去到外國, 買樓收租來生活無憂的竅門

大家真係要俾個讚我呀! 因為為到寫這個"竅"字呀, 我JJ花左成半粒鐘, 才諗番出來, 點寫喎!

言歸正傳, 我地一眾港燦呢, 現在興走佬去外國啊! 只不過呢, 去到外國, 人生路不熟, 無論搵唔搵到份工來打呢, 都要廣開財路喎! 錢途唔好咁狹窄呀各位, 單單打份工係唔夠安全咖, 為到以備不時之需, 總係人有三衰六旺, 話唔埋咖喎!

一講到廣開財路呢! 大家都會記起我JJ未退休前, 正職之外, 還有份秘撈, 再加出租物業, 仲有股仔跌D股息入我袋呀! 頭果兩樣唔講了, 唔同人有唔同職業, 就算我JJ穿越時空去返以前岩岩畢業時, 都未必一定做番同一果個職業. 但係出租物業呢, 這個就可以讓大家來翻版了! 出租物業有乜竅門?

1. 各處鄉村各處例, 怎樣去翻新物業, 怎樣去睇物業價值, 我JJ同大家講唔到了. 不過, 有D野係一樣的.  人生路不熟, 不要太高估自己的能力, 太高難度動作的, 我JJ就唔會去做了,  如: 翻新物業, 估物業價值咁, 大多都會好易俾人呃咖! 如何看個物業抵唔抵買? 好簡單, 賣價乘以藍籌股息回報的%, 是否小過淨收入(租金收入 減一切開支, 再減由於折舊所需的裝修成本), 如果低過, 這物業就值得留意了, 越低越係好的賣價. 當然, 如果太低, 就是可能代表, 物業有問題, 如: 升值能力很低呀!

2. 不要太高估自己的能力, 人生路不熟, 不要買太過殘舊的出租物業, 尤其歷史建築物, 維修費可以是十分驚人, 也會侵蝕了大家的利潤, 甚至是大家的本金.  

3. 學會修整物業的一些小問題, 自己落手執下整下, 到有大問題時, 才請人回來做, 並在旁偷下師, 慢慢就會越來越識整.

4. 不要買太差的區, 總之最少那區D人個個有份工做, 有份收入, 餓唔死, 飽唔親, 就唔會咁易欠租, 唔會咁易買屋升呢後搬走! 如果租客幫你鍚住你D物業, 咁就慳番好多維修開支呀!

5. 買交通方便的地區, 如在公交站旁的物業, 尤其近快速公交站或高速公路, 租務市場就會寛廣很多. 

6. 我JJ喜歡..... 一買就買一幢, 因為自己可以控制租給誰, 不會有其中一個單位D租客十分噪, 十分污濁, 不守規舉. 如果只買樓宇中其中一個單位, 而當隔鄰住戶十分噪, 就會嚇走自己的租客了, 就會影響自己的投資收入了. 持有一整幢物業, 反而投資風險可防可控!

7. 要租屋的申請人, 寫多D佢D背境, 包括信貸紀錄, 保荐人, 工作公司, 其他家人的住址, 有沒有參加義工. 並且, 可以參加當地的 LANDLORD ASSOCIATION, 就會教會大家當地法律, 容許大家問申請人D乜野, 同埋點去拒絕申請人, 甚至點去追租, 驅走違租約的租客!

8. 大家第一年去到外國, 就唔好咁快做重大決定住, 等到第二年熟左環境, 才好出去買物業. 買第一個物業時, 保守少少, 慢慢來, 量力而為, 等到摸熟了當地租賃市場後, 才慢慢增持多一些. 我JJ在第一個5年, 就開始知道賺硬, 第二個5年, 就錢錢滾滾入袋, 第三個5年時, 就全力整番靚佢, 待高價來沽出謀利.

9. 大家都係為財姐, 千祈唔好以氣用事, 租客有時會十分不合作, 千祈唔好同佢鬥, 對自己無好處的. 這樣的租客通常好唔掂, 生活會越來越差, 到佢無錢時, 佢自己搬走, 或趕走佢, 問題就自動解決了一大半. 

好啦, 我諗我講左最主要的部份了, 如果大家有問題, 可以留言俾我.....

PS: 最後, 我地一眾港燦現在要避走他方, 最重要係保本保命, 留得青山在, 那怕無柴燒? 當然, 外國就無香港過去幾十年來, 賺錢咁快, 不過, 香港以後也不會賺錢咁快了, 相比外國, 也不會賺多好多! 所以, 唔好太貪心, 一年有10個8個%, 已經了不起了, 等佢10年8年, 到時大家就會發現到, 大家確實比自己想像中更富有.