滿地可400年古風, 將會一去不再!

前年滿地可才慶祝建城375年週年, 在建城之前幾十年裡, 就是由天主教傳教士和皮草皮商人, 在滿地可舊城建立據點. 所以, 滿地可有400幾年歷史, 就不為過了.

當時馬車或牛車是主要交通工具, 馬或牛蹄在石板大道上行走, 就會發出嚮亮的噠..... 噠..... 噠..... 噠..... 噠.....聲音, 不過, 在我移民來之前, 已經禁示發出這滋擾聲浪, 馬匹馬蹄上已釘上膠墊了. 

現在還可以在滿地可舊城區, 用遊客觀光的名義, 來坐到馬車, 只是馬匹不時排泄馬糞, 掉在路上會被罰款, 所以馬匹後都有個容器來接住馬糞, 只是遊客在馬車上就會聞到這一陣天然的味道了.

這股天然味道當然仍然打擾當地居民和生意人, 所以市政府會在下年1月1日完全禁絕車馬在滿地可內行走, 就再沒有觀光馬車了. 

買車所謂何事?

其實, 都係代步和方便囉, 以前我JJ打工, 但係家中做, 唔洗去公司辦公室度做, 只會耐唔時返去開會, 咁唔係慳番好多交通時間/油錢/整車錢. 不過, 2010年前, 都一年開2萬公里, 大多里數係用係返那華人教會和接人去教會上(因為要間華人教會靠近唐人區, 而我住係好遠的西人區). 

現在, 我JJ只會去近我這邊的教會, 唔會山長水遠去見埋D唔想見的人了. 再加上我賣嘥我D出租物業, 又退左休後, 部車就更加少用了, 再加上我父親現在唔多再願意揸車, 車的里數就好低, 我父親部2010年日本仔車, 就只有揸左9萬唔到, 我果部日本仔2014年就只揸左3萬多DD. 

可以計到, 我去那華人教會見埋D唔老泥D人, 真係好花錢好麻煩咖! 

這幾年整車D錢, 真係少左好多, 一來去D地方較好較近一點, 意外又少一點! 

不過, 我仍然唔放棄買車唔買豪華車的想法, 只買果D易整/容易整/唔洗點整果D車款, 咁就一勞永逸了, 一年只去一次換油和順便整一整, 有次車房仲叫我等到下年才整, 慳番D錢呀! 

很多人要開豪車貴車, 好似我以前果個教友咁, 成日罵我好去消費買衫褲鞋襪, 佢一買就買部近10萬的SUV豪車. 幸好, 佢可能有聽我講, 無買歐洲SUV, 買左日本仔車, 咁, 最少佢唔洗成日攞車去整咁麻煩! 

PS: 好多人富有有錢左之後, 才是佢地人生大檸樂的開始, 因為D人唔知頭唔知路, 買埋買埋D野帶埋大麻煩俾佢地. 所以, 人可以唔洗咁有錢, 夠生活就好了, 但係唔好將麻煩帶到自己頭上, 實在無人會可憐啊! 

還有, 見過唔少人買貴車來溝女, 溝返來果個老婆, 卻帶給佢地人生更多麻煩, 何必咁呢? 娶左返來, 個老婆成日係佢地個袋裡鑿個隆出來, 咪話唔大鑊, 搵多多都無用呀! 

下邊有個視頻, 就係講5大"不能買"的車了...... 睇睇, 果D係咪溝女名車呢嗄? 就會明白, 為何有D人人生咁大Q鑊, 實在唔能夠怪上天唔公道, 上天對所有人都好公道咖!

好啦, 加記又到落雪時......

香港這半年的逆境, 不好受啊, 只是有一事要和大家分享.....

往年, 我這裡每到風雪紛紛時, 我心情都會開始低落, 只是今年有點不同, 因為香港反送中, 令我心情激起千百波瀾, 精神煥然, 身體分泌左好多腎上腺素和安多分.... 所以今年由初雪落下時, 就再沒有情緒低落.

事在人為的意志, 給我看出, 人生必要先堅心意, 世間世事要靠堅強不屈的意志. 最重要, 先問問自己, 自己所做的, 是否有理, 若果有理, 就要不屈不撓去行人生路, 永不低頭永不放棄.

我這裡, 又到風霜伴我行時, 出番首歌俾大家聽下.....

PS: 現在才明白, 人生得漂亮, 是個祝福來咖, 最少, 當人家在情緒低落時, 看到一臉不屈不撓而充滿自信的面容, 人家就會重燃希望.

應否借錢去攪移民?

最近很多在香港的朋友, 計劃著移民..... 

只是有些心儀地方的門檻, 可能高了一點, 錢方面不太足夠, 就打算借錢來伸請移民.

我JJ自己係加記都係移民, 行過的路和經驗, 可能對大家有幫助, 始終移民本身已經是個帶有風險的動作, 再加上借錢去移民, 就令風險增加.

這個呢, 就要看3個問題了: 向誰借錢? 伸請移民項目的性質和風險? 自己手上的錢是否足夠維持5-10年的有體面生活?

1. 最理想是向自己親友借, 只需支付比儲蓄戶口高一點的利息就可以了. 如果向銀行或財務借呢, 就要留意自己移民項目的風險了, 因為借來的錢要附上更高的利息, 基本上, 就會升高自己移民項目的風險了. 

2. 很多地方都有不同的移民項目, 主要是分開退休/專業/投資, 前2項, 都只需要帶入某一額度的資金, 就可以了, 那就風險不大, 尤其專業移民, 就可以借一點錢來移民, 而退休移民呢, 沒有收入下, 就最好不要借錢攪移民了. 至於投資移民呢, 有些地區可容許買國家擔保但低息或無息債券, 若干年後退回本金, 這個風險較少, 借錢來移民也沒有太大問題, 但如果要自己創業呢, 這個再加上借錢來移民, 移民風險和移民後的壓力, 就會倍升呀, 這個真是要慎而慎之. 在加記, 很多投資創業移民, 所做的生意幾年後, 就可以把本金蝕光呀! 所以, 借錢來創業移民, 是最最高風險呀!

3. 最後, 自己手上錢呢...... 如果借錢, 就要扣除所附的利息開支, 再看看, 夠不夠自己5-10年的體面生活啊! 如果足襟見袖, 就要想清楚, 計清楚了. 因為移民後頭5-10年, 大多都是摸索期, 收入大多未能應付生活. 手上金錢能夠維持5-10年體面生活, 是很重要呀!

我會十分提議大家, 未辦移民前, 先去一次觀察當地實況, 去行行當地超市, 看看食物價格, 看看當地租務市場或物業市場, 看看人家的入息稅, 問問跟自己相近境況的家族, 要多少稅後收入, 才可以維持舒適生活. 

最後, 如果大家的移民項目是有一定風險的, 向親友借錢時, 必需如實相告當中有多少風險, 尤其是老人家的養老救命錢, 不能輕易去觸碰!

來加記申請難民..... 我的忠告

真係唔好諗住做難民好過癮呀, 係好濕劑下咖!

首先, 我絕唔會譏笑人家落難, 不過, 有D野呢, 如果可以避免做難民, 就應該盡量避免囉!

難民同移民好大分別咖, 移民係人家有需要接收新移民, 人家會有社會計劃來讓移民融入, 移民並不欠了人家一個人情; 但難民係人家本著人道精神來收留著, 人家不會花太多錢來做補助的福利計劃, 是要難民本人主動去搵食. 

移民是可以保留跟原居地的聯系, 但難民就不能了, 不要說原居地護照或收開的社會福利/退休金, 甚至連銀行戶口, 交易往來, 都受到限制. 曾經, 有個大6人, 以難民身份來加, 十年後回國內娶妻生子, 秘密申請國內護照, 並以國內護照四處去旅遊, 甚至進入神秘國度的朝鮮, 後被加國政府知悉, 遞奪了其加國公民身份, 並驅逐出境. 

所以, 就算有突區護照, 內裡有美國簽証, 都不能使用來到美國旅行, 在未有加國公民和護照前, 都要留在加國, 好似坐監咁. 

難民幾耐才攞到護照? 視乎多唔多人申請難民, 要等幾耐才去見官, 幾耐審批, 聽說現在難民要4-5年才批到, 而且還會越來越等得耐呀! 批左之後, 再要5年才成為公民, 才攞到護照去其他國家呀!

移民來加後, 有遷居到其他省的自由, 但難民最好不要咁做呀, 一入紙申請後, 就最好坐定定係同一個地方或住址. 甚至申請難民後, 並沒有任何居留權, 只會有張好似大6人來香港的行街紙呀, 仲要定期每幾個星期去見官報到, 避免變黑市居民呀! 當中很多情況, D官未必好似見移民咁客氣, 大佬, 老大都要忍一忍呀! 唔好又為左啖氣而誤事呀!

加國現在缺乏勞動力, 來申請難民, 是不愁找不到工作, 但大多都是最低工資呀, 長工或有前途的工作機會, 大多都只請永久居民或公民, 所以, 難民是不折不扣的二等公民啊!

加國會否吸納難民成為公務員? 加國是國際難民公約的簽署國, 會依足公約來處理難民申請. 但如果我JJ係加國政府, 我只請D住左係加國已久的人, 甚至有家有老有小, 有一大群加國本地的社會網絡, 這樣才會效忠加國! 任何國家吸納難民作公務員, 可能並不一定是正面的, 工作性質也可能比較危險, 大家可以看看簫才子/麥仲尼拍的省港旗兵第二集 - 大圈卧底, 講以前無難民公約時, 做難民係幾咁悲慘!

PS: 最後, 無論加國批唔批難民申請, 又或驅逐申請人出境, 各位都要行為良好, 係加國為港人保持良好聲譽, 這樣, 後邊來申請難民的同甘共苦戰友, 才會容易一D, 如果不是, 人家連行街紙都唔出, 直接驅逐出境呀. 

多年前, 香港移民在加國有著良好聲譽, 97後港人少了移民來加, 加國政府就大開歡迎之門給國內同胞, 只是十年左右, 加國政府才認識到香港和國內移民有很大分別, 2014年剎停左, 取消了數十萬份國內人的申請. 由此看出, 良好聲譽是十分重要. 現在很多加國人都分到香港人或大6人.

現在來的難民申請人, 是先頭部隊來咖, 人家對我地港燦印象越好, 日後就越容易辦事呀!

係外國, 真係有D同胞係唔抵幫咖!

前幾日我係我這邊搭地鐵, 大家都知道, 有些60-70年代起的地鐵站, 未有電梯, 要行樓梯嘛!

見到有個大6伯拖住BB車落樓梯, 我見到佢咁狼狽, 我就埋去幫佢抬一邊, 等佢BB車裡個B安全D, 等佢唔洗咁大壓力而引起心臟病或中風.

個大6伯旁條個大6妹係BB車上攞起部IPAD, 初時我估佢想減少重量. 

點知我一拿起BB車果一邊, 發現好重, 個大6伯仲要雙手來提起BB車, 我見到咁重我一隻手抬BB車, 一隻扶住欄杆咁行落去. 

最激氣係我見到BB車個B係好大個, 可以自己落地行果種歲數. 再問個大6伯, 點解咁重, 點知佢話有2大包米呀!

我才意會到, 果個死鬼大6妹攞起部IPAD, 唔係想減少重量, 而係怕跌爛呀! 妖..... 

其實, 這2個大6人, 一係果個大6伯唔用腦, 一係果個大6妹唔負責任, 有乜理由唔拖個B出來行? 有乜理由先顧住部IPAD? 有乜理由買2大包米仲要推住個超齡大B? 

下次我見到大6人, 我都會睇清楚才去幫手, 幫著這些人, 實在係鼓勵D人做人做事唔負責任.

PS: 果個大6伯, 同我父親差唔多年紀, 我已經唔再俾我父親攞任何重野, 唔俾佢做任何粗重工夫咖啦! 我現在仲未識做果D野, 我只會叫我父親係旁邊教我點去做, 由我落手去做, 絕對唔會俾我父親搬米這種咁重的東西. 唉, 這些人做人兒女, 實在太過份了, 佢老豆咁老, 俾佢抬咁重D野, 實在不孝到極點. 所以, 我搬完後, 刻意去黑了掘住個大6妹好耐, 正人渣呀. 自己生兒女, 唔好好教佢敬老, 仲要咁來搵自己父母笨, 頂佢個X啦!

這個又令我想起以前唐人教會果班大帝, 嘿, 做人唔負責, 他們做父母縮骨, 兒女也縮骨, 攪乜野老人服務呀? 嘿, 大罵其他人唔夠信心唔夠愛心! 嘿, 這些人全都係係度阻住D負責任一心慕道的人, 返教會敬拜神, 可恥!

好啦, 過來加記申請難民都好咖!

根據多倫多星島報導, 有加記港人走出來, 話組織起來, 協助任何港人到加國申請難民喎!

咁...... 俾條LINK大家昅昅先 - http://www.singtao.ca/3610813/2019-07-15/post-港人若申請加國難民-僑商組織誓協助安頓/?variant=zh-hk

啊..... 咁呢, 其實我JJ有D想法, 現在要申請難民走人果D, 大多都係勇字當頭, 同我JJ一向的非暴力和平遊行來表達意願, 好唔同咖喎, 我連"抗爭"這名詞都不會掛在咀邊呀! 我係網上, 成日叫人, 遊行咪阻街, 完左就依時依候跟指示離開, 散水返屋企沖1涼覺覺豬, 但不時, 被人以X街杏+橙來形容呀. 

所以, 我諗...... 我同現在這班過來申請難民的人, 會唔多岩咀形咖喎! 網上被人罵呢, 我JJ小小心靈還可以承受, 現在如果俾人當面來罵, 就咪攪我了. 我JJ呢, 都係唔會去幫手了, 留給其他同佢地岩咀形的加記港人來做野啦!

還有一個擔憂, 就係這班人過到來, 極有可能同這裡的大6同胞唔岩牙, 到時我同佢地行埋少少, 都會好惹火呀! 其實, 加記大6同胞都無乜野, 雖然當中不乏五毛, 但大多數都唔想同人惹事呀, 希望這班友過到來, 唔好改變現狀吧!

還有, 我會嚴厲批評任何人仕, 以基督教教會名義來參與, 始終理論上, 這些難民申請人衝左入垃圾會, 是犯了法呀! 咪再來騎劫教會和一眾信徒的信仰, 這個是嚴重阻礙一眾信徒去教會敬拜神的, 咪再俾D好事者, 再來攪攪震!

極為奇特的景觀..... 不過, 真係要多加留意個人安全呀!

去完美加西歐的天然奇觀後, 再去世界其他地方睇奇觀, 真係要好小心, 因為係美加西歐的天然奇觀景點, 都是安全措施做到十足十, 但去到其他國家的奇觀景點, 不要說欄杆, 可能連個安全告示牌都無咖, 睇睇圖中的景點, 就真係好牙烟呀! 隨時命仔不保呀!

還有, 以前聽說有人去了次非洲看奇觀, 之後, 就得出些怪病, 連醫生都唔知道係乜, 估計係深山森林裡, 接觸到一些從接觸過的病原體. 去下邊這些地方, 都係一樣, 尤其第一個係高山上, 與世隔絕咁耐, 找到咁多絕種的品種, 即是也會接觸到一些奇怪病原體呀!

有次, 我係美國上萬六呎高山, 山上係印地安土著的聖地, 聽說禁忌多多, 尤其唔好手多多去摸來摸去..... 上去睇完就立刻番落來了. 哈哈哈.....

原來.... 我JJ被上邊定為...... 最友善的港燦呀.....

哈哈哈...... 原來上邊定左..... 港燦三個友善等級, 呵呵呵..... 最友善果班係..... 在1949年赤化前來定居的人和佢地D後代, 之後就係1949年赤化落來果批人和佢地D後代, 再之後, 就係大約進後, 大逃亡翻山越嶺游水落來果D人和佢地D後代.

不過, 有班人無講喎, 就係一日150個果批人喎, 我諗係刻意唔講這批人, 因為這批人係突區的穩定力量來咖! 用來溝淡港燦中不友善的基因呀! 但是這些人當中, 很多MALFUNCTIONS, 佢地係度生果D仔仔女女, 有好多都湧哂入去蠟髮會......

 如果要我JJ去估, 邊D港燦係最最最最最不友善呢........... 嘻嘻嘻嘻嘻...... 當然要數大逃亡時死裡逃生果班港燦, 不過, 這批人的後代當中, 又可以分開好多種人喎..... 其中最不友善果D, 就係.... 父母千辛萬苦係突區搵到個錢有安身之所, 突然被告知要回歸, 父母就賣樓, 拖住佢地移民去外國, 點知這些人係外國水土不服, 落唔到地生唔到根, 個個回流時才見到突區樓價升左N倍, 之後, 生活得好差, 住得好差, 最後, 一直都唔可以好似父母咁, 可以買番層樓, 有些甚至要住擋房. 

好啦, 大家都會估到, 我JJ係加記, 見到唔少這類人. 可以想像到, 這些人回流後, 會覺得茫茫天地下, 除了突區, 再無退路可以走了. 現在當有人要來改變突區的現狀, 這班人當然會行哂出來, 反對到底啦.

大家可能會問, 移民加記當中, 有多少人的子女回流? 可能我這裡講法文, 我見親果D人, 95% 人一讀完書就立刻回流搵工, 唱野果個"何搵C", 就係這些人中其中一個了. 

其實, 上邊同阿鵝姐都係盞攪, 應承左人地, 50碌不變, 就咪改來改去啦, 現在CALL哂D人出來反哂面, 都咪話唔煩呀!

大國攪離婚下, 突區的歷史性角色?

前排同大家講過, 貿戰下大國要分開來過日子, 現在都差唔多被證實, 這就是那個趨勢了.

只是..... 我有一些說話, 一直都不敢說出來, 因為我JJ怕會..... 嚇親人..... 

現在大國開始要分開來過日子, 不單是雙方唔再互相依存, 還有..... 就係金融系統要分家, 免得被對方來衝擊.

老美在分家過程中, 一定唔會一步到位咁去分哂, 就需要搬D野去某地點, 首先把對方金融和集資遠離自己先...... 不被對方來衝擊自己.

當然係搬來突區啦! 這個就是突區的歷史性角色了. 

只是, 個計劃係雙方分開來過日子嘛! 即是...... 慢慢.... 慢慢.... 慢慢....咁..... 去DIE DOWN..... 這個是十分驚嚇的, 即是..... 現在突區做的金融生意..... 這幾年會沒有多大影響, 之後, 會開始漸漸減少左. 

老美會否刻意慢慢握剎突區的集資和金融活動? 這個大家心裡要開始去思考, 因為只有握殺突區這方面能力, 才能握殺未來潛在對手的綜合經濟國力. 

現在一切的乜乜關係法/民主人權法...... 是兩面刃, 老美講明俾突區知道, 咪跟車太貼呀, 突區越跟上邊貼到近一近, 老美就會開始立刻打.

只是,我地一眾港燦應該去想想, 就算突區唔跟貼上邊, 到左將來會點? 人家的長期戰略意圖都已經十分清楚了, 突區為上邊集資的角色, 慢慢會去DIE DOWN..... 除非, 上邊發生驚天大變, 老美看上邊, 有著180度的改變, 不然, 突區前境, 不太理想呀..... 

PS: 大家可能會問我, JJ你唔係叫人咪諗加記? 係呀, 上邊差, 突區差, 難道加記會好? 再加上人離鄉, 做起事上來, 總係會無咁就手, 總係唔夠本地人咁方便嘛!

我為何反對茹素?

昨天, 搭巴士時見到一位60-70歲師太的尼姑, 有一位女信眾來扶著搭巴士, 我母親這歲數時, 仍可以自己一個人出外搭巴士, 四圍去, 由一早去就去到晚上, 到晚飯時候才回家吃飯, 並同我父親說: "你咪阻住我自由呀!"

我一見這尼姑, 我心中並不同情, 深知道佢地茹素守齋多年, 得道了, 並有很多信眾, 只是, 身體狀況不好.

其實, 這些是骨質疏鬆呀, 是因為人年紀一大, 缺少了在蔬菜或豆類蛋白中吸收鈣質的能力, 要透過肉類蛋白來吸收鈣呀! 

我問過很多佛教徒, 他們真是連蛋也不吃, 更莫說海產魚類了, 唉, 我心裡不祈感嘆, 好好的一個人生, 普通人一年老, 已經開始不容易了, 這些人將來的路更難呀!

最令我心裡不開心的, 很女明星息影後, 都去信佛茹素, 我個人並不反對人信佛, 但茹素..... 我就十分反對. 

為何女星我就十分反對佢地茹素? 因為大部份的女星, 都要身裁纖細, 這樣著起衫來, 才會好睇, 才會上鏡, 才會成為萬人迷, 只是這些女星大部份都是單骨, 單骨D人薄命呀, 為何薄命? 因為容易有骨質疏鬆..... 年紀一大就會因為活動受到限制, 誘發出很多病痛出來. 不要說短命D, 而且人生灰暗好多!

現在D女星, 一個二個走哂去信佛茹素, 真係好擔心佢地!

PS: 我JJ都係單骨人, 有骨質疏鬆的風險, 醫生要我食 Glucosamine, 不過, 初頭還買到由植物提煉出來的, 但現在只能由蝦或蟹殼中提煶了. 我實在不敢同我D佛教朋友講, 這些東西是由動物中提煉出來, 希望他們唔去睇英文吧! 

還有, 我這些朋友茹素多年, 現在已經吃不下肉了, 她們一聞到肉味, 就會嘔吐...... 要靠食提煉出來的蛋白粉, 好似健身的那些人咁.....

唉..... 我真係唔想金仔升.....

我最唔想見到的事件出現, 金價升穿1400美元..... 今日升左23元....

我買金仔只係用來買個平安, 唔係用來謀利, 我JJ已經夠洗夠用夠食夠著, 實在希望這個世界平平安安, 大家開開心心咁過日子. 但金仔升, 即是代表, 勢將走相反方向囉.

前幾日, 老美無人機俾波斯地毯個老闆打左落來, 老美當奴友係臨開戰前叫停..... 原來戰爭只是從我們身旁擦身而過.

如果要我JJ估 G20會點, 我諗..... 開會就一定會開, 就算傾唔掂數, 都會被講到吹到好好..... 一切都推到下一輪的會談當中, 現在做好公關和氣氛先, 遲D再算啦. 

唉..... 突區又會點? 班學生哥如果繼續出來遊一遊, 突區政府都會由得佢地, 最重要係唔好俾集大大係當奴友面前..... 唔好睇! 不過, 無人會被佢地叫落台, 無人會出來為到"定性暴動"而道歉. 現實是, 太大太快的改變現況, 未必對一眾港有好處.
 

童言無忌, 投資者不忘初心!

上年回港, 幾批不同的中學舊同學出來聚聚, 其中有位以前坐我隔離的朋友仔來問我: "點解你中學時同其他人講,  未來的戰爭不會動刀動槍? 而是用經濟用錢用資源用勞動力, 來打垮對手!?"

哈哈哈, 童言無忌, 青少年求知求真, 是的, 我以前讀中學時, 成日同人咁講. 

後來蘇聯解體, 我就俾同學笑話, 一年發咁多事, 多年後我JJ一定有次估中嘛!

一到90年代初, 打九菜因的海灣戰爭中, 當時老美用隱形戰機打仗, 我當時就俾人鬧得好犀利, 話我傻人說夢話..... 

好啦, 其實我都無乜野的, 我JJ又唔係覺得自己一定岩, 只是人生在世, 心裡感覺出來的真善美, 就說出來囉! 就慢慢行在自己的信念當中.....!

其實, 我每年都做出好多投資決定, 只要唔錯得太離譜, 我都會繼續我這些投資的軌道囉! 當然, 錯少少之後, 時間可以來修補其中的錯誤, 只是時間問題, 到將來某時某刻, 就會變番有錢賺嘛!

所以, 投資者呢, 不要要求自己沒有錯, 而是要求自己唔好犯大錯, 就是那些...... 不能補救的錯, 之後, 再加多少少內心的真善美, 人生所做的一切投資決定, 都會有錢賺.

老美對突區 - 沒有義務與責任, 只有利益

大家唔好以為我係度中傷緊老美, 又或洩露佢國家機密, 哈哈哈..... 我只係講出佢地每個選民心底裡的真心話, 佢地會問, 你地港燦自唔自由? 有無直選? 有無法治? 中英聯合聲明落唔落實? 關佢地乜事呀?

好啦, 老美政客比選民, 諗得較深入D咖..... 突區無左法治會否影響佢地做生意? 突區一亂會否有幾百萬難民走哂出來? 咁多難民唔係要洗好多錢? 唔係要派好多軍力去維持地區穩定? 到時政客又唔係俾選民罵? 無得連任? 要落台?

咁呀, 老美政客會選擇性咁講下野囉! 

如果要我JJ估估下呢......  

1. 當奴友會否希望突區民主可以一步到位? 呵呵呵...... 如果係我JJ呢, 我就唔會咁希望了, 一來要用自己好多人力物力, 二來維持現狀, 就可以得閒打打突區牌, 得閒就可以發下爛渣, 壓一下對方攞D著數嘛! 

2. 當奴友會否打算打謝集大大嗎?  哈哈哈..... 如果我係佢, 一定極之希望集大大繼續玩下去, 換左個人, 可能會換埋好多協議的落實呀!

咁呢, 一眾港燦唔好戇居到旨望老美會派軍來保護港燦呀, 港燦必須要自救, 用和平非暴力的行動去爭取自己的未來, 唔可以旨望人家同港燦做埋整埋啊!

PS: 可能有D人誤會, 以為違法咁去衝擊警力和禁區, 之後就可以向外國申請難民. 其實, 到時好講好多野, 包括到時的政治大氣候, 慢下手有機會會被人家送返返來受審呀. 所以, 一切違法之事, 大家千祈咪做呀. 

還有, 好多人講, 在豬20裡, 當奴友會同集大大算一次總賬, 包括貿易賬, 關稅賬, 科技賬, 匯率賬, 加記賬(係呀, 太子女俾加記週左後, 有2個加佬係上邊被週呀) , 枱灣賬, 突區賬. 其實, 真係膽心, 加記/枱灣/突區, 一次過俾當奴友擺哂上台做人質呀! 嗚嗚嗚.....

終於明白...... 點解當奴友唔太講香港遊行!

因為..... 現在係民主黨要求通過"香港人權民主法" 和修改"香港關係法"..... 係民主黨要強硬起來.... 

但當奴友講反話喎, 話佢希望中國和香港可以大家四四六六拆掂佢, 講到好溫和喎!

我終於想到了, 因為佢要同民主黨討價還價, 要佢地共和黨投票通過 "香港民主法", 唔該民主黨係其他地方也要放當奴友D法案通過.

唉..... 係下個星期, 通過 "香港人權民主法", 再之後, 就係修改"香港關係法"...... 

大家真係要睇清睇睇FINALIZED 果份寫成點, 係好影響千千萬萬香港人的生活啊!

PS: 現在條"香港人權民主法"案初稿係:

1.美國國務卿要每年檢討香港是否充份自治, 才可以通過每年一次"香港關係法"的延續.

2. 創立懲罰機制, 專門調查銅鑼灣書店和類似事件, 不讓在港人仕遭到任何無理非法的拘捕和擄走. 再制裁那些侵害人權的人仕.

3. 美國總統要定例條定中美引渡條例.

只有祝福, 沒有咒詛

我未到8歲前, 差不多個個星期都要去睇醫生, 可能因為退燒藥或抗生素的原因, 體質越來越差. 那時沒有今天香港方便的公共醫療, 我父母只能帶我去睇私家醫生, 父母經濟重擔可想而知.

真不知道, 後來我的哥們去做了醫生, 是否因為我? "細佬, 有我地來睇住你, 你可以安心了."

有點感恩的, 我來了加國後, 我健康越來越好, 而每次回港, 以前的一切身體問題, 都好快返返來.

大約可能係..... 我對環境裡一些物質, 比別人反應得更快更嚴重, 甚至我參加大陸團時, 同團友打趣說, 我這些是味精過敏症, 我要食D味道好淡好清的東西, 食物太濃太多奇怪獨特的蛋白質, 反而令我身體立刻出現反應.

父母來加國後, 我知道我絕對有能力, 獨自一個人照顧好父母, 我就跟我哥佢地講. "哥呀, 有我來睇住父母, 你們可以安心了."

是的, 人原本沒有咒詛的, 只是人自己死在罪惡過犯裡, 自招咒詛. 

人原本有著各種各樣的祝福的, 只是人不先自己做好自己本份, 祝福就不會臨到人的身上了.

昨天, 我揸車出外搭巴士去遊巴士河, 之後, 2餐都在遊樂場吃, 再玩玩遊樂場的機動遊戲, 就回家了. 因為買了巴士和遊樂場套票, 巴士和遊樂場吃玩喝, 都不用花錢, 袋裡的錢, 只用了1加元, 是用來給街上行乞的老女人買野食的. 

人們自以為揸貴車, 著到身光頸靚, 就係自豪的事, 但我JJ卻認為, 花錢在施捨和慈悲之上, 其快樂遠勝於被眾人擁著為大眾夢中情人.

當奴友唔太講反餸粽遊行....... 係好事來咖!

佢只係講...... 從來未見過咁多人示威, 

攪到突區好多人好失望!

但係我JJ又係諗野同其他人好唔同, 我反而覺得, 係好事來咖!

佢咁耐講咁多野, 有乜野唔係最終變成佢手中的工具? 跟另一個國家來討價還價呀!

現在, 佢只係講, 上邊和突區兩地會大家講掂數. 

即係, 暫時, 突區仲未被捲入貿戰的旋渦, 突區仍然可以置身事外. 建制D人跟上邊溝通, 仍然可以較平和. 如果當奴友話支持香港乜乜物物, 上邊就會連建制D人都唔會信呀! 極可能會直接派隊兵落來.

大家咪以為老美講外國時, 唔係以佢地自己本國利益為前題, 佢地諗野係..... 第一, 自己的國家安全; 第二, 自己國家的長期利益; 第三, 自己國家商界的反應和支持; 第四, 自己國家國際形象..... 可能到左第99, 才會想下, 人家有左民主之後, 是否會對佢地有利!

大江大海 2019 - 港人何去何從?

還記起台灣作家龍應台的作品"大江大海 1949", 內裡講到, 當年國民黨節節敗退, 共軍快要席捲中華大地, 一班人走難, 過了長江, 來到碼頭, 準備過台海往台灣, 故事講到當時的人和事.

估唔到70年後, 我們港人雖沒有需要走難, 但那種時代急速轉彎的氛圍, 卻跟1949當時逃去台灣的人所籠罩的, 沒有分別!

我自己對以上問題沒有答案, 留在香港? 或遠走他方? 我上年7月到上2個月, 還勸人留在香港, 但事態的發展, 卻令我越來越感到迷茫.

只是, 沒有多少人能像我JJ般, 留在外國, 仍感到生活的幸福感....... 

其實, 何處是吾家? 心之所安囉......  

港人無論去或留, 都不能失去我們自己的根, 我們自己的本 - 向善而惡惡; 人, 生而平等; 熱愛自由; 博愛無歧視; 追求民主公義!

這個也是我JJ在加國的生活態度, 不會因為我是中國人, 讀中國4書5經, 而有任何改變. 

大家就算留在香港, 都不應與虎謀皮, 要向惡說不, 要向不平等不公義的事說不, 這樣才能夠保護大家日後在香港的生活. 

PS: 錢, 永遠都賺唔哂, 但求夠洗夠用, 就好了, 所以, 投資物業可以減持就減持, 留番D收息股, 用來應付生活開支, 就好了.

一個舊租客

上年, 有次我搭巴士去遊玩, 在巴士上, 遇見到個舊租客.

多年前, 佢第一次來睇屋時, 是個青春年少的人, 但在巴士上再見時, 他已經是中年地中海的核突佬, 大白天, 佢仲滿咀酒氣, 行起路上來一拐一拐, 比我高齡的老父, 行得更慢. 

這租客, 第一天來看屋時, 我就看出他沒錢, 要同人合租, 後來同佢合租果條友, 無錢交租走左佬, 得番佢一個人來交租, 當然佢唔夠錢, 我就叫佢 幫我清理公共的地方和冬天掃雪, 不過, 我有叫佢報稅局這些收入呀! 但我預感佢一定唔報.

點知, 佢好嗱西, 整到我D公眾地方好污濁, 時不時仲要我抵諗D自己做, 我同佢講, 叫佢去做, 佢又發爛渣, 我真係驚佢整爛我D地方.

我無法了, 唯有每年多加佢租, 加2-3年後, 到佢頂唔順, 自己走人. 

真係有一年, 可能稅局追佢無報果D收入, 離開果年租約約滿前8個月, 而且係冬天前, 佢話要走人.... 

只是佢係牆身留左幾個洞,  地毯好污濁, 果年冬天, 空左無租收不突止, 我仲要用左好耐時間來整番好.

其實, 佢無錢, 就算我告佢上法庭, 要佢賠我損失, 都無用, 所以, 我就唔再理佢.

只是, 多年過後, 佢係巴士上見番我, 第一句就問我有無地方出租. 我一聞到佢滿口酒氣, 莫說佢果時個樣咁得人驚, 就算佢後生時有份工, 佢來租屋時, 俾我聞到佢咁大陣酒味, 我一定唔租俾佢.

可能佢已經忘記左, 佢攪爛左我D地方和欠租, 佢一聽我無再出租屋了, 佢就一野就想到我賣屋賺左錢, 就來問我俾D錢佢, 幫佢燃眉之急. 哈, 真係有趣的人, 佢後生時唔好好地做人, 攪爛我D地方, 現在卻指意我來幫? 真係笑話! 

我一句就答佢, 有咁多無良租客, 我點會有錢賺? 

佢才記起佢D往事, 佢立刻面色大變, 個樣由笑笑口, 變成好凶.

不過, 係公眾地方, 我真係唔怕佢, 我立刻叫佢係車尾自己搵個位坐, 咪來麻煩我!

之後, 我成日接到D人打電話來唔出聲, 我就知道係佢, 不過, 來電顯示佢係好遠打來, 要搭長途巴士才來到麻煩我, 我點會驚佢? 而且, 再過多D時間, 佢健康只會更差, 人生只會更可憐, 最後, 病死餓死係一張好污濁的床上.

為何加燦身份不再馨香?

當然, 這個係同加中或加港距離有關囉, 80年代中期前, 加記仍然好過香港, 只是一到中國開放左5年後, 香港就好過加記了, 留係加記生活, 係一種追求穩定囉! 睇返轉頭, 如果我JJ當時回港, 到現在我可能搵到更多錢, 或更早就可以退休了, 只是身體健康就無現在咁好了.

之後, 2012年後, 中國國內搵錢環境又開始比加記好, 所以, 加燦身份就不再受人重視了.

以前, 如果D人係國內或香港生活得好差, 就會睇中加記D福利, 就會用假資料或假結婚, 移民過來加記, 之後, 就打枱底工, 唔俾稅, 諗住直到退休年紀, 就去攞老人金. 以前係加記, 肯做就不會餓死, 尤其香港人習慣快手快腳, 只是現在人工智能AI, 再加上自由貿易下大量進口, 工廠已經唔要咁多人, D人少左工作, 自然少左幫襯餐館,

只是現在加記滿街都係露宿者, 成日問路經的行人乞錢, 就可以睇出, 加記的福利都不太幫到忙, 只是個假象, 打算用假資料或假結婚過去外國D人, 就開始唔再考慮加記了.

PS: 我JJ本人就生活得好簡單, 現在夏天唔係流感季節, 我真係揸車出去巴士站, 搭巴士出遊玩, 話哂都有人車我四圍去, 自己揸車, 就要精神來睇路呀! 

其實, 我搭巴士還有一個目的, 等我以前D租客見到我係巴士站等巴士, 等佢地覺得我無賺過大錢, 將來唔好來麻煩我. 

有好多中國人喜歡揸貴車, 著到身光頸靚, 因為想人覺得佢地有錢, 刻意同果D用假資料假結婚的人分開, 俾人覺得佢地唔係用假資料或假結婚. 只是, 我JJ由係加記第一天開始, 都唔洗咁諗, 唔洗咁做.

係加記, 真係有好多中國人咁諗, 揸貴車, 著到身光頸靚, 而且佢地睇人, 都係咁睇. 不過, 多年過後, 這些人的生活就越來越差, 越來越跌入社會最低階層, 我越來越怕再見到佢地, 因為這些人人生第一步已經走歪了, 唔去實事求是, 就點都會大鑊. 這些人就算唔來加記, 去左其他更高福利國家, 都只會係一樣的人生, 越來越跌入社會最低階層, 而沒法自拔. 因為比加記更高福利的國家, 稅更重, 就更難由社會最低階層, 爬上中產了.

任何人一睇到這些人生活得越來越差, 當然就係會果句.... "加燦身份不再馨香". 

大家如果將來過來加記生活, 請記著, 找朋友要睇佢能否"實事求是", 如果不能, 就唔好同佢行咁埋, 這些人最終有日一定會整古到大家的. 不幸地, 教會裡(西人華人教會都係咁), 這種人佔不少, 真係要帶眼識人呀.

為何驚老美來針對網上中文資訊和中華文化?

其實, 老美一針對華胃, 任何有點危機意識的人, 心裡就會來問, 下一步會否針對所有中文APPS? 之後, 會否針對網上中文財經平台? 再之後, 會否針對網上中文字? 甚至中文資訊? 中華文化?

咁, 有人可能會講, JJ你D英文唔差姐, 用英文來讀4書5經, 有乜咁困難?

只不過, 用英文來讀中國文學呢, 好失真喎! 

而且, 我見過咁多個竹昇, 講廣東話好到...... 好似任何香港人咁, 但唔識睇中文字, 佢地大多都對中國文化十分混淆, 有些人仲會批評得好唔客氣, 皆因為佢地唔會睇中文字, 唔會自己由原本中國古藉中, 找答案, 下下都要靠別人消化左, 再傳俾佢地.

我JJ...... 十分幸運, 遺傳左我家族的GIFTED基因, 不過, 一分天資不重要, 九分汗水才是最重要呀! 我記番起D中文, 係用左好漫長的努力呀. 連續10年時間, 每天用30-60分鐘, 打中文字呀. 

而且, 連續5年, 那間華人教會D人星期六/日去玩去開心時, 我用3小時, 去上堂學煲冬瓜呀! 最少, 我JJ唔係得個講字, 信心沒有行為是死的. 

一到中文程度好, 睇古藉就容易好多呀, 唔會咁易走火入魔, 誤解收場呀! 華人教會裡D人, 誤解中華文化, 實在係大笑話!

如果有天, 要我JJ用英文讀中國古藉, 咁就真係乞嚏了, 我會十分反感! 會解讀為, 老美想來種族清洗, 文化大閹割, 語言凌遲處死. 中國下一代人, 就會永遠失去中國文化的精髓了.

為何港燦移民多年後, 找港人結婚, 會有問題?

嗱, 我係指移民後, 就在外國定居果D港燦啦, 唔係果D移民後, 一個屈尾十, 秘密回港生活果D.

其實, 移民多年後, 唔多唔少, 個人都改變左, 思想啦, 生活習慣啦, 就算我JJ係外國學識中文輸入法, KEEP住D中文, 找人教埋我4書5經, 但如果回來跟港人拍拖結婚, 都係有問題咖!

點解?  因為唔知自己邊忽仲係唐人, 邊忽變左做西人.

咁, 人地就一定會諗, 我JJ係唐人嘛, 由頭到腳都係嘛, 就係睇中我同聲/同氣/同生活習慣/同一想法, 點知...... 乜原來唔知邊忽係西人, 邊忽仲係唐人, 哈哈哈....

爛蘋果? 埃PAD?

前幾日, 去博物館, 裡頭有D珍藏可以影得相, 咁, 有個阿嫲係度拍拍拍.

咁, 我好奇怪佢係度左度右度, 正果D野, 佢唔影, 影埋哂D無咁靚D野!

我影左件正野, 好心俾阿嫲睇, 叫佢去影我影完果件正野!

阿嫲才講, 佢果個埃PAD係無閃光功能, 所以影到件正野好大陰影呀!

咁, 我見我自己衰多口, 就用自己手機的電筒功能, 照住咁俾佢影番幅相. 

影完後, 佢仍然覺得佢幅相仲有小小陰影, 仲問我部豆泥手機點解會影得咁好, 還以為我部係蘋果 靚埃PHONE...... 

我就同佢講, 係一部好豆泥的中國手機呀! 

唉..... 係這個風頭火勢下, 我JJ都係唔敢勸D西人, 換部中國手機. 先唔好講話老美一直來罵中國手機唔安全, 易俾人入侵, 現在更加埋當奴友係度串串貢, 慢下手好似華胃手機咁, 隨時無得繼續用, 我叫D西人買中國手機, 唔係大大鑊, 隨時俾人鬥爆我呀!

不過, 有乜理由, 埃PAD連盞燈仔都無咖? 最多係...... 軟件上, 唔俾人開盞燈咁耐囉! 

所以話, 現在當奴友係度串串貢, 其背後的推手, 一定係有D原因來攪華胃的! 唔只係競爭對手了, 仲係埋戰略對手了. 唉...... 我地中國人, 尤其係外國D華人呢, 日後日子將會難過了.

娶西人? 嫁西人?

加記這裡, 好多唐人女性嫁左俾西人.

其實, 我自己本人呢, 就沒有同乜野人種結婚的喜好, 可以是唐人, 可以是國內女同胞, 更可以是非華人.... 因為, 我十分理解到, 就算娶左個唐人, 可能跟我的分別, 同個國內女同胞或西人女性, 都會一樣咁大, 分別和差異都不會小呀, 始終, 每個人都有很大分別囉, 唔會因為男女雙方都係唐人, 就會相近好多, 易傾好多囉.

不過, 好多父母, 如我父母咁, 卻沒有我這些觀念呀! 諗住娶個唐人女回來, 或嫁個唐人, 大家容易傾, 其實唔係咖!

之不過呢, 跟唔係唐人結婚呢, 受影響最深的人, 是自己的父母, 真係會疏離了自己父母好多, 尤其, 生活習慣唔同左, 之後, 就少了用中國人的生活習慣, 去照顧自己父母. 例如, 唔會再去煲唐人老火湯俾父母飲了. 

其實, 如果父母唔係太西化, 而是要求子女用中國人D生活習慣同佢地相處. 當事人跟唔係唐人結婚, 就會係有點不孝了, 最少, 父母少了跟子女, 有如中國人般的感覺了.

有時, 見到D唐人唔同唐人結婚, 就有個不孝的感覺, 唔知道我JJ係咪太傳統了. 

64呀.... 逃犯條例呀......

前幾天我講逃犯條例, 叫話D人如果覺得自己係某名單上, 我就叫佢地點去準備走佬, 就有不知名的網友(最近又多左這些網友了, 都係臨有社會大事時, 就有好多這類朋友仔來探我), 話佢係膚淺+普通的人,唔明點解咁驚"逃例", 佢理佢自己家庭的柴米油鹽醬醋茶後, 已忙得不可開交.

其實, 我JJ真係無話會影響香港任何人喎! 只是如果有人自己心中不安, 我就叫佢準備定走佬囉. 如果心中無不安的, 就無須理會囉.

至於加記政府準備幾十條船, 到一有事就來接走d加燦, 都係一種準備囉. 我都無話有D乜事會發生姐! 

至於一眾港燦如何才覺得安樂, 如何才覺得唔舒服, 咁, 今年64呀, 69呀, 留心觀察一下, 唔係知道囉!

不過, 剛剛聽完地產佬阿C生講完, 佢大意係講話, 在港或將會來港的大6資金, 係唔會因為逃犯條例而改變其佈署, 相反因為老美針對大6資金, 只會越來越多資金泊入突區這個資金避風塘. 

咁, 人地D咁大粒的老闆, 咁出聲講, 我又點會同佢唱反調? 而且老美半年前透過加記, 拉左華胃太子女後, 我果時就已經講左, D大6資金將會來港, 多過去老美. 

只是, 大家係突區安居樂業, 就要看清楚一事, 在突區的老美資金等外資, 將會越來越少, 而6資將會越來越大比重地, 來主導突區內的經濟呀. 就算逃犯條例立唔成, 這個實況, 必然會繼續發生. 

可能, 大家應該要想一想, 突區作為大6資金的窗口,  只會越來越重要, 但一到爆發貿易戰.... 經濟戰..... 金融戰..... 突區將來怎樣? 現在立逃犯條例, 跟最近這些貿易戰有何關係? 突區會否被逼捲入貿易戰的旋渦? 突區會否被剝奪國際樞紐和中心的地位? 最後變成像國內任何一個城市? 

以上這些問題背後的答案, 不會因為突區百萬人上街, 就可以改變的! 大6唔會, 老美也不會!

PS: 我上年7月已經預估, 中美會講唔掂數, 我更加講, 一眾港燦留係突區這個金融戰略要塞, 比較移民或回流外國更有利. 這年裡, 我不斷在問自己, 究竟我叫人咁做, 仲係咪岩呢? 

其實, 這個問題取決於老美的態度了, 因為突區必定是6資的窗口陣地, 而關鍵在於..... 老美能否找到別一個替代突區的緩衝區/橋頭堡? 如果找不到, 又如果現在立左逃犯條例, 限制左老美原有在突區的某些活動, 老美會否接受一個不再一樣的突區? 

無論, 我叫人留係突區這個提議, 是否仲岩? 突區在國際和國內的戰略地位, 必定有增無減, 突區會俾集大大私人睇到實一實, 唔可以出亂局, 將會無人敢係突區亂來...... 所以, 一眾港燦真係要..... 求神拜佛, 上邊唔好亂, 集大大唔好唔精神, 一睇少D突區, 就有人係突區亂來!

加記生活中的港燦童年回憶!

"共你相識在童年...... ", 這首歌真係無街知巷聞到無朋友..... 

係啦, 都好咖, 有D往日回憶, 就係壽星公煉奶..... 係WALMART有賣..... 係咖仲有旁邊仲有椰奶, 可以用來整馬豆糕呀, 大家話正唔正呢? 我夏天冬天身口燥熱, 更可以買椰子水來飲, 1-2加元有交易.

不過, 貿易戰下, 都唔知會點......? 唉! 

就算搵多多錢, 家務都係自己經手好呀!

以前D女仔話我戇居喎, 佢地話, JJ你勤力D, 努力搵多D錢, 薪水X萬, 就唔洗自己做家務啦! 佢地即係暗示, 我搵多D後, 就會考慮來同我拍拖喎!

哈哈哈, 其實, 咁啦, 我自己做家務, 唔係為錢, 但又唔係為興趣, 而係為到自己身體健康.

多年前, 有個這裡的西人朋友, 請了個東亞南的外來家傭, 初時都OK咖. 但一個月後, 才發現, 個家傭隨手拿起塊布, 用同一塊布抹哂全屋, 包括廁所+廚房+爐頭, 之後就跟其他衫褲一齊, 放落洗衣機度洗呀!

WHOLLY COW, 我才了解到, 請個家傭回來, 要佢好似自己家人咁諗法野, 係好重要咖, 這樣野, 有多多錢都買唔到返來啊!

我JJ就話齋呢嗄, 與其咁麻煩, 同個外傭先培養家人般的感情, 不如我自己做啦! 培養感情好花時間咖! 有時間, 我不如去賺多D錢錢, 哈哈哈.....

咁, 又有女仔同我講, 你洗乜自己返屋企玩煮飯仔咖? 大把餐廳和外賣. 

只係呢, 這樣又係同請家傭一樣, 把自己健康的控制權, 雙手交托俾其他人. 

自己煮, 落幾多油鹽糖, 自己控制到, 出街食或叫外賣, 就無得控制.

日日出街食或外賣, 未到中年, 身體就會有事了. 

所以, 銀紙事少, 身體健康事大呀! 

PS: D人滿面暗瘡, 我唔會反感, 但反過來對我咁健康的生活, 來指指點點, 我就開始感到討厭, 就唔想同佢地行到咁埋了. 生活習慣不好, 健康自然唔好, 人生那會好? 跟這些人共同生活, 就只會大大鑊了.

港燦逃犯條例如果生效, 走佬須知......

好啦, 嗱, 我JJ唔係同大家講笑咖, 今日講D野, 係個都幾嚴肅的話題來呀!

唉...... 事到如此, 各位如果覺得自己係某某名單之內, 大家來睇睇我JJ發嗡風, 可能會有幫助呀!

1.  全球都奉行難民第一收容港, 所以當大家搭機離港時, 飛機開往的目的地, 就是庇護申請的最大的關鍵呀, 就要在那裡申請庇護了. 不過, 我真係唔知道轉機時, 途經第三國, 會否就係自動變成第一收容港. 所以, 為免麻煩, 各位要去的心水地方, 班航機最好唔經第三國, 直接去到, 免生枝節了.

2. 之但係, 如果有人係名單上的 頭一批人仕呢, 急住趕時間離開, 立刻去機場候補機位走, 有時, 未必立刻有機位出到境, 就要取捨了, 心水的的庇護國家? 最快離境先? 那個最重要囉?

3. 又如果名單上的 頭一批人仕呢, 真係唔想去立刻有機位去的地方,  但想去的地方又無機位, 要等..... 咁, 可以考慮一下, 買2張機票, 一張係現在立刻有機位去的地方, 一張係想去的地方, 用第一張機票先出左境, 入到候機室, 再係裡邊慢慢等第二張機票的上機時間囉.

4. 最後, 大家有無想過用旅行團的方式走佬? 包條船, 包班機...... 一架普通777就可以直飛去到澳洲/美國/加拿大, 搵夠一班人, 咁就有伴一齊, 用旅行團的方式, 走難去心水的國家, 申請庇護LU喎! 

PS: 有傳聞, 97時, 加記政府原本準備好租定幾十條大船, 一下有乜事, 就去接走有加燦身份的港燦回來加記, 唔知道.... 今次逃犯條例下, 加記政府仲出來講左反對添, 佢地會唔會好似上次咁, 租定幾十條船準備去接人返歸? 

聽聞, 大孖沙李+X最新起好果間廟, 內裡有防彈破+秘密通道, 睇來,,,,,, 這個係用來安置佢上邊D老友落來避避, 而佢自己屋企, 一定有同一樣的準備, 慢下手, 長期有部飛機, 24/7 屎釘拜, 有起事上來, 直飛倫敦. 

不過, 就算今次立法不成, 但大家都知道上邊有幾大決心, 又或上邊佢地諗緊D乜, 大家都要打醒十二分精神, 唔好咁老定, THAT'S NOT THE END, WILL HAVE 2ND ATTEMPT.

仲有..... 我JJ都係唔係64或69回來了,  第一, 多我一個唔多, 第二, 如果一下有事上來, 機位緊張, 我就唔好阻左個位啦!

貿戰下, 老美科技界大佬大有D乜恐慌?

嗱! 自從老美當佬友開始打壓華胃後, 貿戰裡的科技戰, 正式拉起序幕了..... 

咁, 好多人都話中國一定輸Q硬, 這個呢, 觀點與角度啦, 我JJ最喜歡唔跟大路D想法. 我諗, 最主要係..... 點樣先至為之輸囉? 到最後, 會係點輸法囉?

啊! 世人基本上分開3種人, 第一種係普通人, 只睇到2D, 睇事十分平面囉, 第二種係好似當奴友那些政客咁, 睇到3D立體, 能夠發動立體戰術, 又關稅戰又金融戰又貨幣戰又科技戰, 最後一種人, 好似老美科技界D大佬大咁, 睇到4D, 睇到時空交錯下的將來.

這些老美科技界大佬大, 不怕中國追上, 因為照正常情況下, 中國無得追, 只是現在一打科技戰, 就非一般情況了. 

現在對老美科技界來說, 最壞情況可能會來臨了: 第一, 中國被踢出一切科技組織, 即是中國以後可以唔洗按世界遊戲規則出牌, 喜歡打乜牌就乜牌. 第二, 老美自己科技進展也會慢下來, 而跟中國的距離就開始慢慢拉近, 而不是越拉越遠, 除非當奴友好似對老美農民咁, 揼大水喉來補貼. 第三, 發展中國家D科技生意, 一定會俾中國攞哂返去, 老美差唔多可以唔洗再做落去!

1. 現在老美當奴友成日話中國偷用哂佢地D知識產權, 好了, 現在中國被踢出這些科技組織, 打埋貿戰, 大家扯爛塊面, 唔洗互相俾面了, 中國就不用再遮遮掩掩了, 擺明攞哂以前收集左D料出來, 用自己品牌來製造, 來出口, 來賣. 

2. 越多人用老美科技龍頭D野, 佢地收版權費越多, 就越有錢, 就越多錢來發展, 發展就越快. 這個是往常中國以全國之力, 生產科技產品大賣歐美下的情況. 不過, 現在劇情改變了, 中國生產的產品, 不再大賣歐美發達國家, 轉而大賣到發展中國家, 而暫時沒有一個國家可以代替中國咁大規模來生產, 這些老美科技公司收開D版權收入, 就凍過水了. 老美科技公司少左收入, 發展慢左, 再加上中國政府繼續再揼水去佢D科技龍頭處, 中美的科技距離只會越來越細, 而唔會越來越大, 除非當奴友揼大水喉來谷老美科企. 

3. 為何發展中國家D科技生意, 會俾中國立哂返去? 而老美D科技公司係發展中國家裡的生意, 會全部打柴? 因為發展中國家唔需要5G, 甚至連4G都唔洗, 大有可能發展中國家用3G半, 已經夠哂. 講到生產3G半, 中國唔怕老美呀, 照生產到出來呀. 中國只需要頂5年爛市, 頂到老美科技公司無得玩呀, 除非當奴友揼水喉射住老美科企.

老美當奴友的如意算盤係, 將D廉價產品生產基地全部搬去其他發展中國家, 之後, 再賣D科技產品俾這些發展中國家, 來架空中國. 只是中國一早已經打通左發展中國家的科技市場, 現在中國唔洗再守規舉出牌, 隨意點玩就點玩, 所有這些發展中國家D科技生意, 全都會俾中國立哂返去. 又係果句, 除非當奴友揼水喉來吊住科企5年的命.

大家要預備這5年內, 科技會發展得很慢, 例如, 現在硬碟最大是10TB, 可能10年後, 都只會係12-16TB, 唔會好似以前咁, 每18月就DOUBLE一倍. 

還有, 未來10 年內, 在投資科技股上, 利潤和回報, 都受到空前程度的壓抑, 再不會像以前咁賺錢.

PS: 當然, 中國係世界通用的5G上, 一定輸硬無疑, 只是在全盤科技戰上, 仍然係鹿死誰手, 未可分曉! 不要太早斷定中國必會輸給老美, 因為世事似水去無定呀! 老美科技發展一慢, 佢地就大鑊了, 有機會俾中國, 在全盤科技上, 拉得好近呀! 最後, 老美不能不向中國妥協, 來定個城下之盟, 再把中國科企納入佢地的科技系統之內.

E..... 哂乜鬼命吖? 哂出禍來LU!

前排, 多倫多有大6留學生被人縛票, 皆因為佢係佢肥士BOOK上, 大哂佢6條豪車車匙呀! 嘩, 佢唔俾人縛架, 就真係天無理了.

不過, 佢可能有武當娥媚道家功夫, 佢俾人縛左係車上, 架車行緊時, 佢竟然可以跳車走佬喎! 好野, 真功夫.

但係, 佢無事, 佢老豆就有事了, 佢老豆係大6 D背境就被曝光了, 原來佢老豆係大6海南島果處, 係道教協會會長 - 陸道長是也!!

之不過呢, 陸道長最近被曝出, 被個小學女教師呃左260萬大元. 

據報導呢, 陸道長聲稱, 透過當地某商會來認識這女教師, 而且仲係協會內集體簽字才借出的. 

只是"欠借人"果個女教師卻講另一個版本, 話佢同陸道長"親密無間的關係", 大有想講"錢債肉償"這個小三鐵規律喎! 

如果要我JJ夾硬來解讀整件事呢嗄....  本來人人都係咁樣, 由阿公果度, 將D錢流出去, 再流番入自己個袋, 一直都相安無事. 當然, 唔可能全部錢都流回去當事人個袋, 總有一D洗費+手續費+行政費咁啦! 

只是, 當事人個仔的背景一曝光, 當事人就俾人查數, 佢本來想攞番筆錢回來填氹, 點知這個係破壞行規, 而且筆錢可能已經係外國完成交收, 點可以交番俾佢呢? 

當然, 當事人被帶上公堂去追回這筆錢, 而欠債人唯一脫身的借口, 就係係認做"錢債肉償"...... 這樣, 唔洗俾人告洗錢, 小三罪名輕好多, 罰又少好多.

PS: 我這裡好多傻佬同胞, 打機打到個腦SHORT 左, 日日係度出一夜情貼文, 圖文並茂, 繪形繪影, 話佢自己係床上有幾咁把炮, 哈哈哈, 佢地希望找個高官寄養在外國的小三, 妄想跟住個小三做狼狗, 傻到以為可以衣食有寄望. 邊度有咁大隻蛤乸隨街跳呀? 發夢都無咁早啦, 黐線咖喎!

貿戰下的口水戰 - 2個婆娘!

哈哈哈, 俗語有講, 能夠文爭..... 就不用武斗...... 

嘩哈哈, 雙方都派出兩個婆娘來比一比先, 啊..... 係呀, 係兩個婆娘呀!

本來我JJ講貿戰, 真係講到好厭, 攪到我成日都三幅被, 講完又講.

現在好了, 有2個婆娘加入喎, 有趣的地方, 並不是這兩個婆娘秀色可餐, 而係佢地兩個都絕不討好呀! 一個係官方電視台讀稿員, 一個成日係電視台節目上批評CHINESE(佢刻意令人分不清中國政府和中國人的分別), 克人憎到死!

竟然派兩個唔多親善的面孔, 用意都已經知道..... 以右婆娘一貫係佢節目的講法, 佢一定會大彈中國人騙佢呃佢, 差在未肯氹佢上床. 我JJ今次唔會講右婆娘了, 因為佢無D新意呀!

咁..... 呵呵呵, 我就只講"左婆娘"了. 

我估呢, 佢一定..... 第一批評右婆娘係種族主義者, 保護主義者, 反全球一體化主義者, 反開放, 反包容, 破壞美國包容的多元社會. 這幾條罪名, 係美國, 條條都係死罪, 可以令到右婆娘立刻無得撈呀!

之後,  佢就一定大罵美國人自己定出的貿易規則, 美國人自己用就得, 現在竟然唔俾其他人用 - 虛偽呀! 

最後, 佢就會講, 中國這幾十年發展出來的建設, 不少的部份, 是因應美國商人和消費者的需求, 而發展出來的, 現在美國人強行用關稅來摧毁中國這部份的建設, 不少中國人傾家蕩產之餘, 將來再沒有中國人敢來因應美國消費者的需要, 而作出口的建設. 中國人日後只會走自己的路, 不再理會老美了!

PS: 好啦, 有圖有真相呀, 睇圖呢, 左婆娘比較清純一D, 無撻咁多面懵膏係面上, 顯出少少皺紋, 無咁彊屍面囉! 

不過, 佢地一定唔會睇得上我JJ這些唐人男人, 嗄, 點解? 因為佢地一見到我, 就會怒火中燒, 宜得走上來鐘我幾鎚呀, 佢地心中一定會喃喃自語講: "死o靚仔, 頂你個X呀, 你男人老9, 竟然面上仲比我地還要光滑青春, 攪到我地每次出街, 都要撻咁多層面懵膏, 化勁個妝, 才敢出街見人, 你JJ係咪抵死呀? 簡直係死有如辜呀你!"

噢..... 可能這個係..... 今次中美唯一可以達致一致的地方了, 無法啦, 佢地唔出青春美女, 出兩個咁o既婆娘,  一見到我JJ, 就只會係咁收場囉!

馬教主, 現在你雖然被鄧冬菇, 但你音容宛在呀!

想起淘寶, 原來最近有人封左馬教主成為網購祖師爺, 其他果D祖師爺, 如..... 地盤佬祖師爺係魯班, 黑社會/差佬祖師爺係關公, 豬肉佬祖師爺係張飛, 草蓆藤具祖師爺係劉備, 街邊賣蒸包的祖師爺係孔明, 近代呢, 我地都時時見, 就有.... 左仔拜無主席囉! 吖, 唔知道街邊賣粿蒸粽的祖師爺.... 係咪屈原? 又唔知道, 律師公會班友, 會唔會拜包青天呢嗄? 又唔知道, 身為地產佬的C生, 佢會唔會去拜..... 中國最早實行"BUY LOW SELL HIGH"的孔子門生 - 子貢?

各位, 點解我會想起淘寶? 大家泥睇睇我這裡, 買件咁野, 竟然係咁樣價錢, 我都係去淘寶好了. 我這邊賣到$229加仔再+15% 消售稅喎.... 為成千5港紙呀. 

香港黃金都唔會咁貴, 3-4百港仔就有件啦! 淘寶就1-2百人仔嘛!

下次我JJ身痕想換手機時......

哈哈哈...... 大家係咪好想知道我JJ的思路呢?

其實, 我一向對手機這些咁埋身的用品, 都有好大戒心, 我到2013年才開始用 薯嘜PHONE, 到左2017年, 才開始身痕換手機.

好啦, 嗱, 今天當奴友打華胃手機, 講俾我地聽D乜呢? 就係老美選民選個政棍出來, 個政棍可以一鑊打謝打殘, 使用老美佢地任何科技平台的客仔/開發商/營運公司/生產商/金融服務者.

好啦, 既然現實係咁, 咁, 真係唔好使用單一科技平台囉.......! 唔好單單用死一隻ANDORID的薯嘜PHONE, 難保佢地有天, 老美D政棍出來針對中國人/中文/中華文化.

嗱..... 華胃手機單野唔影響到我, 不過, 如果華胃再出新手機, 唔再用ANDROID, 我JJ一定好有興趣去了解一下. 就算出果時, 只有ANDROID機的一半功能, 我諗我都會買來裝 徵信和一眾中文的APPS, 變成我的 2ND ALTERNATIVE. 敏感話題可以唔係微信或對國內同胞出, 但中華文化或中文, 在這件事後, 就一定唔可以靠外人了!

其實, 手機/電腦/智能用品, 到瓜左時, 唔係換過部囉, 有乜咁大把呀?  最大把係..... 唔知幾時會俾人封殺我用開D工具, 一鑊打我柴呀! 

就算華胃出D非ANDROID手機, 好大可能最終會唔好用+煩Q死, 但我仍然會去買, 因為唔可以俾好似當奴友咁樣D政棍, 咁高調咁囂張咁來串串頁. 這個令我想起我以前華人教會果班大帝, 攪到我係佢地教會拍唔成拖, 真係唔可以再俾D人咁做, 避開這些人/事/想法/組織/機構, 是十分重要的!

2013年尾, YAHOO BLOG宣布唔再玩, 之前YAHOO都有半年俾用戶轉去別個BLOG的地頭, 但果年年尾, 都令我情緒低落左半年, 因為用開左, 要改新BLOG的使用習慣呀! 好唔舒服囉.

講一個中年悽酸的故事!

故事係講, 我母親的一對母女朋友, 為何我知道佢地屋企D事? 因為我母親曾經大罵這朋友個女不孝, 而我以前讀大學時, 係教會經常見到我母親這朋友個女, 佢高我3-4年級.

見佢係教會好積極參與事奉, 只是佢喜歡用一己之見, 強加在別人身上, 有次, 仲聽到佢講要替天行道. 其實, 佢屋企本來環境同我屋企差唔多, 都算有D錢啦! 跟父母移民來加記, 畢業後, 我事業起點無佢咁順利. 佢入到佢本行, 而我就因為要留係法語魁北克, 我入唔番我本行呀. 佢父母唔洗佢陪伴在側, 佢要去邊度大展才華, 也完全隨佢喜歡. 

不過, 我後生時, 勝在夠慳+夠抵得諗+夠肯做+夠肯放下自己身段, 而且我從來都不再需要父母來操心. 我從來唔欠咭數, 從來先用心做好自己本份, 儲多D錢, 照顧好自己父母. 

多年前有次, 我母親好勞氣咁返到來同我講, 話這朋友幾年前幫個女置業買屋, 已經用左一大筆積蓄, 現在還要幫個女找咭數, 生活變得好差, 甚至到月底連買藥都唔夠錢. 從我母親口中, 我才知道佢本人不單有咭數, 嫁的那位人兄, 都係先洗未來錢不單只, 拖咭數十分嚴重. 

好啦, 我當時都無答咀, 不過那時我才驚覺到, 有些人係教會裡一個形象, 私下家庭裡, 卻是另一個. 後來, 我勸我母親, 唔好再理會這朋友了, 更不要提什麼意見, 始終都係人家家事, 人家骨肉至親, 理唔到人家了, 一切都是人家自己心甘情願. 

上年我去旅行, 路過一間華人教會裡, 見番佢. 佢父母同我父母差唔多年紀, 但已經不在了, 而我父母仲行得走得, 日日開開心心. 果次, 我見佢生活得好差, 以佢咁要面的性格, 有能力就一定不會咁樣. 最近, 聽其他朋友大罵佢老公不是, 佢夫妻一早分居了, 有個女留係佢身邊, 但膳養費時時不繼. 唉, 我都估到, 人到中年, 咭數纏身, 遇上經濟不景, 工作不保, 柴米夫妻百事哀, 天天嗌交, 婚姻怎會不觸礁?

PS: 其實, 我有口勸我母親, 無口叫自己咪多事. 果時, 我一聽到我母親返來講這個故仔, 我就立刻係我這裡那間華人教會, 同D年青人講, 叫佢地拍拖拍得簡單一點, 唔好要求又這樣又那樣, 人生就唔會開始拖咭數了. 只是我一講完, 教會裡就有人唔妥我, 包括埋這些年青人D父母, 態度極端惡劣, 對我流言四起. 我一見到咁樣, 才意識到叫人防備咭數已經太遲, 崩口人忌崩口碗, 原來某些人身為長執, 在教會裡的人面, 不一定真實, 佢地原來同我母親這朋友個女一模一樣, 有樣板可見.

好啦, 現在我早早可以退休, 我這裡果間華人教會裡D人就好唔掂呀! 不過, 唔關我事了, 各有前因莫怨人, 總之, 這班人咪再來對我指指點點, 我實在討厭這班人呀! 唔做好本份, 人生一到大鑊時, 把其人生問題, 假借屬靈, 刻意講成為別人的問題,  實際想來拖埋別人落水, 嘿!

我母親這朋友個女, 累垮了佢父母的晚年, 種瓜得瓜, 種豆得豆, 將來佢個女都會一樣咁做. 只是佢中年已經生活得咁差, 佢晚年就算有子女在旁, 一定仲慘過我孤身一人. 

我才明白那句 - "一個可憐的人, 必有其背後不為人知的可恨原因!". 這些人口口聲聲屬靈, 替天行道, 但卻忘記了他們自己, 原是死在罪惡過犯裡.

我這邊的中東移民攪D生意

如果大家以前有移民過, 或去旅遊/探親時, 去過外國D唐人街, 大多都會見過唐人街裡頭, 有人開舖賣衫, 又有人開舖做理髮/美容. 

我這裡唐人街D舖頭, 差唔多執左大半囉, 賣衫D執剩賣旗袍/中山裝果D特色野, MARKUP十幾倍, 一係唔發市, 發市當三年囉. 而美容就差唔多執清光, 只剩底D理髮囉!

咁, 現在我見到D中東人開賣衫舖和美容/理髮, 真係百感在心頭, 記番起以前好多人, 記起佢地開舖, 開到執笠閂門. 

睇睇現在中東人D生意, 仲差過以前唐人街果D, 看來佢地都捱唔到好耐, 就快摺埋了.

見番我幾歲大時, 婆仔係街邊幾豪子幫襯果D..... 用線拔面毛和頭毛, 原來中東或南亞都興咖喎!

現在老美最令人不安的.....?

老美一向自許包容+開放+自由+守法+尊重他人, 所以, 當佢地開放個ANDROID系統平台, 就有好多人係佢平台上寫程式, 就有好多人用緊佢個系統平台. 

同一例子, 佢地D蕊片設計平台都係一樣, 有好多人用佢個蕊片設計平台, 來設計獨特應用的蕊片, 用在不同的科學儀器/生產機械之上. 

一個開放的平台, 越多人用, 就越令到老美D公司賺大錢, 軟件系統如是, 蕊片也如是, 今天GOOGLE賺到盤滿砵滿, 股價急升, 皆因為世人都相信GOOGLE 和佢背後的老美政府信守承諾, 才去使用 GOOGLE的系統和相關的產品. 

只是, 現在當奴友打華胃事件下, 任何頭腦清醒的人, 都應該質疑老美是否真係"信守承諾"? 最少, 華胃手機使用者, 在購買華胃手機時, 並不是單相信華胃會信守承諾, 也相信華胃手機使用的GOOGLE公司和佢地背後的老美政府信守承諾. 

現在是老美當奴友, 負了世界上任何一個老美技術基礎的使用者, 包括用家+開發商+相關零售/批發商+相關金融服務者. 

PS: 上年老美民主黨果個大媽克林頓曾經豪言, 數年後中國人會一貧如洗! 這個令任何中國人都毛骨悚然, 因為在其老公的總統任內, 發生了東亞金融風暴, 用東亞人民自己的錢, 去推垮東亞的金融系統. 而掃低東亞金融的大孖沙, 卻是民主黨傳統的捐獻者, 實在難以令人不懷疑, 其老公跟東亞金融風暴沒有關係. 

現在集大大力拒老美進入中國金融系統, 相信當奴友這樣打華胃, 必會令到越來越多的中國人, 支持集大大同老美摙過, 就算擋埋條褲, 都要同佢死過. 

唔洗集大大走回無主席的舊路了, 一個二個中國人自動自覺, 個個無主席陰魂上哂身, 上井崗山, 誓要同老美摙到底, 絕不手軟.

現在貿戰打到國本, 最受衝擊的是老美的國家信譽和國詐!

哈哈哈, 當奴友現在對華胃動手動腳了, 其中理由, 佢真係好老實, 和盤托出, 佢話唔可以俾老二爬超前過老大.

佢咁講, 當然係為佢連任拉票啦, 不過, 這個真係令到世界全部人都好擔憂了, 如果有人影響到老美選民飯碗, 佢地會否俾一個不擇手段的總統繼續連任? 來保障老美選民佢地的飯碗?

香港很多人很傻呀, 又話大6佬唔識死, 又話不自量力. 其實, 最唔識死的, 係現在用緊老美基礎技術的用家和開發商. 睇睇華為和一眾中國企業, 一直使用老美慣用的遊戲玩法, 來進行國際貿易. 只是現在華胃有可能彎道超車過老美, 老美不單只改變遊戲規側, 仲要講明, 這些老美自己玩開的遊戲規則, 唔俾華胃一樣咁來玩法. 

一眾港燦有無諗過? 如果有一天, 老美某些群眾認為中文危害佢地利益, 要當奴友下令殼哥, 唔再支援手機安卓系統內的中文呀, 到時我地一路用開的中文用家, 一路開發中文資訊和數據的開發商, 就會立刻打柴呀? 來個語言滅絕? 來個文化大屠殺? 來個種族清洗? 把中國人財富大轉移? 

那麼, 現在使用老美技術的用家, 在老美技術基礎上攪開發的人群, 又是否應該要擔心起來? 是否要老美政府用國家信譽擔保, 唔會針對任何群體呢? 不過, 在當奴友當政下, 可以唔洗多講了.....

很多人以為老美係文化融爐, 誰知老美內有很多少數群體, 苦苦支撐著自己傳統的文化和價值觀, 並未融入老美的融爐之內. 講荷蘭語的, 西班牙語, 德語, 中文, 萄語, 法語, 信天主教的, 回教, 猶太教, 印度教, 踢克教, 佛教, 婆羅門教, 摩門教..... 美國以合眾國之名立國, 就是讓這些不同的人, 不致於爆發表面的白熱化衝突. 

只是現在當奴友的"打壓老二超車"論, 必定會引起老美國內很多人的恐慌, 深怕有天老美最大的族群選個總統出來, 對付老美其他較少的族群, 來個大滅絕大清洗. 到時, 真不知道, 老美國內將會否自動土崩瓦解? 分崩離柝? 如果真係發生, 全都係當奴友這等目光短淺而又追名逐利的商人型政棍所誤, 亦都是因為老美選民心裡有鬼, 誤已誤國. 

身在福中不知福, 又一例!

前幾日, 又見到這位妹妹仔係度發表偉論, 哈哈哈, 今次佢唔再講"大陸西"了, 而係吹到上邊深圳好高大上喎, 話香港行緊敗運. 

哈哈哈, 如果正如這妹妹仔講, 香港行敗運, 難道世界其他地方會行好運? 深圳又點會好到邊呀? 就連加記所有大城市裡, 都係滿街露宿者流浪漢呀! 美國大把人欠債斷供而自殺呀!

我建議這妹妹仔去深圳關外睇下, 其中一個地方叫龍華區, 4號線尾站清湖地鐵一出來, 裡邊有個地方叫三和人才XX, 搵日早上6-7點去到, 就見到大群大群三和大神, 係度搶緊老散日結工. 

有時, 我會問, 為何這妹妹仔住在香港, 連深圳都不清楚? 反而我這個長住加國的加燦, 知道咁多. 我廿年前都叫D人咪掛住淨係係度飲飲食食. 勸人增加見識, 增加見聞, 開闊眼界. 家族背境唔係一個太大的因素, 天生聰唔聰明, 天生健唔健康, 都唔緊要, 但千祈咪係度唔生鏽.

我係加記, 接觸到一班自稱深圳建設兵團的前深圳人, 個個都係北方大學一畢業後, 就湧去最多機會的深圳打工, 之後, 就以專業人仕身份, 移民加國了. 但係移民後, 都係係加記打工一份囉, 前境? 無呀, 穩定職業? 無呀, 大多都係係度打發日子囉! 見工打工, 過一日得一日. 從他們身上, 我發現這些外表充滿自信的前深圳人, 都只係人一個囉. 

我地港燦醒果班, 只係唔醒出面姐, 又或好似妹妹仔這些人咁, 無機會接觸到醒果班港燦囉! 

唉, 無法了, 眼界+見識+背境, 令到很多港人唔開心, 身在福中不知福.

為何我叫朋友早D退休?

其實, 我由後生開始, 已經力勸D朋友多儲蓄, 好使將來年紀開始大時, 生活會好D.

因為袋中有錢, 就可以早D退休嘛.....

好多人話我, 退休之後太悶了. 這個說出這些人的個人問題, 因為在工作以外, 他們沒有自己人生.

而且, 提早退休唔等如人生一切停頓, 坐係度等死, 還可以做其他自己喜歡的事, 一邊做自己喜歡的事, 一邊減慢生活的速度, 給自己多點時間來養好自己身體, 以備將來一到60歲後, 身體直線往下走下坡.

我一直都講, 55歲之後搵的錢, 很有可能到最後, 用係因為老年工作壓力下, 身體轉差後的醫療開支. 

55歲之後, 除非身體一向好好, 還可以繼續工作. 但如果好似我JJ咁, 天生薄命, 細時成日去睇醫生, 就唔該早D退休, 最少可以慳番D醫療資源, 俾其他人. 

當然, 正如我JJ話齋, 有能力越早退休, 就咪鬼等到55呀! 50, 45, 40.......就算35, 哈哈哈, 都可以退休呀, 咪鬼理別人係度指手督腳漫罵呀, 自己有能力早退休, 關其他人乜事呀?(漫話最多, 是那些去教會旨意別人幫手的人, 其次是那些一心旨意老公養的女教友.)

我JJ自己發現一事, 我咁早退休, 我每天早晨做個半小時柔軟體操, 每晚一上床, 就大教睏天光7小時. 我D記性好左好多呀, 就快回復番我後生時, 未去果間華人教會之前, 過目不忘的天生本領. 

係呀, 原來早早退休, 身體還年青, 可以復原番D創傷呀. 這個是十分重要的, 身體和精神創傷能夠復原過來! 將來的人生才會好,  醫療開支才會減少呀! 大家唔好讓自己陷入"阿茂整餅"的人生陷阱當中. 

PS: 唉..... 我D醫生哥哥, 睇落佢地都好難退休, 因為佢地係名醫, D病人排長隊等睇佢地, 成日有人打電話去苦苦要求佢地再收新病人. 嗱, 好似佢地咁樣, 就真係唔可以自己話退休就退休. 當然, 錢對於佢地來講, 早早已經不是考量的因素.

其實, 我JJ十分幸福, 早早咁後生搵夠錢退休, 又可以唔洗理會別人, 自己一話退休, 就立刻退休.

係啦, 就算點鐘意, 我都係唔買啦!

噢...... 我原本有幾件米老鼠TEE, 但係自問一把年紀, 都無謂著, 有次攞左返香港, 俾左我D侄仔侄女.

不過, 家陣我這邊賣D米老鼠衫, 又幾過癮呀! 唔貴呀, 這件30皮加仔! 這件仲係俾果D長大成人的FANS 著咖!

 這件絨褸, 有咖仔文啊! 好東洋色彩, 仲係俾成年人著, 都係40皮加仔咋, 但係我全都無買, 齋睇呀! 買都無乜胃囉, 我D衫都著唔哂!

睇遠VS睇近, 豁達VS抱怨, 啖定VS迷亂

在中美貿戰中, 網上很多人發表了不同的意見, 這個十分好呀!

只是, 面對大時代的急轉彎, 我們實不能讓自己迷亂呀, 更不能發出抱怨!

要做到咁, 就要睇野睇得遠呀! 勿以一得為喜, 勿以一失為憂, 因為短暫的得和失, 只是過眼雲烟, 讓自己立在不敗之地, 才是最重要!

一切世間世事, 任何人都知道盛極而衰, 月盈至虧, 問題就是出在, 人們不願意去接受虧損和衰敗的世態, 也不願去接受, 有一天資產價格會作出大調整. 

接受了必然發生的狀況, 準備好必然來臨的資產價格大調整, 防範自己的投資風險升高, 這個就是立在不敗之地裡.

當然, 有很多危機, 我們實在無從去防備, 例如食物價格急升, 就算買糧食股, 都不會有好日子過, 生活水準總會因為食物價格急升, 而受影響! 

不過, 衣食住行中, 對於很多有自住物業的人, 住已經不受影響了; 對於好像我JJ這些中年人來說, 衣又不用再買多; 行...... 我部錢七仍可以行多10年, 10年後, 如果我仍可以揸車, 再買過別一部囉. 咁, 到最後, 都係"食"用多錢囉, 一想到咁, 根本就不是問題了.

糧食價升得高, 只需要出外買多一點有收息的好公司股票(生意長有長做長賺錢), 生活就可以了, 不用愁呀!

PS: 這裡加記, 最令我心裡一直擔心的, 就是華人教會裡那班唔生鏽. 好時好市道, 都已經攪出咁多問題給別人, 人地一心入教會慕道, 佢地竟然咁大整古. 好啦, 將會來臨的大逆境, 這些人心裡一定更虛, 更會攪出更多大頭佛出來, 更令到別人不能入教會去慕道. 不會如那個牧師講的, 逆境令教會提升起來, 反而一班唔係真心追尋神的人, 只會攪出更多問題, 更多抱怨, 更多手指指指, 更多漫罵, 更多詆毀和謊言.

波哈熱潮減退?

各位波哈迷, 這件野係小說中, 四大魔法學院中的其中一間. 

只是件T恤唔知點解, 賣唔去, 勁減到5皮野!

不過, 我JJ唔係波哈迷, 無買呀! 

加記是否仍是糧食生產大國?

到貿易衝突, 加記都受到中國影響, 中國禁左加記D菜籽油入口. 

對加記真係有問題呀, 因為好多農夫少左收入.

不過, 最奇怪的, 就係我地這裡D新鮮蔬菜水果, 都貴左唔少. 

圖中的西芹, 今年冬天賣6皮加記, 好貴呀, 上年夏天最平時, 都仲係賣到1皮.

現在天氣回暖, 最平的WALMART, 仍然要4皮呀.

 

相信係因為加記同老美有貿易衝突, 減少由美國進口蔬菜水果, 依靠本地溫室種, 或由中南美洲進口, 加埋航運費, 就真係好貴了!

再講中美貿戰, 點解雙方都會企硬唔讓步?

我JJ講中美貿戰, 講左咁多次, 都有D厭呀! 不過, 我一見坊間所講的一切大路思維, 我JJ毫無異議, 都覺得有理道咖!

只是, 我JJ有個好壞的習慣, 就係諗野唔跟大路, 專門去捐窿捐隙, 諗D其他人未想過的事情和觀點. 好啦, 我又即管講出來, 大家自己參詳一下呀!

現在掌權的紅二代, 其實係最核心的軍二代, 不單掌握著軍隊, 也掌握著核心特權的中央和地方國企, 由細到大, 金錢並不是他們的考量, 他們最大的考量是長期戰略目的和集權. 大家看, 我地集大大佢幾年時間內, 就集到老江幾十年所集到的權力, 更有過之而無不及.

老江那班人, 輸就輸在個個都向錢看, 個個諗住CAP水之後, 走去搵老美, 無顧慮到自己的根本 - 戰略和集權, 一到老江年紀大, 健康唔好, 一個老人一時睇唔到, 那位由老江自己欽點的接班人 - 集大大, 就擺脫左那個同樣加在老胡頭上的緊箍咒, 不用再睇老江派系的面色了.


所以, 作為紅二代的集大大, 佢係戰略思想的大行家, 由佢家族中上輩人開始, 就已經係咁, 所以, 現在集大大考量的, 不會是經貿數字, 而是己方和對方的長遠戰略意圖或利益. 

佢深知道, 現在老美提出一切的經貿協議, 根本就係一個戰略陷阱, 要來逼令中共自己跌入這個戰略陷阱, 最終要令中共崩潰解體, 就好像當年對付蘇聯咁! 

在中共眼中, 阿富汗戰爭只是拖垮了蘇聯的國計和民生, 只是埋門一腳, 卻是由那個沒有前蘇共總書記勃列日涅夫(Brezhnev)戰略思維的戈爾巴喬夫(Gorbachev)引起, 其急於勉救蘇聯瀕臨崩潰的民生經濟, 實施開放政策, 卻直接加速了蘇聯崩潰瓦解. 

中共眼中的歷史教訓如山, 由老鄧欽點老江這個喜歡曬英文和崇洋的上海佬開始, 貪官開始成風, 老鄧心裡想的, 就是要老美疏於防範中共. 幸運地, 之後, 中東和回教徒就不斷有事, 令到老美唔得閒來壓中共, 2次打老伊, 1次打東南歐的前蘇共勢力和回教徒, 再到2007年老美金融海嘯, 中共享有長達30年的戰略機遇期, 老美不單無力壓中共, 還要求中共緊守"滔光養晦", 不來攪串個PARTY.

一到中國廉價勞動力開始枯竭, 就知道飛鳥盡良弓藏的道理, 換上台的集大大這個紅二代, 正式開始跟老美打起深層次的戰略博奕了. 

講回頭, 老江隔代欽點集大大為接班人, 又怎會是老江自己的意願? 當權多年的老江, 都不能隨心所欲揀自己心水的接班人, 大家就可以看到今天集大大集權於一身, 係中美貿戰上, 都無得自把自為. 劇本幾十年前已經寫好大網了, 只是誰去演? 不厚兄唔得, 就集大大去演囉!

如果大家好似我JJ咁去睇法野, 大家必定會明白, 現今發生的一切, 都不是集大大自己一個人自把自為, 而是由無主席年代的"人多好辦事"開始, 一大群中共內的核心紅色家族中人, 一代二代三代四代五代人的心血和秘密了.

解構加國福利和醫療制度

前天有網友仔問我, 加國福利制度和免費醫療.

加國的福利制度, 其實很多人沒有留意到一個好大的重點, 就是..... 加國政府現在設計出來的福利制度, 只是一個短期性質的救助制度, 並沒有政府養人過世的意思.

加國一切對人的法律制度, 是建基於人的故定住址上. 申延到領取福利, 需要申請人的故定住址; 申延到接受免費醫療, 也需要病人有一個故定住址......

問題就出在這裡了, 加國幾十年前的福利制度, 真係設計到滿足到受助人的生活最低開支, 即係..... 政府真係有意圖去養人過世囉!

只是, 大約90年代開始, 當時美加自由貿易開始, 福利金額對比生活基本開支, 就一直向下, 尤其對那些單身無兒女的男性, 福利金額就越來越不能維持最低生活開支.

當然, 咁..... D人無收入幾個月, 靠政府果D少得可憐的福利, 係加記都唔會即時死人, 因為有大把渠道借錢貸款嘛! 原本有收入時, 已經有信用咭嘛, 到無錢交租時, 個制度都設計到要等2-3個月後, 才被房東趕出去嘛! 通常, D人就算無積蓄, 突然無野做無哂收入, 都可以勉強頂到6-9個月, 才失去那個"最重要"的"故定住址"!

到失去那個"故定住址"後, 就失去了領取福利, 來苟延殘喘的可能了. 甚至, 去到醫院或診所, 沒有故定住址, 就沒有接受醫療的可能.

PS: 我以前有出租物業, 咁, 揀住客係好考眼光的, 好多時, 住客來睇屋時, 都係身光頸靚, 有份工作, 信貸紀錄良好, 無欠租紀錄. 

只是這幾年, 我見盡很多租客的環境一直差下去, 真係沉淪呀! 20-30年前, 我D眼光好準, D租客好, 我出租得又容易, 唔洗點花精神管理. 但這幾年加國的就業和經濟環境, 差左好多呀! 真係見到好多人沉淪, 佢地袋中銀包越來越少錢, 而他們的性情也變得極端很多!

其實, 到租客欠租時, 我也好好相與的, 總希望對方唔好發爛渣, 整爛我D物業. 幸好, 我D物業唔包暖氣和電, 租客無錢交租後, 也無錢交電和暖氣, 冬天時, 因為基本人權, 公共公司唔會截租客電和暖氣, 但一到3-4月天氣開始回暖, 就會開始截, 租客就無得再懶係度, 就會自動自覺搬走了.

我知道, 很多人生活在水深火熱之中, 不過, 很多人係自己攞來的, 後生時唔緊張, 又唔儲蓄, 咁到現在年紀大和經濟差, 就沉淪了, 無得怨人富貴.....

哈哈哈..... 唔係串唔起, 而係唔敢串....

這些年代, 東亞國家大攪出口主導經濟, 像加記這樣的進口國, 成衣就變得平宜.

只是, 像圖中般的質料/顏色/剪裁, 照常理, 就不會大減價, 減到8皮加仔了!

不過, 大家睇睇T恤上邊印乜字? 哈哈哈, 這個年代D人, 最怕係俾人覺得係度串串頁呀! 所以這件野, 一直無人買, 要減到8皮野..... 

所以, 這個年代, 係謙虛的年代, 係不出風頭啊! 

PS: 不過, 我都係無買, 就算當底衫著, 我都仲有好多未著, 唔買了, 留番俾別人啦.

也所以呢, 越南, 印尼, 菲律賓這些國家, 繼在中國之後, 走去大攪成衣出口歐美, 其實, 真係賺尾水D錢, 因為歐美好多人, 同我JJ一樣, 家裡還有大把衫褲都未攞出來著, 行公司, 都只係睇下, 望下, 減到8皮野, 攞來當底衫著, 都唔會買呀!

為何我叫人咪移民或回流返去外國?

各位, 我JJ上年講到中美貿易戰時, 我唔係講話...... 叫大家唔好移民? 唔好回流返外國? 當時我講, 全球在貿戰下, 香港相比外國, 我地港燦留係香港, 會比較住係外國, 會好一點.

點解我會有咁樣的睇法? 因為我自己覺得自己係外國生活多年, 都係覺得香港生活會開心D. 很多人會好似我咁, 就算留係加記生活唔錯, 但係香港生活, 將會更好. 而且就算我生活唔錯, 唔代表其他人都應該留係加記.

大多數人都係行一條人人都行的寛闊大路, 有很多朋友, 而唔會好似我咁, 獨自行一條同人唔同的路.

就以90年代初為例, 很多加燦都回流返去, 因為相比加記, 香港生活, 又真係好過加記喎, 起碼朋友會多D. 

就算, 將來香港可能會面臨很大程度上的資產價格調整, 香港都會適合大部份的港人. 

還有, 當香港面臨資產價格調整時, 世界各地資產價格, 都會一同來調整咖. 而且波幅未必比香港少, 只是, 外國很多國家都是高稅率, 蝕錢容易賺錢難, 扣完稅後, 賺一桶金, 係難過係香港咖. 

PS: 有次, 我係唐人街, 見番以前那華人教會裡的教友, 聽說佢90年代跟父母移民, 一到畢業, 就急不及待咁, 回流番去香港. 最近聽說佢回流返來加記了, 但以我所見, 佢在加記生活並不好呀! 

加記的免費醫療和福利, 發展到了今天, 大多都變成誤導人的假象, 任何人在加記, 靠福利過日子, 真係會死人咖. 

睇睇加記通街都係露宿者, 行人行過, 都問D行人要散紙, 買包薯片來充飢.  

我真不知道, 這些露宿者入到醫院或診所, 會否有人理會佢地? 

最近, 有同為發達國家的外交官, 來訪加記多倫多, 卻驚訝著那裡通街都係的露宿者流浪漢. 多倫多應該點都比滿地可好, 任何人回流回來滿地可, 就真係...... 唉....

中美現在攪D乜? 唔係爭霸你死我活, 又唔係鬥而不破, 而係攪緊離婚啊!

好啦, 中美貿戰到今天, 峯回路轉, 初頭上年12月又話城下之盟, 有人為左3個月寛限期, 踒低左, 到3-4月時又再續寛限期, 有人仲講到好大機會達成協議, 但到左剛剛果個星期日, 就話有人反口, 老美就立刻加關稅.

之後, 大把人走出來用經貿數據分析...... 話中方會經濟崩潰, 一定會踒低, 無得打.

嗱, 我JJ自己唔係專瓜, 就真係無得好似人地咁叻, 用經貿數據來分析了.

之不過, 好多人唔嚐試, 去用一個紅二代的身份和背境, 設身處地去想想究竟現在發生的一切, 係有乜含意?

嗱, 如果我係紅二代, 自細跟本係無金錢/經貿的觀念, 只有權力的觀念, 尤其如何去透過發展共慘黨, 來獲取至高至上的黨內支持和權力. 一講到至高至上的權力, 當然係中國土壤裡, 無主席係最佳的樣板嘛!

大家睇無主席以前點做, 再睇睇現在集大大點做, 是否有D相似呢? 都係.....  同大家果D經貿的觀點, 唔多吻合喎.

假設這些紅二代的上一輩, 讚成入WTO, 讚成承諾開放市場和民主化, 係權宜之計, 目的係想先攪起個經濟, 之後反抬都未遲呀!

如果大家用這個假設去看這十幾年所發生的事, 就真係好吻合喎.

老美又會上當? 當然唔係啦, 老美自知道人口老化, 要拉攏中國, 因為中國有佢地好想要的東西, 廉價勞動力嘛!

咁, 這十幾年所發生的事, 就唔係夫妻結婚後嗌交LU, 而係姣婆遇上脂粉客, 各取所需囉!

為何這幾年脂粉客咁鐘意刁難個姣婆呢? 全因為姣婆開始年紀大吖嘛! 無能力再提供廉價勞動力, 即係大家要計劃分手囉!

現在發生的一切, 好簡單咖咋, 睇下邊個需要對方多D, 邊個就要去踒低, 應承短期的妥協囉! 

雙方都係度試緊, 如果無左對方, 會否死人先? 如果無乜影響, 就再試下一樣, 試多一排之後, 就會清楚洒, 或補救好果D要補救的地方. 

所以, 我JJ仍然維持我上年的想法, 中美現在唔係爭霸, 唔係鬥而不破, 而係各自試緊無左對方時, 是否可以繼續生存到, 攪緊離婚手續呀!

PS: 老美加左中國10%後, D經濟數據都仲係好靚仔喎, 咁, 我JJ唔多知道了, 不過, 我好懷疑長期能否都好似咁囉! 不過, 大家要記住一件好重要的事, 集大大作決定, 經貿民生, 未必係佢首要去思考的範疇呀, 治政/權力/集權/黨的未來, 才是佢首要的考量.

至於當奴友, 雖然係商人出身, 但到最後拍板, 佢都係身不由已咖, 咪以為佢可以自把自為. 

集大大/當奴友自話自說係好朋友, 有特殊關係和情誼, 但全都係攞來吹, 以安定人心, 整個假象出來, 矇混世人的神經, 使其麻木和瘋狂, 直到中美公開灘牌!

潮水去匆匆..... 人事全非

冬天時, 就算結冰, 水位都係係十幾呎之下, 現在浸到D椅呀.

呵呵呵, 真係唔好意思了, 仙人現在係水中, 同緊水龍王開緊四圈呀!

各位, 估下水面上一條條係D乜?

就係長椅椅背的金屬架.

原本垃圾筒旁, 竟然綁住一部差人巡邏艇.

原本路牌和告示牌, 浸在水中.

河邊公園變澤國.

堆沙包做水霸, 頂住D水, 唔知道雀屋裡仲有無雀仔係度?

原本河邊的水位呎, 家陣就快浸洒佢了.

雖然有沙包做水霸, 頂住D水, 但D水都可以由泥裡湛透入內, 就要隔一陣, 開水泵抽番D水落河裡.

這些是果D我裝填的沙包, 還未派用場, 放係度, 任D居民自己攞來用.

再講唐人街D地產投資項目!

昨天講完西人商場幾咁慘淡, 今天再講我這邊唐人街唯一的大型商場..... 

當初, 這商場係拆左2-3座舊屋而建成的, 其中有間老舖, 幾十年前由爺孫經營, 爺爺年紀太大,  孫又只有10歲, 伙計是同鄉兄弟, 只是同鄉都係假, 就逼果個年邁老闆, 來讓他們入股, 之後到個爺輩往生後, 伙計聯合起來, 要個孫老闆賣舖. 

舖轉手後, 還未起到商場, 個孫因生繼不繼, 就自殺了.

當然, 很多人會說, 賣了舖後, 把他拆來起大商場, 對大家都有利. 

只是, 起完後的商場, 也不見得大發特發, 地庫有中超市, 但生意一直不好, 轉手了2次, 現在由一個家族內的人, 親戚一同來艱苦經營下去, 不知道能撐多久? 

地面舖位, 現在空了一半, 只有3-4 個舖仍在支撐著, 賣D野被人投訴發霉, 不知道還能撐多久? 入口大堂, 已經出現破地洞而沒有修了.

樓上的商場, 一開始做生意時, 賣D野, 真係好似十幾年前國內二三線城市裡D野咁, 但當時都只開到半層囉, 但現在連1樓都吉剩番1-2間舖開著. 

2-3樓一直吉住左, 4樓做酒樓, 但又係生意唔好. 5樓做旅行社, 不過, 上年破左產後重組, 現在用過第二個名個囉.

一睇佢地大堂地下一個個地洞, 就知道全個商場項目, 係蝕緊錢, 仲係入緊肉果隻. 

PS: 早知今天, D人當初就不要心裡存心不好了, 逼令原老闆賣舖了.

PS: 其實無野的, 好似我JJ這些可以消費的人, 又因為年紀大, 無子女, 唔多出外洗錢. 再加上, 我係唐人街食完後, 都覺得身體唔係好舒服. 在這情況下, 投資係唐人環境中, 怎會有錢賺? 再加上新移民來的同胞, 消費力又比我地港燦差一截呀.

我這裡的商舖租賃市場有幾差?

咁大個OUTLET MALL, 竟然得番4檔野仍然開緊門做生意, 不過, 其中2檔唔係賣野,  一檔係兒童樂園跳彈床, 一檔係玩打槍, 即係只得番原本2檔野仲係度賣野, 仲做生意呀!

唉, 近住有商舖的泊位, 才有幾架車泊係門口, 再行遠少少,  就無車又空空如也.

所以, 大家咪用香港的地產市道, 來睇加記, 尤其係法語的魁北克. 

如果大家有去過英國和法國, 大家都知道有幾大分別. 而係加記, 加記英語地區同法語地區的經濟, 當中差距都係一樣呀! 很多人係多倫多已經覺得難捱了, 不過, 如果佢地來到魁北克, 相信更難捱了.

始終, 我JJ都係要承認, 我JJ係一個行運行到由頭到腳趾尾的人, 係這個嚴重鳥不生蛋的魁北克, 我生活得都算OK囉.

羚羊毛衫

羚羊毛 ALPACA 呀, 係呀, 無錯呀, 真係呀! 仲係BB毛來咖!

哈哈哈, 各位, 全香港D貴太, 都話要佢地老公買條ALPACA 頸巾/披肩呀, 係香港買, 成幾皮野呀.

我JJ又搵到好野啊....... 係件羚羊毛衫呀, 仲係男裝(就係因為男裝, 才賣唔去, 要減價求我JJ買左佢), 不過, 以羊毛的份量, 一定係少過D 披肩啦, 不過, 工序多好多呀! 

當然, 係大減價後我JJ先至買啦, 個價..... 好似係.... 18皮加仔呀!

一舖養三代, 可圈可點!

我父親移民來加記時, 用了香港地產的角度去投資..... 只是不同的水土, 就要用不同的投資方法.

有次我真係直接帶我父親, 經過一個因為主要工業搬出後的破落市鎮(RUSTING TOWN). 

那個在美國賓夕凡尼亞州的破落鎮, 相比現在東莞很多外企遷出後的鎮, 還好很多, SHOPPING MALL 還有超市, 只是其他店舖全關門了, 商場內公眾通道一個二個地坑吧!

現在東莞很多小鎮, 因為台企或外企遷出後, 都變成空空無人, 往日服務工廠內的幾萬員工或外企人員的商業區, 都變得蕭條. 在當地, 往日有幢房間開, 分租給民工和外企中低員工, 再開個餐餐, 再開間店賣衣賣零食雜貨, 一家可以說是坐擁百萬家業. 只是外企員工和民工一下消失, 他們的消費也消失, 百萬家業和月入數萬的收入, 也一同煙消雲散了.

所以, 一舖養三代這個想法, 可圈可點呀! 地產一向都是講.... 地點.... 地點..... 地點..... 任何地方, 其用途改變了, 其價值都不會再一樣了. 

我活得自在, 全因為家人個個都做好自己本份!

昨天我講, 我D侄仔侄女個個都話唔要我D錢, 其實佢地真係好乖咖, 好有我心的, 唔想我做任何事時, 都被其他事來拖住.

佢地由細細個開始, 就叫我唔洗留錢俾佢地, 言下之意, 就係叫我..... 當我經濟許可時, 就自己去決定退休, 不用以他們為念.

但我一睇現在年青人D就業出路, 比我以前畢業時還差, 我就覺得唔可以唔睇睇佢地.

可能係..... 我家族裡D人, 真係得到上天眷佑, 心裡善良無惡念, 我畢業時的加記就業環境咁困難, 我現在都OK, 連我D侄仔侄女畢業出來後, 一切都OK, 咁我就可以放心去退休了.

我有個侄仔, 將會去供讀博士, 可能係繼承左我哥的那種攪研究的天賦, 好啦, 我只係擔心佢一個囉, 因為他的前路最不容易呀. 

PS: 回看我以前那華人教會裡D人, 大部份人都仍在怨天尤人, 整天在指責別人. 其實, 這些人係阻住別人, 來信耶穌的. 相比我家族裡的人, 我地大部份人都做好自己正事實事, 只是一看到這等教會人仕, 我真係擔心我親人會唔想去教會呀!

做投資決定, 要睇自己處境, 唔好估大市走向.

前幾天睇網友篇文, 話之前人人都估錯大市會爆煲, 仲話大市會點升點升.

其實, 我一直在想, 個市唔會點大升, 就係..... 可能係大跌的訊號.... 因為如果預期大升, 點跌都唔會大跌, 只會作頂多10%的調整囉. 

現在一個二個估會升5-10%, 即係好微的對上調整囉! 咁, 即係D人唔會估大升囉, 咁, 大跌的風險仍然陰魂不散呀!

對於我自己來說, 我反而好後悔, 唔早D賣左我D投資物業和較高風險的股票.

因為到現在, 才發現一事, 我過去的5-10年來賺D錢, 原來..... 好有可能.... 唔會係我自己去洗囉!

咁, 我這5-10年唔係白做?! 即係我本應早5-10年就應該退休了.

早知係咁, 我一早唔撈啦! 當時趁後生, 一年365日都去玩.  我還撈緊時, 一年只得一個月去玩, 太無癮了.

所以, 作出投資的決定時, 記緊一定唔可以估大市走向, 只可以睇住自己的人生前路, 做出相應的投資決定. 

原本, 我還諗住我將D錢, 將來百年後, 俾我D侄仔侄女, 點知道佢地一個二個都話唔要我D錢, 佢地個個都搵到. 咁, 我真係好失落, 原來我係白做左好多年了.

在我們的手機世界裡....

係咖人要衣妝, 佛要金裝啊, 手機呢嗄? 當然就係要個殼囉! 唔好講係埃PHONE, 華胃, 三宋, L雞, 每個手機都要裝裝身咖.

其實, 我JJ從來無諗過整個靚靚手機殼, 但求保護到個手機就算了.

睇睇我這裡D人擺D乜野手機殼來賣?

係咪D TASTE好浮誇呢?

有櫻花喎, 不過, 唔係粉紅呀, 而係淡白襯翠綠框!

還有這個假寶玉

 

我這裡冬天時的中國花園, 但係用手機影, 唔靚仔