移民後的生活

我家移民來加快30年了, 除了年齡和體能外, 其餘一切都是步步高升的, 生活越來越好, 物質上越來越有安全感. 當然, 不是我開的車越開越貴啦, 都係日本仔車, 抵食夾大件果D車囉, 衫褲.... 我都係由始至終, 減價才買, 家裡一切, 自己可以落手去整就落手囉. 今天我媽的衣櫃櫃桶D軌爛左, 我見我媽習慣左舊櫃桶, 我真係唔想買新衣櫃, 來要佢改變習慣, 咁, 我唔係自己整囉, 3個櫃桶1-2小時就攪掂了.

我以前, 心裡有個問題, 我家是否那些步步高升的小數人? 是否大部份人移左民後, 生活都每況愈下? 這個問題, 以前很難找答案, 因為好多人來左幾年, 唔係搬去多倫多或溫哥華, 就係回流回香港.

大約我在移民來左5年左右, 有個當時已經移民30年的老移民, 見住我移民後的5年生活, 十分驚訝咁來同我講: "估唔到你生活水準可以保持得到."

咁多年來, 我越來越明白這老移民當時說的是什麼, 原來很多人移民後, 生活水準真是會向下的. 

其實, 大家都可能有動過移民的念頭, 可能都想問我JJ, 我家在加國越來越好的原因, 只是我JJ實在不想武斷地給出答案, 因為很多人比我更聰明和勤力. 我生活得好, 可能不是跟我聰明和勤力有關, 如果真要我給出答案, 那就是: 1. 我從不指望別人幫, 都是自己管好自己的事; 2. 我面皮唔薄, 不怕去問別人的資訊和經驗, 也不介意跟人分享我的資訊和經驗; 3. 要求自己識做不同的事情, 不斷去學習; 4. 想法要正面和樂觀; 5. 事前做好準備, 想清想楚, 唔好臨急抱佛腳; 6. 睇事要睇得遠一點和高一點; 7. 生活可以簡單就簡單些, 不要"贏粒糖輸間廠", 也不要同自己鬥氣!

我覺得, 移民最大忌, 是要面子, 唔肯放下身段,  也不要有"少爺病公主病". 做事認真有誠信, 這一切都比聰明更重要.