世界貨幣會否..... 重回黃金本位?

黃金本位, 即是發鈔的數量, 要與黃金金價掛勾囉! 即係...... 如果一個國家的黃金儲存量是50萬安士, 而發鈔總量是5億, 即是金價用這國家貨幣一計, 就會係每安士一千元. 

咁, 如果有國家大量發行貨幣, 而沒有調高金價呢, 咁, 一有人用大量這個貨幣去換黃金時, 這國貨幣就會被衝擊, 就會被迫宣佈調高黃金價, 要多D錢才可以換到一安士黃金了.

嗱..... 美國係70年代, 已經講明唔可以再用美金來換黃金了, 改由..... 令全球用美元來交易石油, 當然, 美國那會有咁多石油, 來掛勾咁多印左出來的美金呢? 不過, 全世界的石油和糧食生產, 都掌握在美國手中, 所以, 人人要揸美金來買石油和糧食嘛!

即係呢, 黃金本位一早已經被時代所淘汰了, 因為咁少黃金, 點可以 BACKUP 一個咁大咁多貿易咁多人口咁多交收的世界呢?

如果有天再用黃金本位來 BACKUP 貨幣和環球貿易, 環球貿易那時必定縮水縮到七零八落了. 哈哈哈, 所以, 各位, 黃金本位已經成為歷史書的名字, 不會再拿出來再用了. 

PS: 還有, 黃金這10年升到阿媽都唔認得, 主要因為世界大印銀紙, D錢去唔到實體經濟裡, 就去買金囉, 所以, 現在黃金再不是資源商品, 而是消費商品. 嗄.....  唔信呀? 大家記番起幾年前的中國大媽來香港買金的情況, 黃金一早已經係面子/人面/場面上的高級消費品了. 呵呵呵......

有主見之後, 就是執行能力.

上篇野講漏左, 我叫人, 埋堆都唔緊要, 但要有主見, 別人個個都叫自己跟佢, 聽佢, 就一定要自己諗下先, 而且, 唔好有依賴的心態, 很多人利用人們依賴, 來利用別人, 來推趕別人做這樣果樣.

不過, 有主見而沒有行動, 是沒有用的. 一定要有行動, 可能每個人年青時, 行動是比較粗心大意少少, 不緊要啦, 慢慢做, 做得幾次就會完善. 我後生時買股票, 一想起就去買, 買多幾次後, 就會睇耐D, 但不會忘記, 不會放棄, 不會轉軚, 咁就會, 越買股票越識買. 

咁..... 有時處身的環境也是十分重要的, 例如: 每個男性後生時, 都要追個女朋友回來, 這樣, 人類才可以生存下去, 又或基督教教會中的信徒才可以一代一代承傳下去嘛! 只是, 如果身處的境環裡, D人攪串哂, 做壞規舉, 把明明是好事的事, 硬要說成壞事, 那麼, 就要轉轉環境佢.  我唔去那唐人教會, 立刻找到女朋友了, 當然, 我是那些不用去教會扮屬靈才追到女友的人. 

回想, 我是十分後悔, 在那唐人教會屈死自己咁耐, 咁大個人唯一的女友, 果次跟佢分手後, 我才發現, 原來, 我獨自一個人行人生路咁多年, 樣樣都上左軌道, 再沒有能力改變自己, 去遷就到女朋友的不同生活方式. 我想, 我廿幾歲時, 樣樣都未上軌道, 人生樣樣都可以是變數, 去遷就女友, 一定比現在容易好多.

所以, 有主見, 有執行能力, 轉到去一個對自己有利的環境, 是十分重要的. 

收水縮表的日子來臨了, 世道會變得更不容易, 實在會有更多人走出來老點別人, 想去利用別人, 謀取一己私利, 現在這時勢裡, 一定要有主見, 有執行能力, 身處有利自己的環境, 才是一個王道.

PS: 我有個朋友, 就係那位廿幾年前, 炒外匯損手10萬美元的那位, 多年後, 他仍然想著從FOREX中賺回損手的錢, 仍然想著OPTION 槓桿. 其實, 我都有勸佢去從錯誤中修正方向, 他常常都說我沒膽. 

大約2年前, 他跟我說去買金來買保險, 可惜到現在, 他仍然沒有做, 而我在半年前金價1350時, 已經決定去買金, 我不斷耐心地去睇去了解, 直到一個月前左右, 才慢慢來買入現貨金. 

唉..... 這朋友十分可惜的, 可能是他處身的環境吧, 他常常喜歡去某教會, 吃中午飯, 貪些小便宜, 喜歡眼前的小利, 喜歡埋堆, 羊群心態.

埋堆的人, 日子從來不會太好過, 點解?

係我這裡加記的唐人(講廣東話)社區裡頭, 人們因為生在異國, 就比較喜歡埋堆, 以前台山人有好多同鄉會和堂口, 其實都無乜野的, 這些人聚下打下麻雀仔, 不過, 有時生活實在太悶了, 就走埋一齊賭錢, 食煙, 飲酒, 聽人講, 有時更齊齊去風月場所.

後來, 開左幾間廣東話教會, 都好的, 最少活動性質會健康好多. 當中很多人一邊參加教會, 一邊也希望別人來幫幫忙.

其實. 大家中國人又係講廣東話的唐人, 如果在路上遇上有人需要幫忙, 我一定會義不容辭. 我自己跟本就不會理會對方是否去教會. 

我最反感的, 把"幫人"寫入教會教條裡, 甚至有些人入來教會存心混吉, 指意別人財和力, 來成就他們一己私利, 尤其, 當教會大部份人心裡都是想著埋堆, 越令那些一心入教會慕道的真信徒, 其日子越困難了. 

不過, 沒有問題的, 一心信神的人, 心裡有主見, 做事一定會有個方向, 心裡一定有個底, 不會好似埋堆的羊群咁, 這兩種人的人生結果, 係好容易分得出來的. 

就睇股市裡, 埋堆羊群和有主見走自己路的人, 一個風浪打埋來, 羊群個個損手壞腳, 叫天叫地...... 有主見的人, 走自己路, 每一個風浪過後, 越來越有信心, 越來越知道怎樣駕馭風險和人生.

我信神, 又去投資, 自己走自己路, 心裡有神, 內心力量強大, 底氣十足. 我現在能夠咁早退休, 不是我工作出色, 也不是我投資回報過人, 我一生人都是自己慢慢一步步咁行出來. 

當然, 路上遇到不少貴人來相助. 貴人的意思, 不是俾錢我, 俾份工我, 俾股票我, 俾個女友給我(如果咁樣, 這些不是貴人, 而是另一個埋堆的羊群); 而是, 這些貴人擴闊我的視野, 校正我的人生價值, 改變我人生的方位和格局. 

好了, 講到這裡, 一定有很多教會人仕走出來邀功, 不過, 讓我提醒一事, 如果這些人自己入教會一心想著埋堆, 對不起, 這些人對我發揮不了作用, 都只會令我係教會裡邊, 越是受到不公平的對待和批評, 對我人生從來都沒有益處. 

事實上, 我離開了那間唐人教會後, 去不同本地人教會打遊擊, 這麼多年來, 是我人生發展得最快, 最順暢, 最搵錢, 最少受氣, 最唔需要去諸多解釋自己, 別人對我最少誤會和閒言閒語. 

埋堆羊群, 在人群裡盲目跟從著, 在茫茫然人生裡浮沉著, 這個才是最悲慘的人生, 所以, 信神唔好信錯; 所以做牧師D人, 咪做錯, 如果一心想用埋堆羊群, 來壓一心慕道信神的真信徒, 其後果結, 只會是劣幣驅逐良幣, 最後就一定要搬出其他老牧師的名字出來撐場了. 

PS: 好簡單咖咋, 一間自稱是唐人教會的教會, 內裡沒有人肯去學中文輸入法, 個個都假稱"入鄉隨俗"來推卸, 但叫這些人用英文法文, 就更無人做野, 就知道這些人是埋堆性質的會友, 這些人的人生進境, 當然比一心慕道的人, 相差離天萬丈遠了. 

我自己, 曾經有2年時間, 每天一小時坐在電腦前, 慢慢熟習某中文輸入法, 一切都不是突然而來, 都是慢慢一步步咁走, 正如我這般早退休, 也是以前後生時, 一步步咁走. 

當然, 汗水淚水背後, 對我來說, 必定是神的看顧和祝福吧! 大把人, 比我叻, 比我勤力, 比我家庭培育更好, 我自己怎可以沾沾自喜? 看不起別人呢? 

我說以上這些一切,  算是一個警世良言, 無論去教會或不去教會, 參不參加任何團體, 投不投資股票金融產品, 一定要有自己主見, 一定要肯放時間下去, 一定要對自己真誠, 神蹟不是由外致內, 而是由內致外, 先改變自己對事對人的心態. 

不要自欺欺人, 這個只會是一切人生悲劇的開端, 不會見到最慘, 只會見到不斷的更慘.

乜野話? 當奴友, 你發燒SHORT 左呀?

前日, 當奴友果個競選經理, 被法庭告入左一項逃稅罪, 一項詐騙銀行罪, 都係同佢競選項目有關連.... 又有當奴友私人律師, 係法庭上認左8項罪, 包括違法選舉捐款喎.

昨日, 當奴友佢自己爆嚮口講, 如果佢被人正式彈劾, 個股市會大冧喎..... 因為只有佢先致可以令個市起喎! 無其他人攪得掂個市喎!

嘿, 佢係咪係度講緊, 老美個市一直都被權貴和有錢佬來左右大局呢嗄? 佢係咪係度暗示, 叫人快D拋貨著草走佬呢嗄? 

唔怕, 我JJ一早已經甩貨甩到咁上下, 真係希望當奴友你被彈劾成功, 大市冧番咁上下, 資金抽緊, 到時我又可以買多少少平貨金仔.

PS: 點解當奴友現在驚到鼻哥隆都無肉, 鬼拍後尾寢, 講錯說話, 全因為佢現在用緊總統行政權, 去委派佢D親信擔位要職, 去阻住班友去查佢以前D..... 地產生意, 通俄門, 競選舞弊, 班友現在只係搵緊任何一個突破點, 只需要係單一一件事情上, 彈劾到佢之後, 佢一唔能夠運用佢D總統行政權之後, 佢就無左佢D親信來阻住班友去查佢, 就一齊俾人多罪俱告, 連佢70-80年代D地產舊帳, 都會俾人攞埋出來告佢.

睇落, 佢可能會步突區某突手後塵, 成為老美第一個鎯鐺入獄的總統.

與其猜想中國經濟幾時崩潰, 不如猜......

其實, 講句老實話, 上次中國經濟臨近崩潰時, 是上世紀70年代未, 離開日本侵華戰爭完結卅幾年(把中國打了個稀巴爛的日本軍國主義, 最令人仇恨不共戴天), 離開國共內戰又近卅年(又係打到中國爛溶溶), 離開韓戰後美國對中國全面禁運廿幾年(這次美國估不到沒有了中國巨大市場的世界經濟, 要佢自己一個人獨舞, 原來係少左人在佢經濟衰退時帶動經濟), 離開三年飢荒和文革10年浩劫十幾年(俾著任何一個國家, 一早已經大Q鑊了)...... 

大家可想而知, 中國一個咁大體積的國家, 係幾咁難, 幾咁耐, 才走到經濟崩潰的地步. 

對於美國來說, 中國封國閉關不跟美國做貿易, 其損害跟美國同任何一個國家打一次地區性衝突, 唔會差得好遠. 上次美國反恐, 打伊拉克阿富汗, 用左幾多錢? 用左差唔多美國克林頓政府時美企帶回國的錢, 再加之後佢地地產和金融市場泡沫, 到2008年金融海嘯, 之後, 美國要求歐盟和中國咖仔齊齊大印銀紙來填氹.

其實, 作為華人, 我真係唔想見到中國同美國反枱, 之後就閉關唔再理會美國佬, 這個對世界上任何一個人都無好處, 點解?

當美國用關稅來築起貿易圍牆,  當中國唔再理會美國佬, 自己做自己事之後...... 最先經濟崩潰的, 是一些中小型國家的經濟, 如.... 先前的土耳其, 之後會可能有, 阿根庭, 巴西, 智利, 墨西哥, 南非, 埃及, 尼日利亞, 印度, 巴勒斯坦, 之後, 就到接近中國的菲律賓, 印尼, 馬來西亞, 越南, 泰國, 緬甸, 澳洲.

再講件驚人事件俾大家知道, 當以上這些事情發生時, 會夾雜著不斷有不同國家在脫歐, 直到一個地步, 歐元和歐盟崩潰, 之後, 再產生, 歐洲國家再築起璧壘, 再發生地區性磨擦.

如果以上事情發生時, 世界將會是一個不再一樣的世界了, 不一樣到一個什麼地步? 例如....... 子女想買條新褲, 或家裡想換過部新家電, 都已經不再是輕而易舉的事, 可能講緊係家庭裡一個相當大比重的開支了.

搭經濟順風車真係咁重要?

我JJ可以斬釘截鐵同大家講, 就係咁重要囉.

有網友好奇來問我, 我JJ咁早就可以退休?

係咖, 大把人叻過我, 又勤力過我, 又父母輩積落底子好過我, 我係乎碌撞棍一個呀, 靠住順勢而為, 之唔係....... 道家裡的御風而行的哲學囉, 千祈咪去逆天而為呀, 用人自己的主觀意願, 去妄加在天地萬物的定理之中.

再其次, 必然係我死夠運(換句基督教裡的用語, 就係有上帝看顧住我囉).

大家可能會問我JJ, 來緊這些年的經濟順風車又係D乜? 只有個4字, 收水縮表..... 呵呵呵, 任何人在這未來幾年裡唔好跌錢, 其資產淨值唔好收縮, 咁就算係贏了, 因為在這幾年裡, 一切資產價格走勢, 沒有最低, 只有更低. 

直到幾時? 噢...... 這個易答囉, 直到好似當奴友這種反貿易+反國際合作+以一已自私來踐踏其他人的人, 全部摺埋一邊, 給人用最惡毒的咒語來詛咒得永不翻身, 之後, 才會是你我再出來執錢的大好時機.

係咖, 這幾年內, 除左唔好跌錢之外, 仲要保持健康和精神, 哈哈哈, 如果唔係, 到時點走出來再過執錢呀?

PS: 其實, 大多D教會女教友呢, 都係喜歡一個言出必行, 言行一致的男友, 不過, 我JJ不是不能言行一致, 而是我跟本到今天, 我都唔知點去講出, 我將要去做的事情, 甚至我不知道應該點講我的理念, 有可能, 由一開始, 我心裡想D野, 係複雜左少少, 比較難用三言兩語說得清楚. 

我D阿哥一向都講: "JJ 如果你唔係咁諗野,  成日都話順勢, 你可能學術上有很大成就." 噢, 算啦, 我咁鬼懶惰, 你地班大佬都係咪攪我了, 好似你地咁, 每日工作十幾粒鐘, 我JJ身子無你地咁好, 需要多多休養, 才不會乾水到好似個老人精咁樣. 

我JJ跟大部份人唔同的地方, 我係一個好有自知之明的人, 所以一切順勢而為,  不會不正常的盼望, 不會逆天而行, 更不會隻手補青天.

現在才來移民加記, 小心要同人咩債呀!

我JJ以前一向都無反對人家移民來加記...... 其實, 我就係最近這1年才叫人唔好來加記, 之前, 我都仲係好中性, 十年之前, 我那時在財經版常常都叫人移民來加記, 因為資源多之外, 又有自由貿易, 大把人來買加國的資源, 那時, 活在加國, 實在不愁兩餐.

只是大約係十年前開始, 加國經濟唔係唔好,  已係貧富越來越不均, 人們好似我JJ這些人, 當然不會差, 但換轉很多以前的老華僑來移民做餐館咁, 就一定無運行不特只, 下一代仲會不容易向1上爬, 因為稅好重嘛. 果時, 我都係好中性, 無刻意叫人唔好來, 或鼓勵人們來加記. 

但現在呢, 美加自由貿易凍過水之下, 全球貿易量又出現快速收縮, 如果我JJ現在才移民來, 我好肯定, 我一定唔會咁快就退到休, 仲係度同人齋嗡豬嗡, 呵呵呵..... 

當然, 我又唔係別人, 我JJ只是個小嘍囉, 無乜料到, 咁其實, 人家移民來, 在加記的發展一定比我JJ好啦. 不過呢, 人家在香港或國內, 相比現在加國, 一定發展得更好. 咁, 現在加國已經無順風車搭, 有本事的人, 根本就不用來加國. 再因為加國稅好重, 無必要來加國俾重稅, 將來退休時加國又未必有福利.

講真果句, 如果將來我JJ離開加國, 不是因為住唔慣, 而係如果加記稅率對我這種人加起上來, 我就會走人去第二度生活了. 又無順風車搭, 又要我咩埋佢地果條數. 我JJ一向都無攞佢地福利嘛, 我移民來時, 都無福利攞啦. 我起步時加國政府無扶我, 入藉後我又一直無需佢地扶, 現在我就不會有義務來咩起佢了.

PS: 這幾排, 我時時搭巴士地鐵週圍摃下, 差唔多日日都有幾個人來問我施舍零錢, 好多時, 係好後生的人, 一時之間無錢就走出來, 係公交上問人攞錢應急. 好啦, 遲到下年, 我諗仲多人問人要錢呀, 到時我再諗諗好唔好再搭巴士地鐵了, 因為大家搭係同一部地鐵巴士上, D人生活環境越差, 衛生狀況就更差.

我睇..... 投資金仔呢嗄!

哈哈...... 講句真話, 我JJ仍然等機會, 再入多D金仔, 用來對沖將來的貨幣和物價高漲的風險. 

其實係今年年初金價仲係1350美元時, 我都已經開始立定決心買金來壓倉, 我等左好耐, 十分有耐性, 因為我知道, 收水縮表下的息口會高, 美元會轉強, 一部份資金會由金市抽出, 金價就會向下.

我第一次入係1210個位左右, 現在只是初試牛刀, 因為息口再加時, 美元更短缺, D人就會由金市裡再走資出來..... 

我預計到左1130那個位再買, 不過可能同樣要等6-9個月, 之後, 睇情況啦, 如果加息後, 金價再向下, 咁可能會去到1060, 甚至1000這些位, 咁到時就再入囉!

咁, 大家可能會問, JJ 你買咁多金來做乜呀? 係咖, 我用來溝低個成本價佢丫嘛! 

如果真係到個價到1,000, 再買時, 全部的成本價就當然不會1210啦, 但係金仔一到資金不再由金市抽出時, 金價就會喘定再抽上, 到時金價回到1350-1400果D位, 實在係好平常咖咋!

如果金價返到1350-1400後, 我就減持金仔囉, 直減到我目標的那個數目呀!  這樣, 我不單可以減低我個成本價, 更可以賺一筆回袋裡.

PS: 當然, 這種策略性行動, 是十分需要耐性和紀律呀, 還要D錢係未來2-3年內, 唔急住用囉. 還記起朋友仔講..... 財不入急門呀.

實在太多人工呼吸了, 暫時未能宣佈牛市已死.

前幾日, 才醒起我D加國退休基金RRSP(好似香港強積金咁, 買投資基金, 但自願性質, 可以用來扣稅), 放係投資基金上, 雖然我已經係年初, 由最高級別第五級風險, 降到第二級, 但我仍然唔放心, 打電話去改到保本定息.

電話果邊D銀行投資顧問同我講, 定息低過通漲喎, 佢還想叫我升高一級風險, 但被我堅持要保本定息. 佢就來問我: "你做乜咁驚? " 我就答佢, 風頭火勢, D錢這幾年唔蒸發少左, 唔跌錢, 就係贏咖啦. 

聽個投資顧問氣定神閒咁係度講, 我這樣會被通漲浸蝕左我D錢, 不過, 我心裡卻想著, 我就唔信資產價值再會澎漲下去. 我最多係蝕零點2個百份點. 唔怕, 我做慣投資, 我唔怕蝕這些小數目.

之後, 我再打去投資行, 又係轉我D退休金 - TFSA(所有退休金以外, 又一種免稅退休戶口), 放左係小公司的基金上, 雖然都係有政府擔保, 不過, 我聽過香港投資行以前推雷曼迷債果D野, 我決定由小公司基金, 轉去大公司保本存款. 電話果邊個職員梗係唔想我轉, 聽佢口氣, 就知道間投資行收左間基金公司豐厚佣金. 都係..... 堅持之下, 才做得成.

所以, 大家決定了投資方向後, 就要堅持到底, 唔好俾人說說下而改變初衷. 

不過, 聽現在D人講得多後, 看來量寛10年令人對現在收水縮表麻木了, 人人都仲係度憧憬今後仍會有過去量寛10年的回報和市場上升軌, 這個是十分危險的, 不斷有人憧憬繼續升, 就不斷去托住個市, 好似地震海嘯咁, 一下就會崩潰落來, 那個衝擊力是十分恐怖的.

PS: 一睇今日升左咁多,  就知道又係當奴友係度上下其手, 做洒手腳. 邊個敢唔聽佢指, 係佢中期選舉前, 出來救市, 將來一定會無運行. 佢心狠手辣, 當然唔會有人想以後都要摺埋一邊無得撈啦.

貿戰裡的誤點.

在人人都談及貿易戰的時勢之下, 我JJ自覺要出來, 解解話, 好讓大家思考時, 心中有個底啊! 嗱, 大家咪話我長氣侵氣呀.

1. 在熊貓國現在是沒有太多底氣, 同老美開打貿易戰情形下, 有人會問, 為何集大大唔蹈光養晦? 係都要走出去同人爭? 現在攪到人家要來找晦氣. 

其實, 老美家陣加關稅, 如果熊貓國乜都唔做, 只會慢慢跌入老美包圍的圈套裡, 老美只會慢慢咁加上去, 跟現在熊貓國反擊, 最後結果係無分別, 唯一分別係, 老美當奴友現在有個借口來加, 不過, 借口這家野, 口在佢身上, 佢要講乜, 都好容易找到.

一切都都是老美處心積累, 打到埋來, 唔通唔應戰咩? 所以這次熊貓國是被迫走出來應戰的, 就算老美最後贏, 都要增加佢今次貿易戰的成本和風險, 等佢下一次唔敢好似今次咁輕易來撩事生非. 

2. 在貿易戰之下, 熊貓國高層裡頭, 不斷傳出不和同內訌, 其實, 這些只是外界的主觀假想. 

對老美發動貿易戰來個反擊, 令其貿易戰成本高昂和風險巨大, 這個必定是熊貓國高層內的共識, 只是當中一些做法和時間表, 一定不會人盡相同嘛! 

所以, 貿易戰後的世界大勢, 必定不會是蘇聯解體後的世界融合大格局, 將會是...... 各國自顧自的國家發展和經貿佈局, 不再是互動, 不再用加大產能來推低物價.

3. 2008年時, 熊貓國4萬億經濟振興方案, 配合老美QE大印銀紙, 現在有人說, 這個是一個很壞的政策, 讓中國今時今日的經濟出現問題. 其實有一點, 這些人不會想到, 如果沒有老美首肯, 再加上歐佬和咖仔一齊咁做, 熊貓國這樣單方面印銀紙, 一定會俾人來衝擊. 

就係因為老美俾熊貓國咁樣大印銀紙, 再加上原本熊貓國的豐厚儲蓄, 正是熊貓國快速發展的千戴難逢機會. 任何一個對國家有抱負的政治人, 都不會錯過這個為國家做正事實事的大好機會. 當然快速發展的背後, 就是刀山火海, 騎虎難下的政治艱題和生態了. 全都是那一個"我為天下人, 拋頭顱洒熱血"的豪傑情懷. 也是那句: "江山如此多嬌, 引得英雄也折腰."

4. 最後, 講回去老美, 老美決策者一向都不用"發動貿易戰"來形容是次的一切, 他們口裡, 大多喊著...... 爭取應得的公平和無璧疊的自由貿易, 所以, 他們用關稅來做開啟門鎖, 之後的一切, 就可以用其他方法來打了, 可以無所不用其極了. 

所以, 如今貿戰只是頭盤菜, 還未到金融戰, 匯率戰, 貨幣戰, 資源戰, 消耗戰, 到最後可能的地區性衝突, 現在可能已經揀定, 係土耳其開始打起...... 

PS: 希望只係我JJ烏鴉咀, 我一定唔會講岩咖, 世界太平無事. 好吧, 就這樣去想吧, 可以今晚有覺好睏了.

當奴友的單邊美國優先下, 量寛是否成了絕唱?

一直以來, 都有人講, 量化寛鬆是日後經濟政策的主軸線, 就算現今停了量寛, 去槓桿去過剩產能, 日後仍要靠量寛來帶動新一波的經濟發展.

我JJ聽到時, 都係半信半疑咁啦, 但一見到當奴友家陣實行的單邊主義美國優先政策, 我JJ就開始想著, 美國還可以自攪自家的量寛, 但如果要攪番好似2008年時的.... 由美國, 中國, 歐盟,日本齊齊同事量寛, 就可能是絕唱了.

就看看現在美國收水縮表的情況下, 環球貿易量還未能一時三刻跟得上去收縮, 就出現美元短缺的情況了. 即係, 現在老美自己急尿急屎, 唔理其他人未夠時間除褲踎低, 佢就已經舒服哂了, 留下一大灘蘇州屎了, 其他人要聞佢D..... 哈哈哈.....

係咖, 2008年時, 個個國家都有傾有講, 同一時間一齊去做同一的量寛, 只係咖仔遲左DD. 當時, 各國都唔洗驚對方會出古惑, 過自己一幢啦. 相反現在, 美國當奴友單邊主義美國優先下, 成日都有人覺得, 俾別人過左唔只一幢. 

其實, 老美2008年時量寛, 如意算盤...... 係其他國家一齊量寛來買佢地過剩產能, 點知其他國家加大印銀紙後, 有意無意之間變成了..... 其他國家也加大產能, 令到老美產能過剩, 唔單只得不到解決, 而且, 老美產能過剩越來越厲害呀.

嗱, 就咁樣, 現在情況係..... 下次老美再敢量寛去解決產能過剩時, 不單不能指望其他國家會來買佢地D過剩產能, 其他國家都會跟住量寛,  來擴大產能, 跟美國爭天下第一嘛!

所以, 老美如果下次真有量寛, 都唔會好似2008-2012年果個量寛咁大咁廣泛, 而且仲要係皮杷半遮面咁去做, 慌死人知道咁...... 現在我JJ最希望的, 係世界唔會回到80年代末時的全球情況, 滯漲驚人. 不過, 都要做好準備, 因為世事絕有可能變得逆境逼人.

PS: 老美象黨和驢仔黨呢, 現在的外交政策是有左共識的, 不過, 這個並不代表他們兩黨的執行方法係一樣, 象黨由阻住殊頭開始, 都係一直以美國優先來做招來, 而驢仔黨大多都是給人一個全球互動的型象. 現今當奴友攪到咁串之下, 日後就算驢仔黨當選, 其全球互動理念將來受到很大的質疑和不信任了. 一切量寛都不會好似以前咁有效了, 世界經濟若想再好似2008-2017年咁, 可能在我們這輩人有生之年, 都不會見到.

人生的陷阱

最近台灣有人做民調, 叫人用單字來形容2017年, 結果...... 八大字上榜: 茫, 勞, 憂, 亂, 虛, 盪, 滯, 厭...... 

嗄! 乜話, 2017年喎? 已經係唔錯的一年了, 乜台灣人們都仲係睇得咁負面...... 

如果2018年真是有金融風暴來臨, 我JJ真係好奇, 想知道佢地到左下年, 會用D乜字來形容2019年了.

大家可能會問我JJ, 你那邊滿地可D人又點呀? 咁, 法裔人仕囉, 睇野樂觀D, 正面D囉. 嗱, 這裡有20-30%的人, 生活在貧窮線之下, 即是得不到全面的溫飽咖, 可能我這邊溫飽水平比香港高一點, 不過始終都係貧富相比之下的差距. 但我這邊有50% 以上的人, 幸福指數達到世界高位, 即是我這裡是個充滿幸福感覺的地方囉.

不過, 這裡西人幸福指數高, 並不代表唐人會樂觀一點, 相反, 我發現, 我這裡的唐人, 不會比港台人們更樂觀, 尤其是唐人第二代, 就算他們在這邊出生長大啊!

我去左唐人教會咁多年, 就以我最頂佢地唔順的2001-2002年為例, 經濟不差呀, 人人都有份工, 搵到啖食咖, 不過, 以上這八個大字 - "茫, 勞, 憂, 亂, 虛, 盪, 滯, 厭", 正好十分適合地形容佢地D心思. 

其實, 別人諗野負面, 也跟不關我事, 但這些人一見我JJ笑口常開, 就同我好唔妥咁, 好似我欠左佢地十萬8千七咁. 我明白, 教會有好多人係靠人幫, 包括埋這些人自己, 人們幫了這些人, 這些人卻生怕人家要求佢地回報, 所以就係我面前多多聲氣, 驚死我會有天開口咁.

最慘就是, 這些人唔知道佢地諗野負面, 正好阻礙佢地人生的境界, 反而以為佢地負面得來, 係人人都應該咁諗野,  但又唔知道佢地自己已經攞哂著數, 更說我JJ這個不是, 那個不好. 

好啦, 其實我行開一D, 我自己都無講佢地任何不是, 只是我唔理佢地, 就有更多的指責了. 

我JJ十分明白, 這些人有個人生大陷阱, 我幫唔到佢地了, 就算這些人話佢地自己係基督徒, 都脫唔到胎, 換唔到骨. 

金融風暴如果今年到來, 我JJ十分有興趣想去知道這些教會人仕怎樣去面對, 是否仍舊愁眉苦臉? 一肚愁腸來互相責難? 繼而來個教會內訌分裂? 還是, 越發有信心? 最少都要好似我JJ咁, 笑口常開吖..... 係嘛?

最近網上見到一位以前的教會人仕, 2002年那時, 正好用那8大字來形容佢, "茫, 勞, 憂, 亂, 虛, 盪, 滯, 厭", 過了這10年的全球放水印銀紙, 加國政府大洒公帑來支持他工作的企業, 佢現在打出來的頭衍是 SENIOR ANALYST, 其實, 我也為到他開心的, 只是當加國政府赤字加債台高築, 息口高企時, 這位教會人仕將會最受影響, 希望他的想法一早已經不再像以前般的"茫, 勞, 憂, 亂, 虛, 盪, 滯, 厭"了, 咁樣, 他才可以自救, 才可以安然渡過可能發生的困境.

我JJ講左咁耐, 大家明唔明我講乜呀? 實在想同大家講, 今年明年就算點差都好, 都要樂觀D,  可能一切機會都在逆境背後呢.

移民加記, 真要想清楚, 加記已經唔係幾十年前的加記了.

昨天揸緊車, 聽電台節目, 主播問D人會否不再跟父母同住, 搬去別一個城市生活.

就有人打上去講, 佢準備搬去多倫多, 點知個主播問個聽眾, 是否準備了一天工作18小時來應付多倫多高昂的生活費?

噢...... 講到這裡, 乜話? 一天工作18小時? 這個不是新奴隸世代嗎? 天然資源優厚的國家如加拿大, 現在竟然變成"艱難大"的國度嗎?

YOP........ 我就走去計計數啦, 數口咁精細的人如我JJ呢, 就得出..... 個主播係指, 如果要係多倫多想在應付生活費之外, 再加上儲錢俾首期買樓, 再加日後俾錢供樓, 以現在多倫多樓價, 一個手作仔, 就要一天工作18小時. 

大家可以思考如果大家移民來加記, 又想係最多唐人的多倫多落腳生活, 就要考慮一下, 加國本土長大的人, 在現時多倫多生活指數下, 就係咁樣去爭扎買樓, 以祈有個安身之所. 

幾廿年前, D老華僑過來加記, 開餐館或做餐館, 那年代雖然留係餐館時段長, 10點開始, 留到晚上9點打垟, 但中間下午2點到5點, 基本上都係可以休息, 實質都係做8粒鐘咁上下. 

就算係小鎮開咖啡店, 都係早上6點開來賣咖啡甜餅, 去到9點, 等班FARM 佬去左開田, 就無乜野做到11點多D, 再開午市賣雜碎炒飯同MEAT BALL, 到左2點又透透佢, 再到5點又係賣雜碎炒飯同雞脾, 再加啤酒D小酒水. 鎮仔細埠D西人早睡早起, 差唔多7點多D, 就返歸了, 8點可以打垟, 臨睏前煲煲電視帶佢, 就好開心咁去睏覺覺豬了. 連揸車上落班都唔洗, 因為係前舖後居.

以上D老華僑咁樣, 就已經可以有錢買屋供子女讀完大學, 到搵夠錢, 就賣盤賣俾下手老華僑來接手, 搬去大埠度買屋退休生活了. 

不過, 我八幾年時來到加記果陣, 就已經有唐人社工叫人唔好做餐館, 實在太多人做唔掂, 蝕錢執笠去搵社工來幫忙. 

到今時今日咁樣的時勢, 土生土長西人係多倫多都要做18小時, 才有能力置業安身, 更不要說沒有語言優勢的中國人了...... 

由現在開始, 加國又再無左同美國的自由貿易, 又或個條款會改到對加國不十分有利, 可以想像係加記搵食, 將會變得更困難.

我不是嚇大家, 加記現在有很多人已經係白忙族, 可能講緊25%左右,  我估在將來, 會增加到50-60%左右. 對很多由外移民來的人, 這種社會狀況是十分不利的. 

PS: 係91年果陣, 我去多倫多食飯, 入去士嘉堡間餐館, 當時個生意環境差到, 投資移民的太子女, 都要行出來做侍應了. 當時我JJ點D餸平左D, 都被個太子女來白眼一番. 咁樣的環境之下, 一大柵香港人真係無乜好做了, 連消費都俾人白眼, 就不好去消費了, 由得個太子女和佢屋企人慢慢陰乾落去. 

當中有好多人, 未到97, 都已經要回流回港再搵過D銀了, 當然, 他們一遇就金融風暴. 

大約到左95-96年, 士嘉堡D餐館服務又好左好多, 那時, D人才認識到, 加拿大實際上是叫"艱難大"..... 哈哈哈.

貿戰因果背後, 是否..... 去槓桿=去產能=滯漲嗎?

近來, 我心裡一直在問, 金融市場上, 人們成日講"去槓桿", 相信這10年裡, "去槓桿"都是世界大趨勢的主軸, 但一到工業巨頭中間, 他們會否說, 這個根本就是"去產能"? 又或去到經濟學人中間, 他們會否說, 這個是不折不扣的"滯漲"?

問完這個問題之後, 又到我JJ出來講故了, 嗱, 我又係講中美貿戰前因後果啦..... 欲知今世果, 須知前世因啊, 呵呵呵......

老美以前90年代, 佢地打乜乜算盤呢? 當然係指意中國幫佢地應對人口老化所產生的問題, 初時容許中國賣野低廉貨品去美國, 壓低美國人的日常生活開支, 最後可以壓低美國通漲.

之後可能到98金融風暴後, 老美專心發展重工業的後果, 就係開始產能過剩, 佢就諗到中國可以幫佢吸收果D過剩重工業品, 就幫中國加入WTO, 咁..... 大家有眼見, 老美工業股自從果時開始, 升得唔錯, 當然無科技股咁升法啦.

初時, 中國真係做到, 幫美國吸收佢地D產能, 只是歐美加埋起來, 產能又過剩之餘, 而且越來越厲害, 到左2008年金融海嘯後, 中國都仲係度配合緊美國, 也加入大印銀紙的行列, 加大力度來買美國過剩的產能.

只是, 中國自己本土, 要求發展本土重工業的呼聲日益高漲, 而且, "紅乜代"不時想起, 以前中國大買蘇俄的烏克蘭大花布, 後來變成東北大花布了, 情況跟現在跟美國略有相似, 之後中蘇反目的後果, 令到他們不能安寢.

大約到左2010年開始, 中國開始大力發展自己的重工業和高科技產品, 2014年更開始加大出口, 跟歐美競爭市場份額, 產能過剩問題就越演越烈, 而美國本身不單沒能解決產能過剩,  美國本土工業產能過剩和就業, 根本沒有起色, 美國雖然繼續QE下去, 前後玩了3次, 都無補於事..... 2013年開始, 美國知道無止境的QE下去, 跟本解決不到工業產能過剩這個全球性問題.

所以, 就開始計劃縮水縮表之餘, 更向全球重工業持份國, 如歐洲和中國,  要求彼此協議減產, 當然, 我們見到的, 中國還好一點, 陽奉陰違, 但歐洲就從沒有聽佢地支笛.

之後....... 大家就見到現在的貿易戰了....

如果有人說, 歐美聯手經貿圍堵中國, 現在實情......, 只是老大老二壓老三, 壓完之後, 看看還要再壓多幾多, 歐美才會正面交烽的.

如何令到老大轉軚去壓老二, 這個才是現在老三的智慧所在, 蹈光養晦....... 不是不出去跟人爭, 而不是跟人爭第一, 最傻係....., 點解現在老三去找老二, 聯手壓老大? 除非老三一直誤以為自己係老二吧!

 嗱, 大家要睇清楚...... 現在世界出了衝突, 大家要去分清楚, 這個衝突本質, 是否可以妥協? 是否可以避免?

就算...... 一切都可以妥協和避免, 沒有1到2年, 曙光都不會出現. 

但...... 如果全都是不能妥協和避免, 那就無番最少10年8載, 都不會再回復返到新的平衡點. 大家如果好似我JJ咁, 係投資人來咖, 就要諗清楚何時才是重新入市良機. 大家如果想加入短炒大軍, 這10年裡, 都係風高浪急, 沒有最低, 只有更低, 當然會有人會說"時勢造英雄", 但我JJ大吉利事講句, 有可能係英雄塚呀.

大家應該要時不時來問問自己, 過了今年明年的狂潮, 未來10年, 世事的主軸線是否仍是......, 去槓桿..... , 去產能, 滯漲...... 嗎? 千禧世代中人裡, 可能在他們有生之年, 會看到我輩中人裡, 任何人都未曾見過的嚴重危機和紛亂.

當全球股票指數, 再不能反映實體經濟活動時......

嗱..... 大家, 這個就係現在的實況了, 唔好講話當奴友是否上台, 就算佢未上台前, 我JJ係2008年開始, 就不再相信 股票指數, 能夠反映實體經濟的活動了. 

老美兜兜指數由2008年量寛開始, 我就已經不再睇住指數來投資, 只會睇住股票公司的營利和未來業績. 

尤其在加息週期的關鍵時刻裡, 營利和未來業績走勢, 將會決定未來回報, 和自己個人的財務健康. 

我JJ一向叫人投資於他們自己的退休, 買左隻股票, 放埋一邊咪理佢, 有股息收股息, 無股息就睇住佢生意越做越大, 不要太短視, 只單看今天明天股價升跌. 

投資係舊磚頭都係一樣, 回報有幾多, 才是最終決定那舊磚頭到底值幾多錢. 當然, 單一單位的物業, 其價值十分容易睇, 但一到多單位的一幢物業, 管理是十分重要, 管理好, 維修成本低, 物業本身的價值就會高.

一切都是學問和技巧來咖, 總之, 人一天活在世上, 就要不斷適應新的社會環境. 不過, 慶幸的, 我年青人生起步時, 社會競爭少, 世情一切簡單好多, 容易起步, 今天的年青人就沒有我以前般的容易.

PS: 大家可能會問, 為何全球股票指數, 不能反映實體經濟活動?

其實, 量寬放水後, 很多錢並不是走入實體經濟裡, 來發展和壯大生產力, 而是走入金融衍生市場裡, 主要因為回報較高, 也因為人們習慣了金靡摩粉的紙醉金迷生活, 不像我JJ咁去看重實業, 看重社會之本源, 人之本, 人與人之間的本位. 衍生市場現在扭曲了整個市場和指數, 讓人沉醉於一片歌舞昇平之中, 而察看不到將要來的艱苦日子, 實在令人想起伊索寓言了, 食人的妖精, 總是讓人忘記一切危機的, 只管玩樂.

其實, 如果我照常理咁去結婚生子, 就不會可以這樣早退休了, 有時, 我真不知道, 我要多得以前那唐人教會那班混人, 還是要罵佢地好了. 不過, 又唔好對結婚生子太悲觀啦, 以我JJ的做人做事態度, 就算結婚生子, 都一定會有個十分舒適的退休生活. 

當然有些人拍拖時已經一身咭數, 結婚時更要向父母家人開刀,之後買屋又要作了父母一大筆, 到供養子女和去遊埠時, 又要當間屋係提款機, 這些人就算一生裡遇不到經濟衰退, 他們父母和夫妻和兒女, 生活都不會有好過的日子. 這點, 我可以筆定包單, 這種世事絕沒有例外.