滯漲對於退休人仕..... 會係D乜? 好簡單, D積蓄越來越唔見洗, 應付基本生活下, D錢洗得越來越快!
咁...... 滯漲對於果D靠食股息的退休人仕..... 會係D乜? 有可能原本計岩哂數, 淨收D股息就夠錢退休, 但後來D股票股息在通漲下縮水, 就開始唔夠錢洗.
最近有人講, 叫D人唔好退休, 可以做到幾耐得幾耐, 咁...... 我真係讚成咖! 可以繼續做落去, 就做落去.
之不過呢, 做野呢, 可以有好多種喎, 嗱, 其實KEEP D 股票來收息, 都係"人生繼續走"的一種做法囉!
李+X佢九吖幾歲, 都唔退休, 佢果D唔退休, 係繼續做投資決定囉! 係嘛? 佢唔係揸個鑊鏟去炒野嘛!
同一道理, 退休唔係當自己癱左矇左嘛, 都仲係跟住個社會同步來走吖嘛! 繼續參與社會上的經濟活動.
嗱, 我JJ這種退休呢, 係靠收D實業股股息來維生的..... 這些股息, 後生時由每年收得1~2千起, 之後咁多年, 一儲到錢, 就再買D實業股, 慢慢加上去, 加到2018年決定辭職唔撈時, 我當時收D股息收入, 係我日常開支的2~3倍了. 咁樣..... 以當時通脹來計, 就真係可以肯定應付到日後通脹下不斷增大的開支, 尤其, 我收D股息洗唔哂, 就用來再加碼, 再買落D實業股度.
當然啦, 這些實業股係優質好股票, 就係果D生意長有長做長賺錢果D, 而且生意有著不錯增長, 有一定的市場優勢, 這樣才可以把不斷升高的成本, 轉嫁給別人, 才能發放給我穩定的股息嘛, 我JJ認為...... 泥D股票絕對可以抗拒到將會來臨的滯脹大潮.
真係要承認自己年紀大左, 就好多野要慢落來, 唔好再催促自己再好似後生時咁快手. 我2017年年頭知道自己快要慢下, 就開始賣出哂所有D出租物業, 2018年更辭職唔再撈.
但係之後好多投資決定, 查實比出租物業和打份工, 牽涉到更大的銀碼囉!
完美的退休呢, 其實係把量變質囉! 退休前, 要面對好多人, 每天都要做很多決定, 量多囉, 心思集中唔到係D最重要的事情上邊! 退休後, 唔需要面對太多人, 心思可以集中係D重要事情上, 心水會清靜D, 容易集中到精神去做更重大的決定, 這些就是質了.
其實, 打份工, 又或管理好出租物業, 係好花心思的, 後生時面對蚊頭小利, 當然要誠誠懇懇, 敬業樂業呀! 但係做到股息收入高於1.5X日常開支時, 就可以開始考慮一個完美的退休了.
不要忘記, 嚴重滯脹下, 並不是沒有發圍機會, 而係果D發圍途徑改變左, 同之前果30年全球一體化下的時代, 唔同左. 就需要自己心水好清, 心思好清靜來想通佢.
PS: 好多人講嚴重滯脹, 要KEEP住D 出租物業來保值, 我JJ可以好負責咁同大家講, 係加記, 租務法律係用來保障D弱勢人仕, 業主永遠不被看成弱勢人仕. 租金增幅永遠追唔上通脹呀, 即係, 投資出租物業果舊錢, 如果唔槓桿佢(有按揭), 舊錢相對通脹來講, 係會越來越縮水呀! 尤其嚴重滯脹下, 租金增幅係一定追唔上嚴重通脹喎, 投資筆錢就越來越縮水呀, 而且仲要花心思去管理, 實在得不嚐失呀!
其實我JJ係個好夠運的人, 我揸出租物業時, 係低息低通脹的年代, 出租物業係賺到錢的, 但一到高息高通脹, 加租又追唔上通脹時, 投資出租物業的風險就會大增.
