2018年7月21日 星期六

中美貿戰, 揭開雲霧見底牌 2

昨天講完第一部份後, 越想越覺得有需要找個方法對沖風險, 我就走左去做我人生從來不會做的事 - 去買金仔, 因為無股息, 差唔多係零和遊戲呀, 我以前一向唔會買佢, 但面對差唔多零的銀行存款息, 買金就係現金以外的選擇了. 

講返正題, 其實, 一個封閉鎖國國家的國際貿易呢, 就好似白粉咁, 越食就越難戒甩佢. 熊貓國都係咁, 這個原是老美一直設WTO個局, 讓熊貓國入局, 等到佢欲罷不能時, 就要佢開放市場和金融, 到最後就要佢改變社會制度和國家實行的體制, 所以現在發生的一切, 都不是當奴友自己一個人發癲後攪出來, 而是由90年代尾, 老美幫熊貓國入WTO時, 就已經有個咁樣的算盤, 不過咁岩由當奴友來執行吧.

不過, 對於熊貓國而言, 入WTO個局時, 就已經預左有日要同老美反枱了, 因為開放金融和市場, 即是要熊貓國結束一黨專政了, 熊貓國又點會心甘情願? 所以, 2013年集大大脫穎而出上台, 上台後一直擺出左傾, 擺出唔會聽老美支笛來開放市場和金融, 一切都是黨內講好左, 黨內各派一早有左共識, 由集大大來做這場返去左傾年代的好戲. 跟本不會有前幾朝元老聯合來迫集大大唔好再左落去, 也不會有最近傳聞的兵變.

大家用這個角度去睇全件事情, 一切事情就會清楚哂, 探本尋源. 為何當初當奴友要在加息風口時期上, 再減稅, 查實就係一早已經處心積慮要同熊貓國, 在貿易上硬碰硬, 先借老美自己未來功力, 來墊高老美自己現在經濟, 再叫老美企業班錢回國, 才來硬碰熊貓國的經濟, 試圖迫其就範.

熊貓國唔跌落老美設下的這個WTO局, 外表是貿易/金融/貨幣/經濟戰, 內裡卻是熊貓國現有體制的攻防戰. 當然, 最大的沖擊波就是..... 熊貓國國民生活水平, 會來一個插水式的突然急降, 樓市, 股市, 債市大跌, 以打擊其民生和國計, 跟對付前蘇聯, 令其瓦解的手段, 大致相近.

往後, 集大大怎樣去收拾局面? 看看50年代朝鮮戰後, 熊貓國怎樣應對老美的圍堵和禁運? 封閉鎖國 + 再國有化囉, 財富再一次平均分配, 就可以解決現今財富不均和龐大內債, 更有可能發動地區性衝突, 來打亂甚至拖掉, 老美的全球戰略, 使其四面楚歌, 首尾不能呼應之餘, 更不能專心攪好民心經濟.

致於我地突區會怎樣? 如果可以, 繼續做窗口囉, 老美會否認數? 老美承認突區係個緩衝區嗎? 中興事件給我們一個啟示, 就係老美派個觀察員來突區, 突區一切要先知會老美囉. 

如果到最後, 大家如果預計, 將來真係會講唔掂數, 突區失去普通法和自由港, 不再奉行一個兩制, 熊貓國全面鎖國封閉, 大家現在就要考慮移民了, 咪到時臨急抱佛腳.

2018年7月19日 星期四

中美貿戰, 揭開雲霧見底牌.

我JJ 有個壞習慣, 就係喜歡揭底牌, 為免成為別人眼中可恨的眾矢之的, 我大多都會十分厚道地走開, 不會讓人家知道我已經識破玄機, 免得麻煩多多. 其實, 對人家喜歡偽裝出來的假像, 越是詐作不知, 越是對自己有利. 當然, 我JJ不是扮豬食老虎, 而是可以順暢地進行自己的工作; 但是如果對方真是蠢到誤以為我察覺不到, 當然到最後, 就真係會蠢到誤以為我扮豬食老"豬", 其實, 這等人如果有自知之明, 就會知道我也沒有閒情去理會D無謂人.

講返起今天的題目, 老美底牌係乜? 就係用貿易來迫使熊貓國, 最終有天去開放市場, 開放金融. 而熊貓國底牌係搭經濟順風車, 搭得一日順風車就得一日.

偏偏這天很快來到了, 在過去的幾年裡, 老美不斷用WTO世貿的條約, 來嚴令熊貓國要開放市場和金融, 當然, 熊貓國控制其市場和金融, 此仍熊貓國國本之所在, 由簽約那時開始, 都沒有想過開放市場和金融, 但充充門面來搭經濟順風車. 

所以, 大家睇到, 老美對熊貓國的政策改變, 不是因為熊貓國大攪左傾, 大攪個人崇拜, 而是看出熊貓國沒有打算開放市場和金融; 而後來熊貓國大攪左傾大攪回到紅色革命年代, 是應對老美的壓力, 大返老美轉頭, 話俾老美知道, 如果老美唔再鬆鬆對熊貓國政策, 熊貓國有可能回到紅色革命年代, 甚至有可能輸出革命, 四圍幫老美點火, 最終令到老美無法專心去攪經濟囉.

嗱, 老美對熊貓國的政策改變, 熊貓國大攪左傾, 大攪個人崇拜, 大攪回到紅色革命年代, 這些全是雲霧, 背後雙方都有雙方的底牌, 大家唔好被雲霧迷糊雙眼. 

以目前雙方底牌來看, 我JJ睇目前的情況十分悲觀, 而且更不是幾個月就完的事情, 78年改革開放, 17年來在WTO, 前後幾十年,  現在熊貓國集大大終身制, 正好講出, 往後的日子會有幾長.




加燦買加股的策略

加國公民居住在加國, 買加股收息, 比買非加國股收息, 個稅率會低好多..... 因為有 CANADIAN DIVIDEND TAX CREDIT, 就以 魁省居民為例, 65歲以下, 免稅額是1萬左右, 如果只有單單股息收入, 因為CANADIAN DIVIDEND TAX CREDIT, 變成初頭的3萬9千股息收入, 就不用付稅了, 如果是65歲以上, 免稅額是1萬5千, 那免稅的股息收入就更高了. 

嗱,  各位, 加股公司的業務和市場份額, 無美股公司咁大, 尤其美國藥廠股, 真係可以買左之後, 慢慢收股息來做長糧, 而加股任何股票公司, 都不具備這個特點.

所以, 身為加燦的我JJ呢, 就會叫人, 先買美國藥廠股做壓倉大石, 股價和股息, 相比其他股票, 會穩定好多, 到左覺得美股藥廠股息收入, 能夠維持基本生活開支, 之後, 就可以轉軚去睇加股, 因為加股股息D稅低好多, 但股息收入, 無咁穩定呀! 

面對股息收入波動, 當然後生仔無問題, 但一到40歲中年之後, 穩定和安定呢, 壓倒高回報啊! 

 我JJ, 希望大家富貴, 就無閉嗌, 每日一起身就開開心心, 哈哈哈, 嗱, 大家一定要話, 承我貴言咖!

2018年7月16日 星期一

從自己內心世界裡, 勾起出來的影子和漣漪 - 笛子姑娘.

記起以前在小鎮仔讀大學時, 因為人口好少, 晚上做完功課回家, 一到9-10點左右, 就會好靜,  尤其每次落雪時, 靜到可以聽到雪落在自己外褸上的聲音, 也靜到聽到幾條街外, 人家掛在屋前門廊上的風玲, 噔..... 噔...... 噔..... 噔...... 

我自己係個老實人, 心裡誠實無偽, 唔怕靜和孤單一人, 聽到風玲聲, 就不會好似一些朋友咁, 要找我同行, 尤其一些大學裡的女同學. 

不過, 我每次就會記起那首"笛子姑娘", 而忘記了身邊的女同學. 

哈..... 其實, 我當時係想著首歌裡的無言女子, 無畏冰冷和孤靜, 一個人走自己的路, 吹自己的笛子, 就好像我自己一樣..... "霜雪下仍覺自豪!" 

我係咪有點自戀狂呢? 忘記了身邊要求我保護同行的女同學, 可能我心裡看不起她們沒有膽量吧!

算了吧, 都過左咁多年, 就算我今天見番果班女同學, 我諗我都不會理佢地, 因為她們沒有首歌裡那女子的那種神韻..... 

最近才知道, 原來作詞人, 是以這曲來掉念佢早逝的妹妹, 如果我早知歌裡的女子是這樣這樣, 我想我也不會為首歌著迷, 因為...... 原來不是真有其人, 原來只是自己內心世界裡, 勾起出來的影子, 原來本來就是自己而已.

可能我真係有少少自戀吧!



2018年7月15日 星期日

地產! 地產! 地產! 一切都係地產呀!

98年香港金融風暴時, 好多企業原本唔係做地產, 但到左後來, 因為見到地產價升得咁勁, 比起做正業, 又真係賺錢得快靚正喎, 所以, 到後來, 很多企業變成不務"正業"了. 

其實日光之下無新事, 多年前, 我有位朋友整天來游說我去投資入佢的高科技生意上, 只是我覺得佢D生意好初形, 就算將來成功有錢賺, 但初期投資一定唔少野, 尤其我當時D$責死左係出租物業, 就算有錢回籠返來袋中, 都會快D去付清按揭. 最後, 我同佢各走各路. 

多年不見, 有次見佢開豪車, 我也為到佢開心了, 佢做到成績出來. 

後來我同另一個朋友行過佢間公司, 個朋友指俾我睇, 地鐵站旁就係佢間公司. 我心裡好奇怪, 一間獨立屋喎..... 因為獨立屋唔係自住咩? 用來做辦公室, 好麻煩, 好多維修嘛. 

我想一想, 終於明白了, 間獨立屋係佢個投資者擁有的, 佢個投資者係投資移民, 需要一些投資名目來滿足移民局的投資移民協定, 所以, 投資入佢檔生意上, 跟多年前佢來游說我的方法, 如同一軾. 而且佢間公司極可能只佔獨立屋一部份, 其他部份係佢個投資者自住.

前排, 我改搭地鐵嘛, 唔再一定揸車出門了, 我一出地鐵站, 又行過佢公司, 見佢個公司牌無左, 放左個賣屋經紀牌喎. 當然, 一定係佢個投資者唔再玩了, 又或已經滿足了移民局的投資移民協定, 不用再投資係佢檔生意上邊了.

大家都知道啦, 我JJ好八掛咖嘛, 就上網查查佢間公司搬左去邊, 原來佢搬左去間細辦公室裡. 咁..... 即係佢D生意咁多年來, 都係咁上下囉. 最賺錢的, 當然係佢個投資者那個地鐵站旁的物業囉..... 又係靠地產囉.....! 呵呵呵..... 

PS: 其實, 佢又幾醒幾勤力的, 這方面我自愧不如佢了, 只是我有2個強項, 1. 自知之明, 不會亂來揸豪車, 也不需要處處充生哂來搵人集資, 我會好實際咁, 留番D寶貴資金去做真正的投資; 2. 做事乘勢而為, 不單靠自己一已之力, 來妄想逆天而為. 

加記滿地可地產雖然不濟, 回報率低, 但總比細公司攪實業好. 如果大家移民來投資地產, 只要順勢入市, 順勢退市, 唔好磨爛蓆, 唔好下下都要摸底/摸頂來賺盡, 唔好錯過入市或退市良機, 咁就生活一定唔會太差了.






2018年7月14日 星期六

當下時勢, 留D現金啦喂, 老友們!

昨天我賣左我隻 康寧了. 

嗱, 大家可能會以為我攪笑, 康寧餐具這些低端野, 你JJ竟然買佢, 現在又賣左佢. 

康寧好很多年前, 由餐具轉做光纖, 因為都係同玻璃纖維有關, 咁..... 果時我小朋友, 袋裡D錢全部去哂出租物業度, 無錢去買...... 咁, 後來很多地方都造到光纖, 咁佢股價又跌了. 

前幾年, 佢又轉形去做手機顯示屏, 當然又係同玻璃有關, 仲係超清的...... 這次我JJ搭到順風車了. 

現在才賣, 錯過了1年前的高位, 因為果時我忙於賣我的出租物業(真係好煩下咖, 尤其係好多個單位, 買方銀行要求來驗屋驗左4-5次, 驗之前, 我當然要叫人來清潔好.) 我JJ估算, 就算無新競爭對手同佢爭, 但整個手機市場飽和了, 佢股價都唔會點大升, 頂多升回一年前的頂點.

不過, 我揸美股, 就算2-3%股息, 同加股都係2-3%, 但稅率高很多. 所以, 我現在賣美股, 儲備多D現金, 等機會買加股. 加股缺點係, 市場細好多, 業務安穩的公司沒有美股咁多, 能夠俾我JJ揀得上手的公司, 少好多. 

我前排買左間油管公司股票, 不過, 最近俾人告上法庭, 話佢D油管破壞美國原住民保留地, 相信股價會有波動, 未來又係我買入的時機了.

有人提議, 留多D現金係手, 股價將會在近排整固之後, 會繼續向下調整, 可能會有半年到1 年的向下勢頭.

好了, 祝大家路路暢通, 股股略水, 息息生銀, 家肥屋潤.

2018年7月12日 星期四

大家如果問我, 現在好唔好移民加記?

其實, 以我過來人身份, 如果現在仲係90年代初: 1. 美加開始自由貿易; 2. 打完海灣戰後油價超低; 3. 蘇聯解體後釋放大量勞動力, 這些全都是經濟向好的先兆, 移民來加國, 前途會光明啊!

不過, 97前, 都有好多香港人回流喎, 即係這些人搭不上加記90年代這班經濟順風車呀! 

咁, 現在呢, 嗱! 講真呢, 我自己就見唔到加記有乜經濟順流了.剛剛加記才和美國開打關稅戰; 油價不斷狂升, 現在有人估計, 75元一桶油係超低價, 往後油價會大升; 中美大打貿易戰, 大量勞動力將會投閒置散, 但生產成本狂升. 

現在才移民來加記, 生活不會容易呀! 各位!

除非大家有任何過人之處, 又或生活上能忍人之不能忍, 如果唔係, 可見的這幾年, 移民來加國, 都不會是好時機.

如果香港仍然維持一國兩制, 仍然用普通法, 仍然不因為國安理由而取消自由港, 香港仍是個好居住的地方. 

就算香港人認為自己怎樣的不像中國人, 似西方人, 不過, 坦白說, 大家如果移民來到加記, 大家才會發現香港人價值觀仍然跟西方人的價值觀 - 南轅北轍.

PS: 移民來加國後, 好多香港人管埋/理埋/做埋D無聊野, 尤其香港人圈子, 唔係飲飲食食, 就係玩玩玩, 再唔係講埋哂人家的非短流長. 嗱, 我JJ出錢去遊玩, 一定要學到野回來, 才能安心, 才算洗錢值得其所. 一切都要做好自己本份, 更不會自私到, 去打擾別人的安寧. 

不過, 我人生發展得最順暢的時候, 是...... 不去實體接觸中國人的時候, 只在網上吹下水, 無人來攪到我, 無人來胡混我的人生方向. 

當然, 我沒有再去唐人教會了, 對他們來說, 是個壞消息, 我賺到我人生最多錢的時候, 但我因為不再是他們的會友, 我的十一奉獻不再會放在這班混帳人的手中. 

就讓這些人繼續籠裡雞胡混下去, 繼續把唐人教會當成他們家庭會所, 繼續讓這些人有天生活攪唔掂就去回流吧! 或週身唔掂自動接埋! 我提出來, 希望這些人的人生, 來戒律自己和別人, 經濟順流逆流是控制不到的, 但自己的人生, 就一定控制到, 唔好去賴人.