2022年9月28日 星期三

當傳言不攻自破後, 係咪應該思考一下人性?

最近有人瘋傳, 上邊政變, 阿大大被元老軟禁. 咁, 現在阿大大出番來露面, 傳言不攻自破了.

其實呢, 好多人唔係好明白上邊從政D人諗緊D乜. 

嗱..... 做到普通料(乜乜局以下)果D, 又或甘於做到普通料果D, 最重要係佢地自己無風無浪又到退休, 可以光耀門眉/庇蔭後人之餘, 還可以安享晚年.

做到最高果25個人果D, 甚至7個人果D, 在光耀門眉/庇蔭後人/安享晚年之後, 這些人更看重自己在黨史上的政治資產, 看得比佢地自己生命還要寶貴.

如果係改革派的, 當然係會出來講改革開放係應該的, 如果係無忘初心派, 當然係講原教旨嘛! 根本就係各自表述, 係黨內各有各講佢地自己D想法, 佢地叫這些做黨內民主呀! 只要唔好公開出來講, 係黨內講, 大約都唔會有問題.

其實, 只要唔好觸碰到當權派的核心政治資產, 講乜都無問題, 尤其講改革開放係必由之路, 雖然講得唔算空泛, 但都唔係同當權派撐到衡! 尤其刪左之後.

老實講, 俾著我做佢地, 只要係自己在任期間, 無事無干, 唔出問題, 撈番個"工作同志", "榮休同志"稱呼, 係黨史上有番自己一定的政治資產, 退左休後, 我大約都唔會走番出來批評現任當權派. 除左做壞規舉外令自己清譽受損外, 更有可能令自己辛苦經營幾十年的政治資產無左. 

這些人到什麼時候才會出來講番幾句呢? 就係當自己政治資產受損時, 不過, 阿大大好識DO的, 佢已經講到明, 唔會走回頭路, 改革開放一定要繼續, 唔會閉關鎖國, 擺到明..... 黨史係會留番俾"改革派"一些席位的, 唔會剷走"改革派"的政治資產. 就算將來真係走回頭路, 阿大大佢都會有馬仔, 同佢諗到新名詞出來, 唔會俾人叫這些做回頭路的, 既然無"閉關鎖國"這個名詞係公眾眼下出現, 就無問題啦!

不過呢, 現在各方壓力巨大(包括老美老俄加埋經濟民生壓力), 而且仲不斷升級喎, 令人擔心..... 總有一天係巨大壓力下, 阿大大唔沃"改革派"D政治資產唔得, 到時就會大嘈音了.

尤其, 老俄係老烏打成咁樣的戰果, 俾人睇出任何一個較大的北約成員國, 軍事實力都不比老俄弱呀! 而另一方面, 老美又緊跟其後, 又禁這個果個.... 唔同你做生意, 唔買你D野, 唔賣D正野俾你, 直接係沃左"改革派"後繼者的根本利益, 要逼"改革派"後繼者出來反枱反臉, 這個才是令到阿大大識DO都無用, 

不過, 現在"改革派"後繼者的力量越來越弱, 個個都想企係"無忘初心派"果邊, 相信無忘初心派會越來越得勢喎! 但老美又唔想太急太傷害自己友的利益, 來加碼煮死佢地..... 唉, 此消彼長下, 我真係睇唔到係將來.... 會有邊個可以出來同無忘初心派.... 來撐到衡喎.

唉..... 好啦, 面對如此勢態, 我JJ都係打消回來落葉歸根, 返唐山享清福的念頭了, 係網上發下嗡風就算了. 

 



2022年9月26日 星期一

判斷任何事情的本質, 應由人性開始.

人性的使然? 為何令到自己唔舒服呢? 生而為人, 當然希望自己常常活得舒服, 就算男性去追求女性, 或女性被男性追求, 都是希望這段關係帶來自己人生愉悅和舒服.

女性如果化勁個妝來吸引佢地心中喜歡的男性(尤其戴埋個大眼仔), 我諗都只係一次半次可以咁做, 之後的相處, 都係最好舒服一點囉! 唔好化妝和戴大眼仔, 咁多化妝品漿住係面上, 加埋大眼仔就真係好辛苦囉!

男女關係裡, 某一方越係委曲自己, 來實現這段關係, 越係對對方將來有祈待囉!

我見到女性戴大眼仔, 化到個妝好勁, 著短裙花呢襪高跟鞋, 週街咁行呢, 我覺得.... 頭幾次用來玩下, 咁樣又真係OK的, 始終年青有的是資本, 唔攞出來曬曬佢, 實在對自己唔住呀!

不過, 如果咁樣攞來吸引男性呢, 到最後辛苦果個, 只會係女性自己喎!

昨天星期日我去唐人街食野, 有2個女仔又係著到咁, 仲係我旁邊扮講好性感的"廣東話", 真係希望佢地用來玩下而己, 唔好攞來當真呀. 咁樣俾佢地吸引到D男性, 就一定係果D俾人叫麻甩佬D男人啦. 而且, 我邊唐人街越來越雜, 成日有警車來睇住D流浪漢唔好亂來, 這些女仔自己係咁雜的地方咁做, 會有危險喎. 如果有任何不開心事發生, 這些女仔就唔好把罪名堆在全體男性之上了, 而其他女性為免這些女仔影響自己家中的男性, 也應該勸止這些女性的行為.

唉, D人係唐人街化到個妝咁勁咁性感, 當然就一定有佢地原因, 我JJ自問唔會咁用心機係自己身上了, 寧願花多D精神, 搵多幾個錢, 唔係好囉?

任何事情發生, 唔合人性的本質, 就應該懷疑和小心了.




 


2022年9月23日 星期五

睇落呢...... 基金佬開始轉倉拆倉了.

前日老美FED升左3格息呀, 呵呵呵, 加息加到咁急呢(半年加近3%), 果日DOWDOW已經跌左5舊幾, 昨天空軍本來係補空倉, 照理大跌後會少回升, 但仍舊跌1舊喎, 吖, 今日又再跌近4舊呀, 即係呢市場氣氛唔好了....... 基金佬開始為年尾的BONUS準備, 陸續清空一D倉, 以固定自己的 BONUS, 所以現係佢地轉倉拆倉的時候了.

還有, 美金升得好勁呀, 還未確定現在係咪美金高位, 我睇, 應該還未到高位, 我都係遲D先轉美金做加仔了. 

我一向都認為30%的調整後, 係入市的良機, 我最近SELL左一些PUT, 全都係那些股股價大跌後才SELL的, 個STRIKE PRICE 係52 WEEK 最高位的35%~70%, 即係調整近30%, 我才會開始買囉.

上次2020年2~3月大跌時, 我都係DOWDOW由3萬跌到2萬3才開始買入, 買到1萬9才停手. 我睇我今次都係會咁做, 3萬6歷史最高位, 我係3萬1開始SELL PUT, 用當時股價再跌10~20%才買. 

除左 SELL PUT 外, 我JJ都會直接買入, 大約可能係DOWDOW 2萬8(25%調整)開始, 才直接買入, 到時睇下有乜股跌到夠低, 我才開始考慮囉.

都係果句啦, 世上無必賺錢的方法, 有時總要捱下個低價位囉, 不過, 可能今次唔會咁快反彈, 所以我唔會好似2020年果次咁進取咁快手, 今次係會慢慢買入.

 


2022年9月20日 星期二

我JJ能夠做件乜野事?

哈哈哈, 可能係2020年初左右, 突區因為社會運動頻繁, 同胞國的誠信被外國傳媒大肆質疑, 就有人係我這邊同胞網上, 上傳了一個關於德國傳媒對阿大大不客氣的批評, 咁就引來好多粉紅色的某某, 來指責上傳者係賣國賊. 

我都忍左班粉紅色的某某好耐, 成日都講港燦點窮點要靠佢地, 又話我地D社會運動反乜反物, 終於俾我等到發圍的機會..... 

我就回佢地..... 我從未見過西方傳媒對別國的首腦咁唔客氣, 真係擔心這首腦會否再能出國門訪問?(之後就宅左2年, 最近才.... ) 能否為這國開創更好的外部發展環境? 會否被逼放棄與外邊聯系? 會否閉關鎖國? 這些粉紅某某身在外國會否變成斷線風箏?

我出左咁樣回應後, 無人回我喎, 全部靜哂!

過左1-2個月後, 阿大大開乜乜大會議後, 竟然保證"不會閉關鎖國"! 

啊...... 原來這個題目, 係這2年半內不斷發酵, 又再重新成為重要火熱話題呀! 

原來, 係80年代, 一直都係熱門議論的題目, 直到92年到15年, 阿大大上台初果2~3年, 人人都以為唔會走回頭路, 到2019年都無再火熱了. 

都唔知係咪俾我JJ攞左番出來講, 引起一些人攞來炒番熱佢. 

其實, 提醒同胞們一個咁樣題目, 係會令到佢地會諗野實際D囉. 係會令到佢地唔好咁傻囉, 諗野唔好側埋一面. 

看來這個話題還會纏繞好一段時間囉. 

我自己都唔知道"閉關鎖國"這4個字會咁大件事, 會拖慢左好多事情的進展, 會影左好多人的人生命運囉. 

PS: 係咖, 同人漫罵是沒有用的, 同人講下道理, 讓人思想開闊少少, 唔好側埋一邊, 可能都會對整體事情會好一點, 又或拖延負面事情發生囉.


 

2022年9月16日 星期五

今天好多物流公司股價都受壓......

 第一彈出來的, 係FDX 聯邦快遞, 年半前股價做到最高的接近$300, 昨天~$2舊, 但宣佈營業利潤指引向下, 今日就跌近$50皮(20~25%), 嗱..... 各位..... 市場上有人出價來買$100 的 PUT呀! 睇落有人睇到好愁雲慘霧咁喎. 

咁..... 業內龍頭一講預計利潤營業會差, 咁其他業內的持份者, 當然會應聲下挫吧! 唔洗講, UPS 同佢係命運共同體囉, 股價被人質低近10%啦!

其他美加航空股都跌左3~5%不等, 最過癮係..... 連鐵路股又跌, 貨車運輸股又跌.....

嗱..... 可以睇到, 市場對經濟都好悲觀呀..... 

我JJ都係果句, 好似股神咁講, 市場越悲觀, 越有進取的空間, 市場越樂觀, 就少左進取的空間了.

我不斷賣PUT 呀, 做的STRIKE PRICE 開係現股價的80% 到60%之間, 即係要跌20~40%, 我才需要買入.

每天我一開市, 我第一樣留意的, 就係邊隻大藍籌股跌鑊金的, 見到大跌, 就去賣PUT, 用來將來低價購入了. 

真係要耐心地等候了, 家陣差唔多.... 機會每天都會來拷我門的. 

PS: 以前年年都返香港, D洗費大多都係由 賣PUT 而來, 多就無呀, 一年幾千美金, 就夠我攞番香港,  大方咁用來做零花錢咁囉.


2022年9月14日 星期三

無衝勁 + 廉價娛樂和食物, 齊齊躺平..... 導致永久滯脹?

 D人躺平, 做人做事無衝勁無慾望...... 社會就真係會滯了, 不過, 現在D娛樂係咪真係廉價, 飲食係咪真係平價呢? 我就有點保留了. 

去超市買個杯麵都唔平呀, 由$1~4皮加仔呀! 前天我去唐人街, 順路飲番杯乜乜原自湖南好火爆的乜乜燒仙草...... 其實即係我地D涼粉囉, 不過, 杯野黃到好似泥黃咁核突D色, 味道木然, 唉, 竟然賣成$7皮加仔, 而且仲有好多人排隊買, D人係咪傻左呀? 

最有代表性的, 排隊中有個煲冬瓜女仔, 人仔細細, 竟然拖住隻大狼狗, 俾隻狗扯住來行, 佢身上D溜狗配件, 都要洗佢1~2百, 加埋隻狗和狗糧, 無洗番2~3千都唔得呀. 

這女仔一定唔係低慾望! 我覺得, 佢大約係低生產囉! 所有佢買D野, 全部都唔可以為佢人生帶來增值. 排隊買埋D咁野來飲, 又真係反智囉! 

現在情況係D人唔一定係低慾望躺平, 而係低人生的增值, 財富到左佢地手, 唔能夠生產出更大的財富, 所以這社會現在"滯"了. 

脹? 就一定, D咁無用的野, 俾班傻人搶貴哂! D錢去唔到錢生錢的方向, 換來一大批無用的物件. 搶樓搶奶粉搶期油, 唉.......

我JJ一直都自豪著, 自己一直都可以錢生錢, 係人棄我取下, 人人都驚青個市大跌價時, 我買入賺到錢. 

何能大家會問, 既然杯野咁難飲, 為何去飲? 我好奇囉, 不過洗$7皮, 就可以看穿個假像, 又真係十分值囉! 

PS: 有次, 我係我這裡地鐵站見到有個煲冬瓜伯伯, 推著嬰兒車上滿是一袋袋的米, 加上個嬰兒, 一定有2~3百磅, 果個地鐵站竟然無自動電梯,要果個伯伯搬車上落. 我好心走埋去搬佢一齊搬, 才見到有個好似佢個女的女人, 作狀為到減輕重量, 佢只拿走嬰兒車上佢部IPAD. 我見到咁, 難怪煲冬瓜D人, 成日話乜乜躺平, 乜乜永遠滯脹, 其實係同佢地部份人的人生有關, 可以產生幾多增值?

唉, 仲生埋個細路, 唔負責任, 個女兒又自己顧唔掂自己, 又點會唔大鑊呀?

2022年9月13日 星期二

賣左PUT後, 市場急跌, 係咪就一定衰左?

昨天賣出的 PUT OPTION, 今天個市大跌9舊, 但係PUT OPTION 那隻正股, 不跌反升..... 

即係代表乜? 昨天股價急跌係過左龍, 所以俾我可以賺到最好的 PUT 價..... 

所以, 市場股價波動係常事, 理性與非理性交替, 有現金想買股增倉, 實在可以利用市場非理性波動, 賣PUT來入貨, 效果一定比直接入貨好.

 


2022年9月12日 星期一

趁市場心驚驚, 我就PUT PUT 佢了.

係咖, 如果D PUT OPTION 可以俾我在跌20-30% 之後入貨呢, 其實, 又真係好正囉! 老實講, 個市調整, 都係講緊10-30%的跌幅, 就等如趁低吸入囉.

由今年初起, 每次見到YAHOO 上 當天的 LOSERS 時, 我都留意一下當中有邊隻值得賣個 PUT 出去, 都係果D生意長有長做長賺的公司啦, 只係短期內有壞消息, 又或股價俾人追擊, 又或好似現在咁, 市場D人驚青, 要買PUT 或 CALL 來做救生圈囉.

有錢收之餘, 又有機會趁低入貨, 何樂而不為? 缺點係唔輪到我決定幾時買入, 有時甚至遇上急速回升, 走左寶添!

這個係萬試萬靈的錢途(我用左好多年)...... 還掂自己都係想入貨, 就用PUT 來增加自己入貨的資本, 前題係...... 一定要夠錢買股囉..... 真心相信果隻股係抵買的好股, 咁樣, 就會無往而不利了.

其實, 賣PUT 咁來入貨, 令到自己入貨時更有紀律, 股價真係跌到好抵才買入, 咁樣, 長期咁做, 蝕錢機會少 , 賺錢機會大囉. 

最怕係市場一個小反彈就心急入貨, 而忽略股票是否優質有長遠潛力, 這樣係最容易蝕錢, 因為市場小反彈又有, 大跌浪也不會少, 小反彈就心急入貨D人, 大多都會係大跌浪中止蝕時, 因而蝕錢囉! 

大家記著, 買股票係買長期潛質和實力.... 如果係買升幅, 我地一眾小散戶係唔夠大鱷來咖, 小散戶有乜可能睇升跌, 睇得準過大鱷呢?

買股票這家野, 係無得認叻, 認叻D人就蝕錢最容易囉!


 

 



2022年9月8日 星期四

真是大範圍封城嗎? 升息會否更攞命?

近排, 成日聽到上邊好多地方封城. 從YOUTUBE 的視頻, 看來真是有不少地方是進行封控的, 只是上邊大部份地區, 都仍是生活如常. 

這頻度裡, 見到廣州和長沙都生活如常, 大有歌舞昇平的感覺吧! 最少人人都好似有工開有錢搵, 兩餐生活尚算正常呀, 不似很多視頻講佢地開實體店瓜清光! 蝕清光!

 

不過, 我自己就不會過於樂觀了, 始終當地一有一單疫情, 就會同其他封控地區沒有分別. 

最打擊的, 是人們的信心, 一少左信心, 消費和投資就會縮左一大截了. 

我自己總是覺得悲觀, 心裡感到, 在上邊這些生活如常的地區, 人們都只是且行且珍惜吧!

我這裡加記已經差唔多無乜人戴口罩了, 只有入診所和醫院要強制戴外, 公眾場所和巴士地鐵都唔再強制了, 但是都不是好好景, D人頂哂籠都只是飲飲食食多, 叫佢地購買大件野或投資, 大部份都對未來無乜信心, 都係做一日和尚, 打一日齋咁囉.

除了疫情外, 加記央行今天跟隨老美央行, 一加就3碼/0.75%, 去到3.25%. 始終, 都係好影響人們的借貸, 由0.5%升到3.25%, 是升了5倍有多呀, 相比30年前, 8%加到13%, 都只是少於1倍, 對人們的心理影響細好多呀. 我這裡的港人大多現金買屋, 所以升息對我們沒有多大影響! 不過, 對果D好似我JJ以前咁, 一手都係投資出租物業, 長期息口走勢, 又真係會好決定性囉!

不過, 我JJ永遠都係作最壞打算, 為到可能來緊的艱難歲月, 做自己最好的準備! 就算升息, 都一直在增持吸納一些優質股票, 來完善好自己的投資, 希望自己唔會滑鐵盧吧!

哈哈哈, 其實, 我生活安定, 咁就好了, 我也不用賺太多的錢, 錢多了, 對我都無乜用, 但求生活安安定定, 係百物騰貴下, 所收的股息, 對自己生活有個大一D的保障吧! 有多D安全感, 咁就已經係人上人了. 

我仍然維持對長遠未來...... 負面的看法, 好多人只會患得患失, 得過且過, 但從沒有對向下走的未來, 開始做準備, 最少留多D錢係自己身邊, 又或開始買股來收息, 確保自己有更多的可支配收入. 

好吧, 信心是最重要的, 做人沒有了信心, 咁就會大檸樂了! 

我JJ這廿年都同網友講, 什麼是最徹底的破產? 就是失去了自信心囉! 誰人最不容易失去信心? 就是那些人...... 時常作最壞打算, 為到可能來緊的艱難歲月, 做自己最好最完善的準備!