Zara 褲一條, 最後都無買!

嘻嘻嘻嘻...... 各位, 我JJ一向都好頑皮, 到左現在都係呀.

前幾排, 得閒無所事事, 初頭諗住去齋睇衫褲唔買咖, 不過俾我見到這條 ZARA "男裝"褲, 真係男裝來咖嗄, 唔係女裝呀!

大家估下幾多錢? 係11蚊加仔呀, 

噢, 我又受到好大的誘惑啦, 哈哈哈, 點都好, 入去試試先, 睇睇岩唔岩身先! 結果係......

呵呵呵岩到漏油呀, 怪唔得賣剩係度無人買, 真係無乜西人岩著到上身呀.

大家女網友, 係街上見到條咁樣的褲, 會否吹口哨先? 呵呵呵..... 

不過呢, 這條褲係無拉鏈, 去廁所疴殊殊時, 要解5粒好難解的牛仔褲鈕呀, 唔係一粒呀, 大家著牛仔褲時, 果一粒鈕有幾難解, 大家都有哂經驗了.

諗多一陣, 都係咪攪我了, 點平都無用, 而且, 買到番去, 我都未必夠膽著出街呀.

今天去做義, 裝填沙包呀!

大家都知道, 我這裡溶雪+落大雨下, 河水泛濫, 河邊D屋被水浸啦!

好啦, 我剛剛出去幫手裝填沙包, 用來放係受水浸的地方, 來阻擋D泛濫河水流入河邊D屋.

情況.... 大約係係市政府的大型停車場裡, 30噸車頭, 車沙來倒堆沙係地上, 眾人好似我JJ咁, 就一湧而上, 用鏟剷D沙入膠袋, 再用鐵絲封口, 再之後堆係木棑上邊, 再用剷車叉起木棑, 搬去D貨車上, 車去河邊, 俾D人堆係屋前防水浸入屋. 

我JJ當然唔會落到去河邊浴血戰啦, 我好明哲保身咖嘛, 而且我入水即沉喎, 都係唔好攪我了, 命仔尤關, 我都係剷剷沙, 填填沙包, 頂多搬D沙包上車囉, 就係咁大把啦. 

初頭, 同我一齊裝填沙包果個鬼妹, 自發奮勇, 竟然去河邊打浴血戰, 嘿, 有時, 這個係民族性不同的使然. 大部份人見到我係唐人去幫手, 都已經感到我同其他唐人好唔同, 所以呢, 都係果句囉, 唐人係加記混得唔起, 係有一定的公眾形象因素. 

有一事, 原來我體能真係同D西人有很大距離呀, 當我同班西人一字排咁去傳沙包, 原來佢地好好氣咖, 我傳到第5-6分鐘, 我發現自己開始要慢落來啦.

這些大型義工活動, 當然不能少了麥當當來派免費咖啡, 呵呵呵, 不過, 麥當當太CHEAP了, 得咖啡, 無綠茶, 我JJ飲唔到咖啡咖喎, 會手仔震咖.

兒女自殺, 與其怪社會, 不如......

唉..... 不知道是現在資訊發達, 還是現在才發生這些輕生自殺案.

話說, 前幾日, 係上海盧浦大橋上, 發生兒子從母親車裡走出, 一躍跳下大橋自殺.

這個是任何一個父母的惡夢, 尤其現在D人, 只生一個到二個. 

無獨有偶, 聽聞我這裡4月初都有華裔女大學生, 臨畢業前跳河自殺. 就引起這裡唐人街很多亞媽亞太的擔心了, 擔佢地D仔女有樣學樣喎, 因為自殺這風氣, 係可以互相傳染的, 就好似張X榮當年咁.

前天係餐館食飯時, 就聽到有亞太講, 唔好阻住D女拍拖喎..... 會死人喎..... 嘿, 咁, 我JJ係果間華人教會裡, 咁多年都拍唔成拖, 我唔係要攞刀去斬人? 哈哈哈.....

我JJ發現呢, 家陣D人無乜責任感.... 兒女在父母撫養下, 不是對父母有責嗎? 在生兒女時, 女方又應否認為為男方而生兒女嗎? 男方欠了女方嗎? 女方自己沒有責任嗎? 

多年來, 我JJ都一直覺得, 我到老年時, 係唔洗人來幫我的, 尤其現在咁發達, 又有安樂死, 而我自己也不希望去麻煩別人. 所以, 結婚後是否生兒女, 都只是女方自己是否有需要, 如果女方好似我JJ咁注意健康, 現在又已經經濟獨立了, 實在係唔需要養兒防老. 所以, 我覺得, 生兒育女, 係個對社會的責任, 是個延續人類的事, 或延自己基因或氣質的事. 兒女到長大後, 不來麻煩自己, 又可以為社會盡點力, 就已經合格了.

很多時候, 男方計劃生兒養女, 都只是為到女方老紀大時, 有個寄託, 男方自己根本係唔需要生兒女的. 有就好啦, 無也不強求.

只是, 由我年青開始, 我見D人就係咁無責任感, 以為自己係世界中心囉! 我一見到D女性, 誤以結婚只是為到男方, 要男方千依萬就, 咁...... 那就更不用想這些女性了. 

偏偏我去果間華人教會D牧師, 就係利用女教友這些錯誤想法, 來壓我. 我信神, 一直忍佢地, 直到我大約快過適婚年齡時, 祈禱去問神, 這些人仍舊阻住我拍拖, 我應該點做? 祈禱的答案就係.... 咪再理會這些人. 

我可以想像, 那華人教會裡D阿媽們, 現在一定個個都好擔心, 不過, 從她們一開始拍拖, 就已經注定她們日後的兒女會走上這個令她們驚恐的路上, 是她們自己一手做成, 與人無尤呀!

剛剛滿地可市長宣報緊急狀況令

噢..... 大鑊了, 今個週末又落大雨, 現在剛溶完雪, 地下泥土完全係水, 再吸唔到雨水, D雨水直接全部茖落哂落河, 預計星期一左右, 河水會高, 到時真係唔知道會再有多少地方都浸埋.

所以, 剛剛滿地可市長宣報緊急狀況令, 令到D消防可以強制居民由家中撤離..... 

今日再去水河邊睇, 前幾日都仲係浸少半條街, 現在浸左半條, 都唔知道到下星期一時, 會否浸洒河邊全條街, 直浸到出大街主幹道.

我現在估, 今次可能同2017年果次都係一樣咁高水位, 一樣係浸到咁大鑊囉.

雖然我這裡河邊水浸, 但係風景都仍然OK咖.

這裡同胞的環境....

如果話以前加記D唐人餐館佬生活唔好, D餐館佬好唔掂, 唔好嫁俾D餐館佬. 咁..... 現在D同胞呢, 就真係更唔掂了.

以前60-80年代, D香港餐館佬, 申請加記移民時, 都可能老作少少大話. 不過, 2000-2015年前放得最多過來果班同胞, 好多人申請的資料中, 大部份都係老作. 噏佢係專業人仕呀, 大學碩士博士呀咁啦, 又或噏佢地有多少多少錢係袋, 過來加記頭10年, 生活都無問題.

咁, 都可以知道, 人地加記移民局唔再批餐館佬過來移民, 就係因為餐館搵唔到食. 點知果班同胞用假理歷過到來, 見以前班香港餐館佬有生意, 就去跟住班餐館佬打工. 

不過, 今時唔同往日, 餐館無得做. 我移民來時, 加記移民局已經唔批D人來做餐館. 果時1個碟頭係貴過最低工資10-20%左右, 在埠仔係50-60%. 

現在碟頭價錢仲平過最低工資20-30%, 開餐館D香港佬已經係越撈越霉, 這班同胞跟住餐館佬去撈, 打老散, 嘿, 生活點會唔差? 點會唔覺得俾人剝削? 

這些男同胞大多都係一星期去餐館打1-2天枱底唔報稅的工, 之後, 就摺埋屋企打機, 慢慢搣, 搣到無錢, 又再去打老散囉! 這些人就有如國內果班盲流咁, 唉, 完全係天性的使然. 

去片講盲流.... 國內城市裡的盲流係點生活? 三和大神就係樣板了, 美其名, 三和人才市場, 其實係打老散的中介所, 係邊? 就係過左深圳河不遠的龍華區清湖地鐵站旁, 落馬洲過關後搭4號地鐵, 就可以直去到, 睇GOOGLE MAP, 就知道點行過去.

PS: 試想想, 這些事發生在加國華人當中, 將會製造多少人與人之間的衝突, 我JJ真係無眼睇了.

學生有權唔聽書, E臣無力可回天!

哈哈哈, 我都唔知道這句野, 應該歸納為乜乜名堂. 

話說, 我地阿E臣, 佢去公開大學向學生講話, 但見到D學生唔聽書, 係度玩手機, 咁, 佢就黑面請學生離場喎.

不過, 以我JJ記得呢, 以前前代的學生, 好多係佢粉絲, 上堂睇手機追佢D消息, 好平常姐, 人地正牌教授講師, 都未好似佢咁"專橫"喎, 哈哈哈..... 現在係咪....... 冤有頭, 債有主? 

好啦, 我JJ唔係涼薄的人, 其實阿E臣又咪咁小氣啦...... 不過, 可能佢嬲唔係因為人地唔聽佢支笛, 而係現今的學生哥, 再唔當佢係偶像, 更無左那份忠粉鐵粉的味道, 令到佢將來同老闆傾合約時, 議價的能力大減啊! 

加記魁北克水浸都唔係好嚴重姐!

係啦, 係啦, 我這裡魁北克又水浸河邊了. 

今次無上次2017年咁嚴重, 河邊浸半條街囉, D屋就慘D, 佢地下年D保險費一定加到飛起呀! 浸足2年, 以前係70年一遇, 現在2年一遇. 

咪話我JJ唔單聲, 我地唐人買屋, 唔好學西人呀, 咪買咁近水邊, 最少要離開正常水位50呎高的地方, 才好買呀.

有網友問: 以前爲什麽沒這樣的問題? 係咪下遊河道淤堵?

其實呢, 每年溶雪時, 一直都有這些問題, 不過沒有這幾年咁般大鑊囉. 

以前沒有全球暖化, 滿地可冬天天氣更冷, 更冰天雪地, 冬天很少下雨的, 但今年和2017年的冬天都下了數場大雨, 下雨後D水透入到泥裡邊, 又大寒結冰, 在地面以下到2-3呢深, 結成厚冰層. 

現在天氣回暖, 泥土表面溶冰, 再見不到冰了, 只是泥土下面幾吋到幾呎下, 仍然是在結冰. 

現在再落大雨時, 泥土下的厚冰層, 就阻住雨水進入泥裡+被泥土吸收, 雨水變成完全從泥土表面流到河裡, 所以, 河水才會暴漲. 

等暖多半個月, 泥土下的冰層溶了後, 再下雨時, 雨水就可以直透入泥土下, 就唔會一落雨, D雨水就流哂落河, 河水就不會暴漲.

最後, 還有一個重要因素, 就是下游有水霸, 可能初設計時低估了溶雪時河水的流量, 水閘唔夠多, 一時之間唔夠快排走D水囉!

最上一幅, 係大雨來前影影的, 己經好漲了, 下邊3幅係水浸半條街啊!, 當地人要著水鞋出入. 頭先再去河邊睇, 水位又高左, 封路的範圍又大左, 噢.....

好啦, 我這裡復活節有乜?

其實, 都係悶死人呀, 唉, 不過香港都唔會好玩去到邊啦, 同加記差唔多, 都係大家放下假, 休息下咁囉!

係啦商場有D活動俾小朋友, 

外邊有少少佈置咁囉! 一個字悶呀.

連感恩節時的收成都無, 只有幾朿乾左的松枝.

從"安心事件", 看出人性的謬論和偏見!

"安心事件"裡, 大把人走出來評論, 可以見出人們八掛, 和喜歡做"無牌裁判官"的人性.

只是, 也見到很多人的謬論和偏見囉....

1. 貌美 不= 喜歡亂攪男女關係 - 是的, 天生貌美的人, 會受到更大的沖擊, 只是由細到大, 習慣左, 就已經可以絕緣了. 最容易頂唔順果D人, 係果D唔係天生果D, 整容整出來, 化妝化出來, 由他們一開始變靚, 就是想用來亂攪囉. 再者, 天生貌美的人, 特別喜愛乾淨, 唔會咁容易跟人有身體接觸, 特別珍惜自己的健康和衛生. 嘩, 咀對咀? 唔認識對方有2-3年, 就不會讓對方咁做啦!

2.外國長大 不= 性開放 - 外國的生活和環境, 係保留和尊重人們的個人性和獨立性, 尊重別人跟自己不一樣, 不以自己一己之見, 來強加於別人身上. 跟別人亂攪的人, 大多都是破碎家庭, 在一個完整家庭長大的人, 大多都不會亂攪. 多年前, 真是曾經有幾次, 我有西人朋友凝視住我, 之後跟我說, 計劃去中國領養個小孩回來. 大家可以看出, 如果某些西人睇住某人, 不是因為性, 而是因為美. 

3. 公認的一對對明星 不= 真實係一對對 - 很多時, 係佢地背後的經理人和老闆形造出來呀, 如某男藝人咁, 獨男(唔係宅啦)一個, 好似我JJ咁, 過左適婚年齡, 就開始唔多習慣有多個人係自己身邊, 就會變得好"獨". 只是好多人會唔抵頸, 一定要整到一對對, 好似打麻雀或挫大D咁! 其實, 造出一對對的效果呢, 只是整出來俾人睇! 

PS: 當然, 大家都睇到, 教徒真係唔會跟婚外情絕緣. 我以前係那華人教會裡, 都時不時聽到有夫婦面對這些問題. 我一定唔會加入, 去做"無牌裁判官", 這些事, 留番俾受過訓練的牧師來做, 這些係惡哽野, 我JJ自問無咁把炮了.

只是我實在懷疑D牧師的輔導, 是否能起到作用? 解玲還須系玲人, 雖然沒有解決不了的事, 最怕不想去解決問題+不想面對現實的人囉.  尤其, 教會裡很多人, 是有一棵玻璃心呀, 不但不面對自己的問題, 還要自義咁去評論別人的事, 把自己和別人問題複雜化囉.

大家網友, 我有守承諾咖! - 十年敗家創舉

好啦, 我仲記得我那10年之約啊, 我當時講, 如果網友教我影相, 我將來影到靚野, 就係網上無限量登出, 我有坐言起行咖.

只是.... 嗚嗚嗚.... 我前年買果部航拍機, 因為係零下多度起飛之下, 鋰電池係低溫下突然失靈, 上年初冬裡的一場急墮意外, 由幾百呢空中, 急跌落初結冰的湖面. 

初時都見住部野係湖面咖, 只是湖上初結冰只有1吋冰, 而冰的厚度唔夠10吋, 部機就算無跌爛, 都不適宜行出去拾番返來.

最後, 幾個鐘後, 初頭見到部航拍機慢慢沉DD, 越沉越多, 終於完全沉入湖中, 個感覺完全好似以前細個時, 睇果部"大和號沉沒記"咁.

噓, 攪到我成個冬天都低低地, 始終見到D錢錢跌左丫嘛..... 再無心情再添置D新野, 唉...... 慘呀!

最近才有心情走出幽谷, 走出去昅昅後, 發現有新野, 添置了 GIMBAL, 比香港鴨記仲要平, 第二樣, 係一部3/4" 可換鏡頭相機, 雖然比全相片要細, 無咁正, 但對於我來講, 已經好正了, 跟機有14-45MM, 45MM-150MM, 再買多支100-300MM, 有諗過買支100-400MM, 但係好貴囉, 我都係實淺我的承諾之嘛, 唔係出去搵食, 就算了.

支住上期先, 去片.....

現在,我較傾向買些可以自行更換保護鏡的相機, 好似我部舊G-12咁, 果次係美國COLORADO, 急住影野鹿, 撞花左個鏡頭, 後來要再買過部GX-1, 唉, 敗家呀!

好心妳啦.... 放過別人 = 放過自己

大家都察覺到香港那件"安心事件", 咁就有好多人走出講野喎! 

其實, 言論自由下, 都無乜所謂, 只是就不要再在人家傷口上灑鹽, 太無德無品了. 

人家記者會都開完了, 就算當事人表現出的態度, 點唔合你滿意都好, 咁都係人家兩夫妻和另一對男女的事. 

好啦, 你受到欺騙了, 誤以為人家好純品, 用左好多錢去買演唱會飛! 我明白的.

係囉, 咁多港女港男係度講"安心事件", 點解我會咁留意這港女? 

皆因為佢曾經走來撩我講野. 果次我回港, 係沙田新城廣場百記度買格仔餅食, 佢走埋來溜我一齊買, 一次買2個, 會平D. 好啦, 買完就大家田雞過河, 各自走人, 佢竟然同我講: "先生都係平一蚊咋喎!" 暗示要我問佢交換聯絡方法. 唔, 其實, 比佢更主動的女性, 我還見過不少, 只是果日, 又係我留港最後兩天, 都無乜機會再同佢深交, 我就笑一笑走開了. 

後來, 係YOUTUBE上見番佢, 原來佢係網紅來咖, 不過, 佢講D野又幾"嚇人", 曾經有題目講"濫交", 仲成日出賣佢D朋友私隱, 係網上講佢朋友D私事. 真係慶幸果次無留底我的聯絡方法, 少得麻煩去打發這些人走開.

中醫理念現代化

昨天講開果個扶陽中醫師講, D唐人移民來加記後, 最先有的問題, 係肺功能最先退化. 

其實, 我JJ觀察呢, 唔只加記出入室內時遇上空氣一冷一熱, 令肺功能受損, 也因為加記屋內因為長期閂窗, 空氣唔流通, 或空氣質量唔夠新鮮. 

我家就比較好, 有空調機, 按時把外邊新鮮空氣一點點輸入來呢, 由室內氣管, 傳輸直達全屋啊!

不過, 仍然有地方需要注意, 就是空氣中有塵, 尤其夏天更有花粉, 這些野會積聚在空氣管內. 久而久之, 就會令氣管生霉菌, 從而令人有過敏和花粉症. 

我以前是用靜電吸塵機, 只是我仍然覺得唔夠好, 再加上靜電吸塵機一舊了, 功效大減. 我後來改左用紙的空氣慮網, 不過就要時時去換的, 一見到佢灰左色, 就係差唔多時候去換左佢了.

圖中的紙空氣慮網, 是一新一舊來對比, 冬天用左個半月左右, 就可以咁灰了. 因為冬天時, 外邊全被冰雪幅蓋, 而無花粉, 空氣已經係十分優質了, 都可以咁灰色, 夏天時就要更快換. 

還有, 紙空氣慮網是有等級之先, 慮走越微細的東西, 越係貴, 所以, 我冬天會用些平一D的慮網, 夏天才用些貴D囉. 

應對加國水土/天氣/環境, 衍生出來的風土病.

前幾天, 去聽中醫講座 - "如何去應對移民加國後所產生的各種疾病."

我去到之後, 才知講者係出自一門較新(200年左右)的中醫學說..... 扶陽中醫, 主旨是"謹守病機" - 追本探源去了解生病的原因", 所以, 佢地主要思考著, 人們移民來加後的生活/工作/環境/水土/天氣. 

講明係"扶陽", 即係注重陽氣啦! 強調扶陽 - 以火立極(用重猛之藥), 扶正護陽. 

噢, 以我JJ的有限中文呢, 即係話..... 開D藥性燥熱的藥來治病, 即係話, 這派中醫學說的負作用是會令到身體更乾, 更容易出血囉! 最明顯的, 就係會流鼻血囉, 即係話鼻咽癌和大腸癌就可能的負作用, 比效益更大囉! 宜於小心小心求醫了.

個講員講左好多同人嗌交D故仔, 我等左成半個鐘佢才入正題, 只係講左15分鐘, 又再唔講正題了. 不過, 我都收到D堅料.

佢話, 加國出入室內外, 冷熱交替, 冬天長, 寒氣重, 陽氣耗損而寒氣入體. 因為空氣冷, 五腑最快傷的是肺. 

佢叫人: 1. 平時多保暖, 忌食生冷冰凍飲食; 2. 仲叫人早睡早起, 因為晚上陽氣內收, 回歸本位, 才會養到陽氣, 不至於耗損, 天人合一, 日出而作, 日入而息; 3. 收心養性, 心理質素要好; 4. 少縱慾, 會傷脾腎喎! 

佢斷定加記D人係陽虛, 提議加記D人要: 1. 平時適當運動; 2. 多曬陽光; 3. 少飲食寒涼食物. 

我自己就一定每日做一小時柔軟體操, 平時在陽光下出外步行半小時, 少食日本魚生, 飲果汁都叮少少到室溫, 食生果就由雪櫃攞出來放一陣才食囉, 多飲暖茶, 少飲汽水.

PS: 其實, 我JJ認為, 唔一定係陽氣十足的人, 才會長壽健康咖, 以我JJ一向所知, 係要陰陽互濟, 有點似中國道家思想, 物極必衰 - 這個道理下, 間中有點小病小痛, 是一件好事來咖, 因為身體有向上向下的循環週期, 週而復始, 沒可能全無一點小病小痛嘛?

有時, 太在意於日日都咁龍精虎猛, 唔一定係好咖. D人咁諗法, 一去睇中醫, 就會覺得傳統中醫無料到, 會要求開D重藥猛藥, 相反會對身體造成傷害呀! 也可能, 這樣就催生了扶陽這門醫藥.

不過, 開猛藥呢, 很多時, 都可以為某些未期病人來延續一段時間生命吧! 只是病人本身是否舒服, 又別外一個題目了. 這個跟西醫" PATIENT'S WELL BEING"的理念, 有點不同啊!

有點十分有趣, 這派的發起人, 大多都是在四川雲貴廣西一帶,  尤其是天下第一燥熱窩的成都. 這些地方出名係出產大黃大熱的中藥材. 地道的中草藥, 也成了催生這門學說的其中一個因素. 

 最後, 我懷疑講果條友呢, 教育水平很低, 不單D煲冬瓜內含有大量粵語成份, 而且講左粒半鐘, 入正題的時間只有15-20分鐘, 其他的, 都係浪費人時間. 

大家睇睇, 我JJ乜都唔識, 第一次接觸, 聽完佢講, 都可以齋UP到咁多野出來, 就知道一個人讀書多少少, 係幾重要啦!

昨天與今天

逝去種種昨日經已死, 沒能挽回來了.

大家看完後, 可有同感嗎?

莫非, 這是STAR TREK? 升高奇遇中的閃樸現身?

加記較北的地方, 出現了這個奇景呀......

似唔似升空奇遇裡的光波輸送?

單身男不一定宅, 宅男不一定單身!!!

我JJ呢, 最憎人地話我係宅男, 因為宅男的意思係......只會打機, 無鬼用, 連自己生活都成問題, 一味靠屋企人.....

我JJ一向都唔打機, 坐係電腦前面, 都只係上BLOG打字來齋UP下咁囉.

我退左休之後, 都無宅係屋企, 除左冬天外邊冰哂+路滑, 大多數情形下, 都係會走出行下, 而且還盡量跟人有交流. 

只是我屋企唔係唐人區, 又唔想揸車揸個幾鐘出去, 見D無無謂謂的同胞. 

以前, 仲會每週3次去參加那華人教會聚會, 我路上來回, 加埋送人接人去教會, 大大話話都每次都3-4個鐘啦, 這些教會屬靈人仕唔封個榮譽會友俾我, 我都從沒有什麼, 還變本加厲要我全天候侍候這些人,我都仲未話佢地涼薄呀.

現在每週去一次西人教會, 仲係去唔同的西人教會, 只要一句唔岩聽, 就唔洗旨意再見到我, 我立刻寫這西人教會入我黑名單, 仲會不定期向華人社區發佈, 這黑名單的內容. 哈哈哈哈..... 

講開宅男呢, 以前那華人教會有些好麻煩的女教友, 人地拍拖, 就來同女方講, 果個男方點點點...... 我初時有點反感, 後來我才意會到, 原來佢後悔嫁錯左俾佢地老公, 因為佢地這些老公, 大部份都是宅男打機不理家庭咖喎! 歸因到底, 問題只係係佢地自己身上, 佢地自己有眼無珠嫁錯男囉, 仲把佢地D錯誤觀念, 灌輸俾其他男男女女, 希望這些人到了今天, 有著深切的悔過.

不過, 這些女教友竟然來話我唔返教會, 這些人真係瘟疫有頭有主, 靈靈聖聖無走甩, 唔去佢地那華人教會, 就係唔返教會? 實情內裡係..... 因為這些錯誤觀念的女教友以前亂來, 佢地教會裡慮積左好多中女(我係唔會用(盛)女或X犬女王這些侮辱性字眼), 成群中女日日來怨其他人有兒有女, 現在這些中女自己孤苦無依, 要其他人D兒女將來幫手照顧這些將會晚境悽涼的中女, 佢地驚起上, 就一定要我回去幫佢地.

嗄! 乜咁都得呀.... 早知今天, 何必當初? 當年煽風點火的牧師同佢老婆, 當然一退休就閃左人啦, 留番這班瘟人係間破教會裡自生自滅.

加記D雪, 不是可愛呀!

大家可能會認為雪係軟綿綿, 好好玩的東西, 不過, 雪落下來時, 未必一定係好似綿花咁咖, 可以係一粒粒的冰粒來咖! 再加上落左來後, 會吸左空氣中的水份子, 變成越來越重, 越來越硬. 

大家睇睇, D雪落係商場上的屋頂後, 係會點? 突然間, 好似雪崩咁, 嘭一聲就滑哂落來, 好彩果陣下底無行人, 如果唔係, 少則斷骨, 大則斷頸呀!

所以, 就要請人來清雪呀, 不過, 唔可以搵個人爬上去清, 因為除時會嘭一聲D雪崩左落來, 就會連人帶雪咁沖落20~30呎下了. 就要用吊臂送個人上去, 慢慢一DD咁來清呀, 咪話唔煩死喎!

我地上一代D港燦以前話, 加拿大D人好懶, 搵食好容易! 其實, 人地唔係懶, 而係做乜都諗左安全先, 而且有時, 做老闆的, 唔可以唔親力親為咖, 睇睇老闆自己著住皮鞋上去視察呀, 咪話唔係"力不到不為財呀!"

所以, 大家可以意會到, 我JJ可以咁後生退休, 都係因為親力親為, 一早就明白到, 力不到不為財的道理, 也所以, 勸勉大家, 年青時要勤力D, 俾心機一D, 而且唔好理會別人講D乜, 自己做好自己的正事.

PS: 大家可能會問, JJ 你有出租物業,  洗唔洗上去屋頂睇? 

係要咖, 不過, 唔係冬天有雪時, 因為出租住宅物業面積細, 積雪唔會好似商場咁多, 唔怕D雪跌落來責親人囉. 

只是屋頂驚漏水, 最初果幾年, 每年夏天我都要爬上去睇睇咖. 後來買左個望遠鏡來睇, 因為我物業屋頂是斜的, 可以由遠處睇到, 都勉強估到有無甩漏, 才決定要唔要請人回來再換過新的. 再之後, 我再買左無人機番來拍屋頂, 就唔洗咁麻煩了. 

從國內爛片的數目, 來看經濟發展.....

係咖, 當我地聽到"有錢就大爺"時, 當我地聽"有錢就任性"時, 唔理後果咁浪費資源..... 

即係佢地D經濟效益好差囉!

最近, 聽說有人整左個"爛片指數", 指出國內爛片的比率已經達到歷史性高峰喎.

不能否認, 國內很多有料影藝人, 只是當一切資源都無無謂謂咁浪費了, 拍出來都無人睇, 純粹係拍來養住D員工, 拍來防止整體行業, 走出來上訪, 走出來製造公眾不安.

我們可以清楚知道, 地動山搖的風雨正在允讓當中. 

在強國玻璃心下, 香港的引渡法

大家係香港都見啦, 比我JJ清楚很多, 香港一話要立引渡法, 個個大商家都騰騰震, 其中阿大瘤佢係瑪交俾人通輯緊, 就出到聲來抗議.

其實, 佢地驚係有原因, 因為強國玻璃心, 把國內某些人無限地描繪成為受害者, 把一眾港燦描繪成騙子. 

係國內咁多騙案, 無日無之, D人怎會咁順灘俾人呃咖?  

嗱! 我係加記, 就親眼見到D大6人點咁玻離心了, 其實, 他們口中說老移民騙新移民, 說穿了, 就是說加記香港人騙大陸來加記的新移民囉! 其實, 現在資訊咁普遍, 上網問下人, 再去下D講座(全都煲冬瓜的), 就不是唔會俾人呃囉!

我父母初移民加國時, 我因為還未完成學業, 未能伴在他們身邊, 幫他們避開騙子, 而且, 以前資訊唔發達, 真係要自己一步一步咁走過來, 無人問咖.

當時我父母俾經紀點左去買一個無利可圖又殘舊的出租物業(收入不抵售價D存款利息和物業開支), 話幫我父母睇, 隔幾個月後就把鎖匙丟番轉頭. 其實, 我都無再理佢, 我自己事自己攪番掂佢. 只是, 後來卻發現這經紀去我同一間教會, 之後, 就有很多關於我的壞話. 最後, 這經紀欠債, 同別個女人走左佬, 抛妻棄子.

真正做實事的人, 就算被騙, 都無謂花時間來同這些人磨菇了, 無謂同佢死過呀, 做自己實事囉!

今天睇這班國內同胞, 一睇就知道佢地的玻璃心. 我並不是說他們被騙是活該, 只是他們在國內又少騙案嗎? 為何這樣大反應呢?  既然現在咁多資訊有得問時, 佢地都唔花時間去問, 被騙後, 咁就應該沉著應對被騙後的殘局, 想想如何收拾局面, 有的是官方網上資訊.

在這種玻璃心下, 一眾港人曾經係係內地做過生意, 又或賣過樓的, 真係有得震無得睏, 越同大6曾經或仍然有往來的果班港燦, 越係驚到無覺好睏.

我的初心 - 得閒多搵銀, 無事早D抖, 常來照照鏡, 莫使暗瘡生.

係咖, 退左休後, 真係多左同人嗌交, 可能這個就係"退休後綜合候群症"了, 呵呵呵......

好啦, 都係時候UP UP 我JJ由後生開始時, 我的初心了......

係咖, 有閒情逸緻, 咪用來同人嗌交呀, 去搵多D錢錢唔好咩? 當然, 錢不是萬能, 但一個如果連錢都不能去駕馭, 不能去規畫的人, 談何有能力去處理更複雜的事呢?

岩咖, 咪扮到自己好忙咁啦, 咪扮到日理萬理, 成個亮明諸葛亮咁. 無乜事做, 唔係早D上床睏覺豬豬囉! 車, 到世界有需要我時, 我先出來獻世亮相啦, 現在世界無需要我JJ嘛, 咁我唔係摺埋一邊睏下覺覺豬囉. 我健康好時, 起碼可以減低社會上對醫療資源的需要, 減少醫護人員的工作量嘛!

嘿, 我真係因為照鏡, 俾人罵我係外貌協會會長喎! 唔..... 成班都係蠢人, 照鏡除左係睇自己乾唔乾淨, 儀容整唔整齊外, 仲係睇埋自己的身體有D乜野要注意. 例如面色咁, 面色唔夠紅潤, 就要小心了, 可能係大病的先兆, 我就係有個阿伯舊同事, 放工時都仲見佢行得走得, 仲同我雞喙唔斷, 但面色暗沉不單只, 而且還面帶晦氣, 結果佢果一晚晚上就中風後往生了. 又如果佢有留意下身體, 注意下自己面色, 就唔會咁快去左囉. 

好啦, 其實做個太平盛世的人, 有福就要識得享, 唔好成日以為自己係世界再造者, 世界救贖者,. 無咖, 做人呢, 唔好攪串個PARTY, 唔好破壞世界, 間中有D咁多多的貢獻, 就已經OK了.

加國華人自殺 4

原本昨天那篇就講完左"加國華人自殺", 但之後我係加記本地網上, 見到有人講, 佢上年係加記正式打左一個月工, 之後就走左出做..... 那些唔俾稅局知道的檯底工, 現在佢交左報稅單後, 咁加記稅局就退左千幾文俾番佢, 佢羅出來係度曬命.

咁.... 我就感到, 我需要再講第4部份了, 因為這人這故事, 正好貼合那些自殺者最初的人生軌道. 

很多人誤以為加記福利好, 只是這些全都是溫水煮蛙. 政府怎樣好福利, 都是最低生活水準以下的福利, 加記政府希望給與國民的生活保障, 是有尊嚴有體面的, 但總是僧多粥少, 到最後, 加國政府當然會拿寶貴的公共資源, 去幫助最有需要的人, 而這些男人人在中年, 當然不在優先的名單上吧!

聖經講, 神幫助那些自助的人. 如果連自己都放棄自己, 那..... 加記政府真是不知道從何來幫助這些人.  

那些唔俾稅局知道的檯底工呢, 不是不好, 只是是散工, 人生像無主孤魂咁, 沒有一定的軌道, 今天做的, 跟明天後天做的, 可以完全不一樣呀, 日後人家只會請散工, 咁來請佢囉. 

但隨著這些人年紀越來越大, 或做得越來越慢, 越來越沒心機, 散工就會越來越少有得做, 甚至當事人越來越不想出外打這些沒有尊嚴的檯底工, 這些人的生活當然每況愈下啦!

跌到一個地步, 再加上, 欠下一身債, 就會走上自我毀滅的路了.

PS: 根本這些一切, 完全跟宗教沒有關係, 根人權也沒有關係, 完全是這些人誤會了加國的福利制度, 產生了那種不切實際的祈望, 甚至到最後, 產生受人歧視的錯覺來指控別人.

加國華人自殺 3

一講到自殺這些看似"生與死"的問題, D人第一個就想到宗教, 咁, 就有好多人走出來講, 宗教人仕要幫這些社會問題. 

其實, 我一直都好想講, 自殺/老年服務/子女成長這些話題, 不是生與死, 不是宗教性, 而是現世的話題, 視乎人們怎樣去做人做事, 自殺根本就係一個逃避現世的做法, 誤以為自殺就可以了結當事人自己不想去處理的人生問題囉! 甚至, 去信宗教, 就是想把自己不想去處理的人生問題, 轉嫁去給宗教/別人了.

我一直都同人講, 我係那華人教會裡, 一次拖都沒有機會拍, 皆因為D人想法錯哂, 上至牧師, 下至佢地第二代D人. 其實, 以我自己的條件, 不在教會裡找, 怎會找不到呢? 我咁講, 就係想講俾人知道, 係教會裡, 不是一個解決現世問題的地方, 相反地, 只會把現世問題攪得更複雜. 教會是幫不到那些自殺的人, 連他們自己老邁的父母都沒時間, 能相信他們可以做些其他什麼嗎?

曾經有些人說, 她們離婚之後, 時常想去自殺, 自從去了教會後, 人生就煥然一新. 我想, 皆因只是, 她們放下原本的人生問題, 甚至視而不見吧! 就好像身體有病有痛, 走左去食大麻吸毒, 唔去睇醫生咁囉.

原本我自己十分尊重別人, 別人有他們自己的人生和世界觀, 只是這些人不能把他們自己的人生問題, 無限放大, 投放在別人身上, 這個就會變成瘟疫, 把他們自己的人生問題, 強加給別人, 攪禍別人的人生.

其實, 這些教會裡不少的牧師和屬靈人仕, 是十分切合這些自殺者的人生, 根本就是因為他們自己不想處理自己的人生問題, 而走去信教. 入了教會後, 又唔知頭唔知路咁, 誤以為自己真係好了解那個信仰, 誤以為唔理自己問題, 就=屬靈, 傻傻下咁就走去做牧師, 做教會長老執事. 誤以為自己一己之見, 能夠幫助別人; 當別人不理會時, 這些人就自義憤怒起來, 好像要來鋤奸警世咁, 要替天行道. 

一切都是這些人對自己人生問題不負責任, 誤以為有了宗教後, 忽發的奇想全是正義正確, 之後就產生種種人間悲劇, 害了他們自己, 又害了別人. 

加國華人自殺 2

大家可能會問我JJ, 係咪因為華人自殺個案, 我就叫大家唔好移民來加記?

其實, 我又唔覺得我地港燦會自殺喎, 最少我這一代的港燦, 係唔會囉..... 

係加記的國內同胞呢, 男性容易自殺好多, 但女性又唔多見乜際, 相反, 我地係加記的港燦, 頂多精神出左事, 大多都係港女囉, 而港男係好少有事喎, 因為點都會找到D事來攪攪佢嘛! 無必要覺得生無可戀囉!

只是呢, 移民這家野呢, 最見人本身的真章囉, 係一個重大的考驗來咖; 而精神出左毛病, 又或自殺, 就係代表這些人根本係唔適合移民囉!

而且, 我地一眾港燦, 移民後唔適應, 大不了就回流囉, 無必要留係加記磨爛蓆咁慘呀!

我最近發現, 越係講得大大聲果D人, 越係最唔掂囉. 就好似D人越猛講人地自殺咁, 越係佢地自己有自殺傾向呀! 

就好似..... 以前那華人教會裡有人提倡老人服務咁, 其實都是他自己家中有這個需要囉. 不過, 我JJ自己覺得, 點解要相信別人有能力來解決自己的問題? 為何自己問題唔自己來解決呢? 人生走到最後, 什麼都要自己攪掂啦! 當然, 可以時不時出外, 看看加記政府有乜服務幫到自己部份問題,  自己唔係改變少少來配合囉!

仲有, 越係唔想人談論自殺的人, 其內心越係懼怕佢地自己有天會自殺, 我就係有個朋友係咁! 

觀察這些人人生最深層次一面, 都是他們埋首怕見現實, 今天沒勇氣去解決問題, 問題越拖越大, 越難去解決, 最後佢地會選擇自殺囉.

加國華人自殺 1

我這裡快要春回大地, 就有人出左篇文, 講佢做翻譯, 本地加國政府手中幾個華男客死異鄉的個案, 要找他來協調和溝通他們在中國的家人. 都係咖, 冬天已經令人低低地, 就唔多方便講這些硬話題, 等到春天才好講呀!

一個因為打"檯底工"時, 遇上工業意外而身故; 其餘的, 都是抑鬱而自殺. 但都有相同的地方, 中年/獨居/孤僻, 在中國時高學歷, 有著受人羡慕的工作, 志氣不凡, 被認定是社會高上階層; 來到加國後, 一事無成, 活在低階層, 甚至靠福利過日子, 有些死前更欠下一屁股的債和租金. 

我JJ有時會懷疑自己, 自己今天在加記撈得OK, 是人家俾面, 是人家社會制度下的利益既得者, 也有自己家人多年的苦心裁培, 可能我JJ再轉個別外一個環境, 可能一切都不再咁順利! 可能這些在這裡越撈越梅的男同胞們, 都是在國內受人捧著出來, 但一轉轉環境, 他們頭上的光環就不再.

不過, 其實, 我是有接觸過這些類型的男同胞, 發現這些人唯一最大人生快樂是打機, 而且仲可以日以繼夜咁打. 約他們出來大家交誼一下, 我請食飯飲野都無問題, 只是這些人做人..... 不知道佢地習慣左係國內受人熱捧, 還是打機打到自以為自己係天下第一, 佢地係世界的中心咁. 出來又遲到不特止, 找我出來幫佢地手, 就好似奉左旨咁. 

算啦, 佢地做人做到咁, 都可以預計到會有乜事情發生了, 與人無尤呀!

翻看40年前的獅子山下, 才發現人生原來.......

其實, UTUBE 真係好正, 可以睇番以前細時睇過的一些電視劇. 下邊套獅子山下已經有40年了, 可能我細時係香港睇時, 係已經重播左N咁多次了.

只不過, 時隔多年後重睇, 為何個感覺相差咁遠? 我才明白到, 為何小朋友總是充滿快樂? 為何成年人總是充滿著揮之不去的抑鬱和不安?

細時, 看這套獅子山下, 只是知道這套是香港第一套往國際參影而奪獎的電視劇. 

只是今天再看, 人生經歷多了, 才會睇到其中的婚騙案/過埠新娘來港前遭性侵懷孕/過埠新娘被威迫逃走再去騙別一個人. 

原來, 人不要去了解咁多事情, 心裡簡簡單單, 就會活得更快樂. 片中的地方, 是起慈雲山邨前的潦屋區, 居住環境差, 但那時看這電視劇, 卻沒有不快之感, 相反, 現在環境好了這般多, 重看卻帶回來很多的不快. 

不過, 如果我心裡簡簡單單, 唔諗咁多, 可能到現在我要捱得更辛苦, 不可能咁快就可以退休了, 又或可能我會好易俾人呃.

今日同人嗌左交, 呵呵呵!

唔知係咪我患左個"退休後綜合候群症"呢嗄? 以前係網上, 我真係唔會反駁D人, 因為忙住搵銀呀( 大佬, 我自知自己天生福薄之命, 真係咪捱到67歲法定退休年齡先來退休了, 快快搵多D銀, 快快唔洗做, 唔洗捱到身子差哂.) 

可能退左休後大把時間, 又唔知道係咪無乜野做, 所以才花時間去反駁人.

事緣係有人說了一句"佛祖留心中", 我就好心去勸人, 唔好長期戒葷食, 免得有骨質疏鬆, 我就講: "酒肉穿腸過, 佛祖留心中". 咁, 就有人出來罵我大不敬口中作業(還是孽?). 

好啦, 我再講全首詩: "酒肉穿腸過, 佛祖留心中, 世人若學我, 如同進魔道." 唔知係咪我學左D網紅果D壞習慣, 死都要嗌番生佢. 我就指出, 全段大意, 係叫人唔好東施效顰, 佛祖茹素多年, 但世人未必可以, 因為現在流行一個叫骨質疏鬆的病. 

之後, 就有人出來勸我, 話我想得太多了，唔好將簡單D事來複雜化.... 仲講.....  轉眼成空我們便如風而去, 何必自尋煩惱? 等等云云....... 

唓, 又唔好見佢走出來勸之前果條友, 話佢想得太複雜 - "菩提本無樹，明鏡亦非台，本來無一物，何處惹塵埃?"

噓...... 我就梗係唔執輸啦, 同佢講, 佛家說的生老病死等苦厄, 除了生死是一瞬間之外, 老和病都是經年慮月的折騰呀. 

唉..... 我當時真係想起, 袁潔瑩和呂珊.... 佢地個個都是一等一的美人杯子, 但年紀一大, 就受盡骨質疏鬆病煎熬了. 至於萬人迷大美人王祖賢, 我真係希望佢永遠不會受此病所影響到, 永遠出來時, 都可以留給我們一個美好的回憶.

PS: 大家可能會問, 點解我JJ成日話自己福薄之命? 其實, 我係果D食極都唔會肥的人, 而且仲係著任何衫褲都會好好睇果D人, 就算我父親以前成日話我, 係加記買的衫褲好闊, 好似帆杆撐住塊帆咁, 但都著得好好睇!  不過, 這個就係骨質疏鬆病D人的最大特徵呀!

我慶幸是男人, 就算天生有骨質疏鬆病的可能, 都不會如女性的嚴重, 也慶幸我自己吃到乳奶類食品, 我自己也不是吃肉狂, 只是少許肉, 再加2-3倍份量的豆和麥. 還照醫生指示的葡萄糖胺+OMEGA3+VIT D, 每天花一小時做柔軟體操, 這樣也不能保證免於骨質疏鬆病呀.

真擔心班友, 日日係度念經打坐, 日日唔食肉, 又食唔到乳奶食品, 再加唔去睇醫生, 唔食葡萄糖胺 + OMEGA3 + VIT D (這些全是由海產/魚油/動物脂肪中煶煉出來, 屬於葷食), 將來人生就大Q鑊了, 比去教會班友, 人生仲更大鑊呀.

唉, 我真係見過有個肥婆, 真係肥婆來咖, 佢廿歲女讀大學時, 就開始信佛茹素, 到左佢今年快40歲時, 肥胖超重的身體, 竟然被確診為骨質疏鬆病患者. 嗄, 更大鑊的, 佢因為長期茹素, 現在每次食肉, 就會把食物嘔吐出來.......  我都唔知點同佢講好了, 先減肥呀? 還是先習慣重新適應葷食? 本來想勸佢去食由動物煶取的人工蛋白質, 但一見個價錢牌, 我就知道佢無力負擔了. 

果個肥婆仲成日走來老點我, 話我慧根極高, 已經為我找到個得道高僧, 來為我剃渡做和尚.  我唔騷佢, 佢就好似我以前個牧師咁, 來罵我這個那個, 最無厘頭, 一時話我乜乜慧根, 一時罵我精神錯亂.

噢..... 妖..... 點解D人唔可以係佢地自己走錯了的人生中, 得到一些啟發? 最少, 去勸人唔好走上同他們自己一樣的錯路呀.

噢.... 竟有粒咁大粒鼻屎呀?. 厲害..... 厲害.....

今天愚人節, 就講講此女, 有幾咁驚世駭俗呀, 貌不揚但擁有超特異功能啊!

話說佢老媽子12年前, 送左隻圖中右邊的戒指仔俾佢喎! 點知道有日唔見左, 初時以為佢D FRIEND貪心, 撻左去啦.

點知最近有日, 佢唔知道係咪D鼻哥毛太長? 整痕左個鼻哥, 打左個好大的乞嚏, 就有一大PAT野飛左出來, 咦! 好核突呀!

佢就係用TISSUE紙抹果PAT野時, 發現PAT野裡頭有D勁堅硬的東西係裡頭, 用水洗洗佢, 原來係佢隻戒指呀.

PS: 呵呵呵, 最近好很多指控傳聞, 話熊貓國偷老美D科技機密喎, 我JJ就忽發奇想, 真係想寫本科幻小說, 重金誠邀圖中這特異功能奇女子, 來做第一女主角, 叫佢色演間碟, 係佢鼻哥隆裡頭, 放塊512 GB 的 MICRO SD, 將老美全個國家和企業的機密, 偷運哂出去, 哈哈哈......