2021年2月22日 星期一

揸舊錢來加記, 如何收股息來安穩生活?

以下一切, 是假定當事人是加記永久居民或公民, 打算回流回來, 揸舊錢(單身50萬/家庭100萬加仔起計)買股收息過日子, 唔再打算去打工呀. 而以下所講金額, 是基於單身一個人, 如果是夫妻就應該大約是雙倍吧!

加記入息稅重, 人人都知, 只是加記政府一直透過稅率, 來鼓勵人民某種生活和行為, 不同種類收入有不同稅率, 就是鼓勵人民去從事某些商業活動. 又或透過TAX CREDIT, 來鼓勵人民某種家庭生活方式, 如子女或父母免稅額等等! 這些完全是合法, 而又是加記政府所提倡人民去扣減稅款的.

現在我是講股息收入呀! 好多人唔知道, 加記永久居民或公民買加國公司的股票, 所收的股息收入, 是有一個叫做 CANADIAN DIVIDEND TAX CREDIT, 以單身來算, 如果無其他收入, 只有由加國公司的股息收入, 單身的每年頭3-4萬收入(夫妻聯名持有, 就雙計)是不用付稅呀! 完全合法, 而又是加記政府所提倡的. 

就以加記普遍的銀行/保險/油管股為例, 現在大多都有4-5%股息. 是呀, 單身一年如果有2-3萬免稅收入, 或一個家庭4-5萬免稅收入, 就可以生活安穩了, 所以, 大家帶舊錢過來, 買出租物業收租, 未必是最理想呀(因為要俾稅呀), 相反, 買加股收息, 每年頭幾萬股息收入又可以免稅, 就十分理想了. 

只是加股市場有缺點呀! 市場細, 交投量低, 可以選擇的行業少, 來來去去, 只有銀行/保險/油/礦來揀, 當然我JJ一向叫人唔好PUT ALL THE EGGS IN ONE BASKET! 

所以, 大家收夠加股股息來做生活開支後, 生活安穩了, 就唔好只係買死加股, 應該轉去買美股的醫藥/航天/投行/生物/化工/油股等等, 話澌美股市場大, 交投多, 選擇行業多, 分散投資下, 風險會細好多呀! d股息收入唔容易大跌, 來影響大家的生活質素嘛!

不過, 加燦買美股收股息, 要先扣15%稅呀! 之後在15%稅率之上, 還要俾稅加記政府囉! 但為到分散風險, 穩定股息收入, 這個是一個策略性的抉擇呀! 

我JJ認為, 如果大家揸舊錢來加記, 齋收股息來過日子, 是無問題. 當然, 舊錢越大就越生活安穩啦! 

如果一個家庭在100-150萬加仔(單身減半)之間, 就得考慮住係中型城市, 或離大城市唐人街半 - 1小時車程的地區, 屋價平D, 買部普通日本車, 留多D錢去買股收息, 咁就生活安穩, 無煩惱了. 收回來的股息, 還可以儲起部份, 以備將來不時之需, 如換車呀, 如房屋裝維咁啦!

如果袋中有再多D錢, 又唔介意多洗錢, 咁唔係可以買屋買D近唐人街的地區囉, 也可以買部貴一點的車! 常常去唐人街飲飲食食, 幫下其他係唐人街打工而又無咁幸運的同路人囉!

當大家股息收入到了6-7萬加仔後(如果夫妻, 就雙計), 收股息所納的稅率, 開始漸漸高起上來, 之後買股, 就要開始去買增長股, 唔再買收息股來收息了, 因為股價升之下所得的利得稅稅率, 會比收股息的稅率低. 這個時候, 就唔洗再理加股了, 直接去買美股, 而且美股股價升幅彈性大過加股.

所以, 我JJ叫大家來到加記, 有一百萬加仔的人, 唔好買出租物業來收租, 買加股收股息, 更著數; 就算股息收入到左6-7萬, 再買美股, 以率稅來計, 買出租物業無著數(而且好花時間)呀!  

最後, 大家買股來建倉(PORTFOLIO)呢, 就唔好咁心急, 慢慢買呀, 慢慢揀岩才好扑鎚入貨呀!  有耐性用幾年時間慢慢入貨! 一浸一浸咁買! 

乜叫做一浸一浸咁去買.....? 我JJ係2017年賣左出租物業, 再加上賣咁D工業股, 手上有筆錢, 就分開3浸咁來買, 每浸又分開好多步咁來入貨. 上年3月咁大跌急跌法, 我JJ都只係入左第一浸貨咋! 這一浸裡, 就算同一隻股票, 我都仲係分開好幾次, 係不同股價不同時段咁去入貨呀! 咁就安全好多咖啦! 

PS: 以上是我這多年來, 在加記的體驗, 是傾囊相授呀! 只希望大家來到加記, 開開心心過日子, 是無償的白白給大家, 連雙贏都談不上. 當然, 大家在生活安定後, 如果想起我JJ今天的一切, 大家不用來多謝我, 我只望大家可以在自己能力內, 行出去幫助其他有需要的同路人, 咁..... 我JJ就心裡安慰著了! 

未達起計最低數額的朋友們, 大家也不用氣餒, 一樣可以來加記生活, 只是要比較進取一點, 但就不能單靠股息過日子, 還需要有其他收入了, 打工呀! 創業呀! 物業管理呀! 甚至買出租物業(槓桿比買股大一點啊! ), 都是可取之途! 只是風險較大一點呀!

我JJ初來時, 大把這裡的長輩朋友們, 都是想著"雙贏來幫人", 只是目的不太純正, 我自己感到被人出賣了, 所以, 我JJ現在幫人, 是不帶任何雙贏的想法, 一心白白給出去. 

還有, 我JJ從不希望別人看自己是弱者, 也不會看別人是弱者, 別人有手有腳, 所以幫人只會用資訊幫人, 指條好路俾別人行, 咁就可以了! 

相比我以前間唐人教會那班人, 可能佢地唔係全部係香港人, 想法有別. 我由一開始, 只需要別人提供些有用資訊, 我地香港人就可以起步, 自己走路走得有聲有色了, 係唔洗別人出汗水來幫咖! 


7 則留言:

  1. 謝謝分享。
    如果收股息+Part time Job收入, 是否兩者合併一齊計入息税?

    回覆刪除
    回覆
    1. 係呀, 任何收入都要一齊計入息税咖, 一打工就有入息紀錄, 除非打出現金的工作, 大多都是那些收現金的行業; 如餐館

      刪除
  2. 作者已經移除這則留言。

    回覆刪除
  3. JJ先生,
    多謝你告知我們加拿大買股收息....(十分有用,不要抽TAX)
    是否大約計算如下.
    CAD$500,000 x 4% = CAD20,000(一年計), 即每月大約1,667
    如果當屋買了, 不用供. 其實2人來加拿大.CAD1,667 基本食用生活可以支持嗎?
    我怕找工十分困難..要預最差情況可以頂10年.
    其實我SEE your blog 有2年了。真是正,可以比我update Canada d news.

    Thank you very much



    回覆刪除
    回覆
    1. 單身50萬/家庭100萬, 是"靠股息來生活"的起碼額度, 50-75萬單身, 100-150萬家庭, 買了屋後(不用供), 剩下的, 再買股收息來當生活開支, 這個也是一般的生活, 75/150萬以上, 生活就可以充裕一點! 說這些數字, 只是用來給大家一個預算啊! 不過, 路是人行出來, 如果跟現實有差距, 就要想其他方法囉.....

      兩個人一個月$1667的生活開支, 過得去啦, 當然說不上充裕! 年收入2萬免稅, 就等於人家工資年薪的2萬4千, 即是最低時薪($12)的一年收入.

      我只是想說出, 因為加股股息收入頭幾萬完全免稅, 手揸百萬加元來買加股過日子, 是可行的!

      好多人總認為佢地自己賣左香港層樓+積蓄果D錢, 唔夠係加國生活, 要上2百萬才夠. 我只是想說, 他們只要有一百萬加仔(香港大把人有喎), 就可以考慮以上這個選項囉唆, 他們比他們想像中, 有更多選擇, 不是沒有選擇, 也不是只能留在原地!

      刪除
    2. 最後, 唔洗俾屋租, 2人一個月有$1600+ 來做生活費, 生活唔會差囉. 不過, 就唔可以常常出去消費, 或旅遊呀!

      說些我個人的一些消費, 我住一間獨立屋, 屋稅一年5千, 車和屋保險一年$1700, 電費和暖氣一年$1800, 每月2人平均伙食+油+上網+手機通話 $700以內. 基本消費一年$17000.

      如你說的2萬一年, 餘下的3千, 儲起來, 以備將來不時之需.

      當然以上是基於有100萬, 用50萬來置業/車/傢具, 但如果住間細一點, 離大城市1小時車程小鎮的屋, 那就不用50萬, 40萬就可以了, 那就是每年2萬4千免稅股息收入, 那就好好用了.

      刪除