當股神減持老美銀行股時..... 我們應該注意些什麼？

傳統上, 銀行是做信貸買賣嘛, 現今把買賣信貸, 套用新名詞 - 衍生產品資產, 明明是負的, 卻可以被解析為資產. 

大家都看到, 在經濟好時, 這樣操作, 會令任何投資銀行股的人, 魚魚得水, 只是大家看到2008年次按果鑊野, 大家見到銀行股大縮水呀!

好了, 股神一向睇好銀行股, 尤其老美銀行股, 今次佢減持 高佬盛 和 JP 摸緊, 但曾持花旗, 網上有解釋, 前兩者衍生產品資產/按金比率好高, 但花旗相反較少, 較保守. 

咁係咪..... 股神認為2008年果鑊野, 會有可能係近年重演呢嗄? 首先, 老美政府已經揼左幾萬億俾一般打工仔, 如果現在老美這些銀行唔掂, 老美政府再好似2008年咁, 出資救銀行佬, 老美民眾會否出聲抗議? 到時老美銀行佬會點呢?

大家可能會問我JJ, 到時會否係買入銀行股的時機?

其實, 好似今年3月咁, 都係銀行佬+基金佬+高風險投資者, 佢地補倉拆倉轉倉補倉所引起, 當時, 我JJ主力去入油股+油管股+保險股...... 

不過, 如果到時銀行佬無老美政府出來救呢? 又或要俾佢地跌到好慘好慘咁, 老美政府先至可以有足夠民意授權佢地來救市呢? 長時間裡的補倉拆倉轉倉補倉, 所引起的骨牌效應, 就會令到通街都係超平貨來執了. 

我JJ到時會買乜? 因為我住係加記, 因為股息收入的入息稅關係, 我會傾向買加股, 但係加股有D行業, 係做唔起的, 例如:藥廠/民生食品..... 就算做得起, 最終都會搬去美國, 但係我今年3月已經買左油股和油管股, 難道我還要再買資源股? 

所以我有點兩難了, 我買非加國的收息股, 即係要我俾更高的稅率呀. 這個即係叫我, 現在再買股, 就唔好買股來收息, 要睇住長期股價升幅了, 賺差價呀, 即係BUY LOW SELL HIGH.

噓, 即係叫我JJ改變一直的投資策略, 進入一個全新不同的投資思維裡?
 
好啦, 如果再買加股, 可能要等銀行股冧時, 才入D加國銀行股了.
 
PS: 股神今次還減持富國銀行, 我都有, 仲係揸左好多年, 算了吧, 都唔係好多.

還有股神清空了油股OXY, 這個令我有點意外, 不過, 我係個價好低殘時買, 唔似股神係高位買入, 這鑊佢蝕得好金呀! 而且, OXY出認股證來當股息俾我, 我諗我都係揸D好似OXY的資源股, 較為有利, 就好似我揸少少金仔咁啦!

不過, 如果真係好似2008年果鑊重現, 到時滿街D貨都跌到P/E 10以下, 大家唔洗諗咁多, 掃D生意長有長做長賺的藍籌, 咁就可以UN UN 腳了, 唔洗怕呢! 現在最重要係預好D錢來到時買貨了, 哈哈哈!

為何我叫大家向世界出發?

其實, 大家都睇到, 香港已經返唔到回去上年7月之前的香港, 世界也因為疫情在各國爆發, 也不再一樣了, 返唔到轉頭! 

香港一國兩制, 唔係香港和上邊話有, 就有呀, 仲要老美肯認頭, 才有呀! 現在一切都已經太遲了, 老美已經取消了香港 - 不等同中國來看待的特殊地位和關係! 

大家可能問, 上邊俾番哂香港原本的一切, 咁唔係乜事都無? 

哈, 家陣人家做緊野呀, 仲未做完呀, 仲CALL緊人馬係度做緊呀! 上邊叫停, 人家就停左佢? 人家唔係好無面? 

如果真係想講和, 人家開D條件...... 辣到...... 一定上邊接受唔到, 為何? 人家已經開到口..... 唔係叫主上一人靠邊站, 而係叫全個黨一齊靠邊站呀! 連老江老胡佢地都......? 這個, 即係無得傾啦! 

我JJ一睇番起解放後上海的故事, 當時都係雙方交惡, 爆發韓戰呀! 雙方都有人死左呀! 仲係好多人呀! 之後, 就係老美向上邊禁運, 上海就開始破落, 先前走左落香港果班人, 慶幸避開左! 

咁, 係咖, 我JJ都承認, 好多人去到外國, 生活一定無香港咁好! 不過, 家陣香港已經唔再好似以前一樣, 無左以前老美經香港, 同上邊 DEAL 的 特殊地位, 無左以前萬種錢錢流經香港濕濕腳果種過癮了. 所以, 現在去外國, 生活大多會比留在香港好, 因為外國生活水準就算跌, 都唔會好似留係香港跌得咁慘.

上海在解放前, 係黃金地來咖, 全國第一, 就算日本仔攻下上海後, 都要粉飾太平, 唔可以俾上海好似當時香港咁, 有人餓死呀! 但上海解放後, 生活水準一直跌跌跌呀, 跌到D人要海外親戚寄錢寄藥寄物資回去呀! 唉, 一講返起, 我JJ就喊得一句一句呀. 全國第一, 變成要靠海外親人接濟?

所以, 我叫大家向世界出發, 唔單只為大家著想, 仲為到果D無能力離開的港人. 有多D港人係海外, 香港有乜需要, 尤其親人, 都可以有多D人係海外來幫呀! 大家唔好係香港攬住一齊呀, 現在不是團抱取暖的時候, 走得一個港人, 將來就多一分力去幫其他港人呀!

大家唔洗再諗太多了, D人如果仲信有一國兩制50年不變, 到最後只會受到最大傷害.

PS: 昨天, 我JJ去行公司, 見到件DKNY短袖裇 - 加細碼, 著上去型仔到暈呀! 宣傳海報上D MODEL, 都係著加細碼, 我一攞上手就走去排隊畀錢. 只是, 一想之下, 問自己, 哈, 我仲會返香港嗎? 係喎, 我係加記, 一年都著唔到2個星期的短袖衫呀, 衣櫃裡仲有好多未開出來著呀! 仲買? 唔好LU, 都係唔買囉! 

哈哈哈, 加細碼衫, 這裡邊度有人岩身呀? 等多一陣, 又唔係減價來俾我JJ買? 嘻嘻嘻...... 好, 等佢減價.

我地港人向世界出發, 那懼歧視? 那會在乎人家的大不同?

前幾天, 看到這個視頻, 講這位哥仔3年前回流香港, 覺得香港比美國好!

其實, 我JJ都有諗過回流回香港, 因為加記實在太凍了, 年紀一大, 就真係要搵個暖D地方來住了. 當然香港天氣上對我有好處啦! 也當然, 721改變左我了. 

不過呢, 這位哥仔講佢自己不能..... 同時融入美國當地主流社會, 又同時保留自己華裔的文化和身份, 甚至認為美國是白人精英至上. 

唔...... 我認識的洋女嫁唐人老公, 大部份係為到.... 不再跟隨佢地來自的家族傳統, 希望有個"多樣性"的未來和人生. 只是這個不代表, 她們的唐人老公, 就可以把華裔的文化和身份, 放在第一位, 相反, 她們要求老公要去接受不同的文化和身份! 這個是我JJ擔心佢婚姻會起紅燈的原因. 

致於, 某些人控制了社會, 任何地方都有啦, 以前港英時期, 都是一些精英來操縱(現在就..... ), 一般人的問題是.... 要突圍到這些精英的什麼層面囉? D人好似我JJ咁, 錯過左適婚年齡, 就做個普通加燦算了! 

我JJ大膽咁講, 做得精英D人, 首要去接受不同的文化和身份囉! 好似誠哥潮州冷咁, 落到來香港, 難道要把潮州冷果套套用係香港咩? 大家都見到, 誠哥佢沒有放下潮州冷果套, 但佢接受本地港人果套, 做D生意被本地人受落. 這個就是精英同普通人的分別, 不斷去學習和解理, 不讓自己潮州冷果套, 成為阻礙自己的框框嘛! 

所以, 講番我地一眾港人, 現在向世界出發了, 當然, 我們不忘自己港人的本, 但不應讓這個本, 來阻礙自己的發展呀! 人與人之間, 必有不同和偏見, 在香港叫歧見, 在外國就叫歧視, 只是在外國幅度大D囉! 我地香港人無野難到我地咖嘛, 做搬去外國的決定時, 難道這就令我們退縮嗎? 

PS: 十分有趣的, 我JJ住係加記大半生人, 廣東人的特徵漸漸減退, 北方人的特徵漸漸走番哂出來. 早15年前回港, 都仲有人誤以為我係韓國人, 可能係韓劇韓片的關係, 但這10年裡, D人開始誤以為我係北仔/北佬, 可能我年紀大左, 再無好似韓片中D男主角咁靚仔, 又或中港往來頻繁左. 

只是有時在香港D人見到我, 誤以為我係上邊來, 就唔多客氣, 見我著名牌, 就好少少啦! 這個又不太可以叫歧視的, 只是就有點...... 我都唔識講了. 其實, 好多這種人, 是每天150個單程證來香港D人, 又或是他們的下一代. 

相反, 我JJ係加記, 係上等人來咖, 最少英法雙語都應付到, 再加上會普通話, 又唔洗再為生計而要出去搵食. 有些國內人, 一聽我D香港口音煲冬瓜, 又係加記長住多年, 就會提高警覺, 懷疑我係係香港出生的X二代了(文貴大官人講果D), 同我講話, 特別客氣! 

所以, 大家去到外國, 唔洗擔心喎, 香港都掂, 係外國點會唔掂呢? 最怕就係悶死之嘛!

為何我JJ不是估神?

前幾日, 有親戚打來問我金價會起到幾多? 幾時留意賣出? 唉, 事緣因為我前年叫佢, 買金仔來減低揸現金的風險, 我都無叫佢買金來謀利姐, 而且, 金價升, 唔代表我係賺錢, 我只係減少淨持現金的風險咋喎, 離開有利可圖, 實在太遠了!

我一同個親戚講, 我幾錢買入金仔, 佢就好興奮咁, 誤以為我係估神; 其實, 我只係想同佢講, 我離開估中, 相差甚遠呀! 

嗱, 我係係金仔最低價前買入, 我買左, 金仔就再跌呀! 這個, 已經係第一次估錯了; 我第二次估, 諗住千一再入D, 點知跌到$1150, 就最低了, 我又估錯第二次了; 金仔回升到我買入價, 我就估金仔會係果度徘徊再下試低位, 點知我又錯第三次, 金價之後再無跌低過我的買入價, 反而升升升, 升到現在, 我連第二次再買金仔, 都無機會呀!

以上3次估錯, 當然就證明我JJ唔係估神囉!

又好似現在中美咁, 我2年前都估到有大龍鳳, 所以才驚起上來買金仔, 不過, 我當時估唔到今次的大龍鳳會咁杰撻撻, 我當時仲估中美唔會全面脫勾, 估中美會留番香港來做日後往來的通道, 我當時仲提議D朋友, 香港將來會更好境, 我自己也有回流的打算, 當然, 我又估錯左啦! 

到左上年721後, 我才知道D人來接管緊香港個場, 激怒左老美, 我當時仲諗住, 老美唔會散場唔玩! 不過, 我估唔到D人玩得咁盡咁大呀, 又用緊急法, 再用國X法後, 老美就擒牌唔再玩! 這個我又估錯左了!

嗱! 這班人做出來D野, 係唔可以用民主資本世界的諗法去理解, 要用無產階級專政果套去理解呀! 

咁..... 會否打起上來? 我JJ真係估唔到了, 也不敢估! 可能連果D係無產階級專政下, 茁茁成長D人, 都估唔到了. 

PS: 我離開那華人教會前, 開小朋友活動D會議, 果個壞鬼師母平時唔出現, 佢一來, 我就估到佢來催谷我地班同工做野. 其實, 如果係有建設性的, 我都不會大罵這些父母自己唔做, 只係識得係度推其他人去做. 

我一句話個師母, 參與的同工屬唔屬靈, 有無愛心, 一眼見到, 最少1小時來回參與2-3小時的活動, 仲係唔關自己事, 關D自己唔動手的父母事. 

我一句大番個師母, 教會如果唔夠清潔, 就不如唔好攪小朋友活動, 清潔教會地方, 這個跟本唔只單單關D未結婚未有仔女D教友事, 而是全部人都關事.

我烏鴉咀, 幾個月後, 就來左SARS了. 再睇番果壞鬼師母平時的做事方法, 當然就知道, 成間教會亂成一團, 之後幾年裡, 我每次崇拜時段, 行經這教會, 都發現停在外邊的車輛數目, 不斷減少.

係咖, 我唔識估野呀! 但係我識個驚字點寫, 而這個師母和推佢果班父母, 就唔識驚字點寫了, 或者佢地個個都唔知點係教會做事, 只會臭罵別人來"推動"佢地想要D果效! 

今天再見番這些父母和他們的子女, 我JJ盡量都不會用輕視的態度, 不過, 又係真的, 我無估中的能力, 只是比這些人好少少,識個驚字點寫囉! 識個驚字, 比估中更重要呀!

如果真係要攞港燦基因大數據, 都只會因為.....

坊間有講法話, 同一眾港燦做普及病毒核酸檢測, 係想記下港燦D基因指紋, 用來對比重要大人物, 用來做人體器官儲備庫, 又或用來製針對港燦的生化武器..... 又講什麼誠實或服從基因..... 云云.....

其實, 講句中肯說話, 這些講法, 有點不對, 上邊200倍人口, 如果係上邊搵唔到配對基因的人, 就更難係香港搵到. 致於製針對港燦的生化武器, 這個就更難, 不要講港燦了, 就連老美都同上邊同胞D因, 有99.9%相似基因, 基因生化武器點會唔會害番自己呢? 再講什麼誠實或服從基因, 這些就更難了, 有邊個科學家知道邊個基因係誠實或服從嘛!

如果真係要攞港燦基因大數據, 都只會係因為..... 

1. 證明一眾港燦同上邊同胞, 基因上係百份之百吻合, 證明港燦同上邊同胞無分別, 叫D人唔同再吹噓"香港不是中國". 其實, 對於果D 1949年前在港定居D港燦來講, 就算4-5代前的爺爺嫲嫲有人係非華裔, 咁又點呀? 過左右咁耐, 又咁多代人, 個樣成個港燦樣咁, 同上邊同胞無分別!

2. 建立人口基因庫, 鎖定一切有先天基因疾病D人, 定立政策來應對將來可能爆發的疾病和社會問題! 尤其氣候暖化和環境快速改變, 某種基因的人, 將會最受影響. 

3. 當然係關係到優生學啦, AI/5G年代, 跟本就唔需要咁多勞動人口, 只需要更多聰明或體能好的人, 真懷疑著, 已經有政策出台, 計劃去減少甚至壓止, 那些被"低端人口"所引發的社會矛盾! 所以, 大家係網上發表意見, 不要太唔合邏輯, 太過嘩眾取寵, 如果唔係, 好易被定性為低端人口!

4. 當然計劃去把社會資源, 分流到那些最適合AI/5G年代的人, 用基因來分類, 就是其中之一: 高IQ, 高認知, 高聯想, 高體能......, 甚至生殖力強(皮膚白裡透紅, 精子數量高, 排卵準時, 菠大蘿大好生養, 哈哈哈). 共慘黨被定為唯物論者, 唯物論者好講優生學, 猛叫D基因優良D人, 猛生多D. 

做這些普及病毒核酸檢測, 真係好勞民傷財, 防疫效果無乜(因為輪隊時最易被感染, 檢測是100%延後數據), 主要係為左, 基因庫大數據, 徹底係一種唯物論者的想法做法囉!

PS: 我JJ講完左咁多野, 一講到好生養呢....., 真係又令我想起我果個好Q麻煩的親戚, 佢招惹左咁多女人番來, 佢日日俾佢果班女人, 好似扯線公仔咁舞, 又俾佢果班女人D 父母來追罵, 唉.....

佢班女人見我係加記乜都自己落手做, 就話我人生好陰公, 哼, 我才覺得我這個親戚仲陰公呀! 如果這些叫高端人口, 優質基因人種, 我就寧願唔做了.

在科技革命年代裡, 我們港人飄然走遠方, 再闖新世界, 似那舊家鄉一樣!

我地港人現在要遠走他方, 在我看來, 我們會遇到些什麼問題?

1. 人生路不熟, 文化差異, 面對陌生的做事方法和社會制度 - 這個呢.... 我JJ十分有同感, 我JJ就用入鄉隨俗來應對囉! 無乜野咖, 去問問市政府, 問下人家, 網上有無資訊, 來自己閱讀和先理解. 甚至政府半資助好多組織來教人點去做, 尤其先進發達國家, 就越多DIY 資訊和短講, 由免費到不太嗱脷的收費不等呀!

2. 正好迎來新一波的科技大革命, 影響著所有人類的生活/學習/搵食 - 我們進入大數據和AI的年代了, 好快世界將會不再一樣了. 連大家移居去到當地的本地人, 都會無所適從. 

不過, 無野難得到我地香港人喎, 正好用頭幾年去克服上述兩個大問題, 一次攪掂佢啊! 

因為當第二種問題出現時, 就會去改變第一種裡的文化/做事方法/社會制度, 人家本地人都有好多地方, 需要重新適應. 

我地香港人移居去, 當然要適應比當地人更多的地方, 不過, 現在我們可以一石二鳥, 一次過攪掂, 人家本地人都會有不適應的地方, 只是我們香港人會有多一D不適應的地方囉! 可能講緊多少少咖咋!

 不過, 人事呢, 萬變不離其中, 有些地方我地係真係好需要注意:

A. 大家不要以為科技進步, 人與人之間就會疏離, 這個只是對一般人而言. 但對很多願意或有能力花錢的人來講, 他們更不希望由一個資訊機械來得到服務, 而是希望由一個活生生的靚仔靚女, 來提供裁縫式的資訊或決策服務. 所以, 保持一個高雅的儀容和談吐, 一個理解人心理的思維, 是爬上高階社會層面的不二法門, 這個已經贏在起步點了.

B. 科技只是個工具, 背後是人文文化作為靈魂來推動, 尤其在那些不能重複/創新創意/任意而為/藝術標奇立異的領域, AI和大數據是代替不了人的. 所以, 維持自己一定的文化藝術觸覺, 比成為一個理科狀元, 可能更重要呀! 

C. 自己日常的生活和環境, 會影響自己的命運和末來發展 - 2年幾前, 我賣了出租屋, 又椒汁左老細, 走左去退休, 連秘撈都唔撈了. 之後幾個月後, 朋友見到我, 都話我個LOOK唔同左, 高雅左! 係咖, 唔洗對住D窮忙族租客, 唔洗對住來維修清潔D為口奔馳的工人, 唔洗對住辦公室裡的人事和層層老闆, 唔洗成日掛住秘撈D客仔有無下次再番來. 人到無求, 品自高, 之後, 一去諗投資, 頭腦就會好清晰, 好有方向咁去投資, 知道乜野係超值抵買番來! 心靜自然會睇野清晰好多呀! 所以, 大家移民之後, 住D地區唔好咁低階層, 交的朋友要有學識一D, 醒目一D! 還有, 唔好工作時間太長, 留番D時間俾番自己, 去令自己更高階! 現在科技年代, 死做爛做, 只會令自己變成窮忙族!

D. 保持學習, 永不言休, 常常思考, 常常組織自己的思路. 外表只是個硬件, 人家看著一表人才, 之後, 人家就會來看看內心裡的軟件了: 想些什麼, 關心些什麼, 看重些什麼, 全都顯示著社會層次, 之後, 做事就會得心應手, 無往而不利. 

現在風頭火勢下, 移民他方, 怎樣才叫安穩?

現在風頭火勢下, 講移民, 同以前D人講移民, 有無分別? 

我JJ屋企係80年代中來移民的,  果時我地屋企係諗住呢.....  有事就留係加記, 如果香港無事呢, 就教腳返去香港啊! 所以, 我JJ都屬於果D騎牆派, 移民當係買個保險喎!

後來"發玖陸肆"發生之後, 大家都見到, 我JJ並沒有教腳返來香港, 大家就估到我JJ對某些人十分不信任. 到左90年代中, D人移民左來加記後幾年, 一讀完書就回流返去香港. 

當時我真係問佢地, 就算俾你地係香港撈到風生水起, 你可否在香港收成收割? 並安享自己的成果? 更何況, 大部份人只係返去打份工咋喎! 好啦, 我唔阻人發達的, 人各有志呀! 

不過, "發玖陸肆"這種事情發生一次, 我JJ已經嫌多, 現在再來多次加料雙倍效力的, 就一定要放棄對某些人的希望了, 實在不能再相信這些人了. 所以呢, 如果大家現在移民呢, 大家就唔好成日諗住回流, 因為回流係無保障呀! 90年代中, 那時回流的人, 現在又要再回來, 人生來來回回, 就用左好多年來兜兜轉轉了, 平白浪費了不少光陰, 比起我JJ留在加國, 最多係開始時唔多順, 但一過左頭幾年, 之後就好順暢了. 

大家現在如果去英國, 唔洗做投資移民, 唔洗責死筆錢, 更唔洗面對投資風險, 只要帶筆錢去, 證明俾英國政府睇, 夠食夠用, 咁就得了,  實在比以前D人來加記做投資移民, 好很多呀! 

現在, 大家移民呢, 最重要著眼D乜? 問案是..... 安穩的人生!

現在英國呢, 一定唔會好似以前香港咁, 發展得咁快! 不過, 我就唔多睇好日後香港的發展速度, 會點快得過英國了! 慢下手, 香港再過多幾年, 無哂D外匯儲備, 到時就維持唔到社會福利和公共醫療了, 到時大家係香港, 就真係更要擔心無錢醫病了. 

我相信, 憑英國的國力, 總不會維持不到佢地D公共醫療和老人福利, 好似加記咁, 有老人金派咖! 總會夠基本開支囉!(就算一向無乜點供開政府退休金, 政府都有老人金俾D老人家). 而香港就算唔倒退, 現在俾老人家一個月果3千蚊生果金, 連買基本食物糊口都唔夠呀!

以加記為例, 如果以前供唔夠退休金, 老左後退休金唔夠開支, 大多數人都由政府俾老人金來維持基本生活開支. 大約一個月有一千加元左右, 少過全額退休金唔係好多咋! 但係老人唔洗俾醫療, 買藥有得平, 每月過左55元, 之後果D藥錢, 就由政府俾了. 實在..... 這是安穩的人生, 後生時已經知道自己老左後, 生活唔會點差呀! 

所以, 大家實在不用擔心, 將來係外國老左, 會唔夠錢洗囉! 又有老人金, 又有免費醫療, 又有政府包低D藥錢, 莫說相比將來的香港老人生活, 連以前香港經濟咁好時, 老人家在香港的生活, 都一定唔夠在英加澳紐咁好!