校腳走佬系列 6 異國情鴛驚夢散, 督撐..... 哈哈哈.....

網上見到有人講, 佢要校腳去英國, 就要同現在女友分手了, 因為女友係個大家閨秀, 三步不出閨門喎!

就令我想起, 十幾年前, 有舊香港朋友介紹一位女仕俾我, 佢真係好高呀(可能有173), 到我耳仔喎, 香港女性之中, 佢真係好高呀! 咁, 果次見佢, 同佢去旺角食自助餐呀.

當時那位女性見到我件裇衫有自己洗水的皺紋, 就問我點解唔攞去洗衣店喎! 咁, 我就解釋俾佢知道, 我係親戚空置單位度住, 唔近任何大型屋苑, 左近無商場, 要行15分鐘才去到最近的洗衣舖, 一來一回, 再加再去攞番回來, 就係4X15=60分鐘了, 倒不如我沖完涼後, 自己落手洗, 10分鐘就洗好了. 

我最後斷定, 這位女仕在那時, 並不應該移民, 因為果時佢住係香港, 生活乜都好, 香港那時的情況又係咁好, 佢只差身邊無個男朋友, 以佢咁優異條件, 不如係香港搵囉! 佢如果跟住我去左加記, 我真係唔可能搵番同一的港式生活俾佢, 話哂我這裡一出街就係法文, 有些人更只講法文, 我要同佢講法文, 揸車出唐人街食飯, 要最少揸45分鐘呀. 如果這位女仕來我這裡加記滿地可之後, 我一定會好虧欠佢, 令佢生活咁樣受到重大轉折呀.

不過, 如果換轉番果陣時, 好似現在香港情形咁, 我會去問佢...... 會否留在香港, 來賭將來港式生活不變? 還是直頭, 當港式生活不復存在, 直接了當跟我去外國換過別外一種生活方式? 如果佢肯放棄港式生活, 我就會花多D時間來彼此深入認識. 

移民最重要係要改變自己生活方式和心態囉! 唔係因為我靚仔佢靚女, 咁就乜事都解決到! 跟我我這種人結婚, 已經容易好多, 話澌我係果D做開家務/煮飯/執屋的男人, 不過, 如果對方一定要係外國過港式生活, 咁真係連我這些咁容易話為的男人, 都無計了. 

所以, 大家如果現在跟女朋友或男朋友到左斷捨離的決擇時, 個中心問題係要去問..... 對方是否願意改變自己生活方式和心態到外國生活? 還是, 留在香港, 來賭將來港式生活不變?問完這問題之後, 要處理的問題, 就會容易一大半了. 

祝大家好運氣, 對方願意放棄港式生活, 用另一種生活方式到外國生活.

校腳走佬系列 5 天涯遊子, 心何所歸?

 其實, 人是有適應能力的, 我JJ從來不相信, 有任何人不適合去移民囉! 一切都源於個人心態囉!

當然, 人年紀大左, 無後生時適應咁快, 但放多D時間落去, 咁就得咖啦！

首先, 大家第一要攪清楚, 去移民, 不是斷左香港條路, 山水有相逢, 仲會返來咖嘛! 去移民, 只係開多條路俾自己和家人走盞之嘛! 日後自己和家人多個選擇, 唔洗走入死巷胡同嘛! 所以, 去移民呢, 唔係去死呀, 而係去更好地活著人生呀! 

第二, 既然唔係去死, 而係去更好地活著人生, 咁就唔好成日諗野諗埋一邊喎! 移民後, 生活上少少變動, 並不會令自己走入絕路, 而是令自己更會適應新環境, 更會隨遇而安, 隨機應變, 最後, 就會令自己隨心所欲啊!

第三, 既然要養成隨機應變的習慣, 那麼, 就要做人主動一D, 唔好咁被動, 每天醒來後, 就問問自己, 果一天有D乜想去做, 或有D乜應該去做左先, 或有D乜喜歡去做, 自己給自己一個計劃, 或興奮的事情去做, 唔好俾人推一推, 才沃一沃喎! 

第四, 唔好單單著眼去打份工, 份工只係人生一少部份, 人生最快意的地方, 是去做自己喜歡的事嘛! 所以, 就要多去留意工作之外的任何機會呀! 初時未必賺到錢, 因為萬事起頭, 都唔一定有回報, 但開左個頭, 日後賺錢的機會多的是, 人最決定性的地方, 是職業之外的機會, 一份工只能讓自己糊口. 

第五, 既然去到新環境, 一切都是從新適應. 就要從人與人之間最大相同的地方開始, 就是一個善字, 有了善意, 就有了一條百搭鎖匙, 去開啟任何機會之門. 這個善字, 當然是人與人之間一切共通的美好東西, 包括誠信/口誹/信譽/慈愛, 這些全都是百搭之匙, 有了它, 機會就會跟著大家來造訪了. 

PS: 前幾年, 我在香港遊輪碼頭上的觀景台, 遙望在測魚涌和將軍澳之間的東博寮海峽, 就記起當年自己離港移民時, 飛機在啟德機場跑道上起飛, 就是在遊輪碼頭觀景台那裡左近位置, 離開香港土壤的. 今天大家離港遠去, 都是在赤立角機場那裡離開香港土壤了, 但大家不要難過, 山水有相逢, 要想著, 後會並不一定無期, 到適當時候, 我們又可以再回去孕育我們的土壤裡!

 

校腳走佬系列 4 有乜好買來帶過去?

這個嘛..... 一切家具廚具呢? 未必岩用喎..... 過到去才慢慢買囉..... 電飯煲? 外國大多都有得賣, 除非好山卡啦D地方囉. 而且, 好多西人都有用電飯煲呀, 頂多唔係上網買囉! 我有次去玩, 係美國猶他州摩門教徒小城鎮上的WALMART, 都有得賣呀! 都只係20皮美金囉!

衣服鞋襪? 我建議大家頂多帶2-3套到埗後幾個月的衣服外褸去著, 之後再係果度買囉! 因為香港買, 未必岩當地環境和氣溫囉! 尤其鞋. 香港D價錢可能仲貴過果邊呀! 全綿內衣衫褲+襪, 就執半打1打過去. 不過輕果D就可以香港買, 例如: 買幾套散汗衫褲風褸, 大多數薄果D, 香港會平D, 好似加記滿地可咁, 一年總有1-2個月著得到.

貴價傢具? 如楦梓/紅木等等, 咁就要係果邊先買左屋, 知道呎吋, 才好買過去呀! 不過, 好Q麻煩, 古董傢具唔好用呀!

中國人食品? 海味蔘茸? 果邊都有, 但一定會較香港貴, 如果有空位, 帶少少去, 第一年未搵到地方買之前, 有D食下. 

首飾古玩? 哈哈哈, 這個呢, 如果大家已經有, 就帶埋過去, 記住上飛機要跟身帶呀. 買呢? 就隨意吧, 始終留多個現錢係身邊, 都會好D咖! 除非好肯定帶到過去會升值囉. 我JJ自己好喜歡香港街邊D朱義盛呀! 哈哈哈, 一舊水有幾條假石手鏈, 帶到過去, 戴出街都幾威惶咖.

運動用品? 價錢應該差唔多, 尤其正牌果D, 不過, 我JJ喜歡鴨寮街果D散汗離背的背囊, 因為係香港本土牌子, 價錢一定比外國平好多(外國買果D, 唔離背呀, 好焗汗咖), 香港D散汗背囊100-200元一個, 相對我這裡加拿大最少40-50加元一個, 十分平呀, 買一個二個攞過去用, 頭5年都不成問題. 曾經在花園街買過10元一個的NECK WARMER, 可能香港叫頸咕吧, 之後我在加拿大零下20度出街用, 十分適服暖和, 可以放洗衣機洗, 但這些化學纖維的東西, 跟散汗衣褲一樣, 都不要放乾衣機, 在室內掛乾佢, 那就可以著幾年了.

電子產品? 價錢差唔多呀, 過到果邊上網買囉! 頂多去香港D"執笠倉"買1-2條手機線或一些輕便電子野過去呀! 行車紀錄視像頭, 或"特別"的TV BOX? 如果又輕又用得著, 就帶少少過去! 哈哈哈!

去邊度執野? 海味蔘茸 - 百佳或任何做街坊生意的南貨行(大埔福善里裡, 係最有街坊人情味呀) 運動用品 - 波鞋街就貴D囉, 鴨寮街/南昌街價錢都好街坊喎, 尤其行山杖, 30蚊以內, 帶枝過去以備不時之需囉! 衣服內衣襪 - 花園街/水渠道囉, 好平民街坊價呀! 唔會令自己OVER-BUDGET囉! 楦梓/紅木傢具 - 上環應該仲有好幾間呀! 不過好Q貴好Q麻煩, 用起上來唔好用, 我一定唔會買囉! 首飾古玩 - 唔洗問我了, 我唔識, 都係去上環囉, 朱義盛就隨街都有得買, 哈哈哈. 電子產品 - 當然係黃金鴨寮街果度啦! 各位, 以上這些地方, 都係我JJ每次回港, 不可不到的地方. 

還有, 執D零食過去囉, 以前我去開"零食最強", 不過執左囉, 最近D人講XX360唔係自己友, 嗱, 我以前都有去果度買, 再唔係麗姐囉, D咸濕野, 果度都好齊咖! 歐美開暖氣, 室內乾燥, 耐唔時整粒川貝黃皮囉! 再唔係係外國唐人街買包果凍/椰果, 耐唔時一粒, 都可以止咳咖喎!

校腳走佬系列 3 乜原來網上有咁多奇葩問題喎!

外國水質好硬, 會生石喎? 

其實, 水質軟硬=酸碱度, PH呀, 水太硬或碱性太高, 加D野落去中和番佢囉, 所以, 水質係跟供水廠有關, 要看看水廠那城市有多少BUDGET放落D供水度了, 城市越大, BUDGET 越多, 供水的水質就越好呀! 加國大城市如多倫多/溫和華/滿地可/渥太華, 供水水質十分優良, 我親戚來多倫多第一天飲水喉水, 就已經愛上了. 但係一D小城鎮呢, 一來BUDGET少, 二來取水的水源無乜選擇(大多係中部草原或農村城鎮), 水源D水本身已經好硬(大多係內陸湖D湖水, 唔係流動的河水), 要放多多錢落去中和佢, 咁唔係水質差囉! 其實, 人生石呢, 係同食物有更大關係, 大多係高脂高膽固醇的食物引起, 而不是食水的酸碱度呀!

水質硬, 會令到脫髮呀?

很多人講, 住係外國耐, 水質硬就會令人脫髮呢..... 我發現一事, 水質只係其中一個原因, 不過唔係主因, 我發現主因係.....D 人天氣凍, 唔載帽, 尤其出外, 氣溫冷下, 頭皮的血管會收縮, 來減少體溫流失, D血唔流向頭皮, 頭皮下少左血來供應D養份, 當然就會供唔到咁多頭髮茂盛生長, 就會脫髮囉! 去到外國, 唔好扮壯扮有型大隻佬, 載頂帽, 嗱, 我自己住加記咁多年, 無錯, 頭髮係少左, 不竟人老左嘛! 但都仲有好多頭髮呀! 比同年留底D舊同學, 都仲係好多頭髮!

 點解突區D水質唔同外國?

果次我返來突區睇突區博物館, 就有講解了突區地質的形成了, 突區個港口, 原來係個火山口, 中間凹左就係火山口中間, 而D山D陸地, 就係火山最外圍了. 咁, 突區和左近地區係火山群, 好好多火山呀, 成塊地都係火成岩, 火成岩唔係多硫磺囉, 硫磺唔係酸性囉, 所以突區和左近D水, 就係硫磺酸性水囉! 咁, 碱度低之下, D水質就係軟囉. 同外國D碱性水質唔同囉!? 不過, 樣樣野, 有辣有唔辣喎, 水質硬呢, 我JJ係外國係唔會有熱氣這家野喎, 不過, 我返來突區, 飲D硫磺水, 第6-7天就已經熱氣攻心, 要走去煲菊花茶了, 哈哈哈..... 仲有呀, 我JJ係外國D衫, 著1-2年都唔會點甩色咖喎, 但攞番來突區, 洗10次8次後, 就開始甩色呀, 當然係拜突區D硫磺水所賜呀!

外國天氣飲食, 容易整肥人呀?

發現一事, 外國好多港燦, 後生初來到時, 原本好瘦, 但係唔喜歡著衫, 喜歡扮有型去追女呀! 佢地身體感到唔夠暖, 咁唔係俾個訊號佢地身體, 叫身體儲多D皮下脂肪, 咁唔係變肥囉! 所以, 這班友追到女友之後, 個個變肥左, 就俾人飛了, 都係一樣食白果呀! 所以, 係外國, 著多件衫, 俾身體常感到暖和, 身體就自然唔會不斷感到餓, 也不會變肥了. 我JJ體重呢, 同我初來加記時, 無乜點變呀! 都係因為著夠衫, 夠暖囉!

校腳走佬系列 2 大家有便宜唔好洗頸喎!

 昨日講左..... 如果大家有D身家呢, 當然有好多地方選擇去移民. 

只不過呢, 唔係個個都係咁嘛! 咁..... 既然如果無乜選擇呢, 當然係去D容易去的地方囉!

越容易去的地方, 大家就應該快手D, 因為有著數的地方, 通常唔會 LAST FOR LONG TIME呀! 也會好易改到難左串左呀!

現在我地一眾港燦, 去英記容易呀, 但係唔知道英記幾時又再改例呀!  趁現在有著數, 大家就要捉緊D機會了. 

仲有呀, 加記又開放俾D新近香港畢業的大學生申請喎! 大家緊捉機會了!

其實, 話無乜選擇姐, 但又唔係無選擇喎..... 始終..... 計定而後行啊.....還有3個選擇喎!

選項 1: 走佬去英記或加記, 但仍可以回流番來呀, 先係英記/加記開左度門先, 到發現唔岩住時, 再回流回來突區呀!

選項 2: 走佬去英記或加記, 但之後, 仍可以再申請去其他國家嘛! 如老美呀, 袋鼠國呀, 紐紐呀, 都係果句啦, 先係英記/加記開左度門先, 到發現唔岩住時, 再伸請去其他國家呀! 嗱, 我JJ係加記退左休了, 冬天唔係可以落老美南部過囉, 再唔係落去更暖的地方 - 中美南美囉! 就係因為我JJ先習慣左睇法文, 開左條路, 現在可以睇得明西班牙文路牌了, 同一道理, 大家先去英記/加記, 習慣左之後, 再去外國其他國家, 都會更容易適應嘛! 

選項 3: 走佬去英記或加記, 後再做國際公民囉, 有左英記/加記國藉後, 其實要去任何地方短期工作或旅遊, 都係好容易咖咋, 家陣突區護照可以免簽去足170個國家和地區, 不過現在乜乜法過左之後, 好快就無170國家和地區了, 趁住英記/加記開門俾大家, 以後仍會有180國家地區免簽俾大家嘛!

 

校腳走佬系列 1 去邊度好呀?

近來乜乜法過左後, 原來係全球通用喎! 噓, 就算我JJ唔怕, 但都唔想導引各位BLOG友仔去想一些唔開心或不太安全的事情!

 哈哈哈, 所以我近排少左出文啊! 當然, 出文出到未能造福大家, 我JJ就唔出囉!

不過, 最近聽到人人都想緊校腳走人, 咁, 其實我JJ係過來人嘛! 可以寫D野俾大家, 通下水, 俾D TIPS大家呀!

今次係寫呢....... 如果大家有幾個地方可以揀去呢, 而又一樣較容易申請......我就會提議大家..... 

1. 西瓜靠邊大, 一定要去大的地方, 那個國家地方越大, 資源越多, 產糧越豐厚, 民眾教育越高越富有, 民主自由度越高, 就越好, 就算將來一時三刻停澌D外貿, 都可以捱到好多年吖嘛! 照咁原則, 當然係來美加好啦, 美加地方大, 出口糧食多, 藥廠生產力強, 照顧本土自己國民一切, 都能力卓卓有餘呀! 

2. 言語和制度, 當然英國/台灣/澳紐好啦! 美加/歐洲行車係右上左落, 同突區/台灣/英國係相反喎, 我成日返來時, 最危險係過馬路呀, 哈哈哈, 好容易睇漏左就過馬路呀! 大家去到D言語和制度唔合適的地方, 又真好澤洗, 好似我JJ來到法語的加記魁北克咁, 這裡一出街, 除左乜都係法蘭西話之外(路牌和道路情況告示全都係), 更加係用內陸法, 我地港燦習慣左普通法! 不過, 好彩係, 我現在習慣左, 去到西班牙語的中美南美, D路牌都睇得掂囉!

3. 天氣, 其實, 講真, 加記D天氣係好難頂呀, 上年721之前, 我仲成日諗住回流返來過暖和的冬天呀. 當然唔係我係加記撈唔掂啦! 只係一到年紀大時, 就要搵個冬天天氣好的地方住. 只不過, 我現在打算..... 將來年紀再大, 冬天去中美洲過日子了.... 英國天氣都唔好, 美國南部就好少少啦, 不過, 美加西岸有地震, 東岸有巨風. 台灣一切對我地港燦來講, 就真係無敵了, 不過台灣有地震喎! 世界上, 環境對我地一眾港燦最完美的地方, 唔係突區囉? 只係現在俾人咁攪..... 唉...... #*%($&@)%$)^*!(($_^Y)*#*%$)^~(@), 省下百句的粗口. 

4.  國債?人民欠債? 其實, 仲要睇果個國家係咪生產大國囉, 如果係乜乜工業農業生產大國, 多多國債, 人民多多欠債, 都無問題呀! 而且, 這些國家係人民富有政府窮, 還富於民呀, 生活係果度, 只會越住越富貴呀! 就算疫情下, 要加稅, 就算加幾個%, 連我JJ這些係加記唔算富有的人, 都係濕濕碎咋! 最重要係衣食無缺! 咁就得啦! 現在時勢唔好, 預計到自己在那國家衣食無缺, 就已經係高人一等了. 相比上邊, 上邊既不是工業大國, 很多基本工業品都係靠進口, 連農產都要進口, 住係果度, 有乜事起上來, 就好易凍過水, 而且上邊D乜乜債, 不比美加好喎!

5. 是否移民國家? 係呀, 去傳統的移民國家, 當然有著數, 講得係移民國家, 當然係鼓勵D人移民去啦! 當然國家政策上, 係會傾少少去益移民, 幫助移民. 大家移民去到新地方, 當地政策幫到D移民, 係十分重要呀! 當然果D政策係想大家落地生根, 跟當地融合一起! 不過, 一落腳有D政策幫下忙, 總好過無呀! 還有, 移民國家D人, 大多都會對新移民友善一D, 等新移民容易安居樂業呀! 英國/歐洲/美國(美國人口中的一二代移民, 佔得越來越少), 都唔係移民國家了. 澳加紐都仍然係, 有個傳言, 加記稅局對10年內的新移民, 大多都唔會查得咁緊, 一到第5~6年之後, 大家就要醒爬了!

6. 工作機會? 嗱, 各位, 我JJ就從來都沒有什麼CAREER PATH, 因為我唔相信一個CAREER會帶給我家肥屋潤囉! 只是用來糊口吧! 大多數人從來都係CAREER之外果D收入, 才是最決定性呀! 工作機會, 對移民來說, 只佔一少部份呀! 尤其如果大家係突區有層樓, 賣左去移民後, 生活質數不應太差! 我地港燦去移民, 應該著眼於CAREER之外的各種機會呀! 有些國家的政策, 是十分鼓勵人民去尋找在CAREER外的一切機會呀! 加國係啦, 美國係啦, 英國/法國/紐記? 應該唔係, 澳洲? 唔知了. 

好啦, 等我再諗諗仲有無什麼CRITERIA 去決定去邊度移民, 如果再有, 又或有BLOG友仔來問我, 我會再寫, 如果無, 我會去寫"校腳走佬系列"的另一些題材囉!

 

當我們港燦講開老美時......

 大家真係要講野講得客氣少少呀, 無論大家喜歡或不喜歡那個政黨, 都要講話講得客氣呀! 

話澌呢...... 老美這幾十年來, 對我們一眾港燦, 都係好好咖喎. 就算老美政黨輪替, 不同政黨執政下, 政策都都我們一眾港燦十分友好友善, 一直都沒有改變呀! 

嗱, 上世紀50年代前, 我地港燦一直做開東南亞和上邊之間的中轉生意, 上邊一封關, 南洋英治不再, 我地一眾港燦個個無野撈時, 果時失業率廿幾%呀, 係老美係我地一眾港燦最艱難果時, 給與我地最優惠國待遇.

老實講呀, 如果無老美這幾十年對我地港燦咁好, 真係無我地這幾代人多年來安居樂業喎, 我地一眾港燦, 係咪要對人家客氣一D先? 

不過呢, 最近網上見到有人, 用我地港燦D用語, 大罵老美民主黨失勢前高官為"老賊", 唉..... 嗱, 如果真係老香港人的, 就真係唔會咁樣講得出口咖喎! 我諗一定係有人假扮我地港燦了. 

大家講到老美時, 真係要講得中肯一D, 厚道一D, 客氣一D, 有禮貌一D呀!