2022年3月30日 星期三
2022年3月28日 星期一
歷史可曾相似過? 從韓越戰, 中東4戰, 花剌子模, 到老伊, 再到今天老烏.....
大家有沒有留意到上邊所提到..... 二戰後的9場地區小型戰爭, 都係屬於同一類戰爭, 美蘇兩核大國沒有落場打, 而是.... 一係透過雙方代理人打, 又或係某核大國落場, 同對方條靚或邊緣國打.
當然係為左避免全面核戰, 但又要打到有戰果, 分得出勝負為止.
韓戰和中東4戰戰果十分明顯, 越戰就就一半一半, 但後來的花剌子模戰爭, 就已經看出分野, 一到90年代老伊戰爭咁, 已經看出老蘇沒有能力去挑戰老美.
30年過後, 有人認為東升西降了, 就又想走出來挑戰老美了, 只是今次老大哥老俄(老蘇承繼人)自己親身落場去打, 打俾佢個沙煲小兄弟睇, 想小兄弟更靠攏自己, 更賣力去同老美撐.
點知黃金72小時過哂, 都未達到戰略目的, 小兄弟心裡對老大哥就凍過水了.
同是90代年老伊戰爭, 小兄弟祖上老鄧...... 賣左2~3萬架坦克俾老伊, 老大哥又賣左新式戰機過去, 宣稱中東第一強國, 只是未打, 連發炮起飛都未有機會, 就全部被掃低變成廢鐵. 當時正值89陸肆後, 老鄧同老美罵翻, 老鄧叫老江上去代替老趙, 目的係觀望, 等打埋老伊戰爭後, 再作決定係咪繼續扮野, 繼續用老江來粉飾粉飾. 點知老伊一開打3天內, 就輸到爬係地下.
好啦, 老鄧見到咁, 就唔理老大哥住, 同老美繼續DEAL住先, 話哂當時老大哥無著數, 老美有嘛!
直到我地偉大的小兄弟上台, 就有心執行秘密祖訓, 灰復舊日紅色國度, 找舊日老大哥來彼此扶持, 來抗老美.
只是, 今次小兄弟唔夠老鄧老練, 連條紅色底褲都SHOW埋出來俾人睇, 咁就無得好似當年老鄧咁, 可以做騎牆草兩邊擺了!
歷史似曾相似的地方, 在於以"用小戰來制止全球性核大戰", SHOW SHOW QUALI 和 肌肉, 等一眾旁觀者選好邊來企, 唔好企係LOSER 果邊.
但今次歷史不同的地方, 係小兄弟無左老鄧果種滑頭, 靈活兩邊擺, 一早就選好邊來站. 還有就係...... 今次小兄弟和老俄這兩個冒失鬼, 嘈醒左咖仔和老德這2個沉沉睡了的恐龍, 如果唔係這2條冒失鬼, 這2條恐龍係唔會走上加軍費這條路上, 佢地國內一直反對積極參與任何軍事行動, 只係老大哥打入老烏失利, 仍要制出核武口吻, 剌激到咖仔和老德立即加軍費.
唉, 還有一個歷史相同處, D冒失鬼又無料, 又要走出來攪串個PARTY, 真係抵死, 兼夾.... 死有如辜 + 死不足惜. 天下本來唔亂, 係D智慧低一等的人, 懶醒唔得醒, 夾硬走出來攪亂個世局佢.
2022年3月26日 星期六
現代化戰爭中的無形之手.
老烏老俄打左咁多日, 唉...... 看來老俄對老烏的作戰主力, 好似老鼠拉龜一樣, 無訂埋手; 只有老烏精準地去找到老俄作戰主力, 來個迎頭痛擊, 使老俄亂作一團糟.
點解? 其中一個可能, 係老烏有高人係後邊教路, 給與一切老俄的作戰訊息和戰略.
誰個高人有咁多老俄的作戰訊息? 如果唔係老俄有25仔, 就係果個高人一向專打訊息資訊戰.....
哈, 當今世上, 誰人會咁? 大家心裡估到了, 係呀! 大家估中左了.
聰明人總是躱係後邊, 來達成佢地想要D野, 得到了後, 就會全身而退, 消失於無影無蹤.
只有...... 果D傻瓜蠢材下下都要出名留名, 為到要去溝女, 哈哈哈, D女仲以為果D傻瓜好有安全感咁, 個個走哂去...... 哈哈哈, 世事真係好好笑, 笑到停唔到咀, 所以, D咁既人仆街呢, 係應該問自己點解咁戇居白痴.
睇睇果個北極熊蒲精大帝有幾多契家婆, 就知道佢心裡幾想出名留名, 再睇睇佢個沙煲兄弟, 呵呵呵, 下下都幻想自己揚名立萬, 要令後世人記得佢D"豐功偉業", 就知道這兩個冒失鬼, 今次真係改寫左世界格局了. 不過, 係佢地相反方向咁去發展下去, 引出2條沉沉睡了的恐龍出來, 逆轉環球一體化, 令到佢地以後大大鑊!
唉..... 人蠢唔緊要, 最緊要要有自知之明. 無功但無大過, 四平八穩咁, 下邊班馬有飯食, 生活好, 咁就唔會亂, 但今次引出左2 條大恐龍出來, 佢地下邊D馬將會好唔得掂, 個個都要為身家姓命財產, 疲於奔命, 蹉跎歲月於無奈, 不見盡頭到彼岸.
PS: 首歌係好應個話題.....
殺手神槍蝴蝶夢主題曲 歌詞：
一息間 變幻無定
願我一息間 失去無形
從無蹤跡可認
誰願以死揚名
殘留石碑一塊
無名沒姓
一息間
變幻無定
願我一息間
失去無形
何來生死宿命？
誰願了解內情？
繁華夢醒傷嘆
人生無情
2022年3月25日 星期五
誰是加記的上等人
大家唔好以為我講, 有錢人係上等人, 其實, 有錢人未必對經濟作出最大貢獻喎!
對經濟最有貢獻的人, 就係果D參與經濟和生產活動之餘, 又能搵到夠錢洗, 無拖住條咭數或無抵押債, 有D積蓄, 暨且可以儲到棧來退休養老果D人.
這些人一定唔會拖累別人, 唔會要整體社會來替佢地D愚蠢行為來埋單嘛! 無咭數欠債, 生活得好好地, 就唔洗去問攞政府福利. 到最後退休後, 唔洗問政府幫乜幫物!
做人要做個有意義的人, 唔好去拖累別人, 等社會大眾可以集中力量去幫真正要幫的人, 好多時係天災人禍, D人就需要其他人幫一幫, 扶一扶, 等佢地透透氣, 透順左條氣, 就可以繼續上路了.
所以, 自己做個好人, 搵夠錢自己生活, 儲夠錢自己退休, 唔好拖累別人, 咁就十分重要了, 有餘力時, 就出去幫幫其他有需要的人, 咁就係上等人了, 哈哈哈.
2022年3月21日 星期一
婚變, 人人都怕怕!
雖然我JJ仲未婚, 一世人連拍拖都甚少, 但我想我可以提供別一個角度去看婚變的問題!
其實, 真係要同一個好愛自己的人來結婚, 拍拖時, 對方還可以不甚愛自己, 但相處久了, 一到要結婚, 對方就不可以不愛自己. 如果連這個最基本步都未達標, 咁就咪急住結婚了!
還有, 表達清楚十分重要, 咪玩捉迷藏遊戲, 約出來大家了解清楚, 才好去決定拍拖. 結婚前也要清楚地去講清楚婚後雙方的角式和責任, 男方千祈咪一個人攬起上身, 女方也不應假設男方做澌一切野.
咁..... 當然, 我都十分明白的, 外貌是可以迷惑到對方的, 男女的身體都會有化學反應, 男女雙方都會有咁樣問題囉! 尤其靚仔靚女, 咁兩人相處時, 盡量小心D囉! 曾經, 甚至有對方的家姐, 走出來警告我, 咪亂來, 要我晚上10點前要送佢個妹返屋企. 所以, 我日後都係10點之前送異性回家.
都係盡量理智一點囉..... 如果連好好地清楚講明白都唔得, 咁就代表兩個人中間好有問題! 咪急住去拍拖或結婚呀!
如果好似我JJ咁, 搵極都搵唔到合適的對象, 又或成日拍拖前俾人攪黃左, 咁, 就要認命了, 唔好求其, 一將就, 就會註定成大錯.
自己的事業還可以一個人唔受人影響, 但拍拖結婚這些群體野, 就無得唔受群眾影響了. 尤其, 係教會裡頭, 人事關係係會麻煩D, 連帶拍拖也會麻煩左! 我係果間唐人教會14年, 連一次拖都拍唔成, 唉, 一唔去, 就咁去下其他社交, 就有幾位潛在對象了. 不過, 太遲了, 我只夠時間去拍拖一次, 唔成功就唔想再拍拖了, 算了吧!
PS: 其實以前我面對果D成日望住我果D異性, 我大多都唔多理會, 有禮貌咁笑一笑就行開一D. 係教會裡頭就麻煩少少, 有時我自己連詐唔知道, 都會俾D"來關心我"果D教友來踢爆. 有一段時間, 我原本打算約果D眼超超D異性出來, 講清楚一下, 但係我真係講極都講唔清, 所以, 後來我放棄了.
2022年3月18日 星期五
長期滯漲年代=人口泡沫年代=獨行自主年代?
今次下邊這位哥仔又講左D驚人的想法, 我諗諗下, 佢又講得似層層咁喎!
佢講長期利率高升(俄烏戰爭, 全球制裁, 去全球化後的惡果), 通漲不斷高升, 更是源於以前的全球彭漲人口結構, 一到人口老化, 不單中國人口紅利不再, 連全球都是一樣, 人口大幅度衰老, 缺乏勞動人口下, 勞動成本大大提高, 令到成本大升, 通漲大升, 也推高利率. 佢叫人減少負債, 無論是消費債或投資性的債務.
佢仲講, 最大風險不再是通漲和利率, 而是因為通漲和利率上升, 資本收縮, 投資減少, 令到社會新機會和新工作減少, 再加上人工智能和自動化, 替代了勞動密集的勞動人口. 即係, 現在有好多以前勞動密集的人口, 很快會變成多餘無用的勞動力, 全球人口就會出現結構性的人口泡沫.
人口泡沫爆破, 比金融/經濟爆破, 後果更具爆炸性和破壞力. 人口泡沫的人口, 大多都是從事替代性較高的勞動工作(被AI和自動化所替代了).
但是現在戰亂不斷, 去全球化下, 經濟規模大大縮小, 資金縮水, 無左低成本的借貸, 投資意欲大減, 工業生產/糧食減產, 醫療資源也縮減, 再加上AI 和自動化取代了這些泡沬人口的勞動力, 就變成人口泡沫爆破, 這些人就會被排除在經濟體制以外, 成為多餘的人口.
佢都好似我JJ咁, 叫大家在逆境中尋找新的希望, 不斷減少欠債, 增加投資係D長有長做長賺錢的生意之上.
當然, 自己的價值觀和分析能力是最決定性的, 邏輯是十分重要, 但之外, 更要有理解抽象思維的能力, 即是...... 看穿現實世事背後, 將來會發生的事情, 這個是十分重要, 係別人還未開始前, 自己己經去開始未雨籌謀了.
所以, 大家一定唔好埋堆, 唔好跟人跟風, 一定要獨斷獨行, 這樣才會在戰亂不斷/去全球化的局勢下, 立於不敗之地.
2022年3月14日 星期一
投資? 幾多係知識? 幾多係運氣?
前2年, 股市在疫情爆發時大跌, 果時真係通街都係平貨..... 對那些對我好好的網友們, 我回饋佢地..... 叫佢地去買資源股囉!
果時有隻老美油股, 股神係2018~19年, 係60-70蚊大買, 到左疫情時, 這美股大跌, 當時老美政府因為股神係大股東, 就要股神自己去救, 但股神一向的市場投資法則, 佢係唔會用股東錢去咁救間公司, 咁佢就去清空這間公司的持股.
我JJ就係係果時入貨, 到左現在俄烏大亂鬥後, 這股股價翻左幾翻, 嗱, 股神都估唔到, 佢要立刻入番, 咁就炒得更高.
咁去睇呢, 知識係投資的必要基礎, 但係股價2年內翻幾翻, 咁就唔係知識, 而係運氣.
各位, 投資呢, 一定要有知識, 大致都唔蝕本, 大多都會保到本, 致於賺幾多, 要等幾耐, 知識可能只佔少部分, 其他果D主要係運氣.
我成日同自己講, 唔好把運氣的作用, 誤解為知識的作用, 也不要把特殊情況下的運氣, 視作為金料玉律來推想.
PS: 今天痕生指數跌左1 撇有多, 大家看看外圍情況, 可能告訴我們, 已經再沒有環球外圍的進入投資氣氛. 這個可能係知識來咖, 係投資分水嶺, 睇淡睇好的臨界點.....
日後, 將會更淡, 還是更旺, 大家可能心裡有個普了.
2022年3月13日 星期日
孤芳獨對天 - 遙遙看見 萬里烽煙
在俄烏昏亂了十幾日後, 感覺這首歌最應景.
其實, 世道始亂, 大家真係要習慣孤獨, 因為在亂世中, 只有自己能救到自己, 自己命運自己掌握. 當然有宗教信仰是好的, 我JJ都有, 但之後就是自己的靭力和耐力, 自己知道自己想要D乜, 行條乜野路!
很多人以為今次老俄好快會跪低 BACK DOWN, 但看來老俄和老美都會預備緊一場持久戰.
如果浦精大帝唔會行將就木, 又或佢已經搵好接班人, 咁就......即係..... 佢一直打算持久戰, 從軍事, 到經濟, 再到資源,....
真係太後悔, 兩年前無入夠資源股, 只入左油股, 無入礦股, 無入農產股, 無入林業股, 不過, 我JJ有的是耐性和自知之明, 知道自己係小人物, 行事為人, 做投資, 一切都緊慎!
歌詞:
浮雲片片 在我身邊
願伴我去那邊天
我獨搖頭 悲苦笑笑
不覺熱淚流滿面
長長佩劍 掛於身邊
伴着我去償素願
我願回頭 處身過去
嗟嘆命運常黯然
誰人明白世上最寂寞
空揮出寶劍
平時行路彷彿高數寸
誰堪併肩
遙遙看見 萬里烽煙
獨自孤清站在一邊
我欲無言 輕解佩劍
嗟嘆命運常黯然
PS: 兩年前大跌市時買左第一波貨仔, 有網友勸我唔好接人家的飛刀, 真係好多謝佢地, 緊慎要緊, 查實我真係已經賺左好多錢, D油股一蚊變好多蚊, 仲有乜野多求呢? 做人要學會唔好貪啦!
不過, 過左2年後, 升左果D已經升左, 風險已經無左, 就有承受新風險的能力, 可以去尋找更多新投資機會.
我JJ係教會裡, 係唔理人乜濟, 孤獨幫一個, 人家說我三道我四, 我也由佢地吧! 始終做人下下要群眾認同, 實在太累了. 我係教會幫到手就幫, 幫唔到.... 就行開D, 做自己正事實事! 投資呢, 係要受得起孤獨的感覺, 亂世呢, 更需要呀! 唔好諗住埋堆, 無用咖!
2022年3月7日 星期一
誰個同胞在疫情下賺錢? 啊.... 原來佢地去做保安.
原來佢地疫區D保安呢..... 同係街上請日結工無分別, 實在太潚洒了!
大家真係要諗諗, 將來由上邊落來"幫忙"果D, 又係咪咁? 大家一定要小心家居啊! 當然, 這並沒有眨低之意, 只是大家心裡要明白, 香港請D保安同上邊請果D, 性質上好唔同, 最重要大家唔好誤會係一樣呀!
2022年3月5日 星期六
真希望紅十字會快D入到去.....
唉, 見到人家在烏克蘭家鄉, 情緒咁低落, 我都身同感受.....
希望紅十字會快點可以把救災物資運到入去幫助他們!
我這裡紅十字會已經成立專項來幫助烏克蘭朋友, 我自己也捐了第一筆錢, 只要聽到紅十字會入到去, 我第二, 第三筆錢就會捐到位了.
PS: 前幾天見金仔咁升法, 已經把金仔套現, 因為再升都沒有用, 再升就只會代表烏克蘭朋友的生活更慘更差. 唉..... 我D能源股係咁升, 但我並沒有感到任何快樂, 相反, 越來越覺得唔對路, 越來越覺得錢不再是幫助人的媒介.
我JJ可以怎樣做? 深陷一個無奈的深淵之中, 以前, 我還對未來有著美好的憧憬, 以為有了錢後, 自己不愁生活之餘, 還可以去幫助遠方的苦難朋友, 誰知道, 原來我表錯情了.
無力對東風
夢裡奈若何
不知春還在
苦嘆有心人
大家可能感到奇怪, 我JJ會對遠方烏克蘭朋友有這樣的感情? 不單因為前排佢地撐過我地港人, 更因為我深受佢地影響.
我JJ在加國中部草原讀大學, 那裡有很多烏克蘭移民, 在1930 年代因為他們祖家大飢荒而來到加國草原(佢地就係果班強烈要求加國政府在國內大飢荒時, 向中國人伸出援手的人, 佢地對中國人有恩呀).
大家都知道我JJ係香港生活到十幾歲, 點都會有少少花弗. 不過, 當我讀完大學後來到加國東邊的滿地可, D西人唔覺得我係香港人, 仲話我係個 HONEST PRAIRIES FARMER. 果時有一波64後的香港移民, 佢地個個質疑我係咪香港人, 話我一D都唔似.
2022年3月3日 星期四
為何老烏要寫"投名狀"?
唉..... 我隻手腕仍然好痛, 未消腫呀! 做住單手鍵盤俠先!
咁痛都出來發嗡風, 無非係想為大家提供多一個角度去思考當今勢態.
其實, 老烏係個大國, 跟老歐內的老英老法老德老意, 人口面積相若, 老烏加入, 意味著老烏有力改變老歐聯盟內的結構和格局.
最令老歐為難的, 係老烏同老俄原本係同文同種的鄰居嘛, 若果將來老烏改變去親老俄, 咁唔係大檸樂?
哈哈哈, 所以遲遲都唔侵老烏一齊玩, 投名狀就唔少得啦! 而且, 一定唔可以太少, 最少要證明未來20~30年, 老烏同老俄都唔會有計傾.
條件可能係...... 要老烏拖冧老俄, 最少要令到老俄再度崩潰, 最少要令到佢有多個加盟共和國游離出去, 國力得番一半多dd.
這樣不單解除歐洲的壓力, 令老俄再無力爭霸北極圈(北極洋在暖化溶冰, 開通航道和採油氣快要變得可行), 還會令到熊貓國要回頭兼顧潦闊的大北彊, 無暇於東南!
所以有人說, 老美是戰略大贏家, 老德老法老英和熊貓國有利, 只是老俄可能連戰術都輸甩埋褲喎, 而老烏在戰後也不怎樣會輸, 最少, 會好似熊貓國打完安南咁, 外邊紛紛來投資!
好啦, 一切都要等戰果打成點, 之後才有定案! ok? 唔再打字了, 單手打好攰呀!
訂閱：
文章 (Atom)