2017年6月30日 星期五

指模對比 與 圖像辨識

昨天講完果班有國外國藉的表叔表嬸, 將會被大6剝奪去他們未報消的國內戶藉. 

今天講佢地今天大鑊的原因 - 指模對比, 其實就係圖像辨識囉! 

圖像辨識其實用左係好多不同的地方, 例如: 大6每個路口, 地鐵入口, 都有攝影機, 最初的只係用來找某特定車牌, 後來卻可以用來找特定樣貌的目標. 

原來這種圖像辨識科技, 是一位外國定居的唐山大兄帶回大6, 聽說這大兄現在仍被花旗政府全球通輯, 被控偷運高科技出美國喎. 

不過, 現在大6的技術, 已經比數年前引入時, 不可同日而喻了, 由單一目標, 變成同時數十個目標, 甚至數百目標, 真係好堅咖. 

大6現在有著全球最快的超級電腦, 而且無論是設計, 到應用技術, 可能真係唔輸俾花旗. 

PS: 一件已經是2年前發生的案件了,  有犯在重慶某車站旁, 假冒召換私車, 把個女仔騙走並姦殺, 當時公安只憑車站旁的攝錄機, 辨識到車牌號碼, 再對比各個路段經過車輛的車牌號碼, 就知道個女仔條屍大約埋左係那一個高速出口的地區, 之後, 再在千里外的雲南緬甸邊境, 捉到個犯, 並押回埋屍地區, 旁拷側擊來在荒野地方, 找到女仔條屍. 以前大陸用人眼去找, 現在有了圖像辨識, 連百萬個指摸都對比到, 真係好堅咖.

2017年6月28日 星期三

原來大6係咁封死雙重國藉

除左港澳人仕外, 大6係唔容許國內同胞有雙重國藉的. 

不過, 以前執行上有點難度, 因為就算打洒外國護照入境班友D指模, 都攪唔清入境果個乜水, 就係某省某市某縣某鎮某村那個乜水嘛.

但係...... 現在佢地一定用超級電腦來做對比指模了,  就可以係乜水入境時, 打左佢指模後, 係佢出境之前, 就把佢外國護照號碼, 同佢國內戶藉聯上, 令阿乜水出境時, 被認出係某省某市某縣某鎮某村果個乜水, 就可以禁止佢出中國國境了, 就可以要佢先取消國內戶藉, 才俾佢出境了. 

嗱..... 我JJ估大6係咁做的, 先把那長時間沒有活動的戶藉集中在一起, 因為這些人一係死左, 一係人間蒸發左, 一係去左外國, 再揀出那些有出境紀錄的, 那就可以由14億人檔案, 減到千幾萬或幾百萬, 再在這些人中, 先分開指模的不同特徵, 分成好幾十種, 之後, 就把入境外國人的指模, 跟這些在檔案的指模對比......

不過,每天咁多人出出入入, 就算用超級電腦, 都不定有全部對比到, 一定有漏網之魚. 

已經有人講笑, 大家約埋一齊係某年某月某日, 一湧而入境大6, 看看大6的超級電腦有幾堅. 

PS: 其實, 這種指模對比手法,  對那些現在仍然在國內, 離開國內時, 扮成鴆袜同胞, 用港澳通行證的人, 入到香港才用外國護照的人, 是沒有用的. 不過, 就嚴重限制了這些人每次停留在香港,大6和外國的時間, 對這些人十分不利.


家陣真係唔豬道香港會有乜反應.

嘩哈哈, 聽講大6過多幾日有新政, 就係...... 任何國內D人有左外國國藉後, 又如果唔坦白從寬呢嗄, 佢地回中國再離開中國時, 如果被查出, 就會抗拒從嚴, 就會被禁止離境, 直到這位仁兄仁姐回去佢鄉下的派出所, 取消佢地戶藉和國藉為止. 

家陣我這裡大6人都人心惶惶, 因為有好多人真係有外國國藉, 而無坦白報俾中國政府知道, 其實不是為到就業, 因為外國人係中國申請工簽是很容易, 每半年離開中國再入境, 咁就得. 最主要係這班人 係大6仲有樓有股票有公司有房產, 就要用戶藉登紀嘛.

不過, 佢地可以攞張港澳通行紙嘛, 每次來回外國移民國時, 經香港出入中國, 就用張通行紙往來香港同大6, 香港來回外國果程, 就用外國護照囉. 

只是唔可以同日進出香港嘛, 咁會好易穿煲, 所以要係香港留幾日, 扮到好似其他來港"鴆袜"的同胞咁, 咁就神不豬鬼不覺了, 每日咁多來鴆袜同胞, 邊有人得閒一個個咁查呀. 

所以, 香港班舖佬店佬和生意做就開心, 但係反鴆袜大亂盟班人就可能頭頂冒煙了.


2017年6月27日 星期二

為何某些人只能是泛泛之交呢?

最近認識了一位在我這裡滿地可的女網友, 因為她由中國領館裡, 拿到些免費門票, 類似國內春晚的一些民餘表演, 就來找我去一起看. 

之後, 我當然不會咁衰仔, 請了她兩次食飯, 當然不會讓人家不快或不滿, 客客氣氣的跟人談天說地. 

男性如我, 人到我這個年紀, 就不太想同人拍拖, 但我真不知道女性了. 當她一知道我是半個上海人半個香港人, 就開始點批和標籤這2種人. 

其實, 這2種人都十分要面, 要爭做中國人中的第一嘛, 可能係咁, 就攪到其他中國人對這2種人不滿了. 

通常女性對男性有這種批評態度, 而不是遠離, 只有2種可能性, 一是可能那男極度樣衰, 又偏要係女性身邊累累貢, 博大霧, 二是可能那女性對那男性有特別感覺吧! 

對我來說, 可能更像第二個可能吧! 其實一直由年青到現在, 我交友, 不太看重對方的外貌, 主要看看對方能否跟我相處得好, 能否不用太大動作就能理解我的想法, 並且不會來誤會我. 

可惜, 這女網友一埋檯, 就好像同我唔妥咁, 第一說香港人現實, 第二說上海人會計算, 我心想, 就憑她的德性, 我仍然同她食左2餐飯, 不斷回佢短訊, 好言相向, 就已經說明她心中實在充滿偏見和誤解. 

前幾天, 佢終於俾番個安慰獎我, 她說, 這裡滿地可的中國男性很多心思不好, 不是追尋著數就是一夜情, 我是她在這裡少有遇見的好男人. 

不過, 怎樣也好, 她一開始就點評香港人上海人, 做個朋友已經是極限了, 不能再逾越這個層面, 一逾越朋友層面, 當她接觸我家人和我親戚, 又係咁樣點批香港人上海人, 那就不好了.

2017年6月26日 星期一

廉價大陸團風, 吹遍北美華人圈子.

有個朋友前幾天打電話來, 話佢報左660元加仔包機票包食包玩包"鴆沒"的7天北京遊行團. 佢可能上年去完華東7天團未夠皮了, 今年回去再嘆過. 

其實, 以前我係香港報團上去, 我都唔知幾唔鐘意俾人帶去"鴆沒", 真金白銀俾足團費後, 都仲係唔買野就唔放出來去景點; 我都唔知道點解我這朋友咁喜歡去, 可能佢要求低, 有玩有食有人帶住, 佢就開心. 

這朋友來同我咁講, 當然想找我陪佢一齊去, 貪我會煲煲冬瓜識體中文字, 佢仲想完左團之後, 自己四圍走勻大江南北. 嘩, 這樣咁高難度的事情, 我真係攪唔掂咖喎, 就算我係美加自己一個人能夠揸車去玩上一個月, 我咁樣的應變能力, 都唔敢係國內自己走來走去. 

最後, 我提議佢, 係深圳自己一個人四圍走下, 那裡的地鐵和公交都很安全, 這朋友立刻唔講收線, 你話佢幾現實呢? 

講真呀, 現在大6 用現錢都都未必打到的呀, 地鐵巴士的公交全都用儲值咭咖喎, 而且很多時一處鄉村一處例. 

不過, 又係真的, 660元加仔玩7天仲包埋機票, 我落去美國南部暖D的任何城市, 張機票都要600 加仔, 去夏威夷就更貴, 每天租車入油住宿, 點慳都要百5美金一天. 但我覺得, 咁樣爽過跟團去大陸喎, 這樣的大陸廉價團, 實在令人十分不舒服. 只但係, 買難受囉, 浪費寶貴時間之餘, 又達不到增廣見聞的作用.

2017年6月25日 星期日

人在下跌軌道中.

前幾日, 網友小T公子問了一個十分好的問題, 怎樣才知道來租我屋的人在上升軌道呢? P嗱嗱嗱, 老實講, 咁容易睇, 就唔洗咁多女仔揀錯老公啦! 

哈哈哈, 不過呢, 就..... 睇一個人是否在下跌軌道裡, 這個就十分容易了. 

實在太容易了 - 入不乎支! 入不乎支! 

舉個例, 有人來租我屋, 聲稱一邊打工一邊讀書, 做BARTENDER每天7小時, 底薪千六一個月(小費唔穩定, 唔計), 但稅後得番千二左右, 租+電+入油+食物+學費就無洒了. 只是佢欠債2萬(車按和咭數), 每月最低還款$550, 即是佢每月小費一定要有$550. P如果無每月$550小費, 佢一係無錢俾租, 一係自行扎砲捱飢抵餓, 一係佢斷供欠債等債主燒佢帳薄, 一係佢除左BARTENDER之外, 佢有個不可告人的收入來源, 事但一樣, 佢都可以成為問題租客, 就一定係係下跌軌道了. 

其實呢, 這個概念呀, 同女仔揀老公十分相似, 明明知道個男仔如果唔改改佢做人的觀念和態度, 就一定會沉下去嘛, 個女仔就唔好跟住個男仔癲埋一堆了.

嗱嗱嗱, 我JJ唔係講, 如果個男仔唔係咁, 就一定在上升軌道裡, 就一定嫁得過. 其實, 女仔決定嫁俾邊Q個, 男人決定娶乜水做老婆, 其實都係一項人生最大風險的事情, 比起我JJ投資買股票, 或走去買出租屋來收租, 風險就更大了. 

所以, 任何女仔如果聽完我咁講後, 都仲係婚姻不如意的話呢嗄, 咪來打我喎, 因為只能講到誰是在下跌軌道裡, 不能講到誰在上升軌道中嘛. 

PS: 所以呢, 真係唔明白點解D人結完婚後, 去投資時會咁細膽, 婚姻這家咁高風險的野, 佢地都兩脇插刀照上, 投資風險不比婚姻高呀, 佢地就懼首戄尾, 驚死蝕錢. 

有些人更寧願將D錢去買豪宅豪車, 一買入就唔見20%, 都唔肯去投資來錢生錢. 

哈哈哈, 我真係見到有人娶左大頭佛返來, 成日要佢買豪宅豪車, 就算佢點聰明有頭腦, 佢一生人就咁就蝕左了. 無法, 做人的態度和觀念, 決定了人的一生, D人唔改改佢錯誤的觀念和態度, 點叻都好, 都注定佢和佢身邊的人一世都.......

2017年6月24日 星期六

老董, 洗鬼你講咩?

最近老董又出來講野, 今次佢話, 2003年23條立唔到法, 阿爺開始對港燦起戒心. 

其實, 仲洗佢講咩, 任何一個有點頭腦的人, 由果時起, 都要開始醒目D啦. 

2004年後, 紅仔股票大舉來港上市, 當時大把人話D紅仔股票平, 一定起, 係咖, 又無講錯喎; 不過, 無情情咁大隻甲乸隨街跳, 就要知道人家咁做係有目的. 

當時, 我已經講左, 背後策畫這些事的人, 係高人, 唔好得罪這些人, 我地一眾港燦玩唔起咖. 

大家現在睇番返轉頭, 人家印D公仔紙出來, 換港幣, 來拼購港燦D企業, 直接參與港燦的經濟活動. 

人無遠慮必有近憂, 現在D港燦要港獨, 就要自己理好自己的事, 唔好又食又攞人著數, 咁多年來, 攞左咁多著數了, 上左癮咁, 戒都戒唔甩, 就唔該唔好口嗡嗡叫港獨啦, 就算人地唔抵制港燦閂水喉, 都俾人笑死啦. 

不過, 令到港燦攞著數, 攞到上左癮戒唔甩的人, 就係老董了, 佢任內的政策若果不是傾向溶合, 就係傾向靠阿爺, 當然普通港燦人人都哈哈咀笑, 唔洗捱生捱死就生活有著落, 但係聰明的港燦如我, 我已經估到佢乜乜葫蘆賣乜乜藥了. 家陣佢出來咁講野, 我反而覺得佢唔係咁講, 先至出奇呀!

2017年6月23日 星期五

係啦係啦, 一於同佢開拖.

嘿..... 當奴友一上台做總統, 就話要同我地D加燦講話, 以前簽落D自由貿易條款唔算數, 要再傾過喎, 頂佢個X呀. 我地一眾加燦多年來調節經濟和工業模式, 都只係為左遷就自由貿易條款姐, 現在又話要重頭再傾過, 即係玩野姐, 以後就唔可以再相信乜乜條款了, 話改就改, 我地D加燦唔係好無保障. 

身為加燦的我呢, 我一定支持我地靚仔總理同隻當奴友開拖咖喎. 係啦, 就快埋檯傾了, 一於先俾D下馬威佢地睇下, 唔好當地D加燦流咖喎. 首先, 企硬係乳製品產品, 一於唔俾佢地入口, 睇下佢地北方的大型農場可以頂到幾耐, 之後, 就係減少賣電賣水, 哈哈哈, 之後就係縮減我地D加燦落美國購物的免稅額, 再之後, 我仲未諗到, 遲D再講...... 

PS: 大家睇當奴友笑都衰衰格格咁, 十足似隻當奴鴨咁. 




2017年6月22日 星期四

租客苦瓜乾, 我就情緒低落了.

我JJ副業係做出租物業, 見盡人生百態, 也見盡人們的浮與沉. 

其實, 我自己十分希望見到D租客搬走時, 是滿滿的搬走, 可以升呢去買自己的物業, 有自己的一塊天地嘛. 

只是, 我見到的, 大多都是沉多, 浮起的反而少之又少. 

為到免了我繼續傷感下去, 我JJ決定在租客未搬入前, 要查家宅咁查佢地, 要佢地係有上升軌道的人, 才租俾佢地, 咁我就唔洗見到D租客苦埋塊面, 又唔洗令我情緒低落了. 

我情緒低落最大的原因, 並不是我父母開始年老, 而是見到D租客苦瓜乾咁樣的面口. 呵呵呵..... 

PS: 其實, 我JJ話將來開慈善廚房, 供應免費糊口食物俾人, 不過, 我情商真係可能會頂唔順咖喎, 日日見住D人咁慘慘, 我可能到時無哂我D創意和天份咖喎. 這個都係要諗清楚先好做呀.

2017年6月21日 星期三

才華天份值幾銀呢?

大家不要誤以為加國社會制度很公平, 誤以為有才華有天份就會有發圍機會. 其實係不一定的. 現在懷才不遇, 就打算走來加記碰機會, 這個不一定係好事.

我JJ副業做出租物業, 不單見到平常人見不到的人群, 而且更見到平常人見不到的深度, 因為人們來租我單位, 就要留下財政和信用資料.

不要以為做運動員係靠自己才華和天份, 其實一大部份係靠自己老豆和老母, 我有幾個租客係運動員, 年紀輕輕16/17歲, 原來一年教練費就2萬5加仔, 之後就係食宿和租金1萬5, 之後就係一年的輔助教育費5千(因為不能上學, 就要自己讀書來完成中學和預科) , 再加耐唔時回家的交通費, 又去左幾千, 一年無5萬開支都唔得咖. 這些人係由父母來簽租約的, 所以我知道佢地父母個個都年薪十幾萬, 才頂得順咁供個仔女來玩運動員這些人生方向咖. 

最梅的那個過氣冰球員租客, 初時以為佢以前做冰球員好好搵, 後來才發現佢只係打左2季正選, 而且仲只係一隊二流波隊樹打. 佢做教練本來有$150~250一個鐘咖, 只是佢中年發福後, 就無人搵佢做教練了. 唉..... 真陰公呢, 人到中年連教練都無人請佢了. 所以, 有個有錢父母, 好過自己有才華了.

2017年6月20日 星期二

失去未來的憧憬, 失去幸福感

上星期, 在我這裡同一城市的女筆友, 她同我講, 我們這些年紀的人, 還有將來嗎?

這個實在令我莫名其妙了, 為何人會沒有將來? 就算70-80歲如我父母, 他們都有將來呀, 我這年紀的人, 不應因為每天工作太攰, 就沒有將來, 因為將來就是今天的動力嘛, 人到了沒有將來的感覺, 可能就有點問題了.  

我這筆友的母親剛去世,她老公失業多時, 現在留在國內, 來辦她母親的遺產, 只是母親留下的一環樓, 卻在母親臨過世前, 改寫給了她姐姐的名下, 相信她現在面對不少問題了. 

人失去了將來的幸福感, 在我這裡的中國人中間, 是十分常見的.


2017年6月19日 星期一

我這裡中國人圈子- 較貧窮的原因.

很多人不知道, 中國國內D移民, 移民去的地方, 都很有地域性的, 上海/廣州/深圳較富裕的人, 就大多會去較暖和的地方, 如溫哥華/加州等地; 而我這裡因為天氣冷, 冬天日子較長, 就吸引不到富裕國內移民來, 所以我這裡有很多中國人都是東北來的. 

講些關於東北的大數據: 
1. 在這幾年, 中國GDP增長需不高, 但也有6-7%, 但是東北卻是年年負數; 
2. 東北是國內這般多地區中, 最遲改革開放的那一批地區, 最遲放棄計劃經濟的; 
3. 東北現在連連勞動人口和年青人口下跌. 
4. 我這裡的貧窮區原本沒有中國人住的, 但現在卻多了很多中國人住, 

其實, 一方水土養一方人, 鄧小平改革開放時, 阻力最大的就是這些最遲推行改革開放的地區. 1945年後國共內戰, 共軍由東北開始打, 打低國民黨, 打下天下江山, 靠的就是東北兵源, 當時這班人很勇猛的, 唔識死. 

跟這些東北人相處, 男的大多都很有義氣, 女的大多都很大氣, 如果喜歡我, 可以跟我稱兄道弟了, 無話不談. 只是, 我不喝酒, 每次跟東北人相處時, 每遇到他們飲酒, 我飲酒好像飲藥水咁, 要拿個茶匙出來度度佢先嘛. 

他們洗錢也是很豪氣的, 但不是來到加國後可以繼續錢生錢, 有些人一到經濟枯竭時, 就算香港人, 人生和想法都不會不向壞方向去傾嘛. 這些人在加國住上10年20年後, 人心靈裡的想法, 就會變得很負面, 人的質素就會變得沒有將來似的. 

我自己從不會看不起別人, 大家都是平等的, 只是在加國這般冷的地方, 長期生活在貧窮線下, 人又真是會變得很負面. 大家看看我JJ, 生活比別人隱定, 生活在平均線上, 但冬天都有抑鬱症, 而其他人生活在貧窮線下, 抑鬱再加憂慮將來的人生, 人生和性情變得負面, 這個是常事呀.

2017年6月18日 星期日

不開心的原因.

前幾日, 講開個中醫師用拔罐和針炙, 來治療我膝蓋不暢順, 之後他說我肝火太盛. 其中使我傷心的原因, 並不單單是..... 我一向都好注重身體, 而我這生人仍有這些肝毛病; 還有, 個醫師問我, 夜晚做乜唔睏覺? 都唔知你攪D乜? 言下之意, 即是, 我係一個唔多撿點的人, 又或係一個濫交的人. 

其實我一向都好守規舉的, 做人唔會亂來, 更不會有夜生活, 去酒吧或娛樂場所, 更加唔係我的習慣了. 個醫師最後都講, 可能我係果種十分特別人的, 天生出來就肝火大盛, 但會影響日後健康和壽命. 

這個令我想起教會裡的一些人, 真不明白一見到我, 又係咁諗我. 乜原來我個樣似那種交的人咩? 其實, 除了那醫師見到我拔罐後的鮮紅色印外, 其他人一見到我個樣子, 怎會認為我係個交的人呢? 其中最大的可能, 卻是這些人曾經接觸過某些交的人囉, 更可能這些人心裡一直在意這類交的人吧! 

我自己卻不是那種交的人, 心思裡沒有這樣想, 就不會那樣去做, 就不會明白這類人之間譗訕的關節, 之後就不會作出相應的表態和動作.

PS: 其實, 我一直相信, 人天生下來, 一切都是中性, 沒有善或惡之分, 只是人的傲慢與偏見, 製造出人世間一切禍患和悲劇. 是人的原罪, 是人妄要無知地去分正與對吧!

有時, 我在想著, 如果我不是一世人單身著, 我會否現在肝會有這種問題發生? 又或, 如果我不是自細去教會信耶穌, 我長大後, 會否是一個濫交的人吧!

2017年6月17日 星期六

我這裡中國人圈子...... 好多人離異.....

以前還未有大6移民時, 香港移民圈子中, 離異是很平常, 很多夫妻分開了居住後一段時間, 就再找不到對方了, 之後, 就收到對方的離婚協議書. 

為何這些夫妻要分開居住? 工作啦, 在不同城市工作嘛, 這個就是逐水草而居, 跟住份工去打工嘛, 夫妻兩份唔同的工作, 分開兩地太耐了, 就感情生變, 又或自己一個人住得太耐, 習慣左一個人, 就唔想再多個人係自己身邊. 更有些人係因為家庭經濟差了, 夫妻對開支和使用得不到共識, 就攪離婚了. 

現在大6移民的家底比以前香港移民薄, 所以, 移民之後的家庭問題就更多, 離異的比率就更大. 

其實, 人家的家事, 我JJ理來做乜呀? 人家夫妻唔關我事嘛! 只是這些離婚的人, 卻引起這裡中國人圈子很大問題. 

首先這些人離婚後生活更不容易, 又有子女要照顧, 就想再結婚, 但那會找到比前度更好的? 只有更差, 甚至是最差! 

久而久之, 這些人的在這些氛圍下, 人生和性情就會更差, 做人處事就更差下去! 

我以前還有心情去識新朋友, 但一見到這些人的質素, 就不會再想了. 如果不是來為子女找便宜老豆, 就是來騙飲騙食, 貪人家小便宜. 

不過, 這個衍生更大問題, 就是這些人會為到小小便宜或一時性起而來濫交, 當然在這情況下, 這些人的精神創傷更大更嚴重, 而我已經不是第一次被人誤會為濫交的人了. 所以, 我現在每有朋友搬離這裡, 我就少一個朋友了, 很傷心呢!

2017年6月16日 星期五

我這裡中國人圈子...... 將來不堪設想.....

其實, 以前在未有中國移民時, 中國人圈子中, 大多都係香港移民時, 我都唔覺得那時中國人圈子有乜咁好境, 那時大部份香港移民做的生意, 都係蝕錢的生意, 而又好辛苦咁守住盤生意, 每天開舖收舖, 困身到死, 因而無得轉型或進修. 

之後一到97後, 很多香港移民個個都回流返去了, 剩下的人都唔再做生意, 個個賣左盤生意, 留在家中等65歲, 食加記政府的老人金. 

現在來的大6移民, 資本比以前香港移民更少, 做的生意比以前香港移民的更細, 但一樣係蝕錢, 而且就更困身, 更沒有進修和轉型的機會. 

但是, 現在來的大6移民, 入左加記藉後, 就再沒有了大6個戶藉和國藉, 就再不能像香港移民咁, 回流原居地. 

真不敢想像, 將來我這裡的中國人圈子會變成點樣? 以前香港移民都已經唔多好, 大把人欠債走佬, 大把人移民來時身有剩錢而回流時2手空空, 不過, 都還可以回流回香港食綜援, 到65歲再回來食加國老人金; 但現在大6移民錢更少, 家底更薄, 語言技巧更低, 但又不能回流, 這樣下去, 情況就比以前香港移民更差, 更令人不堪設想. 

PS: 我最壞的打算, 我將來退休和父母不在後, 聯同其他義工開間慈善廚房, 每天供應糊口熱湯麵包, 給一些有需要的同胞們, 唉...... 我真不知道將來我可以做些什麼了, 好似好灰咁呀.

2017年6月15日 星期四

噢..... 今天美國加息了

雖然不多, 1/4厘之嘛, 小事一件呀, 但係呢, 風向轉左了, 唔再講明俾人聽, 低息低到你唔信嘛! 現在係話明俾你聽, 息口會慢慢升番到合理的水位. 嗱,...... 問題就係呢度啦, 乜野係息口合理水位先? 同埋用乜速度升去合理水位先? 照現在人人借下滿手欠單來看, 息口合理水位就應該係0%嘛! 不過, 理在已經講明息口唔會係零, 因為現在個講法係美國聯儲局欠下大筆錢, 不能長久擔起息口0%這個水位嘛, 所以現在的合理水位, 係睇聯儲局再頂唔頂得順來講喎. 

如果無大鑊事發生, 例如朝鮮肥仔恩同美國開火, 又或南海擦槍走火, 美國聯儲局係唔需要急於太快升番D息佢咖. 所以美國升息個速度係可以好慢好慢咖. 最緊要美國經濟增長理想, 就唔會有人問佢還錢而要快快加息了. 

所以, 現在我地要問的問題, 聯儲局要加到幾多息才可以用新債來蓋舊債, 還可以中間濕濕隻腳, 賺番D行政費, 來出糧俾班經理學大爺和佢地班靚. 咁..... 這個又唔係要好多錢姐, 每年廿卅億都夠LU掛. 這個又唔係好難姐. 

我JJ認為呢, 美國加息只是形態做勢, 不是有心加到全世界都愁雲苦面嘛. 美國班大爺其實同老鄧好似, 而同毛主席就岩岩相反, 美國大爺要做個勢出來係歌舞昇平, 馬照跑舞照跳, 唔會好似毛主席咁, 連人地著件靚D的衫出街, 都被指為資本主義自由化. 

所以, 佢地加完今日這次後, 可能佢地會試試水位先再諗加唔加, 對大家而言囉喎, 都係我一直講開果句, 有錢要留個多餘錢, 唔好借到盡, 又唔好攞間屋的按揭來加, 來做提款機, 盡量快快還清欠款, 那就天天睏得安樂了......

2017年6月14日 星期三

人生都係隨緣吧!

唉..... 我身子一向都好好, 頂多都係好似其他中年人咁, 有時有背痛和頸痛囉. 我就每年這個春夏交替的時候, 去做一次拔罐和針炙, 可以清走D濕氣佢. 

今年係第三年去, 個老醫師又記得我, 佢今次就同我講, 我次次來, 拔完罐後都好深色, 比平常人深色好多, 而且不是一次係咁. 我都知道的, 因為深色到好深色, 所以我十分注意小心身體. 今次個醫師見少人無咁忙, 就同我診斷一下, 問我是否夜生活多, 少飲水, 少食菜. 

大家都知道啦, 我JJ唔夜生活咖喎, 又係無菜不歡, 每天飲7-8杯水, 而且我仲係少糖少鹽少炸少煎不煙不酒的人仕.

最後個醫師話, 我這樣長久火旺下去, 必定會燒傷到我的肝. 

嗚嗚嗚, 我聽到醫師咁講之後, 我好傷心, 因為我細時是十分容易發燒, 十分容易過敏, 我一直好努力地生活在一個健康的生活習慣裡, 而且更是清心寡慾, 但是到頭來, 我仍然都係有咁樣的人生問題. 

真係羡慕其他人, 又煙又酒又啤啤佢, 又走去有好多好多女朋友, 夜夜笙歌. 

哈.... 做人都係算了, 我也不會再改變自己的人生軌道了, 仍然過著少糖少鹽少炸少煎不煙不酒的生活, 仍然清心寡慾算了.

可能我能健康地去生活了這般多年, 已經賺了很多年了, 上天其實都對我不薄的, 最少, 我要憂柴憂米的日子, 可能頂多1-2年, 其他的時候, 我人生都十分暢順無險阻的.

2017年6月13日 星期二

走甜與味覺

我發現一事呢, 現代人食得太多糖了, 令到味覺退化了. 

簡單的一事, 我去唐人街茶餐廳, 飲檸茶一向都走糖, 而且我還督督督督到幾塊檸檬爛哂咖, 慌死佢地唔出味, 之後果碟叉燒燒肉飯就會感到好好好咸喎. 

咁..... 昨天我去問同是食叉燒燒肉飯的人, 佢地話唔係好咸, 味道適中, 我終於理解到一件事, 飲完甜味的飲品, 就會令到味覺退化, 就要食到好濃味的東西, 才感到好味道; 相反, 飲完無糖檸檬茶後, 味覺敏銳左, 就算食條清水煮的清菜, 都會感到甜味.

PS: 上星期六, 我又入去唐人街茶餐廳, 飲走甜檸茶和食瘦叉燒燒肉飯, 跟住就有對西人老夫婦入來, 之後佢地又係叫左2碟叉燒燒肉飯. 哈哈哈, 希望佢地唔好失望啦, 我JJ不時去唐人街食叉燒燒肉飯, 主要係因為, 我耐唔時要食些唐人街的食物, 如果唔係, 一返到香港第一餐就會唔適應, 有點好似水土不服.

2017年6月12日 星期一

甜與苦

我讀大學時, 住的宿舍有廚房煮食, 為到省時間, 就跟幾個宿友夾食, 大家夾錢來買食物, 之後就輪流煮食. 

只是, 我一向食得十分清淡, 當然就落了很多青菜. 奇怪事就發生在青菜上, 有夾食宿友說我煮的青菜味道苦而難入口, 但我明明食到是甜的. 

哈哈哈, 人生就是這樣, 味覺決定了飲食習慣, 而觀念和態度就決定了人生取向. 

我食到甜的, 而那人食到苦, 注定那人是個食肉獸, 注定我身體健康一直好下去. 

而觀念...... 和做人態度..... 不覺得現實際遇是個苦厄, 反覺得是美好, 那就注定我天天笑口常開了. 

所以, 苦厄來時, 要問問自己, 是否錯在自己身上? 還是, 自己天天在抱怨, 而忽視了身邊一切美好事物?

PS: 有時, 我在想, 我冬天時情低落, 可能比起很多人, 都已經是十分輕微. 如果我像其他人般食青菜食到苦味, 而不是現在食到甜味,  可能我情緒低落會是十分嚴重. 冬天時, 只需一粒糖, 就可以令我的情緒低落唔見哂了.

2017年6月11日 星期日

心存善念, 神必祝福著.

我有個特點, 就係.... 我入去唐人街D舖頭後, 就會有西人跟住入去. 其中原因, 大多都是這些西人唔知道店裡頭岩唔岩佢地, 但見到我這些跟西人沒有分別的中國人, 仲係駟駟正正的那種人入去, 他們才有信心入去試下.

上星期, 我轉去唐人街一間有D笠UP的飛髮舖度飛髮, 笠UP的意思, 不單裝修笠UP, 國內同胞開, 仲同大多數國內街市裡的飛髮舖一樣咁款, 我十足回到國內做NOW鬆佬咁, 哈哈哈..... 

無他的, 我喜歡這些國內飛髮佬淳樸厚道, 做事實際無花巧, 用心飛好個頭, 跟人和氣相處, 我覺得很舒服, 咁就得啦. 

今次跟住我入去的西人, 係個好年青年青的鬼妹, 哈哈哈, 個飛髮佬初時好愕然, 因為平時只有唐人阿伯去佢度飛髮, 現在不單我成個西人咁款入去, 仲有個好後生的鬼妹跟住我入去. 

個飛髮佬可能以為我同個鬼妹同埋一齊, 見到我有好多白頭髮, 而個鬼妹咁後生, 就同我推廣佢地D染髮, 等我看上去年輕一點,
襯個鬼妹多一D.


就算我還係30歲時, 我都唔會同D十幾廿歲女仔拍拖, 現在過了多年, 就更加不會了. 我就笑著回答佢: "人就是這樣的, 總要順其自然". 

其實, 染髮係呃人又呃自己囉, 令我想起, 以前香港D中年男人上去大6娶個後生女咁, 辜負人家下半世人, 到頭來這些大6 女性來香港後, 這些中年男人和大6女人, 他們的人生都不快樂.

所以, 人生呢, 第一, 不要強求; 第二, 順其自然; 第三, 原諒已過去的一切人事, 現在不要找借口來作惡; 第四, 心存善念而天使必護佑著.  


2017年6月10日 星期六

加記銀行大賺的原因

加記經濟雖然不差, 但又唔講得係好好, 而且現在銀行業務競爭大, 服務收費唔可以太高, 利潤就不會高了. 

但加記銀行現在大賺錢喎, 真係有點攪笑, 但睇睇佢地個年報, 原來大部份係投資服務賺錢. 

諗下乜野係投資服務, 當然唔係我每次買賣股票俾果10皮手續費啦! 佢地係賺唔到我這等客戶的錢咖, 

咁.... 乜水俾佢擋來割肉食呢? 我最後諗到了, 成用有銀行職員打來叫我買基金, 一睇佢地D細字, 原來每年2%行政費喎. 

車, 我JJ由十歲就開始買股票啦, 我D道行比佢地D基金經理還高, 洗鬼叫人來同我管錢咩! 所以, 這個世界呢, 就好似以前一個聰明人同佢子孫講: "銀紙揸係手, 千祈咪跣手!"


PS: 所以, 我現在係唔會買加記銀行股, 因為一到政府修改法例, 立法禁止銀行佬出賣客戶利益, 佢地到時D利潤就會打柴, 當然股價也會來個插水. 我現在頂多都係買加記保險公司股票好了, 慢慢來, 山大斬埋有柴呢!


 唔知道香港D銀行佬又係咪咁呢嗄? 大家小心D, 將來銀行股雖不致於夕陽工業, 但也不會好似90年代咁好景了.

2017年6月9日 星期五

人在生老病死之外, 還可以做什麼?

很多人, 尤其係教會裡, 認同一切都是在定命論之下, 他們觀點不離開"既然人跳不出生老病死, 即是人已經被定命了, 那何須苦苦去煩惱?" 

只是, 這類人在應該用心時, 不去做他們認為"煩惱"的事情, 到最後, 他們的煩惱原來比別人還多呢. 

沒錯, 人是不能控制自己生老病死, 但仍可以控制今天和明天的生活比昨天生活好嘛, 這個就是人的選擇了. 

其實, 我不是否定定命論, 又或貶低定命論的的人, 而是這些人既然認同定命論, 已經先不去批評天和自己, 就更不應在他們自己陷入深度煩惱時, 去批評別人缺乏同情心了.

PS: 很多人用結婚作借口, 就不再顧念自己父母了. 這個是十分不對的, 再用定命論來自我理性化, 就更不對了, 最後, 定命論成為他們自己的陷阱, 逃離對父母的責任, 但逃不離開自己的負面人生. 

我這2個月帶母親去做2次眼角膜手術, 先後把她雙眼換成人造眼角膜. 在母親身體仍然好時, 先做好了, 這樣將來我母親身體健康開始走下坡時, 她仍有較好的視力, 生活質素會好過現在不做手術. 當然, 手術是有麻煩的, 手術前後1星期, 都要小心看管好母親. 不過, 這個沒問題, 我做著這些事, 心裡是開心快樂的.

2017年6月8日 星期四

神一般的賭法

哈哈哈.... 我這裡的博彩局現在有個賭法, 就係賭當奴友明年5月1日後, 仲會係咪總統喎..... 

現在賠率係3.5比1, 如果買佢下台, 1元就賠$3.5, 但如果買佢留任, 1元就只賠$1.1. 

呵呵呵, 其實咁賭法唔夠刺激嘛, 都估到佢明年5月1日之前, 佢都仲未變拐腳鴨總統. 如果我來開賭呢, 哈哈哈, 不如賭佢後年2019年2月1日之後, 仲係咪做總統, 這個比較變數大呢!


2017年6月7日 星期三

如果一國兩制瓜左柴.

前兩個月, 上邊大6那位基本法專家, 係基本法研討會上講, 如果香港兩制威脅一國, 兩制會失去存在價值喎,  佢還講得中肯和客氣一點, 大6上邊某些人和媒體, 就講得更令人擔憂.

一國兩制到了現在, 都只是執行了廿年也不夠. 真想像不到, 老鄧40年前, 竟然可以俾個50年的保用證書. 

大家可能會認為, 我JJ移左民啦, 洗乜理會香港現制度會否繼續執行? 其實我係好關心香港的事, 不單只我青梅竹馬阿豬女仲係香港住, 而且香港是我的後路, 加記有乜事(好似60年代東南亞排華咁), 我還可以"了"番來香港嘛! 

一國兩制如果無左, 有乜會影響到我?

1. 失去中加雙重國藉, 只有加藉 - 只有港澳人仕因為兩制, 移民外國後, 才仍有雙重國藉, 國內同胞就會自動喪失中國國藉. 

2. 不能再自由進出香港或深圳. 

3. 我本香港護照自動交效, 我會更難進入某些西方制裁的國家, 如伊朗和委內瑞拉. 

4. 我在外國出生的親戚和我, 將會更不想回香港探親, 跟中國的聯系將會更疏遠. 

5. 不會再視香港作為我第二的資金停留地, 也不會視香港為我第二居留地 - 既然一國兩制原本保用50年, 現在20年未夠就玩蛋, 即是大6對香港再沒有任何保證, 甚至大6任何保證都不能盡信.


2017年6月6日 星期二

咁悶, 不如老屈當奴友係凶兆套戲裡......

我係信徒, 當然不會信 OMEN 凶兆套戲裡這些低級劇情.... 不過見咁悶, 不如開個玩笑

這套1976年的電影, 講述一名美國駐外大使, 在1966年6月6日, 在羅馬教會醫院領養了一個孩子,用來冒充妻子剛生下來就夭折的孩子, 從此怪事開始圍繞在他們身邊, 其養子身邊的人相繼意外死亡, 更有來自羅馬的神父警告他,其養子其實是由狼生出來的撒旦兒子 - 敵基督,他會想方設法來繼他的一切,以便將來可以統治世界. 後來更在其養子頭髮遮蓋的頭皮上發現666敵基督的印記. 

不過, 既然今年64咁悶, 香港又無乜好攪, 不如就襯當奴友咁少頭髮, 去CHECK CHECK 佢頭皮上是否有666的標記, 哈哈哈...... 唔知道佢夠唔夠班做敵基督, 還是佢只是個行先死先的咖呢啡? 

 

2017年6月5日 星期一

大6嚴格執行外匯管制, 加國樓市就.....

加記政府常常都話, 佢地推出15%海外買家轉讓稅見效, 多倫多和溫哥華樓市交投量跌. 其實, 這個不是單一的原因, 其實, 自從今年1月大6政府嚴格執行外匯管制後, 水源少了, 樓又被炒到咁高, 再加15%稅, 無力食之下, 那有人來炒. 

不過, 就算大6匯管嚴左, 都有好多不同地方樓市仍然被人炒高. 

多倫多和溫哥華炒樓現在未甩貨的大6人, 就可能會幾大鑊, 無左新來的大6人來接佢地D盤, 佢地就只能守, 等政策改變後才能甩貨, 好彩, 現在加國息好低, 仍然可以守.

只是, 這班人炒到多倫多和溫哥華樓市咁高, 佢地蝕錢都唔抵可憐.

2017年6月4日 星期日

現代男女平權下

我美國親戚個仔, 早排係美國搭內陸機回家, 坐在座位旁的鬼妹, 就不斷找他說話, 並主動給了他聯絡方法. 我親戚就同我老豆講, 我老豆就覺得好大件事咁. 

其實, 我在男女平權這議題上, 我是十分開放的, 因為就算女性眼都唔暫咁BA實男性, 都唔可以講係D乜野咖, 頂多係話女方對男方有好感囉. 如果男方喜歡, 當然可以去溝通一下, 攪清楚女方心裡想著什麼.
 

現在男女平權, 男女的關係早己不再是男 "男"(動詞) 女 "女"(動詞) 了, 還可以是很多其他的性質, 當然, 這個世界就變得複雜左, 很多時, 是要男女雙方大方地去清楚表示吧. 千祈咪收收埋埋, 又或去玩猜啞謎遊戲. 我自己是個做正事實事的人, 從不玩某些傻瓜遊戲, 淳厚人總是做著淳厚的事, 明確表示不攪一夜情和男女平等. 之後, 我希望一切事情都會好辦, 如果仲係麻麻煩煩, 即是問題不在我自己身上, 那就要安心地去不理會這些人了.
 

講起俾人BA住, 尤其在教會裡, 我其實十分冤枉, 都唔關我事咖嘛. 我都唔知道係咪, 崇拜時有些女仕無乜野好做, 又或存心想整古我, 就成日擰轉個頭, 望住坐到好後的我(都已經刻意坐係大堂最後邊, 等D人唔好注意到我), 中間係無人, 乜水都會亂想一通..... 最慘, 對方唔係固定會友, 但我係, 教會內D屬靈人仕就第一個來找我談"心事", 當然第一句就要求我咪影響佢地年幼子女, 第二就說我招惹埋D麻煩人入教會, 大佬呀, 我又無叫這些人來教會, 這些人喜歡入來教會, 我都無佢符.
 

咁耐, 我試過去約過一個成日係教會裡 BA 住和跟住我的女性, 始終都要知道這些女性想緊D乜咖. 不過, 可能我黑仔吧, 我體面去約佢, 佢不單不應我, 之後竟然又係咁來BA住我, 最後更去牧師個老婆度, 投訴我騷擾佢, 最頂癮係, 這牧師老婆又信佢講, 仲當眾來數落我, 攪到我之後, 都唔敢俾果D跟牧師和佢老婆有計傾的女教友, 走得太近我. 其實, 係這些牧師和佢地老婆唔識做, 唔係我對佢地D女教友無行動, 要怪就怪那些製造麻煩的人.

 其實, 當這些事發生後, 我就不應再去這教會了, 我做錯的地方, 是浪費了我最適合拍拖結婚的14年, 跟這無厘頭教會+牧師+自以為屬靈的人來磨菇磨菇. 看來, 有些麻煩製造者是不配享有男女平權, 一定要用枷鎖來壓著這些人, 天下才會太平的.

2017年6月3日 星期六

香港戾氣重, 64就.....

我家裡下一代的親戚分散不同地方, 大家都差不多的智商和能力, 由細到大, 差不多都是唔洗俾錢讀書果種人. 

美國有一個, 畢業後做工程師, 一邊做, 公司一邊送佢去讀碩士, 今年攞埋碩士, 不過, 佢最開心的, 就係佢做工程師後第二年才買的屋, 今年供完了. 

相比香港的那個, 拔尖入醫科, 遲美國那個2年畢業, 但佢份醫生人工, 儲到現在, 當然可以俾到一層樓個首期, 但係想買層豪一點的樓, 或要好似美國那個咁, 出來做事後5年, 就供完自住物業, 相信都不太可能了. 

我這些親戚同埋一個亞爺亞嫲生, 能力和智商應該差不太遠, 但看著他們的首次置業藍圖, 一個5年就供完, 另一個在香港天之驕子做醫生, 要多一倍時間以上才供完, 可以講明白一件事, 香港生活壓力重, 導至港人戾氣重. 

明天又係64了, 不過, 在咁重戾氣下, 64一切都變了質. 聰明能幹的人, 都要花咁大氣力才有立錐之地, 之後才有餘閒去想通64; 其他無咁叻的人, 一係不聞不問, 一係無能力用正途維生, 要靠攪政治來開飯, 對64就一定有扭曲了, 所以, 我現在不看好D人攪64了. 

華叔一死, 大樹飄零, 沒有人運籌帷幄, 決勝千里了, 留下這些游兵散勇, 必定遲早被阿爺收編入建制之內, 又或現在這些人已經..... 唉...... 

2017年6月2日 星期五

北美治安越來越差了.

這事應該發生係美國威斯康辛州的Milwaukee市, 事發時, 白色車女車主到油站下車加油, 卻把車匙和手袋留在車上, 賊人乘坐灰色大房車, 停在女車主車旁, 趁女車主下車, 就跳上車, 原想偷走汽車. 

只是大膽的女車主, 不顧自身安全, 跳上自己的車蓋上,阻止賊人開走汽車, 賊人也不想有傷亡, 加重刑責, 就棄車逃竄.

大家可以想到, 北美洲已經不是大家借日心中所想的安全國度了, 人們越來越不彼此信任, 犯案的手法, 越來越容易傷害到其他人. 

最恐怖的, 有個男人行1去想幫女車主停下架車, 賊車上的賊人以為有人想來捉他們, 第一個反應不是開車走, 而是下車想去威嚇那男人, 這個卻是最恐怖的事情, 捉到這些人, 一定要審極刑. 


2017年6月1日 星期四

國內土豪買加記物業?

很多人以為土豪們用現金, 又一次過俾清買樓錢, 就以為他們很有錢. 只是背地裡, 這些土豪卻是用私募的方式, 用高息借錢到手來買物業, 買了後就要用物業錢生錢來還高息, 這樣, 就會無所不用其極了, 為到錢, 這些土豪可以飲鴆止渴, 把物業在 AIRBNB 上短租出去, 收取更高的租金. 

只是短租AIRBNB的人良莠不齊, 遇上好時, 還可以, 但有些不好的, 專租這些AIRBNB來開派對, 所以噪音酒精, 甚至毒品, 就這樣出現在這些土豪買下的高尚物業之內.

再加上這些土豪大多都不是生活在加國, 人買下物業就回國內, 交下給物業管理, 當然這些物業管理只是一心做靚現在盤數佢, 不會擔心著將來的物業被攪到一塌糊塗, 又或一文不值. 

現在那些買下土豪們物業的鄰居, 就苦不堪言了, 很多西人找到這裡華人社交網站, 來大吐苦水. 

唉, 這樣真係大鑊了, 這些土豪人在國內, 加國本地人厭惡中國人, 這些土豪不會受影響.

PS: 同一道理, 我出租物業旁的幾幢物業被一個國內同胞買下後, 每次人們來看我的物業, 都話我的真漂亮, 只是很多人不相信我這中國人有操守, 大多都誤為我隱藏下D問題, 唉.... 攪到越來越難租出去.