又到填稅單的時候了

最近報上年2018年D稅, 容易好多, 因為2017年尾, 我賣哂所有出租物業, 2018年5月又開始唔撈了. 

以前, 填報稅表, 要計哂所有出租物業和秘撈, 那年的總開支和收入, 計都計成1-2晚呀, 一疊疊單, 好多疊嘛.

因為加國是漸進式的稅率, 那一年越高收入, 那些高部份的收入就越高稅率. 如果果年收入太高, 咁就要諗下, 應否把物業折舊, 扣減租金收入 , 從而令總收入降低. 等到之後某年, 收入無咁高時, 就放番之前果D物業折舊番去個物業值條數度. 

係加記, 肯動腦筋又懂得合法利用稅制的人, 才不會變成白忙族啊! 

好啦, 今年填報稅表時, 快手好多, 少野做好多, 心情好很多, 1晚就計到出來, 同我原先估計後預交的金額差唔多, 唔洗俾稅局罰利息. 

大家可能會問, JJ 你為何唔交俾會計做呢?  嗱!......

第一, 自己計, 就最清楚個稅制, 就最知道用乜野合法方法, 俾最少的稅(尤其加記稅制無香港咁簡單), 可以快手D達到財務自由. 一切都是, 力不到不為財, 做人唔清唔楚, 人生最後必然大鑊.

第二, 我這些小地主小資產階級, 唔用會計, 自己計, 自己一個一個字填落去, 扮做弱勢社群, 稅局通常都會對我好客氣, 通常係會偏幫我這種人.(對社會商業有貢獻, 比普通人更勤力, 納更多的稅, 但仍屬於弱勢社群.)

第三, 我以前聽教會內流言, 教會某某人好有錢, 後來才知道係當事人個會計爆出來. 所以, 我一直放心不下用會計, 我實在唔怕教會D人知道我有個錢係袋(雖然我一直都避免著), 但我害怕, 會有熟人對我不利. 

PS: 好多人唔知道, 加記係有2個不同階層的人, 一個是有機會用到社會福利的人, 一個是不需要社會福利的人, 而加記政府一直在鼓勵人去做後者, 因為這樣, 加記政府才能夠趨向小政府和低開支, 所以, 對"不需要社會福利"的人, 個政策係寬鬆好多的. 

因為我自己報稅, 我就知道.... 係加記打份工+秘撈+小生意一份, 原來到最後, 人生的分別可以係咁大. 很多人誤以為職位高, 份人工高, 死爬爛爬, 死爭爛爭, 就一定會好. 其實好多人只會係白忙一族. 人一到有份秘撈, 相關的開支, 全部可以用來扣稅; 一到有份小生意, 有好多稅務優惠, 就脫離"有機會用到社會福利"的社會階層. 加記政府會別眼相看這些人.

還有, 我同自己講, 賣哂D出租物業後, 不要因為自己手中現金多了, 就快快咁去改變自己的生活習慣和投資習慣, 再等一兩年之後, 慢慢摸清楚, 想清楚自己的前路, 才去改變都未遲. 好多時候, 皆因為太急進, 而損手爛腳呀.