2018年2月28日 星期三

什麼是最佳最有說服力的男性理歷表和名片?

昨天講開我在微信帳戶裡的大頭相, 就想起在微信裡, 有篇文章講: 最佳最有說服力的男性理歷表和名片.

話說國內某肥胖爸爸, 帶著小女兒去報讀某名校小學, 只是校方一見到這爸爸的肥胖身型, 卻奇葩地說: "本校不招收你這樣肥胖家長的學生!"

嘩哈哈, 這個COMMENT在加記係屬於政治極度不正確, 明顯有歧視的意圖, 但在國內這樣的強者社會, 大概不是個錯誤了. 

文章解釋校方的說法, 肥胖家長代表著這家長缺乏自制自控能力, 不能以身作則來教導兒女做個有教養的人.

文章更指出, 現在在國內求職, 人浮於事, 面試時一見到肥胖的求職者, 大多打了個折扣, 認為這些人缺乏其自我完善和上進的能力. 直指一個健康的身型, 是張最佳最有說服力的男性理歷表和名片.

哈哈哈, 大家可以解讀這個訊息, 國內已經財富泛濫到這程度, 開寶馬奔馳這樣去表明創富能力, 再不能夠證明高人一等了, 而是怎樣去駕馭財富, 去有效掌控財富, 自我完善, 才是關鍵所在, 才是人中之人. 

PS: 大家可以看到一事, 跟我JJ一向說的一樣, 原來名校的神話說穿了, 是一群能力和社會階層高人一等的家長, 教出來的兒女, 令到一間學校變成名校, 不是一間名校裡有什麼猛料教師. 

我香港的親戚, 夫婦都是專業人仕, 人又十分好教養, 而佢地個仔自少在教會學校和教會長大, 真無理由學得咁壞咁差. 我有次去佢仔間學校和教會一看, 發現了, 原來教會學校收生收到最差勁的家長, 教會裡卻充斥著一群不知所謂的父母, 不單把仔女推到教會, 這些差勁家長更成為教會骨幹, 把歪理說成真理, 我親戚個仔在這些歪理環境長大, 怎會不反叛自私?

2018年2月26日 星期一

我在微訊群中的大頭相

哈哈哈, 大家咪誤會, 我並不是想哂身材, 實在, 我離開模特兒的標準很遠, 無資格食這行飯. 

只是我見到很多國內同胞現在不太會管好自己健康, 生活胡亂來, 反映在其身型之中; 尤其我這裡的國內新移民, 再加上加國滿地可這裡天氣又乾又冷, 這些人比以前香港移民更快身體出現毛病.

人的身體健康可大可小, 小到其個人和家庭的經濟狀況, 大到其個人和家庭的心理質素和人生是否積極向好, 再到影嚮著整個社會和民族

其實, 有時, 做好事, 都未必一定要捐錢咖,  人家沒有錢嗎? 有時...... 灌輸正確觀念給別人, 也是十分重要的. 

我這幅大頭相, 是用來誘發國內同胞們注意他們自己的身體健康啊! 呵呵呵, 我出左這大頭相後, 就有很多人講話要減肥了, 更有廚技教授班開始教人清淡煮食法, 這個我實在感到欣慰和開心, 自問, 我JJ自己沒有什麼聰明和能幹, 現在能夠為世間添上一小點點的正能量, 真是生死無憾了.


2018年2月23日 星期五

今年老美加4次息?

哈, 現在老美講減稅, 加基建, 總額會彈3萬億出來市場上, 不過, 老美政府名義上是個窮光蛋, 這3萬億當然要舉來發債, 即是要係股市裡吸資去債市, 唔好講股市係有幾大波動, 也難講老美政府要加息加到幾多才吸夠資金入債市. 

將會發生的情況, 就好像D人食左極樂大補丸一樣, 極樂一刻之後, 就會成個人頽左落來. 

真心希望老美企業由海外調回來的錢, 可以乘大幾倍, 就有足夠強大的流通性來流入債市, 好等唔洗加息加咁多咁快咁急, 已經好多人講今年老美會加4次息. 

4次好似多左, 其實2次1/4%, 本應係好好咖, 但當奴友係都要未來0年裡減稅1.5萬億, 即係由今年開始, 老美開始減成幾百億, 再係股市上多吸幾百億入債市, 慢慢咁減稅減上去千幾二千億. 

好吧, 大家擔定凳仔睇好戲, 最重要係咪俾佢玩死.

2018年2月21日 星期三

初七了, 大家好嗎?

我好好呀..... 人人生日快樂呀! 有無食碗長麵呢(長命)? 整番條臘腸呀(這個我就唔記得母親以前講點解要咁做了)? 又或再來多碗湯圓? 哈哈哈.

我這裡天氣開始暖和了, 最冷的日子已經過去了, 那時12月尾1月初, 有一個星期每天最高氣溫都在-25到-30C之間, 連室內窗底都結冰了, 哈哈哈, 每天下午1-2時, 陽光最強就令窗底冰開始溶時, 搞到我每天要回家去抹水, 免得水被吸進窗下的木後, 一到晚上再結冰, 這樣真係會令窗下的木爆裂, 而下年就要換窗了.

其實, 我是十分感恩的, 自己做好自己本份, 之後就交托給神, 神真是看顧著我,  我全條街的鄰居屋, 全都是同一時間建成, 但一早就已經要換窗了, 只有我家窗門仍然十分保暖. 因為, 電費單會顯示到出來, 電力公司會把我的電暖費開支, 跟鄰居們平均數比較, 高過平均數很多, 除非係巨無霸屋, 屋主就可以知道係咪時候要換窗了. 哈哈哈, 有時, 真係唔能夠唔讚D西人聰明咖! 醒到咁交關...... 

我的衣服, 真係可以著幾年都唔穿洞, 大家話啦, 我JJ係咪真係要笑得出來, 不是因為肉眼見到的物質, 而是心靈裡頭感應到, 物質之後的那位真神慈愛. 

初七裡頭, 是中國人傳統的幸福日子, 人人都生日, 但我更願意大家理解到, 世上真是有這位真神的看顧和祝福.

2018年2月18日 星期日

手機防毒軟件啊!

係有存在的, 我用緊 NORTON, 我這套可以裝係10部電子產品上, 包括 PC, 蘋果電腦, 埃PAD, 埃瘋, 殊嘜瘋, 和平版電腦...... 不過, 我諗呢..... 現在埃瘋, 殊嘜瘋上的防毒乜乜物物呢, 都仲係新, 都係咪係手機或平版電腦上攪太多重要的野住! 等多一陣先. 

PS: 我這套野係大減價買, 原價1舊加仔, 減價就$40加仔, 我有Q龐呀, 買滿1舊減10皮呀, 我一次買滿3套, 用足佢3年呀.







中國人發展不起來, 皆因前世因, 種下今世果.

現在香港已經係初三, 我這邊的初三, 就有一大群同胞組織去加國國會示威, 話在大話小女孩謊稱在華人聚居區被剪頭巾, 加國傳謀/政客/總理手法沒有尊重華人喎. 咁, 人地都無講過係乜水姐做姐, D友傻左定了.

睇番來突區, 竟然因為巴士意外死左19人, 就取消左初二晚的煙花匯演喎, 嘿, 究竟係我地華人袋裡一有錢, 就諗野好唔理性? 還是D人攪政治沒有頭腦? 

其實, 都係顯示著我們全體華人深層次的問題, 我這邊班大6同胞, 以攪示威來得出人們聯絡方法, 來拼湊名單, 唉, 咁樣, 佢地就只會遷就出來示威人群的不滿情緒, 就會亂嗌口號, 亂做埋D唔理性的事, 我已經提醒佢地初三赤口, 小心成年都是非爭議不絕. 

突區政府取消煙花匯演呢, 純碎係棄車保帥, 因為整件巴士交通意外, 都是突區體制上的問題, 突區人大/政協/行會/立法會/皆由這些大財團裡出來, 所以整個體制平時那會去監管這些大財團呢? 除非出了這些重大事故後, 才怕被人拿出來將佢地軍, 現在突區政府當然係怕, 之後被反對派籘拉瓜咁一摸而上, 直指突區體制, 之後就有足夠彈藥拖慢"一洞兩撿"的立法, 就可以拖垮突區政府, 令到建制派因為矛盾過大, 而互相攻伐, 反對派就有更大生存空間. 相反, 如果今屆突區政府如果"一洞兩撿"立法成功, 反對派的生存空間就會更萎縮. 

但是, 現在華人所做的一切, 都十分政治化, 缺乏理性, 寧願不經濟沒有成本效益, 更不理會政治正確, 只理會一己的政治生存空間和發展, 跟70年代英國末落的情況, 如同一軾.

2018年2月17日 星期六

年初二, 重拾童年的開心

係咖, 我真係承認自己係個 大細路來咖, 不過, 咁耐都無諗過一定要係年初二, 買份玩具嘛.

但係呢, 細時係香港時, 年年年初二, 一開年LU喎, 我就拆利是, 去買玩具.

今日我這裡仲係初一, 見初二初三都係週末, 就索性連今日初一星期五都告埋假佢, 上午煮齋食左後, 就週圍槓下嘛, 哈...... 俾我見到這個堅野, 如果係AMAZON以美金$180出售, 仲係唔送來加國, 要自己找中介送來, 現在係加國可以直接買到.  不過, 大家如果睇到果個紅色牌仔上的價錢, 係36加仔呀, 真係平到無朋友呀.

嘩哈哈, 開心死我了, 仲可以好似我架無人機咁, 放個手機上去睇機上的鏡頭, 又可以上樓梯級. 最下邊VIDEO裡頭, 應該是同型的軍用款, 重量重很多, 大力好多, 但睇落好堅喎.






2018年2月16日 星期五

新春大吉

各位, 我遠在加國滿地可, 來向大家拜個年.

一祝, 笑口常開
二祝, 金銀滿屋
三祝, 財息兼收
四祝, 福如東海
五祝, 身壯如牛 
六祝, 壽如松柏
七祝, 閤府安泰


2018年2月15日 星期四

環保情人節

我見我去的單身微信群, D男女一潭死水咁, 攪唔起來喎. 

我就同D男仔講, 唔洗怕, 今年情人節真好, 送花俾人如遭到拒絕, 仍然可以循環再用, 立刻可以轉化做年花, 一D都唔浪費!

又同D女仔講, 咪係度扮哂野話年廿九大掃除啦, 妳地有幾可咁神心呀? 在這個有打機無異性的年代, 有男仔送花俾妳地, 應感到無上光榮呀! 再唔係, 妳地如果唔滿意個男仔呢, 大可以叫我來幫你回收改造到做年花, 我打印張揮春放上去遮住個男仔個名, 咁唔係變年花囉!

PS: 在這個有打機無異性的年代, 竟然有個男仔話, 今年租個情人回來. 噢..... 其實我真係有勸佢好好地找個女友回來, 不過, 這些人那會聽得入耳? 快去打機打死佢啦, 死靚仔!

我明白的, 這代女性比起我那代的女性, 真係苦命好多咖! 不過, 都唔使連我JJ都環保埋咖, 我明白的, 情人節時有好多女仕希望有人約, 只是我已經超左齡了啊, 我無福消受了. 不過, 唔怕, 現在這代中國女少男多, 女仔一定嫁得出.

一切苦厄, 皆因為人的錯誤觀念所引起, 我那代的女仔, 錯在誤以為"靚仔最花心最無本心", 偏要來嚴懲我這個大壞蛋, D教會人仕又來推波助難; 這代男仔錯在只會打機, 仲記起以前間唐人教會有牧師都係打機狂, 嘿, 當然教出來D年青人就會..... 不過, 事後才來做環保修補, 就只令人更傷心更難過.




2018年2月14日 星期三

藏富.........?

以前, 過年過節或自己生日, 都會出去買條長褲, 只是這個..... 現在變得不環保了, 我的衣服全都穿到有洞才會攞出去丟, 但是這樣買法, 就即是我要改變我的一向做法, 甚至改變我一向以來良好的做人價值觀. 把東西浪費, 就不好了, 會折福咖!

所以, 我由今年起, 過年過節生日, 都會捐錢出去, 這樣就可以藏富於心, 甚至於天上, 讓神知道我十分看重衪的祝福和守護, 並撙守衪的囑咐, 把祝福傳給別人.

PS: 只是, 有時自己不是不想做好事, 只是十分害怕捐去一些無良機構, 反而遺害人間. 最近新聞報導, 英國樂施會外派到災區的人道救援隊伍中, 竟然有人拿用公款來嫖娼, 甚至是未成年少女. 我一向都唔會捐錢去樂施會, 因為佢地的行政經費高得嚇死人, 那時我看是18%, 而紅十字會才2%, 宣明會就4%, 現在回想起來, 怪不得他們行政經費高得嚇人, 原來有大量唔等洗的政治酬僱人仕在組織裡頭, 在英國選舉工程後, 派到組織裡去. 

有年回港, 在街上有人來募捐去支援需要人仕送飯, 我一問他們行政費用, 竟然是15%. 雖然自己心裡想著他們燈油爐灶, 所以行政費用咁高, 但我也自然地放回已進袋中的手掌, 沒有把錢捐出去. 

現在D教會, 如果他們的牧師唔領頭出去傳福音, D人對新入去的朋友黑口黑面, 就咪洗指意我俾一個仙佢地, 跟本就係度混吉當食飯.

2018年2月13日 星期二

家陣連老美都係咁....

家陣我寫財經, 越寫越無癮, 全因為在突區2005年痕指變成政策市之後, 現在老美當奴友商人治國, 從熊貓國偷師回來, 試圖以政府行政主導大市, 不過佢東施效顰, 偷師偷得果一半, 再加上, 老美係政治妥協/平衡再平衡的國家, 行政主導從來都只會被人炮轟到支離破碎. 除非D好醒的人, 如二戰的螺絲福, 再加上二戰的時勢做英雄, 才可以行政主導, 不過, 總統人生都天天有如騎在虎背上.

只是當奴友執意要玩野, 當然大把人會陪埋佢一齊癲埋一齊, 因為老美有如導演度棋瘋那套港產片黑社會裡所說的: "字頭係唔可以一個人獨大的, 要平衡!" 

講完上邊的背境故事後, 大家係咪容易明白一些呢嗄? 為何美股在來緊的一段不短的時間裡, 會十分波動了? 就係咁原因囉, 黑社會爛仔爭地盤爭利益, 要開片, 老美財技大享和政客開片會係點, 大家睇睇上兩個星期個股市係點, 就會明白了. 

今日當奴友會宣佈佢1.5萬億老美的基建大鋼, 由聯邦政府借錢俾州政府和市政府, 攪地方上的建基配套, 這個過癮了, 當奴友就會獨大了, 有誰個地方政客會唔睇佢面色呢? 到最後, 目的就是為當奴友佢自己連任舖好條平坦大路.

2018年2月12日 星期一

那些人在國內炒樓才會大發?

當我睇完佢地係微信的對話後, 我才明白過來. 

就是那些善忘的人, 連1998年的國內炒樓血淚史都忘記得一乾二淨的人. 

原來, 有些人在2002年開始炒上海樓, 買入一間後租出, 有了收入, 就向銀行借錢再買別一間. 最後, 在2007年禁止這樣做前, 竟然可以1變8, 再加上多年內上海樓價升幅在10-20倍, 這些人真是很有錢了.

只是, 人們健忘得很, 還記20年前武打紅星李X杰老婆荔枝小姐, 一到98金融風暴, 荔枝小姐竟然炒樓蝕了1億多, 要她老公拼命接拍片來還債, 幸好, 多年過後, 李X杰能夠復員過來, 但不知道他現在身體不好, 是否關係那時拍片而身體勞損有關. 

現在見到這些人炒樓發到烚烚聲, 其實, 都是因為2003年後溫總的吹漲經濟政策 和 2008年時全球印銀紙, 沒有這些, 就沒有如此的資產彭脹, 不過, 現在全球收水, 遊戲就不能再咁玩落去了, 會死人咖.

PS: 我以前D朋友, 當時也叫我去買上海樓, 當然, 我個人咁遠係加記, 錢入左國內後, 就是別人來幫我管吧! 唉...... 就算佢地真係咁先知, 我都不知道最後可有錢流回來給我, 現在D人匯錢來加國, 原來還有很多地下通道的, 不過, 一蚊係國內, 來到加國就當然不會再有1蚊啦.  咁高風險的投資, 唉, 咪攪我了.

2018年2月11日 星期日

爭食世界

AMAZON 前幾天宣佈, 佢地會擁有自己的快遞部門, 咁...... 即係乜野呀? 即係佢地用開的聯邦快遞(FED)和聯合快遞(UPS), AMAZON就會直接同佢地競爭. 即日股價大跌了.

呵呵呵..... 往日的合作伙伴, 現在變成競爭對手. 現在這個世界, 爭食爭到反哂面.

好吧, 下一步, 面對強大對手AMAZON, 聯邦快遞(FED)和聯合快遞(UPS)會否合併? 不過, 有多口友會反問, 佢地一合併, 個公司名一定會變成 FED-UP 了? 哈哈哈

PS: AMAZON 個老細, 已經褲甲一方啦, 哈, 對佢這種人, 錢就一定繼續搵了.

2018年2月10日 星期六

平錢容易錢時代告終後, 當心投資企業的資金鏈.

前天講到投資藥物審批中的新藥廠, 這個不是不好, 只是時代改變了. 

為什麼時代改變了? 因為量寬不再, 平錢容易錢的時代已經告終了. 

不單會加息, 無左平錢, 還會借貸的審批嚴格了很多, 容易錢又無埋. 

我說的這些藥物審批中的新藥廠, 引資的途徑從不只是發新股, 還有發新股給投行或銀行抵壓來借錢, 平錢容易錢的時代已經告終後, 不單人們少了錢去買他們的新股, 連帶銀行都可能因為藥物審批出現阻濟, 而列這些藥廠舉債為最高危的貸款況目, 甚至會把舊債也列降級為問題債務, 要藥廠提早還錢.

大家都知道, 銀行係落雨收傘嘛, 現在當奴友1.5萬億基建和減稅, 大量發債下, 即是由金融市場上抽走流動資金. 銀行資金一吃緊, 銀行佬就快會出來追債, 未到期的, 都要人提早還, 有可能這些小藥廠會出現資金鏈斷裂開來. 

如果投資小藥廠, 現在會較之前, 風險更大, 大家真要多多留意了.

2018年2月9日 星期五

上天不公? 社會制度不公?

自己從不標籤別人是否有錢, 因為財富原是浮動在人們的能力之上. 

我只會標籤人們是否有能力或有辦法, 這個才是財富最後所有的依歸.

我一向都希望, 住在我這裡同一城市的中國人變得有能力有辦法, 因為這個最終就會體現了我這裡的中國人是否富有了. 

我一向不遺餘力地跟這裡的中國人講, 怎樣在加國活得更好更健康, 人生更有亮光. 前些時侯, 因為回暖下雨, 雨水排水管因為之前積雪而排不走, 我就在網上建議人們把排水管口的積雪剷走, 只是有些人卻抱怨說, 加國富人和窮人都一樣要做, 發奮有錢來做乜?

哈哈哈, 這個就是他們所謂"貧窮"的原因, 有辦法下都不願意去努力, 以為有了錢財就唔洗做. 相反, 我認為, 人先要有辦法有能力, 有了錢後, 就可以選擇最有利自己的時間和方向去做事, 事半功倍, 一勞永逸, 單手都可以毫無困難地勝出. 

不過, 始終人們的視野受限制了, 我真是再不知道怎樣勸這些人, 希望這些人最後不要誤以為加國社會制度不公, 好似國內以前攪文革來大鑊飯咁, 咁就啊尼吉帝了. 

PS: 限制人們的, 不是社會制度, 不是上天不公, 而是他們自己的視野, 沒有良好視野, 當然就連辦法和能力都沒有了, 悲哀!


2018年2月8日 星期四

從荷蘭屈金香泡沬到2018年

前幾天2月4日, 大家可能都記起, 被公認為世界上最早的經濟泡沬, 是1637年2月4日的荷蘭屈金香炒賣爆煲, 由最早在1630年代初, 到爆煲時, 總共被炒起了59倍..... 

當然, 結果跟我看到的任何現代泡沬爆破一樣, 都不是單單因為人們的貪婪, 也因為人們在掌握著巨大財富時, 不知所措的反應, 和對財富繼續保持更多地擁有的幻想, 更深遠地, 也因為再創造新財富的途徑受到限制(西班牙法蘭西海上霸權崛起, 阻礙了荷蘭遠程商業的托展擴張).

財富被創造了, 正如荷蘭的東印度貿易公司創造了巨大財富, 也正如80-90年代中港貿易所創造的巨大財富, 人們不知所措, 把財富虛妄地放在虛幻的事物之上. 當一個時代過去了, 尋不著新的機會, 就把財富放在虛幻的事物之上. 現在比特幣就是最好例證, 老美2008年後大印鈔票, 水浸了, 但新財富出路的風險看似很大, 比特幣就成了人們財富的虛幻出路. 

其實, 現今財富的出路, 並不是沒有, 只是人們埋首怕見現實, 沒想去面對失敗的可能和風險. 小弟JJ我就不斷買 測試新藥物的小藥廠股票, 真是高風險投資, 只是相比小藥廠創建人和比特幣莊家, 我發現小藥廠創建人, 更有同情心, 讀書多年, 研製新藥來幫無助的病人, 又做人均真無欺騙. 就這點, 就算我D錢蝕左, 我也不會嗌肉痛一聲,  因為這個是去創造新財富, 幫助更多人, 使明日世界更美好. 

PS: 其實, 世界上歷史有記載的泡沫, 並不是發生在17世紀的荷蘭, 而是發生在3世紀的西晋, 大家有沒有聽過"洛陽紙貴"? 當時紙張是創新產品, 就如屈金香或現在的互聯網一樣, 大量人們為到抄寫文人左思的三都賦, 對紙張需求一時增加, 令到供求失衡下, 出現歷史上第一個泡沬. 

其實, 整件"洛陽紙貴"故事, 同我們現在下載和燒光碟不是一樣嗎? 跟1998年時的東南亞廠商猛製空光碟和空卡式錄音帶不是一樣嗎? 之後, 新的更大硬碟面世, 由1GB 去到1TB, 這些東南亞廠商的生產線資產值不是被債權人一筆OUT消嗎?


2018年2月7日 星期三

去槓桿? 拆倉潮?

今天老美兜鐘一開市就跌5百幾, 之後都在升升跌跌, 一睇 PUT PUT 和CALL CALL, 嗌價差距大, 即是有人走出去買保險, D人叫高價才肯賣, 人心反差比之前大. 最後升番5百點收市.

其實, 昨日老美聯儲局換行長第一日, 就唔橋咁跌法...... 不知道老美聯儲局是否已經受當奴友指使, 是否已經失去其獨立性. 不過, 老美短期戰略, 理應是在降低槓桿, 長期才是低息和高流通性, 可能當奴友減稅後, 就暫時放棄理會低息, 又或一時三刻可以唔使理會低息住, 所以佢地可能現在選擇先全力去槓桿, 即是股市可能會出現一股拆倉潮. 總之, 跌勢並不會一時三刻消失.

嗱..... 拆倉拆成點, 主要要睇去槓桿到乜地步了, 這個工程呢, 我JJ認為一時三刻就不會完全完成去槓桿, 基金佬拆倉潮也不會一時三刻拆完了, 幾耐? 哈哈哈..... 大家睇下當奴友的共和黨幾時開始要做2018年總統任期中期選舉工程呢? 5-6月囉...... 又是否到時要去槓桿做完呢? 還是等到中期選舉後, 才再去槓桿呢?天知了. 

不過, 去槓桿就一定會做的. 

PS: 其實, 我JJ未受過金融服務業訓練, 只係適得以自己的風險承受力去投資, 但唔識點樣去評估另人的風險承受能力, 當然就唔識點去建議別人去投資, 尤其唔識去提議適合當事人風險承受能力的投資. 睇邊隻股票適合我買, 唔難的, 但睇邊隻股票適合別人買, 我就唔多會了. 哈哈哈...... 唔好來罵我獨食難肥, 因為有時我自己都泥菩薩過江播, 自身難保, 我唔識保其他人咖. 

2018年2月5日 星期一

老美跌左4.6%

今天美加東岸時間, 上午才跌左200點, 但係剛剛收市再睇, 竟然跌左近1200點(4.6%), 好了, 連埋上個星期五, 加埋就6.8%, 還有3.2%才到10%, 現在睇個跌勢, 明天跌到總數10%, 都不會太妄斷了. 

只是多過10%, 就是大調整了...... 這個就對投資信心有不少的影嚮. 

最近, 美國聯儲局一直在放口風, 話美國經濟金融整體狀況, 比2008年金融海嘯前好很多, 嗱..... 這個言下之意, 即是佢地以金融海嘯時的POSITION, 作為今次可能退水水位的 BENCHMARK. 是1.5嗎? 1.4? 1.3? 1.2? 1.1? 都係要睇睇這幾天的狀況...... 老美要回歸正常的經濟大環境, 正常市場槓杆, 正常利率, 可以做到嗎? 我JJ就有點保留了..... 老美最終俾個BENCHMARK跌到幾多, 大家可以一齊來估下, 睇下邊個眼光好.


流走中的財富

近年我少了去旅行, 初時以為自己懶左, 死蛇爛鱔唔想起身沃動, 只想睏係床上睡大覺喎. 

不過我睇番以前去玩的相片, 發現一樣事, 我少左以前的那種視覺美感, 不知道是眼睛開始退化, 還是腦裡掌握的影像開始把握不到其中的準確, 以前用傻瓜機, 都影得好震憾, 但現在卻, 心裡頭沒有了那種情感....... 原來在激情背後, 卻是一個主觀, 捕捉最美的, 排除其他不相干的事情.

可能這個就是人們說的, 人老了, 就要認老, 做番自己應做的事..... 父母年紀大了, 更需要我了, 風險太高的事情, 我就不應去做了. 

PS: 再過多少少時間, 澳紐就會首先開市, 日韓香港國內, 就會跟著其後, 我們就會知道, 上星期五美市跌了2.5%的後續反應, 只是一個5-10%的調整, 還是一個海嘯來到. 不過到最後, 大家也不應該太上心, 因為這些全是 COMES AND GOES 的事情, 只是自己的青春和健康, 才是一去不復還了.




2018年2月4日 星期日

人生最大的財富

很多年前, 自己仍然會相信, 能夠預知未來世紀的大方向, 捕捉先機, 就會佔盡優勢; 只是多年後的今天, 我卻發現, 原來世事多變, 變幻原是永恒, 世上並沒有什麼是預知頂兆的大方向, 只有無盡的驚訝, 無盡的不確定, 無盡的出乎人意. 

不過, 做人做事, 有一事需要有信心的, 就是明天不是世界未日, 今天還要努力工作, 努力為身邊的人謀福祉, 努力構建一個更好更佳的人類生存環境. 

這樣, 內心最大的財富, 就只有得著耶穌了. 是真的, 祂會使人安然渡過一切不確定, 一切出乎人意的事. 

PS: 哈哈哈, 我JJ不是正規財經人, 當然就可以咁寫財經吧! 不過, 我這種人是這個不確定世代裡的新人類, 能夠跟不確定的人和事良好地去同存.

2018年2月3日 星期六

富貴相

我以前讀大學時, 有一大班朋友, 其中有些人是十分過癮的.

其中有個聲稱自己會睇相, 但又卻聲稱朋友中間某人有一幅富貴相, 終身衣食無憂.

有次, 這位睇相朋友就話要做個實驗, 叫幾個朋友一齊站出係某某中東水果店老闆旁邊, 看看有乜事情會發生, 好啦, 又俾佢來玩一次, 齊齊企係度, 點知果個中東老闆卻企係那位"擁有富貴相"的朋友旁邊數銀紙. 

嗱..... 嗱..... 嗱..... 照睇心理呢, 這位中東老闆整天在拼命搵銀, 心裡想要威俾人睇, 卻選擇來威俾這位"擁有富貴相"的朋友, 在這朋友旁邊, 攞出大疊銀紙出來數..... 嘩..... 哈..... 哈.....其實我真係唔知道係咪真靈定假靈了. 

其實如果係真, 這位睇相的朋友又太多口了, 洩漏了天機, 而這位"擁有富貴相"的朋友又全單接收, 深信不疑喎, 對他日後影嚮深遠. 最少, 佢一直心裡都好怕人地知道佢有錢, 來對佢不利, 專登著到爛身爛世咁款, 而且揸住部壞鬼錢七.

就前幾年, 同這位"擁有富貴相"的朋友去同遊美國, 一大班人分開2部車來過美國海關, 佢部錢七無人想坐, 質左個上佢架車, 其他個個都迫係另一部車上, 一班人約好, 在過左海關後的 REST AREA 等, 點知我地足足等左佢2粒鐘, 才見佢地兩個一頭怨氣咁來. 

追問之下, 原來, 美國海關見佢著到爛身爛世, 揸住部錢七, 驚住佢莫水去美國打黑工, 就要睇佢銀包內有幾多錢, 無錢就唔俾佢過關, 點知一打開, 不單好多美金, 還有金咭, 白金咭. 只是事情到這裡, 還未完結, 美國海關懷疑佢偷人荷包和咭, 就查左佢足足兩粒鐘, 要打埋手指摸, 直到確認佢真正身份, 才大枝野咁俾佢過關.(可能美國海關心裡話, 你著到咁來過海關, 一睇就知道你想隱瞞某些事情, 我地唔查你, 都無天理啦!)

其實, 係咪呢? 真係陸榮廷睇相,唔衰攞嚟衰了, 人生的末來, 知來做乜呀? 就算係靈係真, 知來做乜喎? 知道左真係未必好咖喎, 這位朋友因為刻意扮到爛身爛世, 現在仲係孤家寡人, 有女性喜歡佢, 佢都怕人地鐘意佢D錢呀, 刻意要去試探對方.

PS: 噢..... 故仔講到泥度, 大家係咪好好奇, 好想知道, 那"會睇相的朋友"點講我呢嗄? EM..... 大家見到我JJ咁多口水, 咁豬事八掛, 都唔洗問啦..... 佢話我"招惹是非"囉.... 之後, 我就塞住隻耳仔, 無聽了...... 其實, 做人最重要係真心做人, 做個好人, 心裡長存善意, 其他的事, 交托給神好了, 知道左未來, 真係唔好咖!

2018年2月2日 星期五

當奴友1.5萬億基建.....

係呀, 大家無聽錯, 佢就係講緊1.5萬億美金的基建, 嘩, 係個乜野概念呢嗄? 即係如果我JJ一個星期買$100美元伙食(已經係比好多本地人多好多了), 即係我JJ大約可以食到3億年喎! 哈哈哈, 又即係可以俾3億人食到1年喎. 

只不過呢, 當奴友話明佢唔信公營私營合作喎! 即是唔得好似熊貓國咁, 批出某基建的專營權俾某私企, 由私企營運+維修+管理+收銀..... 所以, 現在老美收錢公路上的收銀員, 全都是鐵飯碗, 係美國政府或州政府的僱員來咖, 即是大政府格局囉!

當奴友繼續承傳老美共和黨的方針, 嗱..... 唔好講話日後的營運+維修+管理+收銀問題了, 單單這1.5萬億係邊度來, 就十分辣手了, 老美政府莫水到燶, 一定要係私人甚至國外借, 後果大家都會想得到, 一定會扯高利率, 因為美金是環球通用貨幣, 當然也扯高環球利率. 

雖然我JJ一向都好佩服老美玩的財技, 被我譽為當代拆白黨最高境界, 但係呢, 又要錢, 就唔可以唔升息嘛, 就唔可以唔進行小規模的殺雞取蛋了, 相信咖仔會自動獻財獻媚, 求當奴友手下留情, 跟住係邊D國家.... 大家心裡有數, 不過, 突區因為由熊貓國照的, 老美就可能難以如願, 就好似上次突區咁, 炒神不單由突區斬唔到塊肉, 反而俾突區斬返轉頭一筆. 不過, 炒神算啦, 佢斬左咁多個國家, 連高高麗麗都俾佢斬到爬係度求饒, 佢都賺夠啦.


2018年2月1日 星期四

哎吔, 嚇得我騰騰震

上星期我這邊加記發生了中東大話妹, 謊報在港人聚居的仕嘉堡, 被亞裔男子襲擊和剪左回教頭巾, 攪到加記傳媒和政客直指我地一眾華人, 我這邊滿地可班國內同胞都好慶, 就組織左遊行. 其實, 我真係怕佢地攞左國內文革的樣版, 在加記這邊攪斗爭. 好彩佢地遊行人數唔多, 膽唔夠壯, 當中的好事之徒, 就攪唔出花樣來. 如果唔係, 真係有可能殃及池魚呀, 嗚嗚嗚.......

只是我有個這邊網友, 去參加遊行後, 返來同我講, 我個樣好似那扯大旗個攪手, 我一睇, 我有邊忽似佢呀? 諗緊, 人們的想像力真係奇怪, 竟然把兩個咁不相干的人, 扯在一起. 其實, 我真係好驚咖, 驚這條友仔將來上電視講錯野, 得罪左大群人, D人就入哂我數, 以為我係佢. 

其實, 以前都有西人講我這些係 POPULAR FACE, 我地香港人一直都無特別稱呼咖嘛, 後來有國內來的朋友講, 我這個係大眾面喎! 咁, 即係好, 一話唔好呀? 車, 就算話我似李+X, 我都無著數姐, 仲容易俾人標蔘添呀! 

記起, 我2014年回港, 巧遇佔中佔到去旺角, 我好奇走去昅昅..... 我發覺身邊D人都好似我咁, 無所事事係度昅, 但我係回港探親渡假嘛; 就聽到旁邊班黑實勞工講, 佢地因為佔中, 貨車入唔到廣東道一帶的五金舖, 變成無工開; 突然間, 有男人係我耳邊大聲講: "乜佢咁似周X康果個木咀." 我睇來睇去, 身邊班友全都是黑黑實實, 有邊個白白淨淨呢? 除左我...... 噢...... 大佬, 君子不立危牆之下, 都係快速走人, 點知身後那班人仍然跟住我後邊講: "靚仔咪走呀, 企係度呀, 我地有野同你講呀!" 行多幾行, 迎面迎來幾個阿SIR, 班友才沒有跟住我. 

有時, D人都傻左咖喎, 我年紀大過果個周X康咁多, 咁都認唔出, 肯定佢地有齊近視+散光+老花呀. 不過, D人見我白白淨淨, 喜歡攪事呀嘛! 這個才是最危險的! 所以, 現在有人話我似那個遊行大陸攪手, 我真係好驚呀! 我係加記忙左咁多年, 才有安樂日子過, 真係唔想又要搬竇呀. 

PS: 以前那間華人教會都有人講, 係某某不良地方, 見到我喎! 哈哈哈, 雖然這單野攪左我十幾年, 但始終都係殺傷力最低的, 最少還未到人生安全受到威脅. 不過, 自從旺角佔中後, 我都唔會再係遊行示威時去趁熱鬧了, 原來有危險咖!