2020年4月27日 星期一

當下.... 是否一個"先縮後漲"的局面? 怎樣應對?

當大家上個星期見到油價跌到負數的局面, 大家會否懷疑著, 現在沒有人要資源商品了? 

大家可能會問, 資源商品是否不值錢了? 資源商品是否再沒有人要? 

我的答案..... 現在.... 是的!!! 將來..... 不是的!!!

當然啦, 現在歐美度度隔離, 人人留係屋企唔出去消費. 當然一切資源會變得過剩, 只是, 隔離唔會永久的, 一唔再隔離時, 就會由過剩, 變回原來的供需平衡了. 

當然, 大家要計埋好多人破左產, 好多公司執笠, 好多人改變了生活習慣, 當然永遠不會回番去以前的消費水平, 不會再對資源需求咁大了.

但大家可能會問我JJ, 縮完之後回復8成9成原狀, 又點會漲呀? 吖, 如果大家有留意新聞, 歐美在98年生產鏈由東南亞大轉移到中國後, 到今年2020年又再一次轉移, 今係由中國轉移到印度和南亞呀. 

只是我JJ可以寫包單, 南亞的基建和工業配套, 無法同中國比, 只是硬要由中國搬出一部份產能, 就會少了在中國大量生產的成本優勢, 一切消費品都會在短短一兩年內大漲價! 

所以, 我JJ預計, 現在局面.... 是一個"先縮後漲", 一切消費品會在短時間內, 因為人們隔離留家中, 需求大減下, 商家但求售清手頭上的存貨, 來增持更多現金, 就減價求售! 但一到疫情過後, 消費者再出來消費, 商家再去訂購新一批存貨時, 他們就會發現, 一切來貨價錢都會飛漲了. 

正因為面對將會到來的環球大通漲, 人們就會尋找保值或儲值的機會, 再加上歐美發左咁多流動資金出來, 不用全部轉移到保值或儲值的地方, 只要1/10, 都可以十分可觀地推高一切保值儲值避險工具的價格了.

這些保值儲值避險工具是什麼? 黃金啦, 貴金屬啦, 就算普通金屬如鐵如銅, 一切資源商品, 價格都會被搶高! 

只是我想問問大家, 在這個疫情下, 有什麼資源商品被人狂質到個價賤到地底泥呢? 有什麼資源商品在短期內係不能被淘汰呢? 答案係..... 有乜野我JJ近來頻頻買呢吓? 之唔係油股囉!

油股同期油好唔同, 油股係生產油的公司, 期油係油公司的製成品. 期油係有時間限制, 無得放埋一邊, 但油公司擁有的是..... 產油的技術/設備/開採權, 有些更擁有由油變天然氣的技術, 甚至運輸/批發/零售的渠道, 不是任何新進入市場的公司, 可以在10年8載內取代到! 即是老牌油股, 在沒有名義專利權下, 其實係行使著專利權之實. 

當然, 我JJ一向都同意, 同檯食飯, 各自修行, 我認為買油股來做保值儲值避險工具, 可能大家可以買鐵, 銅, 煤, 任何貴金屬等礦業公司..... 不過, 有一事要提醒大家, 尤其貴金屬, 其生產開採的礦業公司, 可能全球大多都只有一兩間咋, 可能當中有很多CARTEL, 小散戶投資時, 其股價往往未必反映到其公司開採的貴金屬價值呀! 投資在油股就不同了, 因為歐美實在有太多油企了, 行業內持份者眾多, 不能隻手遮天來對著小股東. 

不過, 我自己就唔太認識香港D油股了, 我只是係度講緊歐美的油股咋! 大家如果買香港的三桶油呢! 我真係唔多清楚了.


2020年4月23日 星期四

嘩哈哈, 乜話, 下個月尾, 油價將會跌到負-US$100?

唔係咁攪笑嘛? 前幾日4月20號油期貨結算日, 5月期油跌到-US$37..... 今日竟然有人彈出來預測, 6月期油到左5月尾的結算日前, 將會跌到-US100..... 

吓, 咁, 如果任何阿水唔識死, 係6月期油跌到1美仙時, 好好好大手筆咁, 用1萬美元掃入100萬桶期油, 到最後..... 將會欠債1億美元. 簡直係無底深淵喎! 好恐怖呀! 騙子佬龐氏騙局都無咁得人京呀! 食人唔 NERD 骨呀!

哈哈哈, 同這個阿水對賭果條友, 唔係肥到豬籠入水? 有人最開頭已經俾1萬美元佢洗, 之後, 再俾1億佢洗? 

這個是什麼的世界? 咁謊謬呢? 都係唔岩我JJ這些老實人玩了. 我對這個謊謬的世界, 宣報投降了! 呵呵呵......





2020年4月21日 星期二

啊! 戰略原油庫係點既樣?

哈哈哈, 一直以來, 我JJ還以為原油庫係一個好好大大個缸, 好似個罐頭咁. 係外邊睇路邊睇埋去, 係一個大闊平的圓柱狀物體! 

不過, 原來我一向的認知係錯咖, 原來原油庫呢, 係好似一個水桶咁, 上邊放個好大好大的蓋係度, 個蓋仲係..... 浮係D原油表面上邊. 

大家可能會問, 咁樣唔怕D原油揮發左走咩? 原來D原油未煶煉前, 係比屋企D生油仲杰咖喎! 係唔會揮發走左去空氣裡頭!

看看圖中鳥瞰圖, 由上邊睇, 就清楚哂, 下邊有管用來放入或放出D原油.

大家又可能會問, 咁, 唔係好危險? 一爆起上來, 唔係大檸樂? 呵呵呵, D原油未煶煉前, 唔會揮發, 即係唔係著火惹火, 更不會爆炸囉!



PS: 咁樣設計, 唔係為安全, 係為到用最少物料起個桶, 來承載最大側牆壓力, 來裝最多原油, 又用最少建築費. 還有,  因為唔係密封, 油缸裡不會有空氣, 唔洗排走空氣咁麻煩.

2020年4月20日 星期一

哈哈哈.....我無眼花啊, 油價跌到破天荒咁? 竟然變負數-US$35皮?

真係唔敢相信自己眼睛, 仲以為自己咁快就.... 老人眼矇矇或老人痴呆了, 低到低無可低咁, 好無厘頭的價錢喎, -35皮呀!

嘩, 我立刻去睇睇我買左D油股, 都唔知道幾想佢地跌到上次DOWDOW萬8點時的價位以下(話哂我上次嚇傻左, 萬九跌到萬八時, 我無買), 仲諗住入多D.

不過, 好失望呀, D油股無乜跌喎, 咁怪? 仲係先排 DOWDOW 2萬2點D價位喎! 

唔...... 再睇睇自己個戶口, 發現已經收到3月時買果批股票的一小半部份股息了, 暫時收回來的股息, 佔3月投入的資金, 已經有1%, 已經回籠入返來自己個袋了. 就算之後果幾季裡, 股息唔好, 單單收左果D, 已經多過存銀行D息了.

PS: 世界真是瘋狂了, 存銀行D息咁低, 已經係好荒謬了, 現在油價期貨仲要負數, 仲係負-35皮. 即係咪...... 任何阿水攞個桶去攞油, 就有個茂里俾35皮佢呀? 

哈哈哈, 人生真係好過癮咖, 誰看通了現況背後的實體, 就會投資無往而不利. 不過, 看到咁樣, 真係開始有D懷疑這個金融系統快要崩潰.

不過, 如果真係崩潰, 我心裡恐怕老共崩得更勁更快! 

唔係我JJ發嗡風, 有歐美D藥廠才有咁多人才出到D疫苗或藥. 到時, 歐美先用D疫苗或藥, 就會首先反彈了.

2020年4月13日 星期一

如果DOW DOW又要跌, 係乜位才有支持?

各位, 剛剛睇睇DOWDOW果D FUTURE, DOW仲有14小時才開市, 佢D FUTURE 就已經跌左260, 是否預示著今個星期係跌的一個星期呢? 

不過, OPEC油佬剛剛才達成減產協議, 咁, 即係.... 一係減產得唔夠多, 一係疫情太慘淡, 經濟將會太慘落, DOW發揮預示角色, 經濟未跌佢先跌!

好啦, 上次跌到18000, 老美聯儲在買好債後, 乜都試勻下, 開始買高息垃圾債券, 才穩住跌市喎! 

之後, 老美聯儲上任阿頭更走出來講, 叫老美國會快快通過法案, 俾聯儲可以買埋股票來撐市!

今次救市救到, 連垃圾債券, 垃圾財仔, 垃圾投資者都救埋, 嘿..... 咁, 我JJ做乜咁辛苦? 做個睇實投資風險的好投資者呢? 我坐盤左咁多年, 都係同果D剛入市唔識死的圾投資者, 回報一樣! 睇落老美政府唔再鼓勵人去做負責任的投資者了. 又或者, 老美只救錢多果D垃坄投資者囉, 唔係我地這些小散戶呀!

不過, 這個可以預視了一事, 就係DOW跌到18000-19000, 係老美底線, 要盡一切手段去救, 唔救唔得. 

咁啦! DOWDOW由25000跌到19000, 係我JJ第一期入市, 我分開左6-7次入貨啊! 其實, 本應該等等派息番來, 計完有幾多進帳後, 才好決定第二期要進取, 還是保守? 

 只是現在我掌握拿念得.... 無第一期咁有信心了! 開始唔知應該買D乜股乜行業, 所以, 大家如果攞一張LIST 股票來問我呢, 我真係唔敢答大家.

而且, 大凡係這樣的大上大落市, 而且老美政府救市救埋果D多錢的垃圾投資者, 對我JJ這些越是真正去投資的人, 見到咁老美咁救, 越是幻得幻失呀! 心裡拿不定主意呀! 

大家見到果D投資者, 係老美政府救垃圾下, 表現得好肯定, 好信心爆柵果D, 這些人越容易損失爛腳喎! 越容易泥菩薩過江, 自身難保呀!

或者, 如果今個星期又係跌跌, 可能, 我因為心裡忐忑不安, 而不會入市了. 

最後, 我JJ諗呢, 一到左第三期入市, 就必定會更更更保守了.... 始終, 保守, 諗耐D, 諗清楚D, 係一個好的投資習慣, 尤其現在老美救垃圾下.




2020年4月9日 星期四

人生路? 投資路? 最好有張BUYLIST!

係咖, 有左張BUYLIST呢, 機會到來時, 就會好快好順意地, 咁揀最好的選擇囉..... 

大家可能會諗, 果D生活安穩的人, 一定係搵錢多, 但係我JJ, 現在為大家提供一個另類的可能性, 就係, 生活安穩D人, 也可能係買野買得好抵好平呀!

點解D人成日買左貴野呢? 因為佢地心裡無個底, 為何無個底? 最大可能係佢地無張BUYLIST囉!

我這裡超市, 現在因為COVID-19, 限人數進內, 而留在室內公共場所越長時間, 越會有可能中標喎! 所以, 一入超市內, 就買自己要買果D野, 在最短時間內買完出來呀! 我一睇超市內, 就知道那些人無張 BUYLIST, 所以佢地好慢好亂好擔心. 

同一道理, D人入市買股時, 手上無份BUYLIST, 就會有可能買錯股, 買得唔夠低價了, 甚至之後十分後悔, 影響自己心理質素. 

講講我JJ份BUYLIST, 係有十幾個行業, 百幾隻股票. 當然唔係全部買哂佢啦! 而係用來貨比貨吖嘛! 

我張BUYLIST, 點來咁多股票? 1. 股神份股單; 2. 耐唔時俾錢入會, 睇睇人地建議買乜; 3. YAHOO FINANCE, CNBC, BLOOMBERG呀, 時不時有人建議買乜股; 4. 睇睇每天交投最旺而升的股票, 邊隻成日上榜, 唔係行業內龍頭, 就係行業被追捧的股仔, 就可以考慮加佢入我張 BUYLIST裡頭啊!

有左份BUYLIST後, 如果用WINDOWS10, 裡頭連埋MONEY軟件, 存份 BUYLIST 係入邊. 咁, 邊個行業升跌, 邊隻股升跌, 一睇就睇到了, 再去 YAHOO FINANCE 睇睇份MOST ACTIVE 有邊幾隻. 通常, 果個行業跌得好金, 行業內某股係MOST ACTIVE上, 就可以留意了, 觀察一段長時間, 才好落注呀! 

我JJ張BUYLIST係由我小朋友買股果時, 已經開始寫, 當然有些已經一早刪左出來, 有些近幾個月才加入去啦.

當然, 揀行業時, 就要宏觀咁去睇, 揀股時, 宏觀和微觀股價走勢, 都要考慮啦! 之後, 再對比一下是否比存錢銀行好, 或放係債好, 就可以做投資決定了!

有時, 我JJ都唔係即刻決定呀! 等耐少少囉! 做投資決定時, 至忌慌和亂呀! 買股的機會, 必定是那些自己等待己久的機會, 買了之後, 心情愉快, 如獲至寶咁, 這個投資才會有錢賺. 

再次講多次, 手中沒有張BUYLIST, 心裡就沒有個底, 投資決定就容易會慌亂了. 最後, 祝大家投資上得心應手, 無往不利啊!

PS: 如果大家來問我要我張BUYLIST 呢, 我真係唔敢俾大家呀! 因為性格和人生命運, 大家都可能唔一樣, 尤其我JJ被人評為最唔喜歡跟大隊的人, 大家用我張BUYLIST 去入市, 我怕會害左大家呀! 

所以, 功課都係自己去做啦, 才會合襯到自己的性格和命運啊!

2020年4月8日 星期三

5號仔無息派, 準備做食息一族, 應如何計劃退休?

當今之勢, 好多人計劃靠食股息, 來過退休生活. 不過, 股息和企業收入, 有如經濟咁, 有高有低, 有時仲大起大落呀!

最近, 5號仔唔派息, 就有好多中年人出來喊話5號仔呃人, 令到一眾股民退休生活頓成問題!

嗱, 各位, 當大家準備退休時, 計算退休的門檻, 千祈唔好單單計到"夠生活開支"就立刻退休呀. 

我JJ一向叫人投資, 千祈唔好投資係單一一間公司, 或一個行業, 所以食股息呢, 都係一樣, 唔只要食多幾間公司的股息, 甚至數個行業. 

還有, 要把股息收入打個7折呀! 因為, 股息有如經濟, 有升有跌, 有高有低, 計佢股息7折, 來應付退休生活開支, 都已經唔算保守.

當然, 自己的開支呢, 怎樣也要預計將來會不斷升吖嘛! 所以整體性來講, 退休時的開支, 最少要DOUBLE咁計, 來對比7成的股息收入啦! 這樣, 才可以萬無一失. 

咁樣..... 即係呢, 退休後果10年8年呢, 大多數情況下, 收回來的股息大多洗唔哂呀, 不過, 我勸大家唔好身痕咁去洗哂佢. 我JJ強烈提議各位, 應該儲起佢, 再買多D不同的優質股, 增加未來股息或股價的收入.

哎吔, 還有呢, 食股息之餘, 仲要有D現金係手, 最少..... 夠生活到1-2年, 到時無股息收入時, 都唔洗怕呀!

PS: 我以前後生時, 係唔多睇股息, 單單睇股價升, 和出租物業的租金增值. 

不過, 我係賣我這裡加記D出租物業前, 我計過數, D息咁低, 仲係長期超低息, D人買樓來自住的供款+開支+屋稅, 已經跟租金越來越接近了, 除非供少求多而物業價升, 供款開支才會升, 租金才有升值空間. 只是我這裡地產市道供應很充足, 甚至會有剩. 所以, 租金升值空間開始到達頂位了, 再難大升了. 即是, 物業價已經升到近頂了.... 也即是, 一切資產價格已經在等緊調整了.

咁情況下, 我賣出揸了多年的出租物業. 這物業係我的輔助收入,  就算專業人仕, 都唔好大安指意以為份工好穩定, 而且, 到最後, 轉工期間的空檔期, 可以由我租金收入裡應付一陣嘛!


還有, 2個月前, 我全部都係醫療和保險股(通常醫療股有專利和生產技術優勢, 股價和股息穩定), 還有少少的食品股, 都好單一咖. 

不過, 世界沒有絕對呀, 怎樣保險的行業或企業, 都唔一定派息呀, 所以, 為求安全, 一到3月大跌市, 尤其油和天然氣大跌價, 我就開始多了美加D油/天然氣/礦業/銀行這些行業, 更大增保險股的比率. 

生意可以短期內做少左, 但一間管理得好的公司, 經濟一反彈時, D生意和營利就會返哂來, 最重要係唔好執笠關門.


我準備去到持有5-6個行業, 比重當然不會相同, 主要以收入和股息的穩定性來決定啦! 而最理想的收息股呢, 只派收入的30-50%, 間公司用其他D營利來再投資.... 始終, 我JJ都係退休人仕了.

相信一到5月初, 我就會開始收到我今年3月買D油股的股息了, 我十分肯定一定比存銀行利息好, 但真不知道會好幾多倍了, 到時再同大家再講啦!

真不知道, 個市仲會跌多幾多, 我由DOWDOW2萬5開始, 買到1萬9, 1萬9跌到1萬8果時, 我嚇傻左, 無買到, 當DOWDOW彈回2萬時, 我最近買果D已經無蝕了.

大家可能會問, JJ你由2萬5到1萬9平均咁買, 無理由回升到2萬就無蝕呀? 

係咖, 理由係..... 以油股為例, 係DOWDOW由3萬跌到2萬5時, 跌左7成, 而2萬5到1萬9只跌2成, 這2成係DOWDOW升番到2萬時, 升番回去呀!

大家可以看到, 指數升跌幅度, 唔等於某一個行業的升跌幅度! 有D行業係指數最初跌果陣, 跌得最金, 之後就輪到其他行業跌得金囉!

下次才再講,  下一波睇邊個行業囉!




還有, 最理想的收息股呢, 只派收入的30-50%, 間公司用其實D錢來再投資....

2020年4月6日 星期一

"息"字頭上一把刀!! 息即是空, 空即是息!

哈哈哈..... 在這大時代裡, 成日都有人有新攪作, 呵呵呵..... 今期有人講: "息"字頭上一把刀!"

真係好攪野果播...... 講得都仲幾岩咖佢.....

其實, 講開又係呀! 我後生果陣買股, 都唔睇股息乜濟! 一來自己果時後生心跳快, 等得派股息來, 股價已經飄升多過股息1-2倍; 二來, 以前D銀行存款息幾高咖, 有3-4厘, 攞錢出來買股仔, 股息都係得咁上下, 冒得投資風險, 唔係為左股價升? 唔通為乜呀?

之不過呢, 家陣唔知係咪人口老化? 還是世道艱難? 銀行存錢無乜息收, 人人買股都係為左派息囉!

只是, 咪以為現在收息好安全呀, 好多時會變成逐鹿迷山. 真係要睇清楚間公司的財務債表先好, 睇下間公司搵唔搵到咁多錢來派息呀! 好多時, 有D公司搵唔到咁多錢番來派咁多股息咖! 這個係唔係龐氏騙案?

家陣時勢, 一直派到好高息果D, 唔係有專利就有官府包庇, 又或係股息和收入常常大上大落囉! 

我最近買D油和天然氣股, 買之前股價大跌8-9成下, 現股價比起上一季D股息的回報率, 當然係好高好高. 不過, 我當然好明白, 今季就一定唔會咁, 平均有存款息的1-2X, 我都心足了. 因為時勢唔好下, 做人唔好咁大想頭啊!

家陣真係有好多公司面對收入萎縮, 股價插水, 小散戶一睇D現股價VS上季股息的回報率, 就當然好到10-20%啦! 不過, 現在收入縮左水後, 下一季D股息也會縮水, 所以, 睇股息係要有預示未來的4維時空思維呀! 現今靠股息生活D人, 真係要好小心呀! 間間公司都成績唔好, 派少左息呀!

2020年4月5日 星期日

關於5號仔的迷思?

如果大家要我JJ用幾個字來形容5號仔呢! 

噢...... 可以呀, 可以呀, 之不過呢, 我JJ講出來後, 大家咪來打我鬧我喎, 就好似我同人講香港地產之後咁, 後果係俾罵鬼我呀!

這幾個字就係........ "無主孤魂".... 

好了, 我已經準備了俾人鬧鬼了, 鬧啦! 

鬧完後, 請聽聽我講的解釋呀!

好簡單, 由香港開埠起, 英庭根本就唔想係咁遠的遠東, 尤其係中國領土上, 建立殖民地喎, 佢地寧願係新加坡, 因為當時新加坡旁邊係D好原始的部落土皇帝. 攞原始人佢地一塊唔要的沼澤地, 唔多覺吖嘛! 但一攞中國咁大帝國的一塊土地, 就會世世代代被仇視了.

好啦, 咁這班由商人為主的僱傭兵先斬後奏, 攻下香港島, 才用英庭名義來簽和約, 來割讓香港, 多年來, 英國本土人仕, 都覺得英國為殖民地咩重飛呀! 根本由一開始, 英庭根本就想疏遠這班商人, 但阻於後來見到的龐大貿易和商業利益, 英庭才隻眼開隻眼閉.

英庭一直想疏遠這些商人的後果, 就是..... 這班商人要靠自己, 建立自己的港英政府, 稅收系統, 甚至金融銀行系統..... 所以, 由那時起, 港英政府的一切運作, 都是一個獨立王國, 名義聽命於事頭婆(哈哈哈, 維多利亞女王喎), 但實際上, 英庭派來的總督, 在重大決策上, 要聽從這班商人的建議. 這個也是港英權力的核心, 變成後來的港英商人的議會制, 再變成肥彭的代表商人利益的代議議會制.

好啦, 以前未回歸前, 由這班商人組建的5號仔, 因為同港英政府一脈相承, 衣襟同帶一方水, 當然並不能稱得上 "無主孤魂". 只是一開始講97回歸後, 5號仔唔係左遷右折, 將D資金帶去世界各位收購當地銀行? 準備97後, 依附英國或美國. 只是當地銀行當然睇佢地係過江龍, 來跟本地薑爭, 就得罪左當地銀行和政客了. 

之後一切, 大家有眼睇, 5號仔已經無左根據地了, 連手機太子女單野, 佢都要被迫向老美爆料, 5號仔在香港這塊土地上, 就更成為 "無主孤魂"了. 

相信, 過多10年8年, 老輩港人走得7788後(移民或.... ), 5號仔就會無哂班FANS了. 唉.......

2020年4月4日 星期六

一切非美國居民(港人)投資美股的事宜 3

嘩, 前2個星期老美果隻波音, 由全年最高位的US$398(下同), 跌到95, 好似過山車咁, 彈番上180, 依家變番做120.

噢..... 正如周猩猩係唐伯父套戲裡果句 - 人生大起大落..... 

我都有同網友仔講, 老美的航太/醫護/保險, 這些大企業債多, 近排一定成日大上大落囉! 因為大企業債券有機會崩盤, 趁愁雲慘霧下, 小注宜情, 有如老美上任黑仔講, 這些企業大到不能倒下.

係咖, 等岩低位, 可以小注宜情啦, 唔好大注呀! 無人叫人將副身家放哂落去, 都係叫小注宜情啦..... D公司唔執笠, 照住法規去做生意(我咁耐都無買中資呀! 因為唔多明白佢地囉), 唔會俾人告, 咁大的公司, 幾年後唔係翻身囉!

唉..... 有時哀兵必敗, 做投資時的心態好重要, 開心咁落注, 大部份情況都會有錢賺, 同D人人騰騰震咁好大分別, 個結果大多都好唔同呀!  

咁, 大家可能會問, JJ 你唔係講過油和天然氣股嗎? 

係咖, 這些係岩我JJ這些好有好有耐性D人買咖喎(普通人可能揸少少咁啦!) 而我JJ係買來當作財富掛勾的, 既然黃金可以用以財富掛勾, 咁, 油和天然氣就更可以用來跟財富掛勾, 尤其現在油和天然氣價被低估得太嚴重了!

PS: 唉..... 其實到左我JJ這個人生階段呢, 我已經不常常強求回報了, 只求財富保值. 當然, 黃金是一種途徑, 但還有很多種啦, 可能有人會睇到更多途徑囉! 都係果句啦, 各施各法啊!

2020年4月2日 星期四

在爆發疫情果時, 我JJ係唔哂出去超市爭買野咖!

因為, 我JJ平日減價時, 已經囤左最少幾個月的凍肉/罐頭食品/日用品, 尤其未到冬天前的上年12月初, 睇睇我以前點講啦https://mrjj328.blogspot.com/2020/02/jj.html

而且, 加記D屋如此大, 不在大減價時囤些好東西, 唔係好浪費地方?

我有地方就放多個雪櫃+冰櫃, 裡面放D冰煙三文魚, 冰牛扒, 冰長腳蟹, 冰海鮮, 這高質食材.

間房空左係度, 減價時, 買運動衣服, 鞋襪, 大褸, 皮草, 傢俱, 運動器材回來 , 放著來慢慢享用.

到現在這些時段, 就不用出去跟人家來擠著排隊, 現在排隊搶購的, 大多是平時不存多些的人, 即是那些手頭結据, 一到驚恐, 就全都失去思考, 一窩出來搶! 看來他們下個月信用咭利息又會創新高了.