人生那有老馮..... 匆以一得為喜, 匆以一失為憂,

各位, 在2017年就快終結之際, 世界各國央行主導的量化寬鬆經濟大環境, 很快也曲終人散了. 

多年來, 老美督數督到咁多水浸銀紙出來, 真係神乎其技, 令世人嘆為觀止, 怪唔得佢地有咁多諾貝爾獎級數的經濟學家. 

我JJ就以"人生那有老馮", 來勉勵大家, 人生根本就是在跌跌碰碰中, 尋覓出路啊! "得"不是必然, 所以不用狂喜, "失"也不是長久籠罩我們, 所以也不用情緒過度失落啊!

若果明天是個問號時, 那...... 就讓我們今天活得有意義和價值了. 明天是新年, 大家新年快樂, 好好掌握今天.

人心裡怎樣, 他們的人生也會怎樣

我泥度好凍呀, 凍到現在上午9時半, 外邊下著微雪, 但仍然得-20C, 相信這個情況會再維持多10日, 即是前後會咁凍法凍2個星期. 有個說法, 現在我泥度, 比北極圈內還要凍.

有時, 我真是不相信自己沒有神的恩典和保守, 我買了出租物業這般多年, 這些年都是氣溫不像現今的凍, 除了1993, 1998, 2009, 2015這4年, 不過, 好似咁凍法, 都只會凍2-3晚, 日頭還有-15以上. 現在卻凍2個星期, 晚上凍到-30, 就未試過咁. 現在賣出了, 以前作為房東, 在這些寒冷日子裡, 要常常去巡視物業, 尤其夜裡, 更加要去確保一切門窗暖氣正常, 有時真是感到有點危險; 而寒冷冬天過後的春天裡, 更是大維修的工作開始時.

以前, 有教友不服氣來指責我這樣說"我真是不相信自己沒有神的恩典和保守", 這個, 怎樣可以咁來怪責我呢? 每個人的情況都不一樣, 當然神給與的恩典都不一樣呢, 問題出在, 我能見到神在我身上的恩典, 而這些人卻見不到神如何在他們不同人生和處境裡, 章顯祂慈愛的恩典. 

多年過後, 我和這些人的差距卻是十分巨大的, 我心裡充滿無限的喜樂, 人生只會向前看, 憧憬著更美好的明天, 這些人卻每天活在抱怨和投訴當中, 悲哀地過著人生每一天的時刻, 對他自己和身邊的親人, 無益於事, 也無益於人, 可憐呀!

PS: 這些人, 連我著的衫, 都可以來投訴, 難道我要著到衣衫藍褸, 這才叫做屬靈嗎? 我知道我著任何衫, 都著得好睇, 但也不能誤會我只著名牌, 實質我沒有名牌. 

看到他們怎樣來面對我這個不相干的人, 就知道他們家裡的親人, 會係如何的痛苦了. 如果他們家裡總是充滿著各種各樣的矛盾, 衝突和苦惱, 我就真係唔會意外了, 已經在預料之內.

呵呵呵, 我JJ點會俾人偷橋?

哈哈哈, 最近有朋友來同我講, 近排有套港產片, 裡邊個主角造型, 好像在講我喎..... 

我就問朋友借佢隻碟, 來昅昅這套有點咸水味的黑色諷刺劇"西謊極落之太爆太子太空艙", 裡邊劇情以香港這個被眾多謊言美化成"語言藝術"的荒謬都市為背境, 在這裡要騙得到別人, 先要騙到自己. 講個主角呢, 係這繁華都市的一個貧困角落, 住在一個比劏房更不人道的「太空艙」, 在這些六呎X四呎的棺材式住宅中, 跟一班快要連自己也騙不下去的人同住. 主角係網上是人氣爆燈的樓市評論家，但在現實中, 卻是欠負累累，屋租也交不起的網路打手，為了省錢還債，呃女友話自己去紐約實習，實情是搬到「太空艙」，在網上裝著「紐約客」過生活，主角卻在這個環境惡劣的「太空艙」中認識更多「太空人」. 

嗱嗱嗱嗱..... 我JJ一向只講股市, 莫講樓市, 連債市我都唔講, 更不會預測走勢, 也不會預測目標價位, 因為這些全不是我講財經的用意, 我只想同人講, 乜野係真正的人生財富, 怎樣去揀條人生道路, 去使生命更豐盛, 更有著意義. 

咁耐, 我都只是出來見過2個在網上認識的香港朋友仔, 2007年時, 第一個朋友仔十分懊悔地說, 匯豐當時升到百幾蚊, 但他卻在百元時賣了, 問我怎辦? 我笑住答佢, 如要百元再買回, 大把機會. 嗱嗱嗱嗱, 我無做預言家咖, 我只是認知到當時過高的水位咋. 2015年時, 跟別位朋友仔出來飲茶, 當時連股票都無講, 只講點樣用口係手機度嗡去邊度行山, 由手機帶路. 

如果我無記錯, 我習慣出錢請朋友仔的, 不會俾朋友仔破費啊!  所以, 大家不用來問我現在係邊處了, 不會在香港啊! 就算我現在係香港, 有時間都會用來陪屋企人啊! 人年紀大了後, 陪屋企人的機會越來越少. 

PS: 真是懷疑著, 以前見過的朋友仔中, 有人在搜集故事資料.

在虛擬貨幣狂升下

我就一定唔會埋堆了, 因為第一我唔識, 第二我唔覺得好玩, 第三被取替或監管只是遲早的事.

不過, 既然D人錢多到唔知點投資, 胡亂來投資, 即是有好多基金佬手頭上, 有好多客戶的錢, 會用來作風險投資.

其實, 我一向都係度慢慢入緊一些高風險的細藥廠股票, 因為這些人是有心做好盤生意, 有心做些野出來惠及全世界的病人, 我就覺得, 與其做些無聊事如買虛擬貨幣, 倒不如買這些細藥廠股票, 最少這些人心中有個善意嘛.

PS: 多年前, 我跟人說沙士病毒很有醫藥價值, 但當時人人都以為我發嗡風, 我現在投資緊一隻細藥廠, 係用冠狀病毒的抗體, 來醫夷島素過多的病人. 那些年的沙士病人康復後, 出現骨枯的現像, 其實正因為這些冠狀病毒抗體, 阻礙著某些人體賀爾蒙吸收嘛! 現在要解決的, 是怎樣控制劑量和藥力發放速度.

人生無處不歡顏

最近有朋友問我, 人生最大的財富是什麼? 

哈哈哈, 我就立刻脫口一句, 人生無處不歡顏......

有人要花千萬才買到歡樂, 但如果有人, 無論身在何處何境況, 都能歡笑著, 這個當然就是財富了.

我每次回港, 都會吃一次只有香港特色的東西, 魚蛋粉啦, 肥姐老水啦, 妹記魚腩粥啦..... 藥膳拉麵, 魚湯淥油菜..... 葡撻..... 好多好多..... 

還有一樣, 就係格仔餅, 有朋友問我, 外國無格仔餅食咩..... 其實係有, 不過, 無香港果D咁好味呀, 香港果D裡頭D花生醬係開稀左之後, 再加左D芝麻醬係裡頭, 再加煉奶播, 外國果D係加左D好杰的花生醬和牛油, 好劑咖喎. 

不過, 回港時, 這些東西每樣食一次, 都足夠令我爆標, 所以, 每食一次時, 都要十分珍惜那一次的感覺和味道...... 

所以, 人生到最後, 珍惜仍是歡笑的最基本起點, 沒有珍惜, 沒有重視, 人生何來歡笑呢? 人生何來財富呢?

財富.....

前幾排, 聽溫哥華的朋友講開佢地間屋又升左幾多錢.

不過, 我真是不忍心打破佢地美夢...... 並不是因為我會懂得預測樓市走向, 而是我知道, 我這些朋友每年要俾高昂的物業稅(基於物業市價來定的物業稅, 物業市價越高, 俾得越金), 再加上, 任何投資中介評估這些朋友個人值幾多錢時, 是不會計他們住緊的物業啊.

前幾年, 我手癢, 走去叫個投資中介朋友, 評估一下我值幾多錢, 佢初頭都唔確認我D出租物業應該點計(我一直都唔係住係出租業物裡), 因為佢睇的, 係我的 LIQUIDITY, 即係可以立即動用到的財產嘛! 就唔係市價減按揭咁計法了, 最後, 佢打去問二按公司, 話如果我攞我D物業去二按, 48小時內可以按到幾多, 得出來的二按數目, 再扣多20%, 才計入我個人的資產裡. 

嘩..... 所以大家計自己值幾多錢時, 唔好太樂觀, 原來金融機構裡的計法, 同我地一廂情願的計法, 相差好遠.

今年聖誕節真是不一樣呀!

我這裡今年天氣提早寒冷, 而且還是勁嚴寒得很. 平常往年現在零下2-3度, 今年卻是零下廿多度, 聖誕過後, 就更寒冷了. 

今年商場如往年一般, 未到聖誕, 商場裡不停播著歌曲唱著"LET IT SNOW, LET IT SNOW..... , 今年這些商場應該會後悔了, 因為大雪和冰雨令很多人都摺埋係屋企, 除了返工外, 都不會外出消費, 今年消費市道應該比往了差很多. 

還有, 今年老美當奴友的單邊外交政策開勁馬力, 衝過了老美國會的阻力, 成為了現行的政策和法例. 不說遠在亞太的香港和深圳, 近在美國旁邊的加拿大, 下一年將會首當其衝, 正當美國財金分析師都唱好美國來年經濟和消費時, 加拿大卻要看著相反的數據來發愁著.  

當然, 很多加拿大人都為到來年不容樂觀的經濟大環境而盤算著時, 我都係坐在同一條船之上, 並不能幸免而感到沾沾自喜. 最壞打算, 來年我的秘撈可能沒有了, 正職可能被凍薪了, 又或可能給我個PACKAGE, 叫我早早回家休息了(這個其實係中正我下懷咖, 如果係咁, 真係開心死我了, 格格格)

呵呵呵....... 所以, 我都係果句...... "匆以一得為喜, 匆以一失為悲, 人生那有老馮? " 無得撈時, 我就學孔子, 去週遊烈國.....

各位聖誕快樂

我每年都係聖誕前, 我都向不同機構來認捐......  紅十字會, 心臟中風基金和幾間我家常去的醫院. 

今年很多人無飯開了, 嗚嗚嗚, 我就加多左捐去食物銀行, 唉, 都係杯水車薪呢, 略盡點心意, 好使自己在過聖誕時, 心裡過得舒服一點囉!

現在美加貿易協定談判緊, 聽說不單在高層次的原則問題上, 兩國針鋒相對, 而且還在乳奶/汽車工業/能源上, 同樣都係嗌交嗌到火紅火綠, 看來下年會有更多人無飯開呀.

投資.....

其實, 投資這家野呢,有些人喜歡BUY LOW SELL HIGH, 所以他們就每日係個市裡頭咪少少, 變成即日鮮, 我就喜歡睇大環境, 著重大佈局, 務求投資成份跟自己的人生方向和年齡相配. 

年紀輕時, 唔需要理咁多風險, 因為體力好精神又上佳, 一個屈尾十, 就可以番番轉頭再玩過, 但年紀大了, 個人回氣慢左, 就不能不理投資風險了, 隨著年齡上升, 個人抗投資風險的能耐, 都不斷在降低了. 仲有..... 有份正職就不能每個鐘睇住個市, 即日鮮由一開始我行第一步, 就已經絕緣了. 

投資組合? 現金和股票對比? 我一向都唔睇債市, 因為我錢太少, 玩唔到這些高難度動作, 所以到現在我只沾手股票. 見到當奴友係電視上大聲夾惡個款, 我就唔想再增持貨仔了. 以前, 有人講當奴友係個市的禍水, 佢上台, 個市會大跌, 聲知個市就升足一年. (當時更有人講佢已經在當奴友當選之前, 佈署好一切, 不知道今天他如何...... ) 我現在自己喜歡保留多少少的現金, 唔入市住, 因為我覺得, 當奴友有如老董, 講話天下第一, 到做時, 佢同老董都試過公司破產收場, 有時這些商家佬係度豪賭咖.

為何我咁耐都唔寫財經?

皆因為老美黑仔上台後, 佢唔俾個市 FREE FALL, 就推出 QE 到 QE3(係呀, 已經前後3鑊了, 這個簡直係損人不利已的做法), 橫掂都知道個市唔會跌, 但又唔知道個市升到去邊, 又唔知道佢地幾時停 QE, 所以係咁樣的長官意志操控個市下, 我寫財經來都無用啦!

當時我已經同人講, 求其 HOLD 住現有的 POSITION, 等到老美唔再係個市上邊上下其手, 才好去諗增持或減持...... 不過, 我這幾年都忍唔住, 不斷增持, 實在太誘感了.

轉眼又過左成10年了, 我寫財經都生疏哂, 才等到黑仔唔DO, 由大聲夾惡的當奴友上任, 明話要復興老美, 實質係度同佢幕後老闆係度略水. 我就知道老美由黑仔側重工農兵, 轉軚去明益大財主, 這個.... 我就手癢, 出來再寫財經了, 哈哈哈...... 

各位, 我這幾年為左準備賣我D出租物業(由2009年等到今年), 心思就放左係物業增值和稅務最大效益上, 橫掂股市都唔洗諗咁多...... 不過, 由現在開始, 我"重出江湖", 哈哈哈.....

度度百貨公司關門下

嗱嗱嗱, 今年明年將會有乜百貨公司摺埋門市部, 他們會是 瑞典的 H & M, 美國的 GAP 和 BANANA REPUBLIC, 出 hollister 的 運動服公司abercrombie & fitch, 

其他危危乎的, 有瑜伽服 UULEMON, 話唔希望設計衫褲俾有色人種著 的 TOMMY HILFIGER, 老牌老餅的 LEVIS, 專照顧老餅細佬的反斗玩具城......

因為好多人好似我咁, 轉左上網上買野, 只是, 我一定唔會係網上買衫褲, 因為我要試過才會買嘛. 

咁多公司的門市摺埋, 當然就會有好多人無得撈, 而且仲係低端的職位, 平時人工已經好低, 唔會有可能儲到錢, 一但咁大批人失業, 這班人的生計和未來, 將會是一個社會計時炸彈. 

總之, 這個聖誕節, 將會有很多人輾轉返側, 為未來生計而惶恐終日, 如果下年年初再有金融危機, 就會有更多公司用借口來炒人, 到時市況將會更差更慘.

凍得我騰騰震之下.

今年天氣好鬼凍呀, 又早凍又早落大雪, 明天還會落冰雨呢!

好多人講, 天氣咁凍, 打擊了很多人在聖誕前出外消費花錢的意慾, 會損害這裡經濟.

不過, 又唔一定喎, 原來, 我這裡魁北克近著美國東北部的巨大消費群,  這些消費者不用搭飛機, 揸車就可以來到魁北克. 咁..... 這些人來魁北克做乜? 原來係來滑雪, 仲係佢地可以週末來滑, 星期一回去上班, 唔洗千里滌滌搭飛機, 去到美國中部COLORADO山區咁遠來滑雪了. 

據統計, 這些過百萬人次的美國遊客, 一年為魁北克帶來數十億的外來經濟收益喎. 

PS: 我諗班友梗係前世未凍過, 特登揸車來嘆下我這裡鳥不生蛋的西北風了, 哈哈哈.....

金融風險指數

睇香港新聞, 無乜提及, 原來香港政府的新聞部門又幾把炮, 香港無乜報章提及.

原來, 香港是全球金融風險指數最高的地區, 其次是中國, 第三是新加坡, 第四卻是..... 加國......

噢...... 這四個地方有一個共同點, 就係有大量中國人居住...... 

唉..... 唔知道高樓價是否是個好消息?

最近我搭機經溫哥華, 我就同朋友提及我這裡當天零下6度, 溫哥華卻6C, 難怪咁多人由滿地可搬來溫哥華.

這朋友自嗚得意地說, 聽說我這裡滿地可樓價好低, 我心裡卻說, 誰人先上樓才是最重要, 溫哥華樓價咁高, 他的子女他日難以置業和就業, 更不用說能夠留在同一城市, 看護著年邁的父母, 高樓價其實是個壞消息呀.

想我自己, 最初不是滿地可樓價低, 我也不能在大學畢業後的10年裡, 能夠完成到更多的事情出來, 也不能留在滿地可, 照顧父母的需要. 

PS: 美國加息和減稅, 會否引起美企大量地從海外, 把資金搬回美國本土, 從而引發東亞金融風暴, 現在仍然眾說紛紛. 不過, 從最近日韓兩個對中國的外交態度180度改變下, 日韓兩個正為著下一波的金融風暴, 尋找定海神針. 現今的中國國力, 比1998年時, 又真係能夠起到決定性的作用.

不過, 都是那一句, 我們應該展望今次金融風暴後, 能夠帶給我們一些什麼的機遇. 哈哈哈, 不要懼怕, 世界的懷抱總是向著"經得起風浪"的人來擁抱著.

勤勞已經再不是肌肉上了, 是思想上, 是學習上, 是態度上......

今天星期日中午, 我住左加國咁多年, 終於有件奇怪事發生, 加國郵局竟然今天派郵包.

我星期五網上購物了, 出乎意料之外, 今天收到了, 是的, 星期日中午....., 這個在加國是差不多是不可能的事, 保守宗教人仕會出來指責, 這個令到人們不能參加星期日早上的宗教活動.

大約, 我這裡是無神論盛行的魁北克(或人們厭倦天主教過往的政教合一), 不是安省, 也不是中部西部, 所以郵局星期日派包果, 政治上少了很大的阻力.

但可以看到幾方面的啟示:

1. 華人一向賴以上位發圍的空間 - 勤勞, 正在不斷被時代所取代, 新來的華人移民, 如果不是腰纏金銀, 相信他們在加國向上游流動的機會, 將會少了很多很多. 在肌肉勤勞之外, 還要腦袋勤勞, 轉得夠快, 再不能躱在餐館或洗衣舖裡頭, 試圖閉門造車了.

2.  加國人們開始忽視宗教信仰, 一切以當前利益為依歸, 更不用指意他們會多加捐助有需要的人. 加國已經連續7年, 捐款數目和人數減少, 尤其這裡魁北克人, 是加國所有省份中最少捐錢, 只比原住民自治區高一點點而已.

3.回看自己, 相比其他移民來, 比較願意去做事, 順著加國的國策來做, 順著當時加國吹的風向, 來做事. 爬逆水, 只會事倍而功半. 例如, 在自動化和智能化的時代裡, 不要跟人鬥大力, 鬥大隻, 這樣只會辛苦了自己.

不斷充滿著感恩的心, 無論是自己, 還是別人.

前幾排, 加拿大 SEARS 百貨公司, 全部執笠, 大約有萬多人失業.

唉, D人臨聖誕節入冬前, 才來失業, 又真係好慘.

一向都認得一個在SEARS 做售貨員的黑人, 見佢係 SEARS 臨執笠前, 個人好頽下, 當然, 佢間公司執笠後無人工, 再加無哂在職保障, 包括醫療和傷亡保險. 

最近, 見番佢係別一間百貨公司上班, 不過, 佢面上多了很多暗瘡, 睇得出佢生活在壓力之中. 不過, 我都同佢講, 為他找到新工作有個新人生方向而高興.

PS: 我自己一向都很感恩, 感恩著自己人生大多都算順利, 不用等到見到別人活在重重壓力之中, 才懂得感恩. 也為到別人找到新的人生和工作而感恩, 始終現在加國搵食, 比以前艱難左好多.

澳門政府開支.

原來, 由澳門回歸之後, 澳門政府每年開支由百幾億, 升到現在千幾億了.

噢..... 乜唔係話現在澳門賭場生意不景嗎? 好多貴賓廳執笠嗎? 

我每次來澳門玩, 臨走前, 一定去十月初五街, 食番個咸魚蒸肉餅飯咖, 由回歸時$19, 升到現在$36呀(我記得咁清楚, 主要因為咸魚情未了呀, 哈哈哈) , 都係升左90%之嘛. 

當然, 以前葡國佬治下的澳門, 乜都唔做野, 不過, 現在又可能澳門政府做得太多了. 我上個月走左上大潭山昅野, 見到澳門起左好多野, 但我就懷疑邊處有人用咁多新設施? 

聽聞氹仔碼頭起到好大, 但好少人用, 鬼咩, 我這個加燦都係鐘意去外港碼頭多D, 貪佢多賭場免費巴士, 又可以去官也街食瑠槤大菜糕, 又可以去大碼路昅下D國內靚女, 又可以去我最喜歡的十月初五街食咸魚肉餅飯喎.

各位, 今期又到加息.

哈哈哈, 嗱嗱嗱..... 大家咪誤以為我講風涼說話, 講加息來嚇人.

其實, 我成日都同人講, 這個世代講加息, 一日唔打仗, D息都無可能加番到以前的高水平, 頂多加到3%-3.5%, 就已經好難再加.

第一原因, 就係低通漲啦, 咁低通漲, 無需要加息壓通漲, 攪不好, 驚住變通縮就慘了. 為何低通漲? 資訊科技和自動化, 帶來強大的生產力, 但人口老口, 又減低了人們消費的需要. 

第二, 環球水浸呀, 人人手上有錢, 但找不到出路, 放哂係一邊, 銀行啦, 床下底啦, 買金仔啦, 買比特幣啦..... 借貸供大過求, 息口點會升?

第三, 老美當奴友減稅呀, 已經水浸啦, 再減就更水浸, 而且老美政府減稅後就赤字更大, 加息就會令到佢地因為俾息而赤字更大, 佢地老虎蟹梗係唔加到D息咁高.

加到得個3-3.5%, 坳痕都唔會痛啦, 除非專炒磚頭唔還錢果班友, 就可能有問題, 照常理, 一早己經買左舊磚頭來自住, 又或保守地買磚頭來投資, 都應該唔洗驚咖!

PS: 不過呢, 大家唔好聽完我咁嗡之後, 下星期就去排隊買樓花呀, 我只係指果D一早已經入左市的朋友仔, 叫佢地唔洗驚. 現在就唔好再同人迫了, 無謂辛苦自己啦.

香港人看西人, 其中一個最大的錯誤.....

就係.....把所有西人, 都歸類做同一種人, 同一種文化, 同一種生活習慣, 同一種的價值觀.

其實呢, 西人當中, 其中不同西人之間的文化差異, 可以大到好似任何一種西人跟中國人般咁大咖.

尤其, 我地香港人睇番自己中國人, 其實係唔會太覺得中國人彼此間, 有好大的文化差異, 因為我地香港人本身上一輩, 大多係來自大江南北各地的中國人, 所以, 一直我地都唔覺有文化差異這家野嘛. 

所以, 大家會見到西人娶個中國女, 鬼妹會受唐人仔來結識, 甚至有些保守點的西人, 骨子裡總認為中國人同佢地岩傾D. 

所以, 大家如果見到, 有西人講佢係西人社會中好孤獨, 大家不要奇怪, 因為, 真係有好多唔同種族或文化的西人, 甚至有些西人頂唔順西人的社會, 做出一些傻事出來.

各位, 我做完要做的野, 返來了

哈哈哈, 這3個月, 有如狂風掃落葉, 話去就去到盡, 終於完成哂一切的目標, 再不用管我在正職和秘撈之外的事情了, 所以今年冬天, 我會過到....來加國後最舒服的一個冬天. 

慢慢等我去探大家吧, 心情還未定下來, 仲係好係衝峰陷陣咁呀! 哈哈哈..