快公布。

2016年12月11日 星期日

大家估下, 國內政府咁多債, 今次能否一舖還清佢吖嗱?

下年9月起,歐美主要國家+百慕大+BVI+開曼群島+塞舌爾+盧森堡等著名的離岸公司注冊地, 將執行一項叫《金融賬戶涉稅信息自動交換之多變政府間協議》(下稱CRS), 向中國國稅總局, 自動提交有關中國公民及稅務居民, 在這些國或地區內銀行、保險公司、證券公司、基金公司等, 有關的一切資産、投資資料. 所提供信息最遠可追溯至2014年9月。

需要特別注意的是:這部分信息提交給中國稅局是無須通知客戶的。

所有在海外投資或擁有資産, 但仍然持中國護照的人士, 必須萬分謹慎了!!

根據國內私人銀行專家的建議,爲您詳細梳理哪些人將是CRS關注的重點。又將如何應對!

首先,若只是中國公民或僅爲中國稅務居民,資産全部在國內就無需考慮CRS 帶來的影響。

但如果是下列7類人,就必須打起精神,及早做好應對措施!

1、已經取得其他國家永久居留權的中國籍公民, 在加國, 即是移民或留學生, 在加國任何收入, 都要交中國國內的稅, 而且, 加國和中國沒有稅務協議, 即是交了加國稅後, 仍然要交中國稅, 不能用加國已交的稅款, 來抵消要交的中國稅.

只是, 很多移民到海外的中國居民有個習慣,就是不向移居國如實申報全面資産。以加拿大爲例,通常會申報未來想帶入加拿大的資産。對不想帶入加拿大的資産通常不予申報。

但根據CRS協定,移民海外的中國公民在中國境內的隱藏資産將被披露給移居國。一旦發生這種情況,移居國將根據事實和該國法律對移民進行稅務補繳、甚至處以罰金及追究刑事責任。

2、在海外已經配置金融資産的中國籍公民

因爲國籍和常住地都是中國,所以這類人士完全受中國司法管轄。

從技術角度看,如果這部分資産是有問題,而且, 在CRS框架下洗白的難度極大。

3、在海外持有殼公司投資理財的人

中國很多富豪采用了海外殼公司控股境內公司的投資理財辦法。

但在CRS標准下,要求公司實際控制人及公司,兩個層面擁有的金融資産均要披露,利用殼公司的名義避稅幾乎不可能了。

有這殼公司的人真係要研究在CRS標准下,還能不能合理避稅. (噓, 人生原來是場春夢, 今次偷雞唔到蝕渣米了.)

4、在海外存款的中國公務人員、事業單位人員。

這些人的問題幾乎是無解的,即便現在清空資産都沒辦法,因爲CRS要求提供2014年9月1日以來的金融資産訊息。 一旦中國政府認真起來,等待這些人的是巨額財産來源不明罪。

這部分人唯一的希望是中國政府會把追究責任的線, 劃到能逃過一劫的線下。

5、在海外購買大額人壽保單的人

現階段受影響最大的是在香港購買大額壽險的中國公民,還有部分在歐美購買壽險的人。

所有中國公民在海外購買的壽險保單都要披露。同第二類一樣,這部分人需要考慮如何解釋資産的合法性和出境的合法性。

但保單本身的效力通常不會被終止。當事人只需考慮怎樣應對中國政府的調查, 就可以了.

6、在海外設立家族信托的人

CRS規定:已設立的家族信托有關信息也要被披露。

這一條厲害了,國內的私人銀行在過去幾年最喜歡推的, 就是這種家族信托理財産品。

但這一次, 包括家族信托的委托人(即財産授予人)、保護人、受托人(信托機構)、受益人,都在被披露之列。涉及面之廣, 堪稱大炸特炸級別, 噢...... 慘了.當初看起來很美的一個財富傳承設計,很可能變成窩案的高發區域。

7、在境外設立公司從事國際貿易的中國公民。

中國公民在境外設立貿易公司很多是爲了對接國內的貿易公司,通過一些財務技巧以此規避稅款。

但CRS系統是同時同步面向所有國家開放的,信息也是共享的。一個老板的不同公司間進行貿易涉及到境內境外兩部分收入和報稅問題。

PS: 這部分人一要面對個人所得稅在中國的補繳,二要面對境外公司所得稅在中國的補繳,稅率大約爲25%。兩部分成合計將占到境外公司稅務總成本的40%。

今次, 國內無論中央政府還是地方政府債, 可能真係可以迎刃而解了, 咁多人排住隊來俾錢喎.又或者, 美國吸引美企業回流海外資產, 從而推高美匯, 看看中國又會唔會推高人仔的匯價吖嗱?

照我JJ話呢嗄, 都係果句啦...... 同一個世界,不同地方, 同樣要俾稅咖喎”

2016年12月10日 星期六

吓, 震英哥不再連任......

香港突區怪事連連有, 幾年前唐唐被人查家宒, 查到話有潛建, 當時傳媒已經開始剎入唐唐家人的報導中, 這個實在開了一個十分壞的先例. 

老實講, 政客呢, 任何人不喜歡佢政網, 不喜歡佢為人處事, 甚至不喜歡佢將會作政治打壓, 這個只是佢自己一個人的事, 跟佢家人無關. 


不過, 震英哥自己也做錯了, 無必要公開自己女兒的相片, 也應該叫自己女兒不要在網上寫係佢女兒. 

現在震英哥女兒入院, 被大眾作為閒餘的話題, 這個真不知道我要同情佢女兒, 還是...... 

算了吧, 我諗, 佢唔連任, 都唔關佢女兒事, 佢只需要講係佢家庭需要佢.....

2016年12月9日 星期五

又到情緒低落時

今天送了父母親去機場, 目送了他們去辦登機的一切手續.

我自己就要面對獨個人生活幾個月的冬天了. 

無錯, 這個是情緒低落開始時了, 就像每年的流感季節一樣了.

2016年12月8日 星期四

首次明白回教家庭係甚麼回事!

我自己是個十分開放, 十分包容別人的人, 而且總會在人家需要幫忙時, 做點綿力.

不過, 因為最近一件事, 我自己對回教就沒有什麼好感. 

最近去超市買水果, 因為超市給客人的塑膠載濕袋, 在雙手乾燥的皮膚下, 難以打開原本封密來的塑膠載濕袋. 一個在我旁邊買茄蕃的中東女人, 就自言自語般講話好難打開.

我一聽佢咁講, 就好心去示範一次用口吹開個袋佢, 後來更同個女人爹左幾句. 

不過, 就有個中東佬, 我估係佢老公, 就走來用佢地中東話大罵個女人.


嘩..... 洗唔洗咁呀? 是的, 可能佢老婆跟人爹兩句, 係佢家鄉係不榮譽, 要將佢老婆包到全身陷一陷, 得兩隻眼露出來. 之不過, 這裡是加拿大, 是個世俗非宗教國家, 我只係想幫幫佢老婆, 令到佢老婆係加國生活得容易一D咋, 跟本就對中東大肥婆小肥婆無興趣.


 PS: 哈, 好多年前, 有個這裡土生土長的竹昇妹, 一睇佢個樣, 就知道佢反叛成性, 佢父母阿哥叫佢唔好向西, 佢一定要向西, 之後, 聽佢個阿哥講, 佢要嫁個回教佬. 之後佢阿哥都無再講過佢, 我想, 可能佢走左佬唔好俾佢回教老公找到, 一係就俾佢個回教老公教訓得貼貼服服, 不過, 佢父母現在都幫佢唔到了. 




2016年12月7日 星期三

原來人在希望幻滅時, 是會這樣失意的.

我自己並不八掛多事之輩, 只是記憶可能比平常人好一點, 見過的人, 大多在見到時, 一時三克記不起, 但之後就會記起.

昨天去老麥記食包包, 見到一個國內來的中年女性, 一個人坐空枱唔食野, 係度發藕豆, 個藕豆發得令人覺得佢有些好悲傷的事, 佢係有幾分面善, 一時三刻記不起係邊度見過佢.

老實講, 見到人家在老麥記內發愁呢, 而且三九唔識七, 而且又唔記得佢係乜人, 就唔好埋去了, 就算覺得人家需要幫忙, 始終對方是個女性, 就不要走埋去了.

我偷偷地回望佢, 原來佢一直在盯著我. 可能佢係我這裡某團體相片上見過我吧! 不過, 始終我對她來說, 是個陌生人, 我就不會主動去交談. 之後佢喊左出來, 就走了.
  今天我突然想起了她, 她是我這裡唐人街火災後關門那商場內, 在那蘭州拉麵店內工作. 只是老闆旳店關了門, 員工應該還可以去找過另一份工作. 後來我才想起, 很多這裡國內人開的舖頭, 大多都是一群投資移民開的, 內裡很工作人員, 雖然穿著員工制服, 但卻是股東來的. 

我才明白到, 原來這些舖頭這些人的生意, 是一群投資移民家庭的未來希望, 也是他們家庭的生計. 現在商場火災關了門, 生意停頓, 保險賠物業損失而不全賠經營損失, 這中年女人失意了, 百感而生. 

唉..... 見佢仍舊穿著著國內買的衣服, 又遭逢如此挫折, 我真覺得, 這個聖誕節新年, 很多人卻在為生活為家庭而爭扎呢!

2016年12月5日 星期一

這裡是什麼地方? 3

TIPS呢! 這裡不是香港, 但跟香港一水之隔, 而且這裡好容易去, 一出地鐵站就見到咁樣的景. 


2016年12月4日 星期日

勿以善少而不為

今次回港, 飛機上坐在我隔離的, 都係會廣東話的中國夫妻, 回港那程是對年老夫妻, 離港那程是對年青渡蜜月夫妻. 

對人友善不冷莫, 這個都是我做人處事之本, 所以, 人家老夫妻言語不通行動不便, 人家蜜月夫妻初次出遠門, 我都盡點綿力, 幫幫一點. 

讓廁所給老人家去, 不讓他們在癲波的航機上站得太久而生意外; 見到初次出門的年輕夫妻, 在冰涼機倉內衣衫單薄, 因而不停咳嗽, 我就給了他們一包的未開封過的喉糖.

人與人之間是互動的, 表逹一個善意, 善意就會在彼此發酵了. 老夫妻們給了我, 他們吃不下的飛餐, 那程機又長, D餐份量又少. 那對年青夫妻在我昏昏大睡, 遇上派餐, 他們用他們原本已經狹少的空位, 幫我預留那份餐. 


曾經有些人對我說, 他們沒有我幸運.... 只是我發現在我跟他們相處中, 我所釋出的善意, 他們從沒有看到, 又或他們視作理所當然, 甚至覺得全世界都欠了他們. 


這個當然了, 我和這些人的人生, 實在一定離天萬丈遠, 我人生一定比這些人幸福很多, 最少, 我的幸福感覺指數, 比這些人高千倍萬倍. 

我在那裡遇得最多這類人? 就是在唐人教會裡的第二代移民吧! 尤其那些跟隨父母來做投資移民的, 移民來到, 家裡一切情況發生巨變, 富裕變足襟見肘. 只是我家不也是嗎? 我爸爸投資的房地產不是都蝕錢嗎? 我不是要勸止他而父子關係差嗎?家裡不是要緊縮開支嗎? 不過, 我從沒有覺得別人欠了我, 我只知道, 世事原本就多艱難, 只有迎艱而上, 只有對生命人生滿懷善意, 人生才會好起上.




2016年12月3日 星期六

近年尾, 又到慈善機構來慕捐了

年尾捐錢, 一來把握最後扣稅機會, 一來又可以幫助慈善機構達成那一年的善款目標. 


只是今年可能我這裡經濟特別差, 差到大把人當街問人攞錢. 所以我電郵信箱裡, 一天總少不了幾封的慕捐信.



尤其, 那些我上年捐過錢的, 就老馮咁SEND 來慕捐. 



其實, 身處在一個經濟不景的地方, 就算自己經濟無問題, 也都會感到情緒低落.

2016年12月2日 星期五

我真係唔知道, 要多謝當奴友呀? 還是笑佢政治黑暗呀?

今天在老麥記食魚柳飽時, 睇到CNN講當奴友係CARRIER 廠裡發表演講, 佢竟然講, 係佢令到CARRIER 唔搬廠, 所以廠裡2000個員工唔洗食無情雞炒飯. 

不過, 其實佢咁著緊, 走出來親自上下其手, 原因係..... 這廠係係佢副手做州長那個州, 現在美國聯邦政府, 因為唔搬廠, 就俾稅務優惠間廠, 間接即係揼錢落去當奴友在那地方上的支持者吧. 佢並且明言, 如果搬廠, CARRIER 母公司 JOHNSON CONTROL 係聯邦手上的合約, 就會打柴咁話喎. 

美國政治實在好黑暗, 明明根本就係政治酬庸, 就講成義正詞嚴的保護當地勞工. 其實, 美國這十幾年來, 唔見左咁多工作崗位, 大部份不是因為去左美國國外(如中國), 而是因為自動化和機械人的使用. 就以我自己為例, 去銀行已經唔需要找職員, 只需要部櫃員機+自己個電腦和電話, 咁就得了. 去老麥記食包包時, 都係一樣, 用機, 用信用咭. 

最謊謬的, CARRIER母公司 JOHNSON CONTROL, 這幾年來不斷提升自動化的生產程序, 帶頭成為自動化的先驅者, 甚至出去幫別間公司和政府機構提升自動化, 減省成本. 我作為 JOHNSON CONTROL 的股票投資者, 我實在要多謝當奴友揼錢落我個袋. 但當我見到 CARRIER 廠裡的工人, 以為當奴友係救世者, 我就真係笑左出來, 心想, 這些人將來被人一腳踼開時, 真係唔好喊了, 要怪就得怪佢地唔靠自己, 下下都靠D政客政棍, 來爭取原本不屬於佢地的東西. 

2016年12月1日 星期四

多人, 氣氛好呀

今年回香港, 旺角雖然仍有自由行, 但已經少左好多, 最少, 半條街都係可以行到. 

看看滿地可, D人迫滿街, 又真係少見呀. 感覺好好. 



 

2016年11月30日 星期三

這裡是什麼地方? 2

又俾大家估下這裡係香港邊處......

俾個提示, 這裡唔係郊區, 係現在發展得如火如荼的那區裡, 其中一座己建好的大型建築物. 

我見那裡風景環境咁正, 我就去多口問過當地做實Q個阿嬸, 那裡的實Q仲請緊人, 而且急要人來用咖.

阿嬸仲俾TIPS我, 那裡管理層喜歡請俊男美女來做野. 以家陣最低工資33元來計, 日日行行企企, 工作那裡又有咁正的風景, 又如果其他實Q都係美女, 而唔係大嬸(嘩哈哈.... ), 嘩, 簡直係筍工一份呀!

2016年11月28日 星期一

這裡是什麼地方?

哈哈哈..... 大家老香港, 嗱嗱嗱.... 我JJ 回港短時間, 到過香港很多靚地方, 不知道大家能否認出我JJ的腳踪?


可能大家會話我, 車, JJ, 你囉外國D相來呃人咖喎, 不過, 如果大家眼利, 圖中車輛上的車牌, 係香港牌來咖. 



2016年11月27日 星期日

移民真是會迎上更幸福的生活嗎?

今天出唐人街理髪, 順路去拿個月曆, 只是, 才發現唐人街十分冷清, 行去唐人街最大的商場裡看看, 竟然因為商場旁的古老舊大屋燒毀, 連帶波及商場, 商場都關門了. 不知道何時才開番.

不過, 商場雖然一向生意不好, 但總養活了幾間餐館的員工, 一間保健品店, 一間書店, 一間報灘, 十數舖位店內老闆每天的世藝, 和吸引如我般的人流到唐人街, 不過, 火燒了後, 像我這些人流, 就少了去唐人街. 尤其, 今年出唐人街的高速公路大修, 就更令我等少了去唐人街. 


今天去餐館吃午飯, 中午12時了, 還連1/3都沒有坐位滿, 不用搭枱. 臨走時跟待應哥哥說聲拜拜, 可能他以為我要跟他道別, 以後少來唐人街, 就不開心起來..... 

有時, 自己覺得, 加國政府收緊移民審批, 不能讓人們移民後, 變成最低工資的勞工. 這個可能又未必是壞事, 最少, 移民應該是奔往一個更美好的生活吧!


2016年11月26日 星期六

為何忘不了香港?

因為天氣實在太好了, 每天廿幾度, 日日可以出街行, 日日有汗水出,  行過路過, 就有我喜歡想買的東西. 頂多都係要行去深水涉黃金鴨寮街去朝聖電子產品. 

黃金鴨寮街, 基隆街D布料杻杏扣衣帶, 南昌街的衣服, 桂林街的豬腸粉, 北河街的芝麻起巻, 福華街的玩具, 林林種種, 每天行得看得十分開心. 還有間野叫執笠倉, 好多過癮野買. 

 相比加國這邊, 商品的選擇都好少好寡, 又無乜人爭住來買.



2016年11月25日 星期五

又到敗家時

哈哈哈, 我這裡美國感恩節後的黑色星期五嘛, 商家用大減價來去貨清貨嘛.

咁..... 我都忍左手成2年, 一直都想買部航拍回來, 香港好一點的, 都要2-3千, 我這裡有這個呢, 可以傳埋機上的影像回來睇, 仲有3舊電送埋, 原價1200, 勁減了800, 現在400加仔, 等如港紙2千7左右, 我都好開心, 現在叉電, 等著有時間就出去試飛了. 只係睇影像的那個TABLET 唔包, 要用自己部.


不過, 今天天氣都好凍, 但唔大風, 可以安全試機了. 

PS: 一直在懷疑我以前間唐人教會班人, 有看我這裡的文, 不過, 攞400元或以上出來慰勞自己, 佢地教會大把人時時咁做, 都唔應該來PIN POINT 我嘛.







2016年11月24日 星期四

當奴友有難了

剛剛睇到新聞, 話說黑林頓老婆要求在一些遙擺州份裡重新點票, 因為在這些州份裡, 寫紙仔投票和用電子機投的票, 佢得的票相差實在太大了, 懷疑用電子機投的票, 俾人黑左喎. 


其實, 就算唔點票, 黑林頓老婆都係得票最多, 但因為投佢票的人分佈比較集中係某些地區, 而這些地區的選舉人票加埋起來, 就唔夠當奴友咁多. 


不過, 如果真係重點, 而又證明被人黑左, 這個就真係好野, 無論對當奴友或黑林頓老婆, 都好似周猩猩話齋, 人生大起大落, 一個由總統變回平民伯姓, 一個飛上枝頭變鳳凰.

2016年11月23日 星期三

物價越高, 消費得越開心

真係唔知點解, 

香港一切物價都高, 高得幾驚人咖, 但我洗錢洗得好開心, 唔知道係咪要排隊俾錢, 人人都好似趕住洗錢咁, 令我有種快感. 買格仔餅, 買墨魚餅, 買豆腐花, 買老水, 買冰茶....


相反, 回到來加國滿地可, 各處都一片冷清清的感覺, 商場無乜人, 俾錢不用排太大長龍隊, 很多東西未到聖誕節購日, 就已經標示減價了. 就連唐人街間雪榚檔都因為秋冬而關門了.


尤其, 係加國見到人們一片他他條條, 一片無所謂, 一片唔願做唔願捱, 一片寂靜無聲, 一片令人窒礙的感覺. 

 

2016年11月22日 星期二

回來加國已多天, 仍忘不了香港的一切

對我來說, 香港最大的難題是太熱太容易受感染.

搭電車遊河, 由西環去到筲箕灣, 坐在車頭. 那天回家一清潔面上, 竟抹了一層灰下來, 第二天鼻哥有黃色鼻涕流下, 不舒服了3天才好回來. 差點要找抗生素來吃.


2016年11月21日 星期一

尷尬 SHOPPING

其實呢, 真係唔知道點解D人會咁賣野法......

嗱, 我JJ 思想一向好開通, 要賣女人性感內衣褲呢, 就..... 我唔反對咖喎,

只不過令我有個咁尷尬的遭遇呢, 唔知係咪要怪我做人唔小心魯莽, 還是要怪間店大整古.

話說有天我JJ 行街街, 見到有好平的睡衣褲賣, $6元加仔, 全綿厚身,揀左2條, 我著起幾有男性力呀!








咁.... 我盲頭烏蠅咁入左去俾錢. 只係俾錢時, 才發現, 為何週圍好唔對路喎, 初先係一班女人係我前後龍頭和龍尾, 再睇睇呢, 竟然有女人睡衣賣, 其實都OK啦, 睡衣嘛, 人人都要著啦, 


點知再望向別一方向,竟然....有賣好性感的女人......


 才知道今次奶野了, 間店個名咁SEXY, 哈.... 再睇睇前後方排隊俾錢D女人, 個個都攞住好鮮色好性感的奶蓋和內褲, 後來問收銀個女仔(又係著得懶性感, 還把鮮色奶蓋著係T恤之外), 才知道佢地公司最近開埋男性睡衣系列, 等果D陪老婆SHOPPING 的男人, 唔洗係店外等.

我差唔多暈係度, 天呀, 天呀...... 為何要我落得如斯田地? 噢...... 實在太過份了.

我以後一定要認住佢....... 妖..... 生意做到咁唔顧及客仔的感受, 正XXXXX.....#$*%()#*%%)#)@)*%)$)#((%#*^&(!)@)




















2016年11月20日 星期日

聽打交的遊行團

以前, 大陸時時有零團費香港團, 現在我這裡卻有99加仔的大陸團. 

嘩..... 唔係瓜嘛? 不能想像內裡會有D乜喎? 仲敢講話唔會強迫購物, 但離團每一天, 就要罸1百加仔.

記起以前1999年, 我係香港報大陸團, 團費$2000港元, 但帶購物時間仲多過去景點. D團友已經怨聲載道, 人人都講, 忍完這幾天, 下次就唔好幫襯大陸團.

現在搭廿個鐘機回去上海參加團,  再加上點會有好野食? 食宿唔好, D人點會唔燥火?

不過, 最嚇人的, 竟然有99 加元的15天神州大地團, 由上海殺到去重慶, 15天團在巴士裡頭, 日日被佢帶去購物點, D奪命凡音, D人唔好老脾上來, 就真係會.......

2016年11月19日 星期六

中國地方政府財政和中國樓市

原來, 竟然有咁多個省係好依賴賣地收入咖. 

啡色 - 40%以下

淺黃色 - 40-60%

淺綠色 - 60-80%

 深綠色 - 80-100%

中國一唔賣地, 就會點, 一定係各路諸侯亂動不安了, 多少人下崗, 多少人飯碗不保?


 深上港廣四大一線城市還好, 廣東江蘇浙江也還好, 一出京津, 一出廣東, 一出江浙, 就會有問題了.


2016年11月17日 星期四

90年代的高科技, 到2016年.....

以前幾千蚊咖, 現在我買$80, 原價$200.


不過, TONER 粉要自己買, 正奸商,引人買左先,才擋你買TONER粉.


2016年11月16日 星期三

舖租市場仍然好差呀.

真想不到多倫多溫哥華為何可以炒到咁高樓價.

商業舖租市場, 全加都係咁淡靜, 唉..... 度度都關門摺埋


2016年11月15日 星期二

如果做人有耐性

我好多朋友同我講, 他們任性, 任性而為, 喜歡怎樣就怎樣, 不過, 任性之餘, 如果可以等下, 情況會好很多, 最少慳錢呀.

 $75變$29..... 名牌來的, 款就差少少, 舊少少. 但一樣咁正.


2016年11月14日 星期一

生活原是一個選擇

為何, 昨天講加國夏天蕃茄好平, 不過, 如果要食一些特色的唐人菜, 就要俾價錢了.

 很多華人來到加國, 抱怨生活艱難, 但係, 如果一定要咁食法生活法, 就無法了, 一定係又貴又唔好又艱難了.


2016年11月13日 星期日

美好的夏天

不愁衣食, 估下這包蕃茄幾錢?

是呀, 是1元加仔..... 有3-4磅咁重, 但係要快快食左佢, 我用底下果D來做茄醬. 


2016年11月12日 星期六

我這裡夏天的 ALOHA

我這裡夏天D商家買野, 好講引起顧客心中的購物慾, 買沙灘用品,
泳衣時, 不忘擺設一些人們出外遊玩的用品.


紫色單車上, 再加個藍, 不過, 係用來放熱帶植物.... ALOHA






2016年11月11日 星期五

加國歸僑, 不再值錢了.

中國總理官式訪問加拿大, 其實係唔關我地D 加燦事咖嘛, 而且佢只訪問渥太華和滿地可, 但偏偏有人由溫哥華, 搭5個鐘機來聽佢演講喎.

加拿大的華人媒體報道說,大溫哥華的華人社區至少有 1百多人將前來滿地可參加相關活動,包括大溫中華會館主席、大中華文化中心主席、中僑互助會的行政總裁、全加華人聯會全國執行主席、加拿大華人聯合總會主席等人。

可以看出, 這些華人機構, 跟中國政府人員, 關係並不淺薄...... 百多個人, 人人都好似要報到咁, 山長水遠來到我這裡, 做到出哂面咁呀. 這個令到我這等加燦面上無光, 攪到無哂FACE 喎, 我地D加燦, 衣食無憂, 洗乜去巴結人呀?


有時, 我自己在想, 中國國力強大了, 但有些動作可免則免, 尤其給人家瓜田李下的感覺, 就不好了. 常常聽到有網上傳聞, 話說中領館出錢資助很多某些海外華人組織或會社. 這個對任何海外華人來說, 都會引起身份和國籍的尷尬.