2022年5月31日 星期二

疫情解封後, 做D乜會較易成功?

 哈哈哈, 其中一樣係...... 找個女友!

為何? 嘻嘻..... 全因為疫情期間, 好多人無得四圍去玩, 尤其社交圈子窄左, 悶起上來, 現在一解封, 就特別想要找個親密朋友呀!

為何我JJ會感受到? 其實, 疫情下要戴口罩, 現在係街上唔洗戴了,  就真實感受得到 果D 化學作用了, 單身女性一行經過我, 我就感受到對方果D眼神和化學反應. 

嗱..... 這方面的感受, 只有好似我JJ這種人, 才可以講到俾大家知道. 

大家可能會問, 對方係我JJ面前, 有咁既化學反應, 原本只關我JJ事, 關大家何事?

其實呢, 女性對男性開始有化學作用呢, 係一種泛趨勢, 因為女性好想有個親密朋友, 任何男性向佢地主動, 機會都會大增咖! 

大家可能又會問, JJ你點解自己唔去做呀? 

噓, 我JJ超左齡吖嘛! 搵個女友係我旁邊, 實在太煩惱了, 太花精神了, 一時又要帶佢去乜處乜處玩, 一時又要開解佢心情唔靚, 一時又要同佢去乜處乜處食野,大家話啦, 我年紀都唔細了, 我真係無咁多精神來磨菇磨菇呀! 

所以, 如果大家仲係係適婚年齡呢, 大家就快D緊捉機會了, 找個女友回來, 這樣人生才會充充實實的.

係咖, 我JJ搵到生活安穩, 但人生唔充實呀, 都係俾班混人累的! 年青時有精神有時間, 點知俾人整古, 所以, 大家要遠離混人呀! 去識番個女友, 咁就 WONDERFUL了.


 


2022年5月30日 星期一

見住D夏天衫褲, 開始傷感起來!

發現到, 原來我D夏天衫褲特別多, 查實加國夏天係好短, 我初初來到時, 只有短於1~2個星期的日間係30度以上, 現在夏天長左, 30度天氣會長到3~4個星期.

買左咁多夏天衫褲, 原本係諗住..... 賣左出租物業後, 再提早退休, 就可以一年幾個月係香港過, 點知家陣咁情況喎. 

D夏天衫褲放係度, 等於浪費了. 昨天才丟哂D前幾年著返香港D舊衫褲, 留下新淨的下來. 

又把果D窄左唔岩著的新衫褲(因為這2年疫情少出外, 發福左), 捐出去俾人.

唉,  真係有D傷感, 買衫褲果時, 興高采烈, 仲諗著返去四圍去玩, 估唔到家陣...... 會係咁情況, 實在好傷感了. 


2022年5月29日 星期日

上邊D空屋有幾嚴重!? 銀行會有幾多斷供按揭? 經濟會有幾耐低迷?

單單睇睇這2個YOUTUBE 視頻, 見到咁多現在空空的原旅遊設施, 就知道上邊會係點大鑊了!

第一個係雲南大理, 我2012年去時, 見到當地D人好肯洗錢, 哈, 現在就.... 這位姐姐仔話佢自己精神唔好, 硬係啦, 見親D老闆們都走哂佬, 淨番D空屋係度, 點會開心? 佢不如搵番個人來圍爐取下暖啦, 一個人孤零零, 心情一定唔會好呀!?

第二個視頻係西藏阿里地區的一個商場舖位, 全部都空哂, 任由這位踩單車哥仔入去搭營來露宿. 這位哥仔係西藏, 差唔多日日都有丟廢的空屋來入住. 真係可以看出, 上邊D空屋廢屋破屋有幾嚴重!

第三個貴州古鎮, 是中國十大古鎮之一, 往時仲人山人海的旅遊區, 現在靜應應, 連遠方雞嗚都聽到. 鎮上大量店面低價轉讓, 又或已經倒閉了, 留下店面給人來接手.




PS: 真係好佩服..... 我果個好多女人係身邊的親戚, 佢真係好識得氹佢身邊D女人開心! 聽講, 佢身邊果班女人, 全部都係有錢家庭長大, 但現在佢班女人本身果D家族生意好差, 身家縮哂水喎! 但係佢班女人一見到佢, 就開心哂! 
 
好啦, 其實我親戚果份人都無乜點, 心地都好善良的! 同我家幾兄弟最大分別, 就係我家裡D男性, 鼓肅一D, 喜歡直話直說, 喜歡邏輯地把事情灘出來講(始終係專業人仕, 解決唔到問題就玩蛋), 唔似得佢咁滑頭, 喜歡氹女人開心.


2022年5月28日 星期六

真係要提醒, 初移民來的朋友!

我JJ係網上講, 初初移民來到, 大家就要保守一點, 唔好咁心急, 咁進取, 尤其去攞真金白銀開舖做生意, 但求打份工, 守到最初2-3年, 等到摸熟到做生意路數, 才好進取一點.

但有人回我: "除非有好多錢,否则那有可能慢慢適應!?"

唉, 其實這個都係香港傳統思維啦, 講真, 現在香港都唔可以咁心急,  攞真金白銀去開舖做生意啦, 始終香港現在營商環境同歐美, 越來越似, 蝕錢容易賺錢難.

D人初初移民來到, 又唔係投資移民, 就咪攞真金白銀去開舖做生意啦, 唔知頭唔知路, 好易蝕. 講真本地人都好多做舖做生意做唔掂. 現在係大公司一班叻人才做得掂!

尤其錢少D那些朋友, 移民過到來, 就咪冒險, 盞蝕左佢. 而且蝕左之後, 好難再儲夠本, 再東山再起, 

我生活係加國卅年了, 認識到, 係高稅國家做生意, 蝕錢容易, 但係賺錢難(咪以為請人回來就唔洗自己做), 尤其初到埗唔熟門路, 蝕得仲快仲甘呀. 相反, 打工可能賺錢同樣難, 但封左蝕本度門.

PS 1: 多年前, 係那唐人教會裡, 聽聞一位寡母婆, 帶著一對青少年兒女來做投資移民. 佢透過移民仲介公司, 合股一個酒店+酒樓項目, 位位投資人夾25萬, 當時90年代初, 話多唔多. 但不到3年就蝕哂, 渣都無得剩, 還好彩,  位位投資人成功過到D投資移民條件, 成功入藉. 還是不幸中的大幸, 當係用25萬買個加藉吧!

不過, 當時如果任何人開間細餐館, 點只25萬呢? 仲要自己落手落腳做, 都仲好麻煩. 

我屋企因為早早伸請, 無乜投資移民條件, 但求我地過來長住就得了. 唔洗立刻做生意, 我可以慢慢摸熟門路, 就慳番好多錢唔洗蝕. 後來, 果D錢俾我用來錢搵錢, 多年後今天, 就生活好安樂了.

所以大家咪心急, 一心急就好容易蝕錢, 第一筆D錢一蝕左, 係好難再賺番來. 通常賺第一筆錢最重要, 賺到之後, 條路就越來越容易走. 

PS 2: 真係咪以為係加記買磚頭可以保值, 我住的地區, 都已經算係中高產了, 舊區果度好多屋和OFFICE 大樓, 空左好耐, 可能個業主連市政府稅都無錢俾, 最近由市政府收番業權回來, 用來做NGO和市政府部門的OFFICE. 滿地可其他地區, 就可能更差, D磚頭放係度得耐, 就好易垃圾了. 

所以香港人移民過到來, 買間屋自住就好了(唔好太大, 夠住就好了), 唔好咁快去決定買出租物業呀! 我JJ以前買出租物業有錢賺, 有幾分係運氣, 有幾分係自己都有了解一下個物業本身囉  



2022年5月26日 星期四

原來人年紀一大左, 消費的心情都會唔同左!

以前, 後生時, 一見到D野平或減價, 就會去買, 因為諗住終有一天會用得著.

但係, 現在回想, 真係有好多野買左, 放左係度好耐都未用到喎!

我自己就越來越宅了, 越來越唔想出去, 可能係2年幾疫情封鎖吧! 

現在雖然還可以著 30" 褲頭, 但一部份的30"褲已經著唔落了. 我諗我只會越來越宅, 越來越少出街四圍槓, 就唔會點再瘦返, 現在已經唔岩著果D褲, 就更加唔洗旨意會有機會有日再著得番囉. 

昨天才把D唔岩著D新褲, 攞哂出去捐俾人. 就發現了, D野買左, 我就唔一定用得著喎. 

不過都好的, 以前環境無現在咁好, 見到D野平或減價, 就會買, 因為驚住遲D自己無咁好景, 還有驚D野無減價. 

但係家陣, D野貴D都無問題, 真係唔會幾個月著爛一條褲, 到要買時, 我才去買囉. 無必要買定先了. 

係咖, 世界經濟差左, 係因為人口老化, 人年紀一大, 就唔想再消費, 唔需要人家的服務. 



係咪反影到市道真係好差呢?

慘, 希望係趣劇啦!

 


 

2022年5月24日 星期二

現在開始感到體能無咁好了.

好啦, 今日拿起工具, 去換屋企電燈掣和牆身電插頭, 換左10個, 點知電到自己2~3次. 

蝦, 俾著以前, 我唔會咁失準, 換電燈掣和牆身電插頭, 直頭碎料啦. 

今天咁樣呢, 即係證明我唔只手腳慢左, 手腳都仲無以前咁準確了. 

好啦, 都係時候將我D工具攞去俾其他人了, 可以空出屋企D地方出來, 唔好阻住哂.

查實, 自從賣左D出租物業後, 真係好耐都無用果D工具了, 可能我現在連氣力都無咁好.

都好咖, 前幾年賣左出租物業, 自己唔洗煩了. 如果現在仲有出租物業拖住, 我可能會好煩惱了. 話哂, 出租物業大多都係要自己整整佢, 尤其小小地果D野, 咁先會有錢賺, 下下搵人返來整, 就真係無乜肉食了.

PS: 昨天去DOWNTOWN, 行過一班小妹妹, 竟然仲有小妹妹(又係瓜子口面)眼金金睇住我, 唉, 哈哈哈, 咪攪我了, 我都係擰歪塊面行開好了. 俾住我後生時, 有女性咁來望我, 我大多都會行開D, 估唔到2年幾疫情後, 我都仲有女性望住我, 仲係一個好後生好靚女添, 不過, 這些野呢, 大多都係麻煩來咖! 就算後生時, 我都唔想理會這些麻煩.

講真, 真係好多次, 有街上小妹妹來同我講, 叫我請佢食飯,  帶佢去四圍開心玩. 唉, 我JJ係咪生錯左個款? 有著一個花FIT款? 後生時, 正經女仔一見到我, 就怕左我, 立刻走開.

昨天有個這裡網友講, 佢同佢個法裔妻子結婚35年, 係佢個妻子對佢深情愛著他, 拖著拉著他走了他人生咁多年! 哎呀, 我聽到咁, 我真係好想喊出來呀! 

其實我覺得自己一D都唔花FIT姐, 我只係身材纖長一D, 無肚腩, 皮膚白, 瓜子口面而己, 不過, 一切都係同其他同年人一樣, 都會面對生老病死, 身體走向下坡. 我都已經好幸運, 現在才體能無咁好. 我好多同年朋友比我早十幾年, 身體就開始走下坡. 

講到人生麻煩, 哈, 我果個有好多女的親戚, 見佢俾佢班女人攪到陀陀擰, 簡直係慘情, 我真係倒不如好似自己咁, 生活得安安靜靜. 奉勸各位, 女呢, 一個深愛你的, 就夠了, 太多就真會大大鑊咖.


 

2022年5月23日 星期一

環球供應鏈的兩極化.

點兩極化? 生產準時(JUST-IN-TIME)來配合整條生產鏈(唔可以太早, 唔可以遲, 唔可以責死太多存貨, 唔可以食死左D資金係存貨度)果D, 同埋果D唔洗咁點準時果D. 

第一種生產鏈係需要係好好物流網絡果D地方生產, 準時生產, 準時出貨, 準時去到生產鏈下一個廠家手中. 即係.... 這些留係長三角/ 珠三角/環孛海這些物流交通好的地方. 大多係高價工業產品.

第二種就係珠三角騰籠換鳥換左北上去內地果D, 這些係較低的衣衣紡織品, 低級工業產品.

其實這個趨勢, 已經係上邊出現左,不過, 現在講緊, 這些事情將會在其他國家出現, 很多國家裡, 可能只有一小部份地區, 物流交通可以同長三角/ 珠三角/環孛海相比, 其他地區交通落後, 可能連電都唔夠. 

咁, 其實, 印度印尼越南這些國家夠唔夠物流交通好的地方, 來取代長三角/ 珠三角/環孛海? 這個真係可能要睇耐D先知, 不過, 短期內可能唔夠(這2-3年內), 即是全球供應鏈有2-3年會吃緊喎! 尤其高端產品. 家陣所有野都會好貴了, 大家真係要打醒12分精神.

PS: 睇現在個勢頭, 上邊已經決定不再做低工業生產的外貿了, 不再外國買家生產低價的產品, 只是佢地咁樣同外交惡呢, 令佢地也失去左其他大量高價產品的訂單了, 可能佢地一早已經預左咁樣發生了.

現在大家最大要克服的, 唔係高物價, 而係很多人內心的不安和焦慮! 包括消費者/生產商/物流商.




2022年5月22日 星期日

當東鐵過到海時, 那裡會係輸家?

講講香港交通和人流啦, 

現在, 香港MTR應該係4線過海了, 東涌線/荃灣線/東鐵線過金鐘中環, 寶琳線過鰂魚涌. 

如果有輸家? 我估...... 應該係果D少左人流的地方.

當東鐵無得過海時, 人們要係2 個地點由東鐵線轉荃灣線, 一個係旺角東站行去太子站或旺角站, 一個係尖東站行去尖沙咀站. 

咁..... 如果我想順路買下野, 或行下街, 我當然係旺角東站轉車啦, 果度有花園街/女人街/波鞋街行喎. 

啊, 現在東鐵過到海之後, 立刻會見旺角少左人流了, 除非D人刻意要去行旺角囉. 

不過, 旺角東站四圍舊區D舖會少左人流, 果度D舖係輸家囉, 但係因為東鐵沿線方便左, D住宅價可能會升, 尤其旺角東站果度左近咁多舊樓, 好快俾人收收埋埋來重建了.

2022年5月21日 星期六

為何上邊咁難儻內政策輪換?

其實好簡單咖咋, 儻指揮槍, 槍保衛儻. 無槍D人, 就唔該咪係度阿芝阿佐!

大家可能會問, 之前30年果D老江老朱老胡老溫係乜呀? 算D乜呀? 之唔係佢地手中的緊緊只有行政權囉, 係唔同派系(農村+槍)之間, 果個夾縫中的"都市政體", 遊走係不同(農村+槍)派系中的卑微權力, 被不同 (農村+槍)派系包圍著. 

如果不同(農村+槍)派系聯手起來,  都市政體就要俯首交出他們緊有的行政權了, 這個也所以,  都市政體下官僚一貪就好多錢, 全是為到自己有條後路, 因為他們知道,  他們緊緊有的, 只是行政權而已.

大家可能會問, 一動到軍頭D芝士, 點會唔反? 大佬, 係儻派錢派經管權俾軍頭, 個個軍頭睇住上邊派D乜俾佢地, 就知道自己係咪黃馬掛嫡系了. 仲有呀, 講咁多統一大業, 緊係調果班唔順超D軍頭係前線, 最危險最無肉食的位置, 死未? 誰個軍頭唔擦鞋, 恐怕下場只會..... 也所以, 好少能夠兵變到,  

除非地方+軍頭, 不過好難了, 現在連地方都要睇住上邊放錢放權俾佢地. 

這樣, 就是"農村包圍城市"特色的中央集權制度! 

 


2022年5月20日 星期五

揀地方去移民, 千祈咪諗住去做皇帝, 而係諗住去長有長搵錢!

以好多我上輩D朋友同我父親講, 帶幾多幾多錢來加記, 就可以食過世咁,

後來, 又聽人講, 帶幾多幾多錢上去上邊, 就可以做皇帝.

現在, 上邊D人講, 帶幾多幾多錢去越南泰國, 就可以點點過富人生活.

只不過, 我JJ可以好負責任同大家講, 這些諗法係會害死人呀!

其實, 大家唔好著眼移民去D生活指數低的地方, 諗住去到做皇帝, 而係應該去D有發展潛質的地方, 長有長搵錢, 仲越搵越多的地方! 

哈. 如果我JJ當年揀左去泰國越南或上邊, 咁我今天就唔會生活咁無憂無慮了. 可能我會好容易請工人, 唔洗自己做家務囉. 



 

2022年5月19日 星期四

為何D人會做傻事? 尤其有左錢之後?

前幾日, 曾經講過D人亂咁發大生意來做, 最終失敗收場! 

我JJ觀察呢, 佢地同我好唔同喎, 我JJ賺到第1桶錢後, 係用來讓自己生活得無咁忙, 無咁辛苦! 而有D人係賺到第1桶錢後, 係想證明自己叻過其他人, 證明佢岩哂, 證明佢最能幹, 證明人人都要聽佢指!

這些人可能唔好賺到第1桶錢仲好, 因為佢無錢時, 會一直保持患得患失, 就會肯向現實低頭, 唔會去挑戰現實, 唔會死牛一邊頸. 不過, 有D人係未有錢時, 都已經死牛一邊頸, 咁就連第一桶錢都賺唔到了.

係咖, 我JJ係睇餸食飯果D人, 無咁大個頭, 就唔會戴咁大頂帽啦! 洗乜證明俾人睇自己有料, 自己知道自己有料就得啦! 

我JJ一直係度學緊, 點去聽完人地講之後, 去做個最合適自己的決定, 唔好同人呦氣, 又唔好乜都聽哂人地講, 而係聽完人地講完後, 自己做個最好的決定, 行條最好的路. 

查實我JJ並不是什麼叻人, 一來我做人好騰雞, 好患得患失, 好容易害怕和擔憂! 我賺到第一桶錢之後, 俾自己生活舒服D, 縮小我需要去患得患失的地方, 出錢去請人做野, 自己集中精神去理自己最重要果D事情. 而唔係去證明自己岩哂, 而係想知道自己有邊方面需要進步和留意. 

好啦, 家陣個市跌, 世界唔好景, 度度局勢都好緊張, 大家真係要 睇餸食飯, 睇住條路來行, 唔好衝出去懸崖, 唔好爬逆水扮有料, 唔好同現實呦頸..... 

更加, 需要認識自己, 認識身邊的現實, 認識將要投資的股票, 認識自己能夠承擔幾多風險, 認識乜物對自己係最重要..... 





2022年5月18日 星期三

環球供應鏈退潮下, 誰最受影響?

昨天WALMART 宣布業積低過預期25%和未來營業指引向下..... 咁就跌左~12%, 今日又再跌多5%.

好多人講係D人在疫情和經濟不景下, 減少消費和購物.

只是, 我入到WALMART內, 發現D野貴左好多呀! 實情係供應少左好多, 大佬, 無乜必要, 就唔好買住啦! 

唔只 WALMART 跌呀, HOME DEPOT呀, TARGET 呀, COSTCO呀, MACY呀, 等等大型零售商都跌.

連最抗跌果D 一元商品店(DG, DLTR, 查實現在大多已經2-3蚊一件了), 都跌左成10%. 

噢, DOWDOW跌左一撇野, 科技創新股的NASDAQ跌左近5%! 如果咁跌落去, 我JJ估呢, 個市都仲有排向下喎. 有人仲話, 咁多零受股業績唔好, 是指著衰退的方向.

其實, 我JJ一向都有加大去消費, 只是我買左太多野了, 決定以後在無必要買下, 盡量唔買了. 



 


2022年5月17日 星期二

越見到D同胞咁樣窮遊, 我就越心情低落. 都係介紹一下我點去遊吧!

 睇到第一個, 拉車徒步行國內線, 可能無萬里都有8~9千里了, 但佢雙腳膝頭哥叫救命, 唉..... 

睇第二個仲神奇, 竟然踩單車上西藏, 去到5千米, 佢點會無高反? 我JJ去到4千5, 行快一D都暈陀陀, 真係擔心佢個肺和心瓣受到永久傷害了


好啦, 大家唔好見到同胞咁遊法, 有樣學樣呀! 唉, 真係可以死人的. 

我JJ點去遊? 其實, 我JJ用自己好舒服的方法, 遊完一個月後, 都感到身體好累呀! 要休息了.

真係咪步行或踩單車去, 買張機票去到果度左近較大城市, 落機後租車, 慢慢揸去囉! 

夜晚租MOTEL 睏, 搵果D有雪櫃仔微波爐的MOTEL, 有煮食爐就更好了. 

遊完一天後, 臨去MOTEL前, 去超市買齊果日晚餐, 明日早餐和午餐(放在MOTEL雪櫃裡), 當然一早買齊其他副食品, 如果喜歡任何調味料或即食麵, 落機時係大城市買齊佢囉! 我就喜歡係大城市買埋個電飯煲, 慢下手想食飯, 哈哈哈, 就有得食了.

我每日唔會揸多5~6小時, 也不會徒步多過4~5小時, 也一定唔會係高山上過夜, 一定會落到2千米下才住MOTEL呀, 這樣才會安全無高山反應. 10點上床覺覺豬, 5點未天光前出外影相, 日頭出齊就回去MOTEL 食早餐, 然後沖白白豬豬, 就又再去下一個景點, 再入住別一間MOTEL. 

離開前, 將果D午餐放入保溫袋內, 再煲D水, 放入保溫壼內. 到午餐時, 就可以沖D即食湯, 或茶包, 有D暖野落肚了. 

當然, 防曬霜/潤膚霜/蚊怕水係必備, 救傷KIT也要呀. 我更喜歡攞埋支督督杖去呀. 全身由帽到褲, 都係防曬質料呀!

 



2022年5月16日 星期一

面對可能脫勾? 面對金融風暴?

大家真係要聽下這視頻, 內裡講2個情況港元會同美元脫勾: 

第一, 係政府長期赤字, 不過現在無10年8 年, 都未洗驚住.

第二, 行雙軌制的法定貨幣(由13:35 to 20:40)

唉, 真係要聽下人地講, 因為我自己一聽雙軌制的法定貨幣, 初時我都唔知點反應, 雖然感覺有唔妥, 但又唔知點唔妥(不境我jj唔係果一行), 一聽佢講, 就諗起劣幣驅逐良幣. 

 

ps: 認同佢觀點, 手頭有空閒錢, 無欠債, 面對金融風暴, 就唔洗怕, 最怕係未睇清楚就入市買貨. 

都好感恩的, 我一手都係防守股, 尤其前排買果d電網股, 仲企得穩, 無蝕錢. 不過, 我jj仍會無間斷, 咁去慢慢, 少少地咁入貨, 最重要D股票有生意做有錢賺有發展前景有股息派, 一時的股價上落, 到最後, 都只係過眼雲煙!


2022年5月14日 星期六

加記有識得D人靜靜走左人.

唉, 每次發現有以前識D人, 突然靜靜地唔見左, 全無消息咁走左人, 就知道佢地人生可能遇上大問題, 

其實, 錢係好多人突然消失的原因, 其餘係婚姻和家庭原因, 又或係一鑊幾個原因咁來!

照計這裡...... 錢唔應該係好大問題, 自己搵夠自己洗, 再儲D錢預留急需或退休, 除非D人去到好盡, 無咁大個頭, 戴頂大帽囉! 

真係有人做生意失敗左, 銀行CALL 佢 LOAN, 連自己住間屋都無埋囉! 其實, 做生意就真係要好留意風險了, 買股票來投資, 查實風險係最低, 買出租物業就高D, 開檔生意就更高. 尤其有D人, 真係開檔生意好大門面, 咁, 一切開支, 如電/租/營運稅, 都會高D啦, 吃力好多.

聽過一個故仔, 係個老婆唔識野, 又好要面子, 偏要個老公做生意做到好大門面, 無咁大個頭, 戴頂大帽, 最後生意失敗唔只, 個老公就同個老婆離婚了, 各行各路了.

又聽過一個故仔, 2017 年有人係這裡生意失敗, 欠下一大筆銀行債, 以為走開7年, 過左追債期, 咁就可以甩身. 佢搬左番突區, 真係希望係2024年前都無乜事發生, 佢到時可以走番返來加記啦. 也希望真係如佢所願, 7年之後追唔到佢債, 佢唔洗再左避右避D債主吧!

也聽過幾年前, 上邊D機構好肯俾研究經費, 這裡有人貪上邊開D條件好好, 就返左去, 唉, 真係希望佢唔好俾人用完一腳踼走吧! 聽聞上邊現在限制出境呀, 真係好替佢擔心了. 點解佢無聲走番去做研究? 睇怕佢都係想將來返來, 唔會俾人查佢吧!

好啦, 食得咸魚抵得渴, D人咁去揀自己條路, 就要自己理好佢了, 旁人只能勸其他人, 唔好"無咁大個頭, 戴頂大帽!" 凡事按部就班, 慢慢來! 

PS: 其實, 係加記有95%初創企業係開張5年內執笠, 上邊講果D人都已經好過以前, 因為2009年後的QE, 佢地借錢開張做生意, 融資容易好多. 

90年代時, 都有人叫我投資入佢個初創公司度, 只係VENTURE CAPITAL, 都講明只投資係POST-DOC D 創辦人身上, 但十個都有8~9個跑唔出, 爛左尾. 

唉, 相信現在又變番難去融資初創公司了.  


 




2022年5月10日 星期二

百年一遇的大時代? 世上兩大勢力正下著一盤大棋!

大家有無留意, 世上兩大勢力, 係這幾年, 發生好多好怪的事情, 兩年前老美大選, 看看選票上出術出得好難睇姐, 又睇別一邊改憲法改到可以連任三屆, 都係好難睇, 同佢地一向的做法好唔同. 點解? 

雙方都係度安排已方用最適合的人選, 去下這盤大棋呀! (大家咪再幻想著, 佢地會換任何話事人, 放咁既風出來D人, 大多都係一D隱性大外宣, 果D人企係危牆之下, 咁耐都無人沃佢地, 當然內裡有原因,)

各位, 誰能夠看穿佢地點下棋, 誰能在大時代中獲利, 選擇最佳企位, 避免自己沒頂之災呀!

只是我JJ現在都仲係估緊盤棋點下......

大約, 老美希望把北極熊和大熊貓瓦解為幾件, 而別一邊希望用震動全球供應鏈和突然性針對性去全球化, 來打沉老美這邊的全球經濟話事權.(還記起誰最先講極限戰? 連金融民生, 甚至供應鏈都攞埋出來講!)

嗱.... 這個是沒煙硝的戰爭, 是現代化戰略裡, 發揮到極限的表徵.

前幾年, 好多人講康波理論, 話捉著時機, 就能改變命運, 變成中產. 

我看呢. 如果2020年2~3月股市大跌市是康波理論中的機遇, 現在來緊的大時代, 將會一定是康波理論中的機遇了. 不單變成中產, 更是可能變成精英一族. 

不過, 今次難估好多, 上次2020年時, 一切都係照著歷史來估, 十分容易見到事情後果, 但係今次係兩隻有型之手, 在下著舉世大棋盤, 旁人就好難估了.

係咖, 後果難料了, 大有可能齊齊唔見錢, 荷包縮水, 就睇睇邊個唔見最少錢吧!

我JJ一手都係防守股, 不過, 都係唔見錢, 只是比其他人少D囉(連油股都跌呀). 看來我JJ可能要開始做些不同的事情了, 看看吧! 我應該點去因應當世2大勢力下的棋盤呢? 我真係受唔起人生大起大落呀!看看我D歷史知識幫唔幫到我吧! 如果係老美和熊貓大帝, 我會點下棋? 

現在所發生的一切, 絕對係這盤大棋的其中一步, 或為行這一步而作的預備工作, 絕對不是獨立的事件來咖! 看看幾時某一方會大叫 "將軍無棋"!

 



 

 


2022年5月9日 星期一

在加國投資, 唔一定要再用港人想法.

剛剛同個來左幾十年的唐人朋友傾計, 原來佢仲係好羡慕佢係香港D親戚有好多物業, 幅身家好疊水. 

見佢係加國咁多年, 都仲係用佢父母那些港人老舊想法, 以為加記D物業, 好似香港咁, 一定常常升, 升完仲可以再升. 家陣香港都唔得啦, 更何況加國?

我從佢身上觀察, 係加國收租, 係唔可以當係坐定笠錄, 一定要好進取! 唔可以俾D出租物業殘殘舊舊咁,  一定要管理得好貼身, 自己睇得好實先得. 

其實, 我JJ以前仲有出租物業時, 真係每日都去巡一次, 落手落腳半個小時咖. 

老實講, 一到自己手腳慢左時, 就要諗諗唔好再係咁了, 諗諗賣左D出租物業. 

就唔可以好似香港咁, D物業唔租都仲可以放空置佢.

我這邊都唔知有幾多舊屋, 空左好多年, 最後由市政府接管左, 再用來做市政辦公室, 或市政屬下的民間組織NGO. 因為舊屋的維修好Q貴呀! 好多人連地稅都無錢俾呀!

又見過好多舊屋, 因為無人賣, 俾市政收返來拆左, 移為平地, 變成草地或小公園.

 

 




2022年5月7日 星期六

當對"姓社"無忘初心時, 先富起來的時代完了, 世界就不再一樣.

為何咁容易就可以走上回頭路? 哈哈哈, 最合理的解釋..... 就係...... 一直有人在刻意隱瞞"從來都是姓社"的這個硬現實. 

誰人咁高明? 可以讓咁多聰明的叻人都忽視左這硬現實? 是否...... 逐鹿迷山, 巨大利益當前, 人們誤以為自己可以改變自己命運.... 由無產階級, 提升到中產/小資? 

實在認識太多加記這邊的同胞們, 他們跟我不同的是, 他們是改革開放的"先富起來"世代, 但相同的, 卻是我們心中的那棵"不信任"的心, 不過, 叻人去到邊都無問題, 都搵到啖食. 睇睇我JJ係加記咁多年, 雖然唔講得家肥屋潤, 但衣食無憂, 也是可以講得上的.

改革開放對 "先富起來"世代的人, 是什麼意思和機遇? 只是跳板一塊囉..... 用來跳出國門, 移民去外國嘛! 這個是一個悲劇, 諷刺著果D懶醒唔得醒的人, 自以為係救世者, 去救無產階級, 誰知道將來大鑊飯越來越縮水, 生活得越來越悲慘, 最後變成要食泥!



DOW個市? 我點睇?

星期三, DOW才升了近千點(仲係收市前1~2個鐘才彈起), 但星期四一講話加半厘息後, 個市就又跌返近千三.

好明顯, 星期三俾人夾高, 引人入市, 儲夠子彈, 之後就星期四夾返低, 仲要趁勢拉低D非指數成份股! 下幾次升息時, 可能都係會咁.

好明顯地, FED講加2~3次半厘, 再加幾次1/4 厘, 到3厘就差唔多. 實際上, 2~3厘息係好正常, 這樣才回復正常的融資環境嘛! 

再睇睇老美經濟指數, 就講話好強勁喎! 

所以, 我自己就不會太在意經濟衰退的擔憂, 返而我會趁住D人有心夾低D非指數成份股, 會緊慎地增持一些好公司股票, MARKET CAP 係1B以上的中型公司, 長線PE係15以下, 長線股息係3~4%, 這樣的加股係我心頭好呀! 又如果大家等跌市時, 係1或2年最低位買, 咁樣增持法, 大家將來就會衣食無憂了.

都係果一句, D股票公司如果生意長有長做長賺錢, 咁先可以同佢天長地久了, 如果唔係, 快D飛左佢啦, 哈哈哈.....  去蕪存菁啊! 正如股神講, 賣走D無咁好的, 保留或買最好果D股票....


2022年5月4日 星期三

好後悔, 以前回港無去睇清楚舊香港係點!

今日的調景嶺已經唔同哂, 由海灣變成遠離海邊!

睇番當年紀事片, 才知道自己MISS左好多舊香港的事.

不過, 算啦, 我又唔果度長大, 更沒有係果度生活過, 睇睇紀事片就好了! 

 由得...... 往事逝如流水去, 今天還有明天事. 清折調景嶺之前果一年前, 我有回港, 只是移民加國後, 新生活令自己陀陀擰, 真係無心情去睇下.



最頂癮係請左台灣張艾嘉來做旁述, 又請左周潤發和陳玉蓮來講以前往事, 聽清楚陳玉蓮講話, 佢真係有少少鄉音喎! 同阿發哥仔一樣! 唉, 現在唔會有人夠膽請張小姐來幫手了, 唉...... 真係好稀虛.




2022年5月1日 星期日

移民後, 要盡快達到當地資金獨立!

其實都唔洗等上邊, 停辨對外投資公証服務, 一直以來上邊每個人都外匯管制, 每年5萬, 仲要證明係基本生活所需, 而唔係用來買樓喎. 

停辨對外投資公証服務呢, 其實係阻慢大型外資和企業資金出走.

不過, 又要諗返轉頭, 上邊開始咁做, 突區會否有樣學樣? 

當然係突區, 係唔洗投資公証服務, 但..... 也可以設置其他資金出走的關卡!

所以大家要有心理準備, 留意了..... 將來投資移民會否受影響? 到涉海外的移民, 再轉移資金會否受影響? 移民後深陷問題D人, 會否更深陷問題? 

如果大家現在還未放哂D錢係外邊, 要依賴由突區匯出D錢, 大家投資上, 就要步步為營, 唔好冒太大風險了.

PS:

昨天行過河邊, 又見到堆起沙包陣, 都無乜點落雨, 水位就已經差4-5呎就浸到街別一邊的屋了, 連揼水機都已經放左係果度. 查實已經較秋天時, 水住已經漲左十幾呎, 如果再落下雨, 就一定又浸哂河邊D屋.
 
影完相後, 看到街別一邊的屋, 有個貌似同胞的女人和小孩, 上年仲係西人住, 今年變成同胞住了. 佢地講一種我聽不明的方言, 後來我才想起西南那邊方言(希望他們不是同水和雲有緣吧), 真係唔敢講這個殘酷現實俾佢地知道 - 今年D河水極大機會浸入佢地間屋. 
 
我這邊, 2016/18/20年, 浸左好多河邊地區, 唉, 真係好似每2年浸一次咁, 今年河邊D人又準備水浸了. 
 
在2021年開始, 就有好多屋被定為在Flooding Zone內, 即是好大機會會浸, 上年才見到有間被定為Flooding Zone內的屋, 掛牌來賣呀. 任何人唔知頭唔知路, 貪平買左, 咁就大檸樂了. 上邊講果個同胞, 原本以前仲有國內條水喉射住, 但現在無得地下咁運錢出來. 佢地就真係大檸樂了.
 
所以大家移民來到, 買屋唔好貪平, 當然有些平屋仲可以靠裝修攪掂, 但先天性有問題的地段, 就無得攪. 通常我地香港人買屋唔買近河邊(蚊虫會多好多), 唔買對住大斜坡. 
 
但很多同胞佢地係國內住得好近河邊, 佢地唔為意這邊水浸可以好大鑊. 國內D屋係用磚和石屎起(水浸就搬野上樓囉), 但這邊D屋係木結構, 而且還有地庫, 地庫內D完成牆身係灰板