叻人就一定有錢嗎?

今次這條片係講...... 有班經濟學家做左個模型推演, 發現.....原來人有無錢, 成唔成功, 係同佢叻唔叻, 努唔努力係無關, 完全係運氣喎. 

只不過, 模型推演裡...... 人人都係均等機會咁遇上好運或惡運, 但是事實上呢, 我地係可以做一D野, 增加自己的順境機會, 減低自己的逆境機會. 

1. 常有笑容, 善意, 耐性 - 做人最忌係......雖無過犯但面目可憎, 其實, 99%的人都唔會天生樣衰, 只是後天裡這些人相由心生, 以為全世界都欠左佢地十萬九千七咁, 所以, 就大鑊了, 明明人家唔識佢, 無拖無欠, 但都想整古佢, 明明有機會, 人家都唔俾佢.

2. 搭順風車 - 係咖, 唔好爬逆水, 有順風車搭, 就快快上車, 有便宜就唔好駛頸. 乜野係順風車? 例如: 朋友公司請人, 特來單聲, 嗱, 就唔好扮哂清高, 怕欠人情, 人情用左, 最多係搵機會還返俾佢. 禮尚往來, 君子也.

3. 唔好同人爭崩頭, 唔好同人嗌交 - 試想想, 香港人移民左去一個城市後, 全部人走去開餐館, 係咪大大鑊先? 實在係災難性呀. 係..... 無錯..... 唔好離群, 但係...... 唔係跟住大隊做乜自己就做乜嘛. 尤其, 嗌交呢, 我一定走開D. 我都無謂浪費自己時間來嗌, 有時間我留番來諗下點搵多D錢錢返來仲好啦. 嗌交呢...... 大多都係留番俾果D失敗者囉.

4. 唔好時時好忙好攰 - 惡運時, 大多數人都係太攰太忙. 還有呢, 時時太攰太忙, 就算D機會同錢錢, 兜口兜面咁COM 埋來, 自己就睇唔到啦! 也補捉唔到喎! 

5. 避開D危險, 唔好挑戰極限 - 係咖, 傻左咩, 去跳BUNGY JUMP? 任何有危險D野, 都咪攪我了. 同一道理, 住係安全的中產區, 總比住係貧民區好, 係咪? 君子不立危牆之下喎.

6. 學識博, 但可以不精 - 學識太精, 會墮入特定思維方式咖, 甚至要來 DEFEND這種思維, 一DEFEND呢, 就好易同人有沖撞呀, 相反, 學識博呢, 容易改變自己的命運和人生軌跡, 一有機會來臨, 學識博就會容易理解到有乜機會在那裡.

7. 做人做事隨緣呢.... 入鄉隨俗, 唔好是非心太重, 更不要替天行道 - 係咖, 真係見到有人移民來之後, 或轉換左新環境之後, 對新環境格格不入喎, 更有一D人呢...... 是非心太重了, 可能佢地天生好宗教性, 甚至會走出來講, 替天行道, 打低哂果D佢地睇唔順眼的人和事. 唉, 其實, 這樣係人生最大鑊的事情來咖! 如果要信宗教呢, 就要信果D"使你福杯滿溢"果D, 唔係下下叫人出來替天行道果D. 

8. 最後, 大家有無諗過, 乜野係人生最大的風險呢? 唔係做生意/買地/買股票/買古董, 而係結婚呀, 尤其係一個民主人權的國家裡, 離一次婚, 夠你一世人有排受呀! 其次..... 係真心誠意咁去相信一種理念或宗教, 有無諗過, 有D科學家用自己理念, 窮一生精力去研究, 到最後才發現自己理念是錯的! 所以, 認識清楚人生最大的風險, 未結婚前如果發現有機會會離婚, 就要肯定唔會離婚才好去結婚呀!

為何今上有咁多人支持和妥協佢?

其實大家有無諗過? 點解到現在環境差左咁多, 都無乜明顯威脅性反對今上? 當然, 一來係佢採取手段來壓制反對者, 但係二來, 係好多人一早預左現在環境會咁差, 佢地只係希望有個人出來帶頭走出現在的困境, 並沒有認為是今上蝦碌整出咁多困局.

家陣同大家解釋一下, 支持和妥協今上果D人, 佢地心裡諗緊D乜?

點解D人一早預左現在環境會咁差? 因為這些人看客觀形勢上(在不改共產計劃經濟模式下), 認定將來經濟環境全是一個個的DEADLOCK了, 因為中國再無人口紅利, 也沒有可供外資來華的巨大消費市場, 中美合作將會無以為繼, 將會續步步上反面的狀態. 

上邊D人諗, 現在辦事邏輯..... 與其慢慢等對方有計劃來同自己反面, 倒不如在自己有利的情況和時機下, 自己先同對方反面, 好等己方佔有更多有利的先機. 

嗱, 明白左D人的思維後, 就明白到佢地會用佢地無產階級共產思想, 繼續下埋盤大棋佢落去囉! 

所以, 冷戰係開始左咖啦, 甚至有人走出來講, 冷戰應該係係2018年開始, 果年我仲叫人小心中美兩國會變戰略對手, 果一年, 我仲驚到震, 驚到喊. 好啦, 2018年己經開始左冷戰了.... 數英雄人物, 金戈鐵馬, 懷古風流, 道盡世事興衰.

面對如今多變世局, 我輩應..... 運籌帷幄, 決勝千里, 下策: 保本保命; 中策: 混水摸魚撈上一筆, 提升自身的社會階層; 上策: 西瓜靠邊大, 永遠企係最多野食/最人強馬壯果一邊囉, 並參與其中. 

大家估下我JJ係上中下策, 會揀邊一策? 其實, 我不停入貨, 就知道我係參與其中, 退休後都跟住個經濟大環境來走, 如果唔係, 我點會了解到上邊D人諗緊乜呢! 只是我現在唔多方便了, 唔好再走出去同人阿芝阿佐了. 但係私人醒幾句俾網友, 我就做得到的. 

其實是否面對一個更困難的將來? 還是面對一個機會和錢兜口兜面咁湧埋來? 根本就係靠現在自己一念之差, 與其日日哭哭啼啼, 慘叫現況差到亞媽都唔認得, 倒不如日日把眼光觀看當世給與我們的機會, 當大家看到世事背後千載難逢之機時, BINGO, 恭喜大家了.

 

 

自己話唔入貨, 最後都入左貨喎!

各位, 我唔係話俾大家聽, 我JJ近來係唔會入貨, 因為來緊經濟會唔好, 可能個市會有不少的調整, 等到因為經濟差而大跌市才入貨, 將會拾到更抵的平貨了.

只是有時呢, 有些股跌到好平, 係唔跟個市跌, 而係跟間公司自身的環境有關.

最近入左間天然氣/油管股, 係因為間公司在建的天然氣管超支呀, D人開始懷疑間公司的賺錢能力, 所以股價下跌, 跌到2020三月疫情封城時果個價位, 咁就真係好誘惑人了.

係咖, 最後入左貨了, 因為真係優質資產來咖, 這些油氣管股, 比油股更能把成本轉嫁給下游商. 

好啦, 俾D時間落去, 就會知道我未跌市先入貨的舉動, 又是否明智了. 現在我都唔肯定岩唔岩了. 不過, 有平的優質資產唔入, 就真係對自己唔住了.

面對當前可能發生的困境! 我地負責任咁去做人做事囉!

今日文中的兩段片, 都是預示當世兩大經濟體脫鈎後, 可能面對的惡劣環境. 其實, 唔只佢地咁悲觀, 我JJ對未來都係咁悲觀.

不過, 機會永遠留給那些心裡常存善念而上進的人, 當這些人用平常和負責任的心, 對未來有充足準備, 到危險到來, 淡然而處之, 之後就積極去尋找危險背後的機會, 並加以發大來做, 這個就是50~60年代老香港人成功的最大秘訣. 

50~60年代那時很多人因為重重危機浸到眼眉, 就選擇躺平, 就選擇不負責任咁做人做事, 甚至對家庭了. 

不過, 前車可鑑, 我們這代香港人無理由再陷前人之轍吧! 

好了, 又忽追又忽趕, 永遠不說後退, 讓我們香港人再成為未來的蹄造者..... 

PS: 其實, 我並不太擔心我們港人, 我最擔心係我這邊長大的二代人, 尤其, 在1995~2005年左右畢業的果D人, 當時時勢唔錯, 生活唔錯, 一切都唔錯, 工作雖然未至於等著他們, 總是有的! (當然現在更容易搵到工做, 因為太多人好似的JJ咁, 提早退休了. )

不過, 相比生活開支和薪水, 這裡2000~2005年左右畢業的果D人, 係最容易儲到錢, 最容易買到屋, 最容易中年後生活安穩. 我這輩人因為經歷了之前困難的歷月, 所以持別看重儲錢/投資/買屋/生活安穩(我JJ由05年,就開始儲到錢, 相信同當時大量低息平錢和中美蜜月有關). 但這裡2000~2005年左右畢業的果D人, 心裡係無這些想法, 所以佢地一到現在呢, 就可能開始有問題了, 因為佢地現在係好難儲到錢, 甚至連佢地CAREER PATH 都更難去走下去. 只是這裡2000~2005年左右畢業的果D人, 現在係這裡華人家庭經濟的主力, 這些人人生不好過, 好多華人家庭就會難攪下去了.

有時我其至懷疑, 這裡基督教會裡一些想法, 會令這情況更差更壞, 俾著係我, 一定會叫D人唔好先洗未來錢 + 馬死落地行 + 面對現實, 唔會驚人罵而唔出聲, 好了, 現在這些教會就真係無能為力了.

 

 

自以為富人孩子..... 想法跟我們有什麼不一樣?

片中這位仁兄, 肯定是個十分聰明和有趣的人啊, 講到佢自己兒子8歲前在內地, 活得像個小皇帝, 有工人, 更有由法國請來的媬姆. 

我諗呢, 像佢兒子這些人人生係斷左片囉, 唔接地脫離現實呀!

聽到我這裡果D官三代或富二代, 哈, 一個月屋企俾佢一萬加元喎, 俾著我呀, 屋企寄2年錢來之後, 我就可以開始自己的投資起跳了. 係呀, 我讀書時, 成日都同屋企講好驚有大變, 屋企再寄唔到錢來. 屋企就寄左舊錢來, 我就放埋一邊當保險.

我JJ讀完書後, 一有收入, 就攞左屋企D蔭庇, 開始左我D投資起跳了! 果時算好多錢咖啦!

不過, D官三代/富二代係唔會好似我咁諗, 竟然可以月月清喎! 哈哈哈, 唔夠洗之後, 就去送美團飯團外賣喎, 見過好多次, 真係D人揸住部成10萬加元的貴價車 去送外賣. 佢地當送外賣係江湖救急呀. 

見到我這邊D送外賣小哥, 個個都氣宇軒揚, 唔會頭揼揼眼濕濕, 哈哈哈, 唔知道佢地係咁送外賣5年10年之後, 仲會唔會維持到現在咁?

好啦, 人家D事, 我都無謂評論, 只是, 加記社會環境同佢地老家好唔同了, 我以前係香港出世長大, 比起加記D鬼仔鬼妹, 都唔夠人地咁成熟獨立囉, 而這些官三代/富二代呢, 可能比我地這輩香港更不適應加記囉.

我JJ係加記咁多香港人當中, 算係一個異數囉. 最少來加後, 生活一切越來越好囉! 所以諗法同好多其他香港來果D人好唔同咖!  也所以, 跟好多唐人教會裡D人, 想法有天淵之別囉! 根本這些人係唔會有閒情逸緻去學打中文字, 唔會好似我咁來發嗡瘋, 對他們來說, 也可能佢地會覺得我同果D"官三代/富二代"無乜分別, 不過, 又真係有唔同囉. 但我覺得佢地無力傳福音, 係都要趕我走開D, 我當然自動自覺行開D, 等佢地自己受番佢地自己決心要做D事的後果囉.

我改變了自己的命運嗎?

其實, 我JJ上一代只是個小老闆, 最多時, 只有近千人跟佢搵過食, 都唔係有合約受聘.

佢D行家呢, 好多都係金融風暴或海嘯中被打回他們昔日起家時的光景, 能夠安享晚年的, 不會太多.

致於我昔日的朋友和舊同學呢? 宿命是畢業/打工/中年之後等被人淘汰出局. 

其實, 我JJ都係中年後離開職場, 只是這個係我自己選擇, 係人家未到來要我走前, 我還有少少討價還價的能力時, 搵到個最好的下台階, 攞個好的OFFER 來拜拜. 

好多人做到人地叫佢走, 這個唔理想呀!

主要, 我從後生起, 就儲錢來投資, 現在收的股息, 係我後生買股票時成本價的20-40%(股價又升左好多倍). 如果筆錢存係銀行, 到現在都仲係幾個%囉!

讀書係好, 但單單讀書就改變唔到命運囉! 仲要有接受世界在改變的那種心理質素, 才會聞到嗅到去投資邊度, 邊類公司, 跟住世界一齊來變先得咖.

老實講, 我JJ 後生時, 係好跟貼世界改變的方向, 當時係十分興奮咖, 因為覺得我的機會來臨了. 

PS: 唔知道點解, 最近幾年, 對世界改變呢, 有種恐懼心態, 唔知道係咪我心裡好怕打仗呢? 我心地善良, 真係好唔想見到其他人受苦受難了. 我係股票賺親果D錢, 全都唔係同人對賭, 而係由新時代型經濟壯大後, 所賺回來的. 以前, 總係覺得世界整體會越趨和平, 但係現在覺得世界會轉趨不穩和戰亂呢!

忽然想起, 20多年前, 有次係那間華人教會的BOOK FEST (好似係中國信徒中心攞D書來賣), 我一見到何清蓮果本"中國的陷阱"(唔係福音/ 宗教書籍), 我就買下來, 果時中國被看成騰飛中的新興經濟體. 點知有個長老見到我買本咁樣的書, 仲以為我好似佢D仔咁竹昇, 對中國任何事都看徧, 要趕我出教會咁講呀. 

當時我真係對任何新事新想法, 都持開放態度. 讀完本書, 想了一想, 咁多年都無買中資股了, 也沒有買任何港股, 後來發生的一切, 都同本書裡質疑的地方, 十分接近. 

做人最怕就係一承不變囉, 個長老係咁, 佢D仔又係咁, 最重要係接受這個世界沒有固定軌道的改變, 唔係大中華膠想中國騰飛, 就中國一定會騰飛的. 如果現實裡係飛唔起, 就要隨遇而安, 唔好磨爛蓆先得咖. 

後來, 這個長老去歐洲, 去幫助當地D中國非法偷渡者, 我一直係好尊重佢的高風亮節, 言行一致, 但係, 我JJ係佢地這些人眼中, 只是小人一個囉!

WHAT'S NEXT? 我們面對一個什麼的年代和世界?

人生有何危險?老實講, 唔係世界不斷在變, 而係自己再無能力去適應這個不斷在變幻的世界. 

今次老美唔救銀行, 只救存戶, 純因為現在老美大銀行唔會有乜大問題, 唔同2008年果時, 果時唔救大銀行就更大鑊.

現在唔救中型銀行, 等佢自行執笠, 係汰弱留強囉! 每隔若干年就有中型銀行執笠, 純因為業務跟唔上世界的轉變囉!

在一個不斷加息的歲月裡, 銀行業務和做法仍然一承不變, 咁就會發生問題.

大家見我係2020年疫情時, 大買能源和保險股, 但今天大家暫時係唔會見到我去買銀行股, 因為那一時, 現在彼一時啊!

世界唔同左呀! 現在在加息或高息的日子裡, 一切都唔會太快來復原呀! 要好似2020年中咁反彈呀, 無咁容易囉! 除非中美講得掂數, 有空間來讓息口回落. 

不過, 現在各方勢力不斷拉据下, 除非有一方崩潰或投降輸一半, 物價本應就無理由坐低, 貨幣政策對通漲和經濟, 無可能不選其一, 無能力做到兩全其美呀! 

其實, 在美加已經好好咖啦, 最少衣食無憂, 在加記更有全民醫療, 有病就同你醫, 還有什麼奢侈的願望呢! 

現在最重要, 係保本, 而唔係本金增值, 現在再不是一個經濟快速增長的年代. 慢慢等機會去買一些生意長有長做長賺錢的優質收息股回來, 等自己有穩定現金入來. 

保險, 能源, 電力, 醫療, 醫藥, 物流等等板塊, 大家都可以去留意一下. 

聽番首歌仔, 重拾我地老港燦的冒險和進取精神, 有少少"賭一賭"的氣魄. 話口未完, 除了矽谷之後, 瑞信又傳出..... 哈哈哈, 現在我地真係....... 聽到那刺激歡呼聲了.