2018年6月23日 星期六

投資信念被沖擊了, 不過, 我有著強烈信念

前幾天, 美國"兜兜30"指數裡成分股中的通用電力(GE), 被人由兜兜指數中除名.

其實照正咁講呢, GE 是原本最先兜兜30的成份股來咖, 也是最後一間仍在成份股名單上的公司, 是二次工業革命名人愛迪生創辦(第一次工業革命當然是發明蒸氣機的瓦特, 至於第三次工業革命頭馬呢? 現在仲未有人敢講係邊個, 我JJ估呢, 再過多20年之後, 就會有人行出來講話係標叔叔或蘋果佬了). 今次GE被 兜兜除名, 正好說出, 二次工業革命差不多淡出當代世界舞台了.

大家會問, 咁, 件事對你JJ有乜沖擊先? 嗱嗱嗱..... 我JJ一向叫人買股好似娶老婆咁, 唔單只要曾經擁有, 更加要天長地久吖嘛! 有朋友就來問我, 大佬你D天長地久理論唔岩喎, 應該係大難臨頭各自飛吖嘛!

哈哈哈...... 咁.... 我會咁答囉: "大哥, 人生一世, 有如草木一春, 莫說間公司D股票會有日跌價或營利大不如前, 老婆或老公都會有天皺皮啦, 身材大變. 不過, 老公老婆這家野, 同對方共渡咁耐的美好時光, 乜都抵番啦!, 點可以話走人就走人咖?" 

係咖, 我揸左GE係手咁耐, 淨係收股息都抵啦, 而且, 現在個價雖然跌到7個1皮咁, 我都無蝕錢喎, 點可以講話股票唔可以長揸, 而且, 我仲想襯低吸吸佢喎. 

其實, 以GE現在D業務咁計呢, 佢有好多頂尖的產業, 橫跨入去第三次工業革命呢! 只要佢 SPLIT  左其中一D業務出來, 分折成幾間公司, 個股價就會升升升...... 當然股神由佢個倉裡清洒GE出來, 實際理由係美國政府唔會俾GE分析開來, 不過, 一到美國政府改口風俾GE分析, 相信大把人會再入貨.

 所以, 價值投資呢, 買股天長地久呢, 仍然係至理明言, 不會錯的, 尤其現在天下大勢風雨飄搖, 總要西瓜靠邊大, 樹大好擋風喎, 而且佢D生意仍然係長有長做長賺錢咖, 有錢賺, 理得佢係咪兜兜成份股, 總不要被世間虛名所誤導. 

都係歌裡果D對白講得岩喎..... "那用爭世上浮名, 世事似水去難料!" 

 


2018年6月18日 星期一

我這邊的巴士地鐵有幾污濁?

呵呵呵, 真係好污濁咖, 尤其現在公交局員工擺工, 只維持基本服務, 即是清潔果班大帝就唔多願旭來開工了.

昨天搭地鐵去遊樂場玩, 嘩, 地鐵一來到, 見到D玻璃窗上D塵呢, 令我想起非洲D火車呀, 千年陳漬喎. 

好了, 如果這邊D公交再係咁污濁, 我就唔再搭了, 自己揸車無咁嬲LU.

PS: 現在我朋友D仔女快畢業, 搵工好難呀, 就算搵到, 大多都無乜 CAREER PATH 甚至 JOB SECURITY 都無, 我一向都叫佢地要多D帶兒女出外四處走走, 就算將來兒女要離家去遠方打工, 都不會挪手不成勢嘛. 

其實我心裡覺得, 加拿大無左北美自由協貿, 加國年青人的前境差左好多, 畢業後在加國搵食, 前境比以前差左一大截. 現在真係要諗諗回流了, 以前還可以找到份工, 現在更不容易了.


2018年6月17日 星期日

終於明白, 我這裡的人點解咁鐘意著到黑紋紋.

哈哈哈, 大家有無記得? 我以前成日講, 我這裡D人好興著深色衫褲咖喎, 其實, 我自己都唔係一定喜歡著鮮色衫的, 不過, 我唔喜歡同別人做同一樣的事, 如果真係要我跟從別人, 我就要有相當充份的原因了.

其實, 我一直都係揸車咖嘛, 回港時呢就梗係搭巴士地鐵啦, 不過香港地鐵巴士, 你真係唔讚下佢地唔得果喎, 相比我這裡, 嗚嗚嗚, 我最近唔洗再返工了, 唔撈了, 退休了, 諗住優哉閑哉咁, 有人車我四圍去, 就上左條賊船, 走鬼左去搭巴士地鐵, 點知..... 我D靚靚鮮色衫褲就一撻撻了, 慘呀! 

係囉, 現在我才明白點解D人要著到黑紋紋啦, 皆因為佢地搭巴士地鐵, 又或上班地方, 沒有我上班果度咁乾淨啊!

 嗱..... 理解事情呢, 舉一反三喎, 咁, 即係D人見到我著鮮色衫, 就已經知道我係揸車唔搭巴士地鐵啦, 上班果D地方係好乾淨, 即係我佢地明明一睇就知道我環境不會太差. 

都係..... 我以前成日都覺得眾生平等, 而累事, 這點.... 我咁耐都觀察唔到. 

PS: 其實, 我以前去唐人教會, 見到D人死充爛充, 我一貫的眾生平等觀念去看, 我都只覺得D人有點無聊, 就沒有深入諗點解D人要咁做. 現在才明白了, 著深色的名牌, 是因為沒有選擇下, 要著深色衫褲, 但為求不被人輕看, 就點都要買名牌了, 諷刺的是, 細碼鮮色名牌係最靚的, 但往往都是細碼鮮色名牌賣唔去, 往往要減價, 等著我這種人去買. 

為何D人係唐人教會唔想被人輕看, 要頓起個款? 我到最近才明白了, 原來當中全都是人性, 沒有任何宗教的位置在其中 - 不想被人來胡混, 來指指點點. 越是入教會真正慕道的人, 越是謙虛有禮, 越是容讓別人犯錯, 越是給人胡混得慘, 越是給人來指指點點, 越是成為別人的箭靶. 

對於我這些不會入教會來指望別人好處的人, 如果不是信神, 入教會來何用呢? 如果這些教會不能為別人提供敬拜神的地方, 這些教會有何原因來生存呢? 我又為何要出錢支持這些無謂人和教會呢? 

到最後, 我一定會原諒他們的, 好讓這些事, 在我人生中終結了. 因為他們今天的困局, 再多1-2百個我20年前愛心的人, 我今天財力的人, 也幫不到他們, 既然, 無可救藥了, 返魂無術, 就由得他們去吧!






2018年6月12日 星期二

退休後呢......

噢...... 其實, 我真係發現一件事喎, 就係我變得十分不情願去跟人交談了.

點解呢, 以前無法, 一定要同人講野, 現在就可以做獨家幫, 唔洗理人, 又唔洗人知道我做緊D乜!

最尷尬一次, 我去社區中心找社工傾下我怎去幫我媽的年老問題, 咁個社工就叫我要預留將來時間去照顧我媽, 即是叫我準備將來要半退休啦. 

咁, 我當時都無想過, 就衝口而出, 話我已經退休了, 社工一見我成個小朋友咁款, 就來話, 你咁年青, 唔好下下講退, 你媽的老年問題, 都是將來的事, 後來我才講我的年紀, 佢半信半疑..... 

哈哈哈, 係咖, 我一向俾人話我係老頑童, 可能患左"天山童姥綜合候群症", 咁, 我係唔想咖, 只是同年的人一見到我, 可能真係唔好開心咖, 有些人更想來揼我, 總之D人就諸多來留難我, 所以我現在退休後, 變得十分不想跟人交談.

好吧! 網上社交吧, 你們看不到我面貌, 哈哈哈, 就會不一樣了. 我會多D來探大家的.








2018年6月8日 星期五

買保險股呢?

這幾年, 我屋企和車的保險費貴左好多, 上年加左我~20%喎.

咁, 其實, 我又從來沒有要保險公司賠錢咖, 咁, 即係保險公司無賺之餘, 還有多左好多客仔成日要佢賠錢.

嗱, 我JJ就搵左別外一間保險公司, 不過好似查家宅咁, 查埋我信貸記錄, 查埋我婚姻/良民/租約/信用咭按時付款紀錄, 查埋我間屋有無私自改動.

好啦, 出來個價, 就平左40%了. 即係我3年前個價喎.

所以, 買保險股呢, 大家都要做做市場調查囉, 唔係隻隻都有錢賺, 有生意做, 現在競爭太激烈了.

不過, 個D保險公司有我這類客仔, 而又識得KEEP住的, 就一定有錢賺的.

我比較喜歡個D做人壽或醫保的保險股, 因為客仔都係有閒花錢, 花錢來買安心, 就一定唔會亂來, 間這些保險公司就賺硬了.

其實, 保險公司客仔唔會亂來, 係因為沒有天性條件來亂來, 因為信貸背後, 預視著一個人的行為和想法. 那些人年青時碌爆咭, 信貸唔好, 就會預視著D人在任何事上, 都會亂來, 都會不按常理去做人做事. 這些人日後怎樣掩飾, 都沒有用, 銅油瓶始終都會裝銅油的, 三歲定80..... 無得講, 就係咁簡單.

PS: 我現在深明一個道理, 一間公司, 一個慈善組織, 一個宗教團體, 都是一樣道理, 不按常理去辦事做人, 就一定無運行. 虛情假意, 或炫目耀眼粉飾背後, 必定是日後滅絕的根由.

2018年6月7日 星期四

胸圍戰爭

噢...... 大家唔好想入菲菲啊, 這個不會有任何色情成份的BLOG文, 我只係度討論我這裡近日發生的時事咋喎.

嗱..... 怪唔得我這裡魁北克省被形容為保守的國度, 因為2-3百年來一直受天主教會的影響播, 不單係北美洲最後取消黑奴或地主農奴制度的地區, 而且還有很多法規呢, 一直沿用到今天, 係十分保守咖喎.

咁, 最近先知道, 原來這裡有條法例呢, 要上學的每一位女學生, 硬性規定一定要戴胸圍喎, 如果唔戴, 就無得上堂. 

條法例原來一直係度2-3百年了, 一直都無人提出來修改, 又或者最近這幾十年, 都無人咁戇居來執行吧! 

最近有洋女發現這條法例的存在, 就有洋女要推翻佢啦.

為何最近幾十年無執行過呢? 因為以前D學校係由天主教會包辦吖嘛, 咁男校還男校, 女校還女校嘛, 執行檢查果個係修女嘛, 嗱, 咁就無問題啦..... 舊時可以隨時可以查找不足嘛, 同規定男學生要著襪著上衣上堂, 同樣可以容易執行嘛.

不過, 我JJ有個問題囉! 其實, 女學生戴唔戴 BAR 都唔容易睇到啫, 除非我這裡夏天30度著薄衫囉, 其實, 係咪應該交番俾女性自己決定呢? 

尤其, 現在社會物質環境咁好, 在胸圍以外, 還有好多選擇喎, 照我所知(大家咪當我盲毛一個, 其實我係好了解女性的), 有些貼身衣, 十分透汗和通爽, 但又不會顯現2點出來咖嘛. 

好了, 2-3百年前的封塵法例, 家陣俾這裡一眾洋女來喊打喊殺, 係囉, 咪咁梁炳啦, 快D叫一眾洋女簽名聯署, 來廢除佢啦. 

就算真係有日咁益我, 有意或無意之間俾我昅到野, 我都要用碌柚葉煲水來洗眼呀, 免得我生眼挑針, 都無好野帶協呀. 

PS: 其實, 我係加國這裡, 都唔知睇到幾多次了, 都好尷尬咖喎, 我一定擰歪塊面唔睇. 道理就等如, 百貨公司厠所必經通道上, 如果一定要經過女性性感內衣褲果個部門, 我寧願唔去廁所了, 免得被人心裡懷疑瓜田李下嘛, 免得被人心裡罵著色情狂. 

好了, 女權是好的, 但請不要濫用, 又唔好諗住要男性出洋相, 又或惡意來中傷男性, 這個沒有必要, 損人不利己, 有空閒時間時, 倒不如多諗計去賺水, 或出去玩下開心下, 不過, 自由社會諷刺的是, 有些女人就係咁..... 




2018年6月3日 星期日

臭味相投

有次, 我在香港某會所卡位食晏仔, 坐係我後邊班女人係度講緊佢地男友, 唔為意俾我聽到哂喎. 第一個講佢男友電腦裡收埋左幾TB 的咸相和視頻; 第二個講佢男友係打機狂, D遊戲仲係打到血肉淋漓果種; 第三個呢, 就講佢男友又打暴力GAME又收埋好多成人視頻. 

其實, 我本來都係水過鴨背, 唔會留係心上, 只是班女人咁樣講出來, 就唔係為到認叻, 可能係係度啿苦水, 而係都幾接受現實喎,

哈哈哈, 可能係新時代女性, 跟我以前年代D女性, 真係好大分別喎. 以前年代D女性, 好少講自己男友, 一是怕自己無面, 一是怕自己男友俾人搶左去. 

我JJ身為男性一份子呢, 真係好想走埋去同佢地分析下咖喎, 只是我知道, 到最後, 佢地一定會叫我慳D啦!

嗱.... 嗱.... 嗱.... 如果要我JJ行出來品評以上三種男性呢, 我會.... 哈哈哈.....

1. 男人電腦裡收埋左幾TB 的咸相和視頻, 都不是太差呢, 最少他不是GAY嘛, 更有可能, 佢只係唯美主義者, 欣賞著世間美好的一面, 既然有美感, 這人都不會太差, 都不會做出任何傷害別人的事出來, 做這些人的女朋友或老婆, 都不會太慘, 頂多係驚住男友老公會拿別的女人, 跟自己來比較囉.

2. 喜歡打暴力GAME的男人呢? 不要誤以為這是男性心理上是在保護女友或老婆, 這些人天生就有支配慾, 但因為無能力控制現實一切, 就在打機埋來發洩吧! 喜歡打暴力GAME的男人, 尤為危險, 潛在裡有一種破壞的慾望, 隨時會有家暴發生的可能.

3. 喜歡又打暴力GAME又收埋好多成人視頻的男人呢? 我有點擔心, 這些男性看的成人視頻, 是一些十分重口味的視頻, 甚至是虐待狂或戀童癖, 因為支配慾, 加上破壞的慾念, 再加上情慾, 這些男人是最危險的.

大家可能會問, 為何這些女人會這樣說出來, 不怕男友被人看不起嗎? 我想了好耐, 後來我終於明白了 - 臭味相投. 女性如果不太深入認識自己男友老公, 一切都是估估下, 所以拿出來同其他女人講. 現在這些女性, 實在太了解佢地D男友, 而且深覺自己同佢男友有點臭味相投. 即是, 這些女人如果係男人時, 都會同男友一模一樣, 同一種人. 

這個也是好事, 現代女性不單只可以接受男性陰暗的一面, 而且還可以接受自己女性陰暗的一面. 不像以前世代我見的女性一般, 她們不了解男性, 也不了解自己女性, 更不了解人性.

PS: 大家可能會問, 我JJ點解成日可以聽到香港D人講野, 乜加國D人講野, 我聽唔到咖咩? 哈哈哈...... 我最近發現一件事, 就係我JJ隻耳仔, 原來細時係香港長大, 聽慣了廣東話的音頻, 可能英文的音頻還會好一點, 對方講野細聲D, 我都聽到, 但煲冬瓜和法蘭西話, 我就唔掂了, 對方講得細聲少少, 我都GET 唔到呀.